“Nisaidie Mahali Ambapo Nahitaji Imani!”

“Babaye yule kijana akapaza sauti, akasema, Naamini, nisaidie kutokuamini kwangu [nisaidie mahali ambapo nahitaji imani, “NW”].”—MARKO 9:24.

 1. Ni nini kilichosababisha baba mmoja apaaze sauti, “Nisaidie mahali ambapo nahitaji imani”?

BABA ya mvulana mwenye kupagawa na roho mwovu alisimama mbele ya Yesu Kristo. Jinsi mwanamume huyo alivyotamani sana kwamba mtoto wake aponywe! Wanafunzi wa Yesu walikuwa wamekosa imani ya kutosha kuondosha roho mwovu huyo, lakini baba huyo akapaaza sauti hivi: “Naamini, nisaidie kutokuamini kwangu [nisaidie mahali ambapo nahitaji imani, NW].” Kupitia nguvu aliyopewa na Mungu, ndipo Yesu akamwondosha roho mwovu huyo, hiyo bila shaka ikiimarisha imani ya baba ya mvulana huyo.—Marko 9:14-29.

 2. Kwa habari ya imani, ni kwa njia gani mbili Wakristo hawaoni aibu?

² Kama baba mwenye kujaa tumaini wa mvulana huyo, mtumishi wa Yehova aliye mwaminifu-mshikamanifu haoni aibu kusema: ‘Mimi nina imani!’ Huenda wadhihaki wakakana nguvu ya Mungu, ukweli wa Neno lake, na hata kuwako kwake kwenyewe. Lakini Wakristo wa kweli hukiri kwa utayari kwamba wao wana imani katika Yehova Mungu. Hata hivyo, watu hao hao mmoja mmoja wanaposema kwa Baba yao wa kimbingu katika sala wangeweza kusihi hivi: “Nisaidie mahali ambapo nahitaji imani!” Pia wanafanya hivyo bila aibu, wakijua kwamba hata mitume wa Yesu Kristo waliomba hivi: “Tuongezee imani.”—Luka 17:5.

 3. Ni jambo gani lenye umaana juu ya jinsi Yohana alivyotumia neno “imani” katika Gospeli yake, na kwa nini hilo lilifaa?

³ Hasa Maandiko ya Kigiriki ya Kikristo yana mengi ya kusema juu ya imani. Kwa kweli, Gospeli ya Yohana hutumia maneno mbalimbali ya Kigiriki yanayohusiana na “imani” (shina la Kigiriki, pi·steu’o) kwa asilimia zaidi ya 40 mara nyingi kuliko Gospeli zile nyingine tatu zikiwa pamoja. Kwa kutumia kitenzi nyakati zote, Yohana alikazia kwamba kuwa na imani hakutoshi; kuizoea ni muhimu. Akiandika karibu na 98 W.K., yeye aliviona vikono vya uasi-imani vikinyooshwa ili viwafikilie na kuwatega Wakristo dhaifu katika imani. (Matendo 20:28-30; 2 Petro 2:1-3; 1 Yohana 2:18, 19) Hivyo basi ilikuwa muhimu kuzoea imani, kutoa uthibitisho wa imani hiyo kwa matendo ya ujitoaji kimungu. Nyakati ngumu zilikuwa mbele.

 4. Kwa nini hakuna lisilowezekana kwa wale walio na imani?

⁴ Imani huwezesha Wakristo kukabiliana na magumu yoyote. Yesu aliwaambia wanafunzi wake kwamba wakiwa na “imani kiasi cha punje ya haradali,” hakuna chochote kingekuwa kisichowezekana kwao. (Mathayo 17:20) Kwa njia hiyo, alikazia nguvu ya imani, tunda la roho takatifu. Hivyo Yesu alikazia, si lile ambalo wanadamu waweza kufanya, bali lile ambalo roho ya Mungu, au nguvu ya utendaji, yaweza kufanya. Wale waongozwao nayo hawafanyi vipingamizi ambavyo ni vitatizo tu viwe milima ya matatizo. Kutumia hekima ambayo roho ya Mungu hutoa huwasaidia wayaone mambo kwa maoni yapasayo. Hata matatizo mazito husinyaa yakawa madogo wakati yatiishwapo kwenye nguvu yenye kutegemeza ya imani.—Mathayo 21:21, 22; Marko 11:22-24; Luka 17:5, 6.

Kusali Ili Imani Isitindike

5-7. (a) Ni maneno gani ya kuonya juu ya imani ambayo Yesu alisema alipoanzisha Ukumbusho? (b) Imani ya Petro ilimwezeshaje kuimarisha ndugu zake?

⁵ Katika 33 W.K., Yesu aliadhimisha Sikukuu ya Kupitwa pamoja na wanafunzi wake kwa mara ya mwisho. Halafu, baada ya kumfukuza Yuda Iskariote, akaanzisha mwadhimisho wa Ukumbusho, akisema: “Nawawekea ninyi ufalme [agano, NW], kama vile Baba yangu alivyoniwekea mimi . . . Simoni, Simoni, tazama, Shetani amewataka ninyi apate kuwapepeta kama vile ngano; lakini nimekuombea wewe ili imani yako isitindike; nawe utakapoongoka waimarishe ndugu zako.”—Luka 22:28-32.

