Wachukuaji Nuru—Kwa Kusudi Gani?
“Nimekuweka uwe nuru ya Mataifa.”—MATENDO 13:47.
1. Mtume Paulo aliathiriwaje na amri inayotajwa kwenye Matendo 13:47?
“NDIVYO tulivyoamriwa na Bwana [Yehova, NW], Nimekuweka uwe nuru ya Mataifa, upate kuwa wokovu hata mwisho wa dunia,” akasema mtume Paulo. (Matendo 13:47) Hakusema hivyo tu lakini alitambua pia uzito wayo. Baada ya kuwa Mkristo, Paulo alitoa maisha yake aweze kuutimiza amri hiyo. (Matendo 26:14-20) Je! sisi pia tumepewa amri hiyo? Ikiwa ndivyo, kwa nini ni ya maana sana katika siku yetu?
Wakati ‘Taa Zilipozimika’ kwa Ainakibinadamu
2. (a) Ulimwengu ulipoingia wakati wao wa mwisho, ni nini kilichotukia kilichoathiri sana hali yao ya kiroho na kiadili? (b) Waziri wa serikali wa mambo ya kigeni wa Uingereza aliitikiaje yale aliyoona yakitukia katika Agosti 1914?
2 Kabla ya watu wengi walio hai leo kuzaliwa, ulimwengu huu uliingia katika wakati wao wa mwisho. Mambo makubwa yalitukia kwa mfuatano wa haraka. Shetani Ibilisi, mwendelezi mkuu wa giza la kiroho na kiadili, alitupwa chini duniani. (Ufunuo 12:7-12; Waefeso 6:12) Ainabinadamu ilikuwa tayari imetumbukizwa kwenye vita yayo ya ulimwengu ya kwanza. Mapema katika Agosti 1914, vita hiyo ilipokuwa imekuwa uhakika, Sir Edward Grey, waziri wa serikali wa mambo ya kigeni wa Uingereza, alisimama kwenye dirisha la ofisi yake katika London na kusema: “Taa zinazimika kotekote katika Ulaya; hatutaziona zikiwashwa tena maishani mwetu.”
3. Viongozi wa ulimwengu wamekuwa na matokeo gani katika kujaribu kuangazia wakati ujao wa ainabinadamu?
3 Katika jitihada za kufanya taa hizo ziwake tena, Ushirika wa Mataifa ulianzishwa katika 1920. Lakini taa hizo hata hazikuwaka sana. Mwishoni mwa vita ya ulimwengu ya pili, viongozi wa ulimwengu walijaribu tena, wakati huu wakiwa na shirika la Umoja wa Mataifa. Kwa mara nyingine tena, taa hizo hazikuwaka kwa uangavu. Hata hivyo, kwa kufikiria matukio ya hivi karibuni zaidi, viongozi wa ulimwengu wamekuwa wakizungumza kuhusu “utaratibu wa ulimwengu mpya.” Lakini haiwezi kusemwa kwamba “ulimwengu mpya” huo umeweza kutoa amani na usalama wa kweli. Tofauti na hilo, makabiliano ya kijeshi, ugomvi wa kikabila, uhalifu, ukosefu wa kazi, umaskini, uchafuzi wa mazingira, magonjwa, na kifo vyote hivyo vinaendelea kuharibia watu shangwe ya uhai.
4, 5. (a) Giza lilikuja juu ya familia ya kibinadamu wakati gani na kwa jinsi gani? (b) Ni nini kilichokuwa cha lazima ili kuandaa kitulizo?
4 Kwa uhalisi, ilikuwa kabla ya 1914 kwamba taa zilizimika kwa ainakibinadamu. Hilo lilitukia yapata miaka 6,000 iliyopita katika Edeni, wakati wazazi wetu wa kwanza wa kibinadamu walipochagua kujifanyia maamuzi yao wenyewe bila kujali mapenzi ya Mungu yaliyosemwa wazi. Maono yenye kuhuzunisha ya jamii ya kibinadamu tangu wakati huo ni visa mbalimbali tu maishani chini ya zile ambazo Biblia huita “nguvu za giza.” (Wakolosai 1:13) Ilikuwa ni chini ya uvutano wa Shetani Ibilisi kwamba yule mtu wa kwanza, Adamu, alitumbukiza ulimwengu katika dhambi; na kutoka kwa Adamu dhambi na kifo vikaenea kwa ainabinadamu yote. (Mwanzo 3:1-6; Warumi 5:12) Hivyo ainakibinadamu ikapoteza kibali cha Yehova, Chanzo cha nuru na uhai.—Zaburi 36:9.
