Serikali Itakayoleta Paradiso

Yesu alipokuwa duniani, aliwaambia wafuasi wake waombe juu ya Ufalme wa Mungu hivi: “Ufalme wako uje, mapenzi yako yatimizwe, hapa duniani kama huko mbinguni.” (Mathayo 6:9, 10) Pia nyakati zote alisema juu ya “Habari Njema ya ufalme.” (Mathayo 4:23) Kwa kweli, alisema juu ya Ufalme mara nyingi zaidi ya mambo mengine yote. Kwa nini? Kwa sababu Ufalme ndio chombo atakachotumia Mungu aondoe matatizo yanayofanya maisha leo yawe magumu sana. Kwa kutumia Ufalme huo, karibuni Mungu atamaliza vita, njaa, magonjwa na uhalifu, naye ataleta umoja na amani.

Wewe ungependa kuishi katika ulimwengu kama huo? Ikiwa ndivyo, basi imekupasa uisome broshua hii. Ndani yake, utajifunza kwamba Ufalme huo ni serikali, lakini ni serikali bora kuliko yo yote ambayo imepata kutawala wanadamu. Pia utaona njia yenye kusisimua ambayo Mungu alitumia ili awaeleze hatua kwa hatua watumishi wake makusudi yake juu ya Ufalme huo. Tena, utaona namna Ufalme huo unavyoweza kukusaidia wewe hata leo.

Kwa kweli, hata sasa unaweza kuwa raia wa Ufalme wa Mungu. Lakini kabla ya kuchagua kufanya hivyo, utahitaji kujua habari zaidi juu yake. Hivyo tunakutia moyo uichunguze broshua hii. Kila jambo ambalo itakuambia juu ya Ufalme limetoka katika Biblia.

Kwanza, ebu tuone ni kwa nini tunauhitaji sana Ufalme wa Mungu.

Wakati wa mwanzo wa historia ya kibinadamu, Mungu alifanya mtu mkamilifu na kumweka katika paradiso. Wakati huo Ufalme haukuhitajiwa.

Hata hivyo, Adamu na Hawa, wazazi wetu wa kwanza, wakamsikiliza Shetani, malaika mwasi. Aliwaambia uwongo juu ya Mungu, akawafanya wao pia wamwasi Mungu. Hivyo wakastahili kufa, kwa sababu “mshahara wa dhambi ni mauti.”—Warumi 6:23.

Mtu asiyekamilika, mwenye dhambi, hawezi kuzaa watoto wakamilifu. Hivyo watoto wote wa Adamu walizaliwa wakiwa wasiokamilika, wenye dhambi, wenye kufa.—Warumi 5:12.

Tangu wakati huo, wanadamu walihitaji Ufalme wa Mungu uwasaidie waipone laana ya dhambi na kifo. Ufalme huo utaliondolea pia jina la Mungu mambo ya uwongo ambayo Shetani alisema juu yalo.

Yehova Mungu aliahidi kwamba “uzao” (au mbegu) wa pekee ungezaliwa ili uokoe wanadamu katika dhambi. (Mwanzo 3:15) “Uzao” huo ungekuwa Mfalme wa Ufalme wa Mungu.

Huyo angekuwa nani?

Miaka kama 2,000 baada ya Adamu kufanya dhambi, kukawa na mtu mwaminifu sana aliyeishi, jina lake Abrahamu. Yehova alimwambia Abrahamu aondoke katika mji wake mwenyewe akaishi katika mahema katika nchi ya Palestina.

Abrahamu alifanya yote aliyoambiwa na Yehova, ikiwa ni pamoja na kufanya jambo moja ambalo ni gumu sana. Yehova alimwambia amtoe Isaka penye madhabahu awe sadaka.

Kwa kweli Yehova hakutaka binadamu atolewe kuwa sadaka. Lakini alitaka ajue kama Abrahamu alimpenda sana. Abrahamu alikuwa karibu kumuua Isaka Yehova alipomzuia.