⁶ Yesu alisali ili imani ya Simoni Petro isizimie. Ingawa Petro alijisifu kwa uhakika wa kupita kiasi kwamba hangemkana Yesu kamwe, muda mfupi baada ya hapo alifanya hivyo mara tatu. (Luka 22:33, 34, 54-62) Kwa kweli, mchungaji alipopigwa akafa kama ilivyotabiriwa, kondoo walitawanyika. (Zekaria 13:7; Marko 14:27) Hata hivyo, Petro aliporudi kutoka anguko lake la kutumbukia katika mtego wa hofu, aliimarisha ndugu zake wa kiroho. Yeye alitokeza lile jambo la kuweka mwingine mahali pa Yuda Iskariote asiye mwaminifu. Akitenda kama msemaji wa mitume kwenye Pentekoste 33 W.K., Petro aliutumia wa kwanza wa “funguo” ambazo Yesu alimpa, akifungua njia ili Wayahudi wawe washiriki wa Ufalme. (Mathayo 16:19; Matendo 1:15–2:41) Shetani alikuwa amedai awapate mitume ili kuwapepeta kama ngano, lakini Mungu alihakikisha kwamba imani yao haikutindika.

⁷ Wazia jinsi Petro alivyohisi alipomsikia Yesu akisema: “Nimekuombea wewe ili imani yako isitindike.” Ebu fikiri! Bwana wake aliye pia Mkubwa-wa-Kazi alikuwa amesali kwamba imani ya Petro isitindike. Nayo haikutindika, au kuzimia. Kwa kweli, siku ya Pentekoste, Petro na wengine walipata kuwa ndio watu wa kwanza kupakwa mafuta na roho takatifu wawe watoto wa kiroho wa Mungu, wenye kutazamiwa kuwa warithi-washirika pamoja na Kristo katika utukufu wa kimbingu. Kwa kuwa wakati huo roho takatifu ilitenda juu yao kwa kadiri isiyotangulia kujulikana, wangeweza kuonyesha tunda layo, kutia na imani, kwa kadiri isiyopata kuwako kamwe. Lo, lilikuwa jibu zuri kama nini kwa nasihi yao: “Tuongezee imani”!—Luka 17:5; Wagalatia 3:2, 22-26; 5:22, 23.

Kukabili Mitihani Iliyoko Mbele Tukiwa na Imani

 8. Ni onyo gani la wakati wake ambalo tengenezo limetupa sisi kuhusu utimizo wa 1 Wathesalonike 5:3?

⁸ Kwa utimizo wa unabii wa Biblia, karibuni tutasikia kile kilio cha “Amani na usalama!” (1 Wathesalonike 5:3, NW) Je! jambo hilo lingeweza kutia imani yetu kwenye mtihani? Ndiyo, kwa maana sisi tumo katika hatari ya kunaswa bila kuwa chonjo na yale yaonekanayo kuwa mafanikio ambayo huenda mataifa yakapata katika kutokeza amani. Lakini hatutaishiriki roho ya watangazaji hao wa amani ikiwa tutazingatia akilini kwamba Yehova Mungu hatumii chochote cha viwakilisho vya ulimwengu huu kuufikia mradi huo. Yeye ana njia yake mwenyewe ya kuleta amani ya kweli, na hiyo ni kupitia Ufalme wake tu chini ya Yesu Kristo. Kwa hiyo, hata mataifa yawe na mafanikio gani katika kuthibitisha amani, yatakuwa mafupi tena kifumba-macho tu. Ili kutusaidia tuwe chonjo katika jambo hilo, “mtumwa mwaminifu mwenye akili” ataendelea kuchapisha maonyo ya wakati wake ili watumishi wa Yehova wasinaswe bila kuwa chonjo na ile mbiu ya kisingizio cha “Amani na usalama” itakayopigwa na mataifa ya mfumo huu wa kale wa mambo.—Mathayo 24:45-47.

 9. Kwa nini uharibifu wa Babuloni Mkubwa utataka moyo mkuu na imani kwa upande wetu?

⁹ Kilio cha “Amani na usalama!” kitakuwa ndicho kiishara cha “uharibifu wa ghafula” utakaokuja juu ya Babuloni Mkubwa, milki ya ulimwengu ya dini bandia. (Ufunuo 17:1-6; 18:4, 5) Hilo pia litatahini imani ya Kikristo. Huku dini bandia ikianguka kuwa mabomoko, je! Mashahidi wa Yehova watabaki imara katika imani? Bila shaka. Tukio hilo—lisilotarajiwa wala kufahamika kikamili katika akili za watu walio wengi—halitakuwa uanzilishi wa binadamu. Ni lazima watu wajue kwamba kwa kweli hiyo ni hukumu ya Yehova, katika utakaso wa jina ambalo dini bandia imelitukana kwa muda mrefu. Lakini watu wangeweza kujuaje mtu fulani asipowaambia? Tena ni nani mwingine angeweza kutarajiwa kuwaambia hivyo isipokuwa Mashahidi wa Yehova?—Linganisha Ezekieli 35:14, 15; Warumi 10:13-15.