5 Njia pekee ambayo nuru ingeweza tena kung’aa kwa wowote wa ainakibinadamu ingekuwa ikiwa wao wangepata kibali cha Yehova Mungu, Muumba wa ainabinadamu. Ndipo, “utaji ule uliotandwa juu ya mataifa yote,” laana kwa sababu ya dhambi, ungeweza kuondolewa. Hilo lingewezekanaje?—Isaya 25:7.
Yule Aliyetolewa Kuwa “Nuru ya Mataifa”
6. Yehova ametuwezesha tuwe na matarajio gani matukufu kupitia Yesu Kristo?
6 Hata kabla ya Adamu na Hawa kuondolewa katika Paradiso, Yehova alitabiri kuhusu “mbegu” ambayo ingekuwa mkombozi wa wapendao uadilifu. (Mwanzo 3:15, NW) Kufuatia kuzaliwa kwa kibinadamu kwa hiyo Mbegu iliyoahidiwa, Yehova alimfanya Simeoni mzee, kwenye hekalu katika Yerusalemu, amtambulishe huyo kuwa ndiyo “nuru ya kuwa mwangaza [ya kuondolea shela, NW] kwa Mataifa.” (Luka 2:29-32) Kupitia imani katika dhabihu ya Yesu ya uhai mkamilifu wa kibinadamu, wanadamu wangeweza kuondolewa laana iliyotokana na dhambi ya kuzaliwa. (Yohana 3:36) Kupatana na mapenzi ya Yehova, wangeweza kutazamia uhai wa milele katika ukamilifu wakiwa sehemu ya Ufalme wa kimbingu au wakiwa raia za Ufalme huo katika dunia paradiso. Huo ni uandalizi mzuri ajabu jinsi gani!
7. Kwa nini ahadi kwenye Isaya 42:1-4 pamoja na utimizo wayo wa karne ya kwanza unatujaza tumaini?
7 Yesu Kristo mwenyewe ndiye dhamana ya kutimizwa kwa mataraja hayo matukufu. Kuhusiana na kuponya kwa Yesu watu waliosumbuliwa, mtume Mathayo alitumia yale yaliyoandikwa kwenye Isaya 42:1-4 kumhusu yeye. Andiko hilo lasema hivi kwa sehemu: “Tazama mtumishi wangu nimtegemezaye; mteule wangu, ambaye nafsi yangu imependezwa naye; nimetia roho yangu juu yake; naye atawatolea mataifa hukumu.” Na je! hilo silo jambo ambalo watu wa mataifa yote wanahitaji? Unabii huo waendelea hivi: “Hatalia, wala hatapaza sauti yake, wala kuifanya isikiwe katika njia kuu. Mwanzi uliopondeka hatauvunja, wala utambi utokao moshi hatauzima.” Kupatana na hilo, Yesu hakutenda kikatili watu waliokuwa tayari wamesumbuka. Aliwaonyesha huruma, akawafundisha makusudi ya Yehova, na kuwaponya magonjwa yao.—Mathayo 12:15-21.
8. Yesu ametolewa katika maana gani na Yehova awe “agano la watu” na “nuru ya mataifa”?
8 Mpaji wa unabii huo anaelekeza fikira zake kwa Mtumishi wake, Yesu, na kusema: “Mimi, BWANA [Yehova, NW], nimekuita katika haki, nami nitakushika mkono, na kukulinda, na kukutoa uwe agano la watu, na nuru ya mataifa; kuyafunua macho ya vipofu, kuwatoa gerezani waliofungwa, kuwatoa wale walioketi gizani katika nyumba ya kufungwa.” (Isaya 42:6, 7) Naam, Yehova ametoa Yesu Kristo awe agano, awe dhamana nzito ya kiahadi. Jinsi hilo linavyotia moyo! Yesu alionyesha hangaikio la kweli kwa ainakibinadamu alipokuwa duniani; hata alitoa uhai wake kwa ajili ya ainabinadamu. Huyo ndiye yule ambaye Yehova amekabidhi utawala juu ya mataifa yote. Si ajabu kwamba Yehova alisema juu yake kuwa nuru ya mataifa. Yesu mwenyewe alisema: “Mimi ndimi nuru ya ulimwengu.”—Yohana 8:12.
