Vijana Wenye Wakati Ujao Salama

“KAMA vile [kisa cha ubakaji] chochote kiwezavyo kuwa chenye kuogofya na cha kuchukiza mno”—hivyo ndivyo hakimu aliyekuwa akiongoza kesi ya majuzi alivyofafanua huo uhalifu. Genge la matineja wanane, wenye umri wa kuanzia miaka 14 hadi 18, lilimvizia mtalii wa kike katika eneo fulani ndani ya jiji la London, likamshambulia kingono kwa kurudia-rudia, kisha likamtupa kwenye mfereji uliokuwa karibu ingawa alisema kwamba hangeweza kuogelea. Yaeleweka kwamba, mama ya mmojawapo wa matineja hao alijulisha wazi kwamba alihisi akiwa mgonjwa alipoona ripoti ya habari za televisheni juu ya mambo ambayo mwana wake alikuwa amefanya.

Kwa kusikitisha, tukio hilo ladhihirisha linalotukia katika jamii leo. Unyama umekuwa jambo la kawaida, uwe katika utendaji wa kihalifu, zogo la nyumbani, au mapambano ya kikabila ya Wabalkani, Afrika ya kati na magharibi, na kwingineko. Vijana hukua katikati ya hali hizo, au wao huzisikia mara nyingi. Basi, si ajabu kwamba wengi hupata kuwa wakatili, wasioonyesha “shauku ya kiasili,” na “wasio na hali ya kujidhibiti.”—2 Timotheo 3:3.

“Wakali”

Mtume Mkristo Paulo alipomwandikia mzee mwenzake Timotheo barua yake ya pili, Roma ilikuwa serikali kuu ya ulimwengu. Ujahili na ukatili yalikuwa mambo yaliyoenea katika viwanja vya michezo vya Roma. Na bado, Paulo alionya kwamba wakati ujao, nyakati zingepata kuwa “ngumu kushughulika nazo.” (2 Timotheo 3:1) Kwa kupendeza, neno la Kigiriki lifafanualo nyakati hizi kuwa “ngumu kushughulika nazo” latia ndani wazo la kuwa ‘kali.’ Tukio fulani wakati wa huduma ya kidunia ya Yesu zaidi ya miaka 30 mapema laonyesha jambo lililosababisha ukali fulani wa wakati wake.

Yesu alikuwa ametoka tu kuwasili kwa mashua kwenye ukingo wa mashariki wa Bahari ya Galilaya. Alipokuwa akikanyaga kwenye ukingo, wanaume wawili walimkabili. Sura yao isiyostaarabika na kupiga mayowe kwao kulifanya ieleweke kabisa kwamba jambo fulani kuwahusu halikuwa sawa hata kidogo. Walikuwa “wakali isivyo kawaida,” kwa hakika, walikuwa wamepagawa na roho waovu.a Walilopaaza sauti lilitokana na roho waovu walioongoza matendo yao ya jeuri. Wanaume hao walipiga mayowe wakisema hivi: “Tuna nini nawe, Mwana wa Mungu? Je, ulikuja hapa kututesa-tesa kabla ya wakati uliowekwa?” Roho waovu waliowapagaa wanaume hao wawili walijua vizuri kwamba Mungu alikuwa tayari ameweka wakati wa kutekeleza hukumu yake dhidi ya roho waovu. Hilo lingemaanisha uharibifu wao udumuo milele. Lakini hadi wakati huo walikuwa wadhihirishe uwezo wao mbalimbali unaopita ule wa kibinadamu ili kuchochea ujeuri mkali. Utendaji wa Yesu wa kimuujiza wa kuwafukuza roho waovu hao ndio tu ulioletea wanaume hao wawili kitulizo.—Mathayo 8:28-32; Yuda 6.