Kwa sababu ya imani kuu ya Abrahamu, Yehova akatoa ahadi ya kuwapa wazao wake nchi ya Palestina. Akasema Uzao ulioahidiwa ungekuja kupitia ukoo wake, na ule wa Isaka mwanaye.—Mwanzo 22:17, 18; 26:4, 5.

Isaka alikuwa na wana-mapacha, Esau na Yakobo. Yehova akasema kwamba Uzao ulioahidiwa ungekuja kupitia Yakobo.—Mwanzo 28:13-15.

Yakobo, ambaye pia Yehova aliita jina Israeli, alizaa wana 12, na baadaye wote hao wakazaa watoto. Basi watoto wa Abrahamu wakaanza kuongezeka.—Mwanzo 46:8-27.

Ilipotokea njaa kali katika eneo hilo, Yakobo na jamaa yake wakahamia Misri kwa mwaliko wa Farao, mtawala wa Misri.—Mwanzo 45:16-20.

Huko Misri habari ilifunuliwa kwamba ule Uzao ulioahidiwa ungetoka katika nyumba ya Yuda.—Mwanzo 49:10.

Mwishowe Yakobo akafa, na wazao wake wakaongezeka hesabu mpaka wakawa kama taifa. Ndipo Wamisri walipowaogopa, wakawafanya kuwa watumwa.—Kutoka 1:7-14.

Mwishowe Yehova alimtuma Musa, mtu mwaminifu sana, aende kudai Farao wa wakati huo awaache huru watoto wa Israeli.—Kutoka 6:10, 11.

Farao alikataa, hivyo Yehova akaleta mapigo kumi juu ya Wamisri. Pigo la mwisho, alimtuma malaika wa kifo akawaue wana wazaliwa wa kwanza wote wa Misri.—Kutoka, sura 7 hadi 12.

Mungu aliwaambia Waisraeli kwamba kama wangeua mwana-kondoo awe chakula cha jioni chao na damu yake waipake juu ya vizingiti vya nyumba zao, malaika huyo wa kifo angezipita nyumba zao. Hivyo ndivyo wazaliwa wa kwanza wa Waisraeli walivyookolewa.—Kutoka 12:1-35.

Yaliyotokea ni kwamba Farao aliamuru Waisraeli waondoke Misri. Lakini ndipo alipobadili nia yake akawafuatia ili awarudishe.

Yehova akafungua njia ili Waisraeli waokoke kupitia Bahari Nyekundu. Farao na majeshi yake walipojaribu kuwafuata, wakafa maji.—Kutoka 15:5-21.

Yehova aliongoza wana wa Israeli kwenye mlima unaoitwa jina Sinai katika jangwa. Akawapa huko Sheria yake kisha akasema kwamba kama wangeishika, wangekuwa ufalme wa makuhani na taifa takatifu. Kwa njia hiyo, baadaye Waisraeli wakawa na nafasi ya kuwa sehemu yenye maana ya Ufalme wa Mungu.—Kutoka 19:6; 24:3-8.

Waisraeli walipokwisha kuwa kwenye Mlima Sinai kama mwaka mmoja hivi, Yehova aliwaongoza kuelekea Palestina, nchi aliyokuwa amemwahidi Abrahamu babu yao.

Mwishowe, katika Palestina Mungu akaruhusu Waisraeli watawalwe na wafalme. Kisha Mungu akawa na ufalme duniani.

Aliyekuwa mfalme wa pili wa Israeli ni Daudi, mzao wa Yuda. Daudi alishinda maadui wote wa Israeli, akafanya Yerusalemu kuwa mji mkuu wa taifa hilo.

Matukio yaliyokuwa katika utawala wa Daudi yanaonyesha kwamba Yehova anapounga mkono mfalme fulani, hakuna mtawala wa kidunia awezaye kumshinda.

Yehova akasema kwamba Uzao ulioahidiwa ungekuwa mmojapo wa wale wa ukoo wa Daudi.—1 Mambo ya Nyakati 17:7, 11, 14.

Sulemani, mwana wa Daudi, alitawala baada yake. Alikuwa mfalme mwenye hekima, na Israeli walifanikiwa chini ya utawala wake.