9. Kwa nini Yesu hakujitoa mwenyewe kufanyia maendeleo mfumo wa mambo wa wakati huo?
9 Yesu alitumika akiwa “nuru ya ulimwengu” kwa kusudi gani? Kwa kweli haikuwa kwa kusudi lolote la kilimwengu au la kutaka vitu vya kimwili. Yeye alikataa kujaribu kunyorosha mfumo wa kisiasa wa wakati huo kwa kutokubali ufalme ama kutoka kwa Shetani, mtawala wa ulimwengu, ama kutoka kwa watu. (Luka 4:5-8; Yohana 6:15; 14:30) Yesu alionyesha huruma nyingi kwa wale waliokuwa na masumbufu, akawapa kitulizo kwa njia ambazo wengine wasingeweza. Lakini alijua kwamba kitulizo cha kudumu hakingewezekana katika muundo wa jamii ya kibinadamu iliyokuwa chini ya laana ya kimungu kwa sababu ya dhambi ya kuzaliwa na iliyokuwa chini ya uvutano wa nguvu zisizoonekana za roho waovu. Akiwa na mwono-ndani wa kimungu, Yesu alitumia maisha yake hasa katika kufanya mapenzi ya Mungu.—Waebrania 10:7.
10. Yesu alitumika akiwa nuru ya ulimwengu katika njia zipi na kwa kusudi gani?
10 Basi, Yesu alitumika akiwa nuru ya ulimwengu katika njia zipi na kwa kusudi gani? Yeye alijitoa mwenyewe kuhubiri habari njema za Ufalme wa Mungu. (Luka 4:43; Yohana 18:37) Kwa kutoa ushahidi kuhusu kweli ya kusudi la Yehova, Yesu pia alitukuza jina la Baba yake wa kimbingu. (Yohana 17:4, 6) Isitoshe, akiwa nuru ya ulimwengu, Yesu alifunua uwongo wa kidini na hivyo akaandaa uhuru wa kiroho kwa wale waliokuwa katika ufungwa wa kidini. Alimfunua Shetani kuwa yule asiyeonekana mwenye uvutano juu ya wale wanaojiruhusu watumiwe naye. Yesu pia alitambulisha wazi matendo ya giza. (Mathayo 15:3-9; Yohana 3:19-21; 8:44) Kwa kutokeza, yeye alithibitika kuwa nuru ya ulimwengu kwa kutoa uhai wake mkamilifu wa kibinadamu kuwa fidia, kwa namna hiyo akifungulia njia wale wanaojizoeza imani katika uandalizi huo wapate msamaha wa dhambi, uhusiano wenye kibali cha Mungu, na taraja la uhai wa milele wakiwa sehemu ya familia ya Yehova ya ulimwengu wote mzima. (Mathayo 20:28; Yohana 3:16) Na hatimaye, kwa kudumisha ujitoaji kimungu ulio mkamilifu katika maisha yake yote, Yesu alitegemeza enzi kuu ya Yehova na kumthibitisha Ibilisi kuwa mwongo, kwa njia hiyo akiwezesha wapendao uadilifu kupata faida za milele. Lakini, je! Yesu angekuwa ndiye mchukuaji nuru pekee?
“Ninyi Ni Nuru ya Ulimwengu”
11. Ili wawe wachukuaji nuru, wanafunzi wa Yesu walipewa daraka gani?
11 Kwenye Mathayo 5:14, Yesu aliwaambia wanafunzi wake: “Ninyi ni nuru ya ulimwengu.” Walipaswa wafuate nyayo zake. Kwa njia yao ya maisha na kwa kuhubiri kwao pia, walipaswa wawaelekeze wengine kwa Yehova akiwa ndiye Chanzo cha mnurisho wa kweli. Kwa kumwiga Yesu, walipaswa kujulisha jina la Yehova na kutegemeza enzi kuu Yake. Walipaswa kutangaza Ufalme wa Mungu kuwa tumaini pekee la ainabinadamu kama vile Yesu alivyofanya. Pia wao walipaswa wafunue uwongo wa kidini, matendo ya giza, na yule mwovu anayeleta mambo hayo. Wafuasi wa Kristo walipaswa wawaambie watu kila mahali kuhusu uandalizi wa Yehova wenye upendo wa wokovu kupitia Yesu Kristo. Wakristo wa mapema walikuwa na bidii iliyoje ya kutekeleza mgawo huo, wakianza kwanza katika Yerusalemu na Yudea halafu wakisonga hadi Samaria, kama vile Yesu alivyoamuru!—Matendo 1:8.
