Kwenye Bahari ya Galilaya

SIMULIZI la Marko 4:35-41 linasema kwamba Yesu na wanafunzi wake walipanda mashua ili wavuke Bahari ya Galilaya. Linasema hivi: “Sasa kukatokea dhoruba kubwa ya upepo wenye nguvu nyingi, na mawimbi yakawa yakiipiga mashua kwa nguvu, hivi kwamba karibu mashua ifunikwe na maji. Lakini yeye [Yesu] alikuwa katika tezi, akiwa amelalia mto.”

Katika Biblia, neno la Kigiriki linalotafsiriwa “mto” hupatikana tu kwenye andiko hilo. Hivyo, wasomi hawafahamu maana halisi ya neno lililotumiwa katika mstari huo. Katika Biblia nyingi, neno hilo limetafsiriwa kuwa “mto.” Lakini huo ulikuwa mto wa aina gani? Katika lugha ya awali, Marko anaufafanua mto huo kwa njia inayoonyesha kwamba ulikuwa kimojawapo cha vifaa vya mashua. Mashua iliyogunduliwa karibu na Bahari ya Galilaya mnamo mwaka wa 1986, imewasaidia kuelewa maana ya neno la Kigiriki ambalo Marko alitumia.

Utafiti umeonyesha kwamba mashua hiyo yenye urefu wa meta nane iliendeshwa kwa matanga na makasia. Mashua hiyo ilitumiwa katika uvuvi na ilikuwa na tezi ambayo ingetegemeza wavu mzito. Inakadiriwa kwamba mashua hiyo ilitumiwa kati ya mwaka wa 100 K.W.K. na 70 W.K. na hivyo inaweza kuonyesha jinsi mashua ambayo Yesu na wanafunzi wake walitumia ilivyokuwa. Shelley Wachsmann, ambaye alihusika katika kuchimbua mashua hiyo, alitunga kitabu The Sea of Galilee Boat—An Extraordinary 2000 Year Old Discovery. Anasema kwamba “mto” ambao Yesu alilalia ulikuwa gunia la mchanga lililotumiwa kusawazisha uzito wa mashua. Mvuvi fulani mwenye ujuzi huko Jaffa, aliye na ustadi wa kuvua kwa nyavu alisema hivi: “Nilipokuwa mchanga, mashua nilizotumia katika Bahari ya Mediterania zilikuwa na gunia moja au magunia mawili ya mchanga. . . . Magunia hayo yaliwekwa kwenye mashua ili kusawazisha uzito wa mashua. Lakini wakati hayakuwa yakitumiwa, tuliyaweka tezini. Halafu, ikiwa yeyote angekuwa mchovu, angeenda tezini na kulitumia gunia hilo la mchanga kama mto na kulala.”

Wasomi wengi huamini kwamba kulingana na simulizi la Marko, Yesu alilalia gunia la mchanga lililokuwa tezini, ambapo ndipo mahali salama zaidi katika mashua wakati wa dhoruba. Haidhuru mto huo ulikuwa wa aina gani, jambo muhimu ni lile tukio lililofuata. Kwa msaada na nguvu za Mungu, Yesu alituliza bahari iliyokuwa imechafuka. Hata wanafunzi waliulizana hivi: “Kwa kweli huyu ni nani, kwa sababu hata upepo na bahari zinamtii?”