Sulemani pia alimjengea Yehova hekalu zuri katika Yerusalemu. Hali zilizokuwa katika Israeli chini ya utawala wa Sulemani zinatuonyesha baadhi ya baraka ambazo Ufalme wa Mungu unaokuja utaletea wanadamu.—1 Wafalme 4:24, 25.

Hata hivyo, wengi wa wafalme waliomfuata Sulemani hawakuwa waaminifu sana.

Lakini wakati wazao wa Daudi walipokuwa bado wakitawala katika Yerusalemu, Yehova alitumia nabii wake Isaya aseme habari za Mwana wa Daudi aliyekuwa anatazamiwa kuzaliwa ambaye angeitawala dunia nzima kwa uaminifu. Huyo angekuwa ndiye ule Uzao ulioahidiwa.—Isaya 9:6, 7.

Nabii Isaya alitabiri kwamba utawala Wake ungekuwa wenye utukufu hata kuliko ule wa Sulemani.—Isaya, sura za 11 na 65.

Basi, kuliko wakati wo wote uliotangulia, watumishi wa Mungu walitaka kujua Uzao huo ungekuwa nani.

Lakini kabla Uzao huo haujaja, wafalme wa Israeli wakawa wabaya sana hivi kwamba Yehova akaruhusu taifa hilo lishindwe na Wababuloni mwaka wa 607 K.W.K. Jamii kubwa ya watu hao ilipelekwa uhamishoni katika Babuloni. Lakini Mungu hakuwa amesahau ahadi yake. Ule Uzao bado ungetokea katika ukoo wa Daudi.—Ezekieli 21:25-27.

Mambo yaliyowapata Waisraeli yalionyesha kwamba, ingawa mfalme wa kibinadamu mwenye hekima na mwaminifu angeweza kuleta faida, faida hizo zilikuwa za muda. Watu waaminifu wanakufa na wanaowafuata huenda wasiwe waaminifu. Utatuzi ulikuwa nini? Ni Uzao ulioahidiwa.

Mwishowe, baada ya maelfu ya miaka, Uzao huo ukatokea. Ulikuwa nani?

Malaika mmoja kutoka kwa Mungu alimjibu msichana asiyeolewa, Mwisraeli, jina lake Mariamu. Alimwambia kwamba angezaa mwana ambaye angeitwa jina Yesu. Hivi ndivyo malaika huyo alivyosema:

“Huyo atakuwa mkubwa na ataitwa Mwana wa Aliye Juu Zaidi; na Yehova Mungu atampa kiti cha ufalme cha Daudi baba yake, naye atatawala akiwa mfalme.”—Luka 1:32, 33, New World Translation.

Hivyo Yesu alipaswa kuwa ndiye ule Uzao ulioahidiwa na mwishowe kuwa ndiye Mfalme wa Ufalme wa Mungu. Lakini kwa nini Yesu alikuwa tofauti na watu waaminifu waliokuwa wametangulia kuishi?

Yesu alizaliwa kimuujiza. Mamaye alikuwa bikira, na hakuwa na baba ya kidunia. Yesu alikuwa ametangulia kuishi mbinguni na roho takatifu ya Mungu, au kani ya utendaji, ilihamisha uhai wa Yesu kutoka mbinguni kuuingiza katika tumbo la uzazi la Mariamu. Kwa sababu hiyo, yeye hakurithi dhambi ya Adamu. Katika maisha yake yote, Yesu hakufanya dhambi.—1 Petro 2:22.

Alipokuwa mwenye umri wa miaka 30, Yesu akabatizwa.

Aliwaambia watu juu ya Ufalme wa Mungu na mwishowe akajijulisha kuwa ndiye Mfalme wa Ufalme huo.—Mathayo 4:23; 21:4-11.

Alifanya pia miujiza mingi.

Aliponesha wagonjwa.—Mathayo 9:35.

Alilisha kimuujiza watu waliokuwa na njaa.—Mathayo 14:14-22.