12. (a) Nuru ya kiroho ilitazamiwa ienee mbali kadiri gani? (b) Roho ya Yehova ilimwezesha Paulo atambue nini kuhusu Isaya 42:6, na unabii huo unapaswa uathirije maisha zetu?
12 Hata hivyo, kuhubiriwa kwa habari hizo njema hakungefanywa kwenye shamba hilo pekee. Yesu aliagiza wafuasi wake ‘wawafanye mataifa yote kuwa wanafunzi.’ (Mathayo 28:19) Wakati wa kugeuzwa kwa Saulo wa Taso, Bwana alionyesha kihususa kwamba Saulo (ambaye baadaye akawa mtume Paulo) angehubiri si kwa Wayahudi peke yao bali pia kwa wasio Wayahudi. (Matendo 9:15) Kwa msaada wa roho takatifu, Paulo alikuja kufahamu yale yaliyohusishwa na hilo. Hivyo, akafahamu kwamba unabii kwenye Isaya 42:6, unaotimizwa moja kwa moja katika Yesu Kristo, pia ni amri iliyokusudiwa wote wanaojizoeza imani katika Kristo. Kwa hiyo, kwenye Matendo 13:47, alipomnukuu Isaya, Paulo alisema hivi: “Ndivyo tulivyoamriwa na Bwana [Yehova, NW], Nimekuweka uwe nuru ya Mataifa, upate kuwa wokovu hata mwisho wa dunia.” Namna gani wewe? Je! umefikiria kibinafsi kwa uzito wajibu huo wa kuwa mchukuaji nuru? Kama vile Yesu na mtume Paulo, je, wewe hutumia maisha yako kufanya mapenzi ya Mungu?
Nuru na Kweli Kutoka kwa Mungu Ili Kutuongoza
13. Kupatana na Zaburi 43:3, sala yetu yenye bidii ni nini, na hiyo inatulinda dhidi ya nini?
13 Ikiwa sisi, kwa mbinu zetu wenyewe, tungejaribu ‘kufanya taa hizo ziwake tena,’ ili kuangazia wakati ujao wa ainabinadamu, tungeikosa sana maana ya Neno la Mungu lililopuliziwa. Hata hivyo, bila kujali unachofanya ulimwengu kwa ujumla, Wakristo wa kweli humtegemea Yehova kuwa Chanzo cha kweli cha nuru. Sala yao ni kama ile iliyorekodiwa kwenye Zaburi 43:3 inayosema hivi: “Niletewe nuru yako na kweli yako ziniongoze, zinifikishe kwenye mlima wako mtakatifu na hata maskani yako.”
14, 15. (a) Yehova anatoa nuru na kweli yake katika njia zipi? (b) Tunaweza kuonyeshaje kwamba nuru na kweli ya Mungu vinatuongoza kwelikweli?
14 Yehova huendelea kujibu sala hiyo ya watumishi wake waaminifu-washikamanifu. Yeye hutoa nuru kwa kujulisha rasmi kusudi lake, kwa kuwezesha watumishi wake walielewe, halafu kwa kutimiza yale ambayo amejulisha rasmi. Tunaposali kwa Mungu, hatufanyi hivyo kidesturi tu, tukifanya hivyo ili tu kuonyesha utakatifu. Tamaa yetu ya moyo ni kwamba nuru inayotoka kwa Yehova itatuongoza, kama vile zaburi hiyo isemavyo. Tunakubali daraka linaloandamana na kupokea nuru ambayo Mungu huandaa. Kama vile mtume Paulo, tunafahamu kwamba utimizo wa Neno la Yehova hutia ndani amri inayokusudiwa wote wanaojizoeza imani ndani yayo. Kama vile Paulo, tunahisi kama tuna deni kwa watu wengine hadi tunapowapa habari njema ambayo Mungu alitukabidhi kwa kusudi hilo.—Warumi 1:14, 15.