Watu leo, kutia na vijana, watendapo kwa njia yenye kichaa, yafaa tukumbuke tukio hilo. Kwa nini? Kwa sababu katika karne hii ya 20, twakabili hatari ya namna hiyo, kama vile kitabu cha mwisho cha Biblia, Ufunuo, kielezavyo: “Ole wa dunia na wa bahari, kwa sababu Ibilisi ameteremka kwenu, akiwa na hasira kubwa, akijua ana kipindi kifupi cha wakati.” (Ufunuo 12:12) Tafadhali, ona kwamba kutwezwa huko kwa Shetani kwaandamana na “hasira kubwa” kwa sababu ajua kwamba wakati wake ni mfupi.

Kushambuliwa

Kama itajwavyo mara nyingi kwenye kurasa za jarida hili, Kristo Yesu alitawazwa awe Mfalme wa Ufalme wa Mungu katika mbingu mwaka wa 1914. Mara moja Yesu alichukua hatua dhidi ya adui mkuu wa Mungu, Shetani. Hivyo, Ibilisi na roho waovu wake wamefukuzwa kutoka mbinguni, nao sasa waelekeza uangalifu wao juu ya dunia hii. (Ufunuo 12:7-9) Kiasi cha uvutano wake kikiwa kimewekewa mipaka sana, Shetani “hutembea huku na huku kama simba anayenguruma, akitafuta sana kunyafua mtu fulani.” (1 Petro 5:8) Ni nani walio mawindo rahisi kwake? Je, haieleweki kwamba ingekuwa wale ambao hasa hawana uzoefu katika maisha na mahusiano ya kibinadamu? Hivyo vijana leo wamekuwa malengo ya Ibilisi. Kupitia kufuatia kwingi kwao muziki na wasaa, wanatumiwa vibaya kwa urahisi na Ibilisi.—Waefeso 6:11, 12.

Hata vijana wajaribupo kufanikisha maisha yao, wao hujikuta wanazuiwa. Tangu mwisho wa Vita ya Ulimwengu ya Pili, watu katika nyingi za nchi zilizokuwa vitani awali wamejaribu kulipia kwa kutolea familia zao mtindo-maisha wa ukwasi. Mali za kimwili, wasaa na burudani ya kupita kiasi, ni mambo ambayo yamekuwa miradi mikubwa. Tokeo ni kwamba wengi wameteseka. “Waazimiao kuwa matajiri,” Paulo alimwonya Timotheo, “huanguka ndani ya kishawishi na mtego na tamaa nyingi zisizo za akili na zenye kuumiza . . . Kwa maana kupenda fedha ni mzizi wa mambo mabaya ya namna zote, na kwa kujitahidi kufikilia kupenda huku wengine . . . wamejichoma wenyewe kotekote kwa maumivu mengi.” (1 Timotheo 6:9, 10) Kwa ujumla, twakuta watu wa jamii ya leo ya kufuatia vitu vya kimwili wakiwa wamechomwa kwa maumivu ya kiuchumi, kifedha, na kihisia-moyo. Miongoni mwao mna vijana wengi, wahasiriwa wa hila hiyo ya adui mkuu wa Mungu.

Ingawa hivyo, kwa kufurahisha kuna habari njema. Nayo yawahusu vijana, ambao wana wakati ujao salama mbele yao. Yawezekanaje?

Tafuteni Sana Nanyi Mtapata

Vijana wengi wana miradi ya juu. Wao hukataa viwango vinavyoharibika ambavyo ni vya kawaida miongoni mwa watu wazima. Wao husita kwa sababu ya mtazamo wa ukosefu wa haki na wa kutojali wa wanasiasa na wafanyabiashara wenye kutaka mamlaka. Ikiwa wewe ni kijana, labda hivyo ndivyo uhisivyo.

Mfikirie Cedric, kijana aliye katika miaka ya mwishomwisho ya utineja, ambaye kisa chake si tofauti hata kidogo na vya wengine.b Akiwa mtoto, alihofu mambo mengi, kutia ndani kuhofu kifo. Hakujua kusudi la uhai. Kwa sababu ya kutopata majibu ya maswali yake kufikia wakati alipokuwa na umri wa miaka 15, alijitoa kutafakari juu ya maana ya uhai akiwa miongoni mwa vijana wengine wadhanifu. “Tulikuwa tukivuta kasumba na kuketi tukizungumza kwa saa nyingi,” kijana huyo akumbuka. “Uliamini kwamba kila mtu alifikiri sawa nawe, lakini hakuna yeyote aliyekuwa na majibu.”