Hata alifufua wafu.—Yohana 11:38-44.

Miujiza hiyo inaonyesha mambo ambayo Yesu atafanyia wanadamu akiwa Mfalme wa Ufalme wa Mungu.

Je! unakumbuka jinsi Mfalme Daudi alivyokuwa amefanya Yerusalemu kuwa mji mkuu wa ufalme wake? Yesu alieleza kwamba Ufalme wa Mungu haungekuwa hapa duniani, bali ungekuwa mbinguni. (Yohana 18:36) Ndiyo sababu Ufalme huo unaitwa “Yerusalemu wa mbinguni.”—Waebrania 12:22, 28.

Yesu alieleza sheria ambazo ingekuwa lazima watii wale ambao wangekuwa raia za Ufalme huo. Sheria hizo sasa zimo katika Biblia. Sheria za maana zaidi zilikuwa za kwamba imewapasa watu wampende Mungu, tena wapendane wao kwa wao.—Mathayo 22:37-39.

Yesu alifunua pia kwamba hangekuwa peke yake katika kutawala Ufalme wake. Kungekuwa na wanadamu waliochaguliwa kwenda mbinguni wakatawale huko pamoja naye. (Luka 12:32; Yohana 14:3) Kungekuwa wangapi? Ufunuo 14:1 unajibu: 144,000.

Ikiwa ni watu 144,000 tu wanaoenda mbinguni wakatawale pamoja na Yesu, wanadamu wanaobaki wanaweza kutumainia nini?

Biblia yasema: “Waadilifu wenyewe wataimiliki dunia, nao watakaa milele juu yake.”—Zaburi 37:29, NW.

Wale watakaoishi duniani milele wanaitwa “kondoo wengine.”—Yohana 10:16.

Hivyo kuna matumaini mawili. Kuna watu 144,000 wenye kualikwa na Yehova Mungu waende mbinguni wakatawale pamoja na Yesu Kristo. Lakini mamilioni wengine wana tumaini hakika la kuishi duniani milele wakiwa raia za Ufalme wake.—Ufunuo 5:10.

Shetani alimchukia Yesu, akampinga. Yesu alipokwisha kuhubiri kwa miaka mitatu na nusu, Shetani alifanya mpango akamatwe na kuuawa kwa kupigiliwa misumari kwenye mti. Kwa nini Mungu aliruhusu hilo?

Kumbuka, sote tunafanya dhambi na tunastahili kufa kwa sababu ya kuwa watoto wa Adamu.—Warumi 6:23.

Kumbuka, pia, kwamba kwa sababu Yesu alizaliwa kimuujiza, alikuwa mkamilifu na hakustahili kufa. Hata hivyo, Mungu aliruhusu Shetani ‘amponde Yesu kisigino,’ amuue. Lakini Mungu alimfufua tena kwenye uzima akiwa roho asiyeweza kufa. Kwa kuwa alikuwa bado ana ile haki ya kwenye uzima mkamilifu wa kibinadamu, sasa angeweza kuitumia haki hiyo atukomboe sisi binadamu katika dhambi.—Mwanzo 3:15; Warumi 5:12, 21; Mathayo 20:28.

Ili kutusaidia tuelewe kabisa maana ya sadaka ya Yesu, Biblia inaisema kwa kutumia vielelezo vya kiunabii.

Kwa mfano, unakumbuka jinsi Yehova alivyomwambia Abrahamu amtoe mwanaye awe sadaka, ili ajaribu upendo wake?

Hiyo ilikuwa kielelezo cha kiunabii cha kutolewa kwa Yesu kuwa sadaka. Ilionyesha jinsi upendo wa Yehova kwa wanadamu ulivyokuwa mkubwa sana hata akaruhusu Mwanaye, Yesu, afe kwa ajili yetu tupate kuwa na uzima.—Yohana 3:16.

Je! waikumbuka njia aliyotumia Yehova kuwaokoa Waisraeli katika Misri, akaokoa wazaliwa wa kwanza wao kwa kuagiza malaika wa kifo awapite?—Kutoka 12:12, 13.

