Maisha na Huduma ya Yesu

Njia ya Uzima

NJIA ya uzima ni ile ya kufuata sana mafundisho ya Yesu. Lakini si jambo rahisi kufanya hivyo. Kwa mfano, Mafarisayo wana maelekeo ya kuhukumu wengine vikali, na inaonekana sana kwamba watu wengi wanawaiga. Kwa hiyo Yesu anapoendeleza Mahubiri ya Mlimani yake, yeye anaonya hivi: “Msihukumu, msije mkahukumiwa ninyi. Kwa kuwa hukumu ile mhukumuyo, ndiyo mtakayohukumiwa.”

Ni hatari kufuata uongozi wa Mafarisayo wenye kulaumu watu kupita kiasi. Kulingana na masimulizi ya Luka, Yesu anatoa mfano juu ya hatari hiyo kwa kusema: “Je! aliye kipofu aweza kuongoza kipofu? Hawatatumbukia shimoni wote wawili?”

Kulaumu-laumu wengine mno, kukuza na kuwaonea, ni kosa kubwa. Kwa hiyo Yesu anauliza: “Utamwambiaje nduguyo, Niache nikitoe kibanzi katika jicho lake; na kumbe! mna boriti ndani ya jicho lako mwenyewe? Mnafiki wewe, itoe kwanza ile boriti katika jicho lako mwenyewe; ndipo utakapoona vema kukitoa kile kibanzi katika jicho la ndugu yako.”

Hilo halimaanishi kwamba wanafunzi wa Yesu hawapaswi kutumia utambuzi wo wote kuhusiana na watu wengine, kwa maana yeye anasema: “Msiwape mbwa kilicho kitakatifu, wala msitupe lulu zenu mbele ya nguruwe.” Kweli zinazotoka Neno la Mungu ni takatifu. Ziko kama lulu za mfano. Lakini ikiwa watu fulani mmoja mmoja, walio kama mbwa au nguruwe, hawaonyeshi uthamini wo wote kwa kweli hizo zenye thamani kubwa, wanafunzi wa Yesu wanapaswa kuwaacha watu hao wakatafute masikio yenye kuitikia zaidi.

Ingawa Yesu amekwisha kuzungumza sala mapema katika mahubiri yake, sasa anakazia uhitaji wa kudumu katika sala. “Endeleeni kuomba,” yeye anahimiza, “nacho kitapewa kwa ninyi.” (NW) Kutoa mfano wa utayari wa Mungu kujibu sala, Yesu anauliza: “Kuna mtu yupi kwenu, ambaye, mwanawe akimwomba mkate, atampa jiwe? . . . basi ikiwa ninyi, mlio waovu, mnajua kuwapa watoto wenu vipawa vyema, je! si zaidi sana Baba yenu aliye mbinguni atawapa mema wao wamwombao?”

Ndipo Yesu anapotoa ile ambayo imekuwa kanuni ya mwenendo inayojulikana na wengi kuwa Kanuni Bora. Yeye anasema: “Basi yo yote myatakayo mtendewe na watu, nanyi watendeeni vivyo hivyo.” Kuishi kulingana na kanuni hiyo kunatia ndani kuchukua hatua ya uhakika katika kufanyia wengine mema, kuwatendea kama vile wewe unavyotaka utendewe.

Kwamba njia ya uzima si rahisi inafunuliwa na maagizo ya Yesu: “Ingieni kwa kupitia mlango ulio mwembamba; maana mlango ni mpana, na njia ni pana iendayo upotevuni [yenye kuongoza katika uharibifu, NW], nao ni wengi waingiao kwa mlango huo. Bali mlango ni mwembamba, na njia imesonga iendayo uzimani, nao waionao ni wachache.”

Hatari ya kupotezwa ni kubwa, kwa hiyo Yesu anaonya: “Jihadharini na manabii wa uwongo, watu wanaowajia wamevaa mavazi ya kondoo, walakini kwa ndani ni mbwa-mwitu wakali.” Kama vile miti myema na mibaya inavyoweza kutambuliwa kwa matunda yayo, Yesu anasema, manabii wa uwongo wanaweza pia kutambuliwa kwa mwenendo na mafundisho yao.

Akiendelea, Yesu anaeleza kwamba si yale tu anayosema mtu yanayomfanya awe mwanafunzi Wake bali ni yale anayotenda. Watu fulani wanadai kwamba Yesu ndiye Bwana wao, lakini ikiwa wao hawatendi mapenzi ya Baba yake, yeye anasema: “Nitawaambia dhahiri, Sikuwajua ninyi kamwe; ondokeni kwangu, mtendao maovu.”

Mwisho, Yesu anautoa ule umalizio wa mahubiri yake ambao unastahili kukumbukwa. Anasema: “Kila asikiaye hayo maneno yangu, na kuyafanya, atafananishwa na mtu mwenye akili, aliyejenga nyumba yake juu ya mwamba; mvua ikanyesha, mafuriko yakaja, pepo zikavuma, zikaipiga nyumba ile, isianguke; kwa maana misingi yake imewekwa juu ya mwamba.”

Kwa upande ule mwingine, Yesu anatangaza hivi: “Kila asikiaye hayo maneno yangu asiyafanye, atafananishwa na mtu mpumbavu, aliyejenga nyumba yake juu ya mchanga; mvua ikanyesha, mafuriko yakaja, pepo zikavuma, zikaipiga nyumba ile, ikaanguka; nalo anguko lake likawa kubwa.”

Yesu anapomaliza mahubiri yake, makutano wanashangazwa sana na njia yake ya kufundisha, kwa maana yeye anawafundisha kama mtu mwenye mamlaka wala si kama viongozi wao wa kidini. Mathayo 7:1-29; Luka 6:27-49.

◆ Yesu alisema nini juu ya kuhukumu wengine, na hata hivyo alionyeshaje kwamba wanafunzi wake walihitaji kutumia utambuzi kuhusu watu?

◆ Yesu alizidi kusema nini kuhusu sala, naye alitoa kanuni gani ya mwenendo?

◆ Yesu alionyeshaje kwamba njia ya uzima haingekuwa rahisi na kwamba kuna hatari ya kupotezwa?

◆ Yesu alimaliziaje mahubiri yake, nayo yakawa na matokeo gani?