15 Nuru na kweli ambayo Yehova ametoa katika siku yetu hudhihirisha kwamba Yesu Kristo anatawala sasa kwa bidii kutoka kiti chake cha enzi mbinguni. (Zaburi 2:6-8; Ufunuo 11:15) Yesu alitabiri kwamba wakati wa kuwapo kwake kwa kifalme, habari hizi njema za Ufalme zingehubiriwa katika dunia yote inayokaliwa kwa ajili ya ushahidi. (Mathayo 24:3, 14) Kazi hiyo inafanywa sasa, na kwa bidii, duniani pote. Ikiwa tunaifanya kazi hiyo kuwa jambo la maana zaidi maishani mwetu, basi, nuru na kweli ya Mungu vinatuongoza, kama vile mtunga zaburi alivyosema.
Utukufu wa Yehova Umeangaza
16, 17. Yehova aliangazaje utukufu wake juu ya tengenezo lake lililo kama mwanamke katika 1914, na alimpa amri gani?
16 Kwa maneno yenye kuchochea moyo, Maandiko yanasimulia njia ambayo nuru ya kimungu inaenezwa kwa watu kila mahali. Isaya 60:1-3 linaloelekezwa kwa “mwanamke” wa Yehova au tengenezo lake la kimbingu la watumishi waaminifu-washikamanifu husema hivi: “Ondoka, [Ee mwanamke, NW] uangaze; kwa kuwa nuru yako imekuja, na utukufu wa BWANA [Yehova, NW] umekuzukia. Maana, tazama, giza litaifunika dunia, na giza kuu litazifunika kabila za watu; bali BWANA [Yehova, NW] atakuzukia wewe, na utukufu wake utaonekana juu yako. Na mataifa wataijilia nuru yako, na wafalme kuujia mwanga wa kuzuka kwako.”
17 Utukufu wa Yehova uliangaza juu ya tengenezo lake la kimbingu lililo kama mwanamke katika mwaka 1914 wakati ambapo, baada ya kipindi kirefu cha kungojea, mwanamke huyo alizaa Ufalme wa Kimesiya, Yesu Kristo akiwa Mfalme. (Ufunuo 12:1-5) Nuru tukufu ya Yehova yaangaza kwa kibali cha kimungu juu ya serikali hiyo kuwa ndiyo inayofaa kwa dunia yote.
18. (a) Kwa nini giza laifunika dunia, kama ilivyotabiriwa kwenye Isaya 60:2? (b) Watu mmoja mmoja wanaweza kukombolewaje kutoka katika giza la dunia?
18 Kinyume cha hayo, giza laifunika dunia na giza kuu lafunika vikundi vya kitaifa. Kwa nini? Kwa sababu mataifa yanakataa serikali ya Mwana mpendwa wa Mungu kwa kupendelea utawala wa kibinadamu. Wanafikiri kwamba kwa kuondolea mbali namna moja ya serikali ya kibinadamu na kukubali nyingine, wataweza kusuluhisha matatizo yao. Lakini hilo halileti kitulizo wanachotumainia. Wanashindwa kuona ni nani kutoka makao ya roho anayeyaongoza mataifa bila kuonekana. (2 Wakorintho 4:4) Wanakataa Chanzo cha nuru ya kweli na hivyo wamo gizani. (Waefeso 6:12) Hata hivyo, bila kujali yale yanayofanywa na mataifa, watu mmoja mmoja wanaweza kukombolewa kutoka katika giza hilo. Kwa njia gani? Kwa kuwa na imani kamili katika Ufalme wa Mungu na kujitiisha chini yao.
19, 20. (a) Kwa nini na kwa jinsi gani utukufu wa Yehova umewaangazia wafuasi wa Yesu wapakwa-mafuta? (b) Yehova amewafanya wapakwa-mafuta wake wawe wachukuaji nuru kwa kusudi gani? (c) Kama ilivyotabiriwa, “wafalme” na “mataifa” wamevutwaje kwenye nuru ya kupewa na Mungu?