Hiyo ilikuwa kielelezo cha kiunabii. Kama vile damu ya mwana-kondoo ilivyomaanisha uhai wa wazaliwa wa kwanza wa Waisraeli, damu iliyomwagwa ya Yesu inamaanisha uhai kwa wale wanaomwamini. Na kama vile matukio ya usiku ule yalivyomaanisha uhuru kwa Waisraeli, kifo cha Yesu kinawatolea wanadamu uhuru kutoka katika dhambi na kifo.

Ndiyo sababu Yesu aliitwa “Mwana-kondoo wa Mungu, aichukuaye dhambi ya ulimwengu.”—Yohana 1:29.

Hata hivyo, Yesu alipokuwa duniani alikusanya pia wanafunzi, akawazoeza ili wazihubiri habari njema za Ufalme, hata baada ya kufa kwake.—Mathayo 10:5; Luka 10:1.

Hao ndio waliokuwa wanadamu wa kwanza kuchaguliwa na Mungu wakatawale pamoja na Yesu katika Ufalme wake.—Luka 12:32.

Unakumbuka Mungu aliwaahidi Wayahudi kwamba kama wangeishika Sheria ile, wangekuwa “ufalme wa makuhani”? Sasa walikuwa na nafasi ya kuwa sehemu ya Ufalme wa Mungu na kutumikia wakiwa makuhani wa kimbingu ikiwa wangemkubali Yesu. Lakini wengi wao walimkataa Yesu.

Hivyo tangu wakati huo, Wayahudi hawakuwa tena taifa teule la Mungu; Palestina haikuwa tena Nchi ya Ahadi.—Mathayo 21:43; 23:37, 38.

Tangu wakati wa Yesu mpaka wakati wetu, Yehova amekuwa akikusanya hawa ambao wangetawala mbinguni pamoja na Yesu. Kungali kuna elfu wachache wao walio hai duniani leo. Tunawaita mabaki wapakwa-mafuta.—Ufunuo 12:17.

Sasa, unaanza kuona Ufalme wa Mungu ulivyo. Ni serikali mbinguni, mfalme wake ni Yesu Kristo, na wanaojiunga naye ni watu 144,000 kutoka duniani. Utatawala wanadamu waaminifu duniani na utakuwa na nguvu za kuleta amani kwenye dunia.

Baada ya kufa kwake, Yesu alifufuliwa, akaenda mbinguni. Alingojea huko ili Mungu amwambie wakati wa kuanza kutawala akiwa Mfalme wa Ufalme wa Mungu. (Zaburi 110:1) Huo ungekuwa wakati gani?

Mara nyingine Yehova alipelekea watu ndoto ili awaambie mambo fulani juu ya Ufalme wake.

Katika wakati wa Danieli, Yehova alipeleka ndoto kama hiyo kwa Nebukadreza, mfalme wa Babuloni. Ilikuwa ndoto ya mti mkubwa mno.—Danieli 4:10-37.

Mti huo ulikatwa, ukaangushwa chini, na kisiki chake kikafungwa pingu kwa miaka saba.

Mti huo ulikuwa mfano wa Nebukadreza. Kama vile kisiki hicho kilivyofungwa pingu kwa miaka saba, Nebukadreza alipoteza fahamu zake kwa miaka saba. Kisha fahamu zake zikarudishwa.

Yote hayo yalikuwa kielelezo cha kiunabii. Nebukadreza alikuwa mfano wa utawala wa Yehova ulimwenguni pote. Kwanza, utawala huo ulitumiwa kupitia wazao wa Mfalme Daudi katika Yerusalemu. Wababuloni waliposhinda Yerusalemu mwaka wa 607 K.W.K., ukoo huo wa wafalme ulikatizwa. Hakungekuwa kamwe mfalme mwingine katika ukoo wa Daudi “hata atakapokuja yeye ambaye ni haki yake.” (Ezekieli 21:27) Huyo alikuwa Yesu Kristo.