Cedric, kama vijana wengi, alikuwa na hamu ya kuwa na msisimko. Kutumia madawa ya kulevya tu hakukumridhisha. Upesi akahusika katika kuiba na katika kulangua madawa ya kulevya. Bado alitafuta misisimko mipya. Alianza kuiba kwa ajili ya wale walioagiza vitu hususa. “Nilionea shangwe kufanya hivyo,” akubali. “Lakini sikumwibia mtu wa kawaida chochote kamwe. Ikiwa niliiba gari kwa ajili ya matumizi ya muda tu, nililiacha likiwa katika hali nzuri. Mahali pa biashara nilipovunja usiku ni pale tu nilipojua kwamba palikuwa pamekatiwa bima. Kufanya hivyo kulinisaidia kutetea mambo niliyofanya.” Kama uwezavyo kutarajia, Cedric aliishia gerezani.

Cedric akumbuka hivi: “Mark, mfungwa mwenzangu, aliongea nami. Akitambua kwamba nilikuwa na msalaba mkubwa uliochanjwa kwenye sehemu ya juu ya mkono wangu, aliniuliza kwa nini nilikuwa na mchoro huo. Alifikiri lazima uwe na maana ya kidini kwangu.” Majuma kadhaa baadaye, Mark alimpa Cedric nakala ya kitabu Unaweza Kuishi Milele Katika Paradiso Duniani.c “‘Unaweza Kuishi Milele’—maneno hayo machache yalinivutia mara moja. Hilo ndilo tulilokuwa tukizungumza juu yake sikuzote, lakini hatukuwa tumeweza kamwe kugundua kweli kuhusu kuishi milele.” Baada ya mazungumzo mengi na mmoja wa Mashahidi wa Yehova aliyezuru hilo gereza, Cedric alipata kung’amua kwamba jambo alilotamani lingeweza kufikiwa—lakini kwa njia ya Mungu tu.

“Mara tu nilipoacha kushirikiana na rafiki zangu wa awali, nilifanya maendeleo haraka,” Cedric aeleza. Maendeleo yake katika uelewevu na kupata furaha ya kweli hayajawa rahisi. “Bado nayafanyia kazi,” asema. “Lazima niwe mwangalifu juu ya jinsi ninavyofikiri.” Ndiyo, Cedric sasa ang’amua kwamba kuwa mdhanifu kulimwongoza kuingia katika mtego wa Ibilisi, akifikiri kwamba miradi yake ingeweza kufikiwa tu kwa kushiriki katika utendaji mbalimbali ambao wakazia msisimko.

Kwa kupendeza, Cedric amekuwa nje ya gereza kwa muda mrefu, naye huonea shangwe ushirika wa ukawaida na wengine ambao wamepata walilokuwa wakitafuta sana. Sasa yeye ni mmoja wa Mashahidi wa Yehova na hushiriki tumaini lao la kuishi katika Paradiso hapa duniani. Atazamia pia mwisho wa uvutano wote wa kishetani.

Bila shaka, si vijana tu kama Cedric walio na wakati ujao salama; wengine pia wamelelewa na wazazi wenye kumhofu Mungu, ambao walikaza kikiki akilini mwa watoto wao kupenda kweli ya Biblia.

Mazoezi ya Kimungu Huleta Faida

“Mlee mtoto katika njia impasayo, naye hataiacha, hata atakapokuwa mzee,” akaandika Mfalme Solomoni wa kale mwenye hekima. (Mithali 22:6) Hilo limethibitika kuwa kweli katika kisa cha vijana wengi wenye nafsi yote ambao wamechagua kufuata kiwango cha Biblia.