19 Jumuiya ya Wakristo haijazoeza imani katika Ufalme wa Mungu na haijajitiisha chini yao. Lakini wafuasi wapakwa-mafuta wa Yesu Kristo wamefanya hivyo. Kama tokeo, nuru ya Yehova ya kibali cha kimungu imeangaza juu ya wawakilishi hao wenye kuonekana wa mwanamke wake wa kimbingu, na utukufu wake umedhihirika kwao. (Isaya 60:19-21) Wao huonea shangwe nuru ya kiroho ambayo hakuna badiliko lolote katika mandhari ya kisiasa au ya kiuchumi ya ulimwengu linaloweza kuwanyang’anya. Wao wameona Yehova akiwakomboa kutoka Babuloni Mkubwa. (Ufunuo 18:4) Wanaonea shangwe tabasamu ya kibali chake kwa sababu wamekubali nidhamu yake na wametegemeza enzi kuu yake kwa uaminifu-mshikamanifu. Wao wana mataraja mazuri ya wakati ujao, na wanashangilia katika tumaini ambalo ameweka mbele yao.
20 Lakini ni kwa kusudi gani kwamba Yehova ameshughulika nao kwa njia hiyo? Kama vile yeye mwenyewe alivyosema kwenye Isaya 60:21, ni ili kwamba yeye ‘atukuzwe,’ jina lake lipate kuheshimiwa na wengine wavutwe kwake akiwa Mungu wa pekee wa kweli—ikitokeza faida ya milele kwao. Kupatana na hilo, katika 1931, waabudu hao wa Mungu wa kweli walikubali jina Mashahidi wa Yehova. Kama tokeo la kutoa kwao ushahidi, je! “wafalme” walivutwa kwenye nuru waliyoangaza, kama vile Isaya alivyotabiri? Ndiyo! Si watawala wa kisiasa wa dunia, bali idadi iliyobaki ya wale walio katika mstari wa kutawala wakiwa wafalme pamoja na Kristo katika Ufalme wake wa kimbingu. (Ufunuo 1:5, 6; 21:24) Namna gani “mataifa”? Je! wao wamevutwa kwenye nuru hiyo? Bila shaka ndivyo! Hakuna taifa moja la kisiasa ambalo limevutwa, bali mkutano mkubwa wa watu kutoka katika mataifa hayo yote wamechukua msimamo wao upande wa Ufalme wa Mungu, na wanatazamia kwa hamu ukombozi ili kuingia ulimwengu mpya wa Mungu. Utakuwa ulimwengu mpya kwelikweli ambamo uadilifu utaenea.—2 Petro 3:13; Ufunuo 7:9, 10.
21. Tunaweza kuonyeshaje kwamba hatujakosa kusudi la fadhili isiyostahiliwa ya Yehova ya kutukabidhi uelewevu wa mapenzi yake?
21 Je! wewe ni mmoja wa huo msongamano unaokua wa wachukuaji nuru? Yehova ametuwezesha tuelewe mapenzi yake ili kwamba sisi, kama vile Yesu, tuweze kuwa wachukuaji nuru. Kwa kuonyesha bidii katika kazi ambayo Yehova amewakabidhi watumishi wake katika siku yetu, sisi sote na tuonyeshe kwamba hatujakosa kusudi la fadhili isiyostahiliwa ambayo Yehova ametunyooshea. (2 Wakorintho 6:1, 2) Hakuna kazi nyingine yoyote iliyo ya maana zaidi kwa siku yetu. Na hatuwezi kuwa na pendeleo jingine kubwa zaidi ya kumtukuza Yehova kwa kuangazia wengine nuru tukufu inayotoka kwake.
Ungejibuje?
◻ Ni nini visababishi vya msingi vya matatizo ya ainabinadamu yenye kuhuzunisha?
◻ Yesu na wafuasi wake pia ni “nuru ya ulimwengu” katika njia zipi?
◻ Nuru na kweli ya Mungu vinatuongozaje?
◻ Yehova amesababishaje utukufu wake uangaze juu ya tengenezo lake?
◻ Yehova amewafanya watu wake wawe wachukuaji nuru kwa kusudi gani?
[Picha katika ukurasa wa 9]
Tukio moja katika Edeni linatusaidia tuelewe matatizo ya ainabinadamu yenye kuhuzunisha leo
[Hisani]
Tom Haley/Sipa
Paringaux/Sipa