Ungekuwa muda gani kutoka mwaka wa 607 K.W.K. mpaka wakati Yesu angeanza kutawala? Ingekuwa miaka saba ya unabii. Yaani, miaka 2,520. (Ufunuo 12:6, 14) Na miaka 2,520 kutoka mwaka wa 607 K.W.K. inatuleta kwenye mwaka wa 1914 W.K.

Hivyo Yesu alianza kutawala katika mbingu mwaka wa 1914. Hiyo ilikuwa na maana gani?

Biblia inatuambia kupitia maono ya mtume Yohana.

Aliona mwanamke mbinguni akizaa mtoto wa kiume.—Ufunuo 12:1-12.

Mwanamke huyo alikuwa mfano wa tengenezo la Mungu mbinguni, lenye watumishi wa kimalaika wa Mungu mbinguni. Huyo mtoto wa kiume ni mfano wa Ufalme wa Mungu. ‘Ulizaliwa’ mwaka wa 1914.

Halafu jambo gani lilifuata? Jambo ambalo Yesu alifanya kwanza akiwa Mfalme ni kumfukuza Shetani, na malaika wale walioasi pamoja naye. Walifukuzwa mbinguni wakatupwa chini kwenye dunia.—Ufunuo 12:9.

Biblia inatuambia yaliyotokea: “Furahini mbingu, nanyi munaokaa ndani. Ole wao wanaokaa kwa dunia na bahari! Kwani yule Diabolo ameshuka kwenu mwenye gazabu nyingi kwa sababu anajua ana wakati mufupi tu.”—Ufunuo 12:12, Zaïre Swahili Bible.

Hivyo Yesu alipoanza kutawala mbinguni, maadui wake wakawa watendaji sana duniani. Kama Biblia ilivyotabiri, yeye alianza kutawala katikati ya maadui wake.—Zaburi 110:1, 2.

Hiyo ingekuwa na maana gani kwa wanadamu?

Yesu alituambia: vita, upungufu wa chakula, magonjwa, na matetemeko ya ardhi.—Mathayo 24:7, 8; Luka 21:10, 11.

Tumeona mambo hayo yakitukia tangu mwaka wa 1914, ambayo ni sababu nyingine kwa nini tunajua kwamba Ufalme huo ulianza kutawala wakati huo.

Ingekuwapo pia “huzuni kuu ya mataifa, wasijue njia ya kutokea . . . huku wanadamu wakizimia kwa sababu ya hofu.” (Luka 21:25, 26, NW) Tumeona hayo, pia, tangu mwaka wa 1914.

Mtume Paulo aliongeza kwamba watu wangekuwa “wenye kujipenda wenyewe, wenye kupenda fedha, . . . wasiotii wazazi wao, . . . wasiotaka kufanya suluhu, wasingiziaji, wasiojizuia.”—2 Timotheo 3:1-5.

Sasa unajua kwa nini maisha ni magumu sana leo. Shetani amekuwa mwenye kutenda sana. Lakini pia Ufalme wa Mungu umekuwa ukitenda.

Upesi baada ya mwaka wa 1914, mabaki ya wale wanaotumaini kutawala mbinguni pamoja na Yesu walianza kusimulia habari njema za kwamba Ufalme huo ulikuwa umesimamishwa. Sasa kazi hiyo imeenea dunia yote, kama Yesu alivyosema ingeenea.—Mathayo 24:14.

Kusudi la kazi hiyo ya kuhubiri ni nini?

Kwanza, ni kuwaambia watu juu ya Ufalme wa Mungu.

Pili, ni kusaidia watu waamue kama wanataka kuwa raia za Ufalme huo.

Yesu alisema kwamba katika siku zetu wanadamu wote wangegawanywa kuwa watu walio mfano wa kondoo na walio mfano wa mbuzi.—Mathayo 25:31-46.

“Kondoo” wangekuwa wale wanaompenda yeye na ndugu zake. “Mbuzi” wangekuwa wale wasiompenda yeye na ndugu zake.

“Kondoo” wangepokea uzima wa milele na “mbuzi” hawangepokea.

