Tusalije kwa Mungu?

MWANAFUNZI alipoomba maagizo kuhusu sala, Yesu hakukataa kumpa. Kulingana na Luka 11:2-4, alijibu hivi: “Mnaposali, semeni: ‘Baba! Jina lako litukuzwe; utawala [“ufalme,” NW] wako ufike. Utupe daima chakula chetu cha kila siku. Utusamehe dhambi zetu, maana sisi tunawasamehe wote waliotukosea; na usitutie katika majaribu.’” (Habari Njema Kwa Watu Wote) Hiyo ndiyo ijulikanayo kwa kawaida kuwa Sala ya Bwana. Inajulisha habari nyingi sana.

Mwanzoni, neno la kwanza kabisa hutuambia ni nani apaswaye kuelekezewa sala zetu—Baba yetu. Ona kwamba Yesu hakuruhusu hata kidogo kusali kwa mtu mwingine, mfano, “mtakatifu,” au hata kwake mwenyewe. Kwa vyovyote, Mungu alikuwa ametangaza hivi: “Utukufu wangu sitampa mwingine, wala sitawapa sanamu sifa zangu.” (Isaya 42:8) Kwa hiyo sala zielekezwazo kwa kitu kingine chochote au mtu mwingine yeyote badala ya Baba yetu wa kimbingu hazisikiwi na yeye, hata mwabudu awe mwenye moyo mweupe kadiri gani. Katika Biblia, ni Yehova Mungu tu aitwaye “Msikiaji wa sala.”—Zaburi 65:2, NW.

Wengine huenda wakasema kwamba “watakatifu” hutenda wakiwa waombezi tu kwa Mungu. Lakini Yesu mwenyewe aliagiza hivi: “Mimi ndimi njia, na kweli, na uzima; mtu haji kwa Baba, ila kwa njia ya mimi. Nanyi mkiomba lo lote kwa jina langu, hilo nitalifanya, ili Baba atukuzwe ndani ya Mwana.” (Yohana 14:6, 13) Kwa njia hiyo, Yesu aliondolea mbali lile wazo kwamba mtu yeyote aitwaye mtakatifu angeweza kutumikia katika fungu la mwombezi. Ona pia yale aliyosema mtume Paulo kumhusu Kristo: “Kristo Yesu ndiye aliyekufa; naam, na zaidi ya hayo, amefufuka katika wafu, naye yuko mkono wa kuume wa Mungu; tena ndiye anayetuombea.” “Aweza kuwaokoa kabisa wao wamjiao Mungu kwa yeye; maana yu hai sikuzote ili awaombee.”—Warumi 8:34; Waebrania 7:25.

Jina Ambalo Lazima Litukuzwe

Maneno yaliyofuata ya sala ya Yesu yalikuwa: “Jina lako litukuzwe.” Mtu angeweza kutukuzaje, yaani, kutakasa, au kuweka kando, jina la Mungu isipokuwa alilijua na alilitumia? Mungu anatambulishwa kwa jina lake la kibinafsi Yehova zaidi ya mara 6,000 katika “Agano la Kale.”

Kielezi-chini cha Kutoka 6:3 katika Douay Version ya Katoliki chasema hivi kuhusu jina la Mungu: “Watu fulani wa kisasa wametunga jina Yehova . . . , kwani matamshi ya kweli ya jina [la Mungu], ambalo liko katika maandishi ya Kiebrania, hayajulikani sasa, kwa sababu limekuwa halitumiwi kwa muda mrefu.” Kwa hiyo New Jerusalem Bible ya Katoliki hutumia jina Yahweh. Ingawa wasomi fulani hupendelea matamshi hayo, “Yehova” ndiyo njia moja halali na iliyofuatwa muda mrefu ya kutamka jina la kimungu katika Kiswahili. Lugha nyinginezo zina njia zazo zenyewe za kulitamka jina la kimungu. Jambo kuu ni kwamba twalitumia jina hilo ili tulitukuze. Je, kanisa lako limekufundisha kutumia jina Yehova katika sala?

Mambo Yafaayo ya Kutajwa Katika Sala

Halafu Yesu akawafundisha wanafunzi wake kusali: “Ufalme wako uje.” Gospeli ya Mathayo yaongezea maneno haya: “Mapenzi yako yatimizwe, hapa duniani kama huko mbinguni.” (Mathayo 6:10) Ufalme wa Mungu ni serikali mikononi mwa Yesu Kristo. (Isaya 9:6, 7) Kulingana na unabii wa Biblia, upesi utaondoa serikali zote za kibinadamu na kuleta muhula wa amani ya tufe lote. (Zaburi 72:1-7; Danieli 2:44; Ufunuo 21:3-5) Kwa hiyo Wakristo wa kweli hufanya kufika kwa huo Ufalme kuwa kichwa chenye kurudiwa-rudiwa katika sala zao. Je, kanisa lako limekufundisha kufanya hivyo?