Sheila, Gordon, na Sarah walifanya hivyo. Wakumbuka kwamba wazazi wao walikazia sana kutii amri ya Kristo ya ‘kwenda kufanya wanafunzi’ kwa kuhubiri habari njema ya Ufalme. (Mathayo 24:14; 28:19, 20) “Katika uamuzi wowote ambao ulipasa kufanywa, Mama nami tulizoea kuambiana, ‘Utaathirije kazi ya kuhubiri?’” akumbuka Sheila. “Tuliacha miradi mingi kwa sababu ya kusababu huko,” akubali, akiongeza hivi, “lakini ilikuwa baraka wee!” Hata mwishoni mwa siku ndefu walizotumia kuzuru nyumba za watu wakiwa na habari njema, Sheila na mama yake walipiga mwendo kurudi nyumbani wakiimba. “Shangwe yangu ilikuwa kamili,” asema. “Naweza kuihisi sasa.”

Gordon akumbuka Jumamosi nyingi alizoonea shangwe. “Nilialikwa nyumbani kwa wazee wa kutaniko, ambako tulikuwa na chemsha bongo na mazungumzo yenye kufaidi juu ya Biblia. Tulitiwa moyo kukariri mistari ya Biblia, kusema kwa uhuru habari za Kimaandiko, kusimulia jambo lililoonwa katika kuhubiri, na kujifunza jinsi kazi ya Ufalme ilivyokuwa ikipanuka,” Gordon akumbuka. “Mambo yote hayo yalinisaidia kuweka msingi mzuri na kusitawisha kumpenda Yehova Mungu.”

Sarah ana kumbukumbu zenye furaha za jioni alizotumia pamoja na Mashahidi waliozuru. “Tulikula mlo pamoja. Kisha ili kumalizia siku, tulicheza piano, tukiandamana na waliokuwa wakiimba nyimbo juu ya Ufalme wa Mungu. Muziki ulitusaidia kwelikweli, hasa wakati wa miaka yetu ya shule, kwa sababu ulituruhusu kufanya mambo pamoja tukiwa familia.”

Bila shaka, si vijana wote watafutao kumpendeza Yehova walio na hali za familia zilizo bora. Hata hivyo, ushirika wa karibu na familia nyingine za Mashahidi kutanikoni huwatolea usalama na uhusiano wa karibu.

Thamini Sana Msingi Salama kwa Ajili ya Wakati Ujao

Vijana leo wana chaguo. Waweza kuendelea na ulimwengu huu mwovu ukaribiao kutumbukia kwenye uharibifu katika “dhiki kubwa” inayokuja ambayo ilitabiriwa na Yesu. Au waweza ‘kumwekea Mungu tumaini lao wazishike amri zake,’ kama alivyoimba Asafu, mtunga-zaburi aliyepuliziwa. Kumtii Mungu kutawazuia kupata kuwa “kizazi cha ukaidi na uasi. Kizazi kisichojitengeneza moyo, wala roho yake haikuwa amini kwa Mungu.”—Mathayo 24:21; Zaburi 78:6-8.

Katika makutaniko zaidi ya 80,000 ya Mashahidi wa Yehova ulimwenguni pote, utakuta vijana wengi wawezao kukuvutia. Wamesikiza shauri la Paulo kwa kijana Timotheo “kufanya mema, kuwa matajiri katika kazi zilizo bora, kuwa wakarimu, tayari kushiriki, wakijiwekea wenyewe kuwa hazina salama msingi bora kwa ajili ya wakati ujao.” Tokeo ni kwamba, sasa wamepata “mshiko imara juu ya uhai ulio halisi.” (1 Timotheo 6:18, 19) Pata kujua mengi zaidi juu ya Wakristo hao wa kweli kwa kuhudhuria mikutano yao. Kisha wewe pia waweza kuwa na tumaini la wakati ujao salama.

[Maelezo ya Chini]

[Picha katika ukurasa wa 7]

Roho waovu waliwapagaa wale wanaume “wakali isivyo kawaida” ambao Yesu aliwaponya

[Picha katika ukurasa wa 8]

Kujenga “msingi bora kwa ajili ya wakati ujao”