Kazi hiyo ya kugawanya inatimizwa kupitia kuhubiri habari njema za Ufalme.

Huu ni unabii uliotolewa na nabii Isaya.

“Na itakuwa katika siku za mwisho, mlima wa nyumba ya [Yehova] utawekwa imara juu ya milima, nao utainuliwa juu ya vilima; na mataifa yote watauendea makundi makundi.”—Isaya 2:2.

Wanadamu sasa wanakabili “siku za mwisho.”

“Nyumba” ya ibada ya Yehova ‘imeinuliwa’ juu ya dini za uwongo.

“Na mataifa mengi watakwenda na kusema, Njoni, twende juu mlimani kwa [Yehova], nyumbani kwa Mungu wa Yakobo, naye atatufundisha njia zake, nasi tutakwenda katika mapito yake.”—Isaya 2:3.

Hivyo, wengi kutoka mataifa yote wanakuja kumwabudu Yehova na kuwaalika wengine wajiunge nao. Wanajifunza jinsi ya kutenda kwa njia anayotaka Yehova.

“Nao watafua panga zao ziwe majembe, na mikuki yao iwe miundu; taifa halitainua upanga juu ya taifa lingine, wala hawatajifunza vita tena kamwe.”—Isaya 2:4.

Wale wanaomwabudu Yehova wana umoja na amani.

Matokeo ya utendaji huo kupitia Ufalme wa Mungu ni kwamba sasa kuna mamilioni mengi ya watu ulimwenguni pote ambao ni raia za Ufalme huo.

Wanakusanywa kuzunguka mabaki, waliosalia wa wale wanaotumaini kwenda mbinguni wakatawale pamoja na Kristo.

Wanapokea chakula cha kiroho kupitia tengenezo la Mungu.—Mathayo 24:45-47.

Wao ni udugu wa mataifa yote wa Wakristo wanaopendana kweli kweli.—Yohana 13:35.

Wanafurahia amani ya akili, tumaini la wakati ujao.—Wafilipi 4:7.

Upesi, habari njema zitakuwa zimehubiriwa. “Kondoo” watakuwa wamekusanywa. Ndipo Ufalme utafanya nini?

Unakumbuka kwamba Mfalme Daudi mwaminifu alishinda maadui wote wa watu wa Mungu? Ndivyo Mfalme Yesu atafanya.

Wakati mmoja Mfalme Nebukadreza aliota ndoto ya sanamu kubwa mno iliyofananisha serikali zote za ulimwengu tangu wakati wake mpaka wakati wetu huu.

Ndipo alipoona jiwe limechongwa kutoka mlima, likaivunja-vunja sanamu hiyo. Jiwe hilo lilifananisha Ufalme wa Mungu.

Maana yake ni uharibifu wa huu mfumo mbovu uliopo wa mambo.—Danieli 2:44.

Haya ni kati ya mambo ambayo Ufalme huo utaharibu.

Dini ya uwongo haitaonekana, kama jiwe la kusagia linalotupwa katika bahari.—Ufunuo 18:21.

Ndiyo sababu wote wanaopenda Mungu wanatiwa moyo watoke SASA katika dini ya uwongo.—Ufunuo 18:4.

Halafu Mfalme Yesu ‘atawapiga mataifa na kuwachunga kwa fimbo ya chuma.’—Ufunuo 19:15.

Kwa hiyo, Mashahidi wa Yehova, wajapolipa kodi zao na kutii sheria za nchi, hawajiingizi katika siasa.

Hatimaye, Shetani mwenyewe, yule “joka” mkubwa, anatupwa katika shimo refu sana.—Ufunuo 20:2, 3.

Watakaookoka dhiki hiyo ni “kondoo” tu, wale wanaomtii Yesu kuwa Mfalme.—Mathayo 25:31-34, 41, 46.

Mtume Yohana alipata maono ya “kondoo” watakaookoka dhiki hiyo.