Kwa kupendeza, Yesu pia alionyesha kwamba sala zetu huenda zikatia ndani mambo ya kibinafsi yatuhangaishayo. Yeye alisema: “Utupe daima chakula chetu cha kila siku. Utusamehe dhambi zetu, maana sisi tunawasamehe wote waliotukosea; na usitutie katika majaribu.” (Luka 11:3, 4, HNWW) Maneno ya Yesu yadokeza kwamba twaweza kutafuta mapenzi ya Mungu katika shughuli za kila siku, kwamba twaweza kumfikia Yehova kuhusiana na chochote ambacho huenda kikatupa wasiwasi au kusumbua amani yetu ya akili. Kumwomba Mungu dua kwa ukawaida katika njia hiyo kwatusaidia kung’amua jinsi tunavyomtegemea. Kwa njia hiyo twapata kufahamu zaidi uvutano wake maishani mwetu. Kumwomba Mungu kila siku atusamehe makosa yetu kuna manufaa vilevile. Hivyo twapata kutambua zaidi udhaifu wetu mbalimbali—na kuwa wenye kuvumilia zaidi makosa ya wengine. Himizo la Yesu kwamba tusali tusitiwe katika majaribu lafaa pia, hasa kwa kufikiria maadili yanayozorota ya ulimwengu huu. Kwa kupatana na sala hiyo, tunakuwa waangalifu kuepuka mastakimu na hali ambazo zingeweza kutuongoza kwenye kosa.

Basi, ni wazi kwamba Sala ya Bwana hutuambia mengi juu ya kutoa sala zimpendezazo Mungu. Lakini je, Yesu alikusudia kwamba tuitwae sala hiyo na kuikariri kwa ukawaida tu?

Shauri Zaidi Juu ya Sala

Yesu alitoa maagizo zaidi juu ya sala. Kwenye Mathayo 6:5, 6, twasoma hivi: “Tena msalipo, msiwe kama wanafiki; kwa maana wao wapenda kusali hali wamesimama katika masinagogi na katika pembe za njia, ili waonekane na watu. . . . Bali wewe usalipo, ingia katika chumba chako cha ndani, na ukiisha kufunga mlango wako, usali mbele za Baba yako aliye sirini; na Baba yako aonaye sirini atakujazi.” Maneno hayo hutufundisha kwamba sala haipaswi kutolewa katika njia ya kujionyesha na kujisikia ili kumpendeza mtu fulani. Je, wewe humfungulia Yehova moyo wako wote ukiwa sirini, jinsi Biblia isihivyo sana?—Zaburi 62:8.

Yesu alitoa onyo hili: “Msipayuke-payuke, kama watu wa mataifa; maana wao hudhani ya kuwa watasikiwa kwa sababu ya maneno yao kuwa mengi.” (Mathayo 6:7) Kwa wazi, Yesu hakupendezwa na kukariri kwa sala—wala kuzisoma kutoka kitabu fulani. Maneno yake vilevile hukataza matumizi ya rozari.

Misale ya Katoliki hukiri hivi: “Sala zetu zilizo bora zaidi huenda zikawa mawazo yetu wenyewe ya asili tumgeukiapo katika shukrani au katika uhitaji, nyakati za huzuni, au katika kumheshimu kwetu kwa kawaida kila siku.” Sala za Yesu mwenyewe zilikuwa za asili, wala si za kukaririwa. Kwa kielelezo, soma sala ya Yesu iliyorekodiwa katika Yohana sura ya 17. Hiyo hushikamana na sala ya kigezo, ikikazia kutamani kwa Yesu kuona jina la Yehova likitakaswa. Sala ya Yesu ilikuwa ya asili na yenye kuhisiwa sana moyoni.

Sala Asikiazo Mungu

Ikiwa umefundishwa kutoa sala za kukaririwa, kusali kwa “watakatifu” au kwa mifano, au kutumia vitu vya kidini, kama rozari, lile wazo la kusali kwa njia ambayo Yesu alionyesha huenda likaonekana kuwa lenye kuogofya mwanzoni. Hata hivyo, ili kusali kama alivyoagiza Yesu, suluhisho ni kupata kumjua Mungu—jina lake, makusudi yake, utu wake. Waweza kutimiza hilo kupitia kujifunza Biblia kikamili. (Yohana 17:3) Mashahidi wa Yehova wako tayari na wangependa kukusaidia katika jambo hilo. Kwani, wamesaidia mamilioni ulimwenguni pote ‘yaonje yaone ya kuwa BWANA yu mwema’! (Zaburi 34:8) Kadiri uzidivyo kupata kumjua Mungu, ndivyo utakavyozidi kuchochewa kumsifu katika sala. Na kadiri uzidivyo kumkaribia Yehova katika sala yenye kicho, ndivyo uhusiano wako pamoja naye utakavyokuwa wa karibu zaidi.

Kwa hiyo waabudu wote wa kweli wa Mungu wanasihiwa sana ‘waombe bila kukoma.’ (1 Wathesalonike 5:17) Hakikisha kwamba sala zako kwa kweli zapatana na Biblia, kutia ndani maagizo ya Yesu Kristo. Kwa njia hiyo, waweza kuwa na uhakika kwamba sala zako zitapata kibali cha Mungu.

[Picha katika ukurasa wa 7]

Kadiri tuzidivyo kujifunza juu ya Yehova, ndivyo tuzidivyo kuchochewa kusali kwake kutoka moyoni