“Nikaona, na tazama, mkutano mkubwa sana ambao hapana mtu awezaye kuuhesabu, watu wa kila taifa, na kabila, na jamaa, na lugha, wamesimama mbele ya kile kiti cha enzi, na mbele za Mwana-Kondoo, wamevikwa mavazi meupe, wana matawi ya mitende mikononi mwao.”—Ufunuo 7:9.

“Mkutano mkubwa” huo ni wale wote wanaoitikia kuhubiriwa kwa habari njema.

“Wanatoka katika dhiki ile iliyo kuu.”—Ufunuo 7:14.

“Matawi ya mitende” hayo yanaonyesha kwamba wanamkaribisha Yesu kuwa Mfalme wao.

Kuvaa kwao “mavazi meupe” ni mfano wa kwamba wanaamini kutolewa kwa Yesu kuwa dhabihu.

“Mwana-Kondoo” huyo ni Yesu Kristo.

Kisha wanafurahia baraka gani? Waikumbuka ile furaha katika Israeli wakati Mfalme Sulemani mwaminifu alipokuwa akitawala? Ilitoa mfano mdogo wa furaha itakayokuwapo duniani chini ya Mfalme Yesu.

Amani halisi itakuwapo katika wanadamu na kati ya watu na wanyama, kama Isaya alivyotabiri.—Zaburi 46:9; Isaya 11:6-9.

Kama Yesu alivyoponesha wagonjwa alipokuwa duniani, ndivyo atakavyoondolea wanadamu wote magonjwa.—Isaya 33:24.

Kama alivyolisha umati wa watu chakula, ndivyo atakavyomaliza kabisa upungufu wa chakula kati ya wanadamu wote.—Zaburi 72:16.

Kama alivyowafufua wafu, ndivyo atakavyowafufua wale wafu ambao hawakuwa na nafasi kubwa ya kuutii Ufalme wa Mungu.—Yohana 5:28, 29.

Hatua kwa hatua, atarudisha wanadamu kwenye ukamilifu ule ambao Adamu alipoteza.

Je! huo si wakati ujao ulio mzuri ajabu? Wewe ungependa kuja kuuona? Ikiwa ndivyo, jitahidi ili uweze kuutii sasa Ufalme wa Mungu, upate kuwa mmoja wa wale “kondoo.”

Jifunze Biblia upate kumjua Yehova Mungu na Yesu Kristo.—Yohana 17:3.

Shirikiana pamoja na wengine ambao pia wanautii Ufalme.—Waebrania 10:25.

Jifunze uzijue sheria za Ufalme na kuzitii.—Isaya 2:3, 4.

Weka maisha yako wakfu ili umtumikie Yehova na kubatizwa.—Mathayo 28:19, 20.

Epuka mambo yanayomchukiza Yehova Mungu, kama vile wivi, kusema uwongo, uzinzi, uasherati, na ulevi.—1 Wakorintho 6:9-11.

Shiriki kuzihubiri habari njema za Ufalme.—Mathayo 24:14.

Ndipo kwa msaada wa Mungu, utaiona ikirudishwa ile Paradiso ambayo Adamu alipotezea wazao wake. Utaona ahadi hii ikitimizwa: “Nikasikia sauti kubwa toka [kiti cha ufalme], ikisema: Tazama, hema ya Mungu ni pamoja na watu, naye atakaa pamoja nao, nao watakuwa watu wake, na Mungu mwenyewe atakuwa pamoja nao, atakuwa Mungu wao. Naye atapangusa kila chozi katika macho yao; wala mauti haitakuwa tena; wala maombolezo, wala kilio, wala uchungu hautakuwa tena; kwa maana [mambo] ya kwanza yamekwisha kupita.”—Ufunuo 21:3, 4, ZSB.

[Chati katika ukurasa wa 20]

(Ona mpangilio kamili katika nakala iliyochapishwa)

607 K.W.K.. 1914 W.K.

K.W.K..  W.K.

500 1,000 1,500 2,000 2,520

[Picha katika ukurasa wa 11]

Abrahamu

Isaka

Yakobo

Yuda

Daudi

[Picha katika ukurasa wa 14]

144,000

[Picha katika ukurasa wa 16]

Adamu

Yesu