10. Shambulio la Gogu juu ya watu wa Yehova litakuwaje mtihani wa imani pia?

¹⁰ Mashahidi wapakwa-mafuta wa Yehova na washirika wao wenye tumaini la kidunia wamekuwa na moyo mkuu unaohitajiwa ili kueleza wengine juu ya utekelezaji unaokaribia wa hukumu ya Yehova dhidi ya Babuloni Mkubwa na sehemu nyingine yote ya mfumo wa mambo wa Shetani. (2 Wakorintho 4:4) Katika fungu lake akiwa Gogu wa Magogu, lenye kuonyesha cheo chake cha sasa kilichoshushiwa heshima, Shetani ataongoza kijemadari majeshi yake ya kidunia yakafanye shambulio la kufa na kupona juu ya watu wa Mungu. Imani katika nguvu za kimungu za ulinzi kwa ajili ya Mashahidi wa Yehova itatahiniwa. Lakini twaweza kuwa na imani kwamba kama vile Neno la Mungu lilivyotabiri, Yehova ataopoa watu wake.—Ezekieli 38:16; 39:18-23.

11, 12. (a) Ni nini kilichohakikisha wokovu wa Noa na familia yake wakati wa Gharika? (b) Sisi hatutahitaji kufanya wasiwasi juu ya nini wakati wa dhiki kubwa?

¹¹ Leo, sisi hatujui ni jinsi gani hasa Yehova atawapa himaya watu wake katika ile “dhiki kubwa,” lakini hiyo si sababu ya kutia shaka kama atafanya hivyo. (Mathayo 24:21, 22) Hali ya watumishi wa kisasa wa Mungu itakuwa kama ile ambamo Noa na familia yake walijikuta wakati wa Gharika. Wakiwa wamefungiwa ndani ya safina kwa kuzungukwa na maji ya uvuruvuru wa uharibifu, yaelekea waliduwaa kwa kuhofishwa na wonyesho huu wa nguvu ya kimungu na ni lazima wawe walisali kwa moyo wa bidii. Hakuna wonyesho wowote wa Kimaandiko kwamba walifanya wasiwasi na kujiuliza hivi: ‘Je! kweli safina ni madhubuti kutosha kuziokoka kani za uharibifu? Je! tuna chakula cha kutosha kudumu mpaka Gharika imalizike? Je! tutaweza kukabiliana baadaye na hali zilizobadilika duniani?’ Matukio yaliyofuata yalithibitisha kwamba wasiwasi wa jinsi hiyo ungalikuwa usio na msingi.

¹² Ili kuhakikisha wokovu wao, Noa na familia yake walihitaji kuzoea imani. Hiyo ilimaanisha kufuata maagizo na miongozo ya roho takatifu ya Mungu. Wakati wa dhiki kubwa, itakuwa lazima kadiri hiyo hiyo tufuate miongozo ya roho takatifu na kutii maagizo kupitia tengenezo lake. Ndipo hatutakuwa na sababu yoyote kufanya wasiwasi na kuuliza: ‘Mahitaji yetu ya kiroho na ya kimwili yatatoshelezwaje? Ni uandalizi gani utakaofanywa kwa ajili ya watu wazee-wazee au wale wanaohitaji utunzi maalumu wa kitiba au matibabu? Yehova atafanyaje iwezekane sisi kuokoka tuingie katika ulimwengu mpya?’ Wakiwa na imani imara, watumishi wote wa Yehova walio waaminifu-washikamanifu wataacha mambo yote katika mikono yake hodari.—Linganisha Mathayo 6:25-33.

13. Dhiki kubwa ikiisha kuanza, kwa nini tutahitaji imani kama ya Abrahamu?

¹³ Dhiki kubwa ikiisha kuanza, bila shaka imani yetu katika Mungu itaimarishwa sana. Kwani, tutaona kwamba Yehova anatekeleza yale aliyosema angefanya. Tutakuwa tukiona utekelezaji wake wa hukumu kwa macho yetu wenyewe! Lakini je! sisi binafsi tutakuwa na imani ya kutosha kuamini kwamba wakati wa kuharibu waovu, Mungu atahifadhi watu wake? Je! tutakuwa kama Abrahamu, aliyekuwa na imani kwamba ‘Mhukumu ulimwengu wote atatenda haki,’ asiharibu mwadilifu pamoja na mwovu?—Mwanzo 18:23, 25.

14. Ni maswali gani yapasayo kutusababisha tuchanganue imani yetu na kutia bidii kuiimarisha?

¹⁴ Ni jambo la maana kama nini tujenge imani yetu sasa! Mwisho wa mfumo huu mwovu wa mambo ukiwa karibu sana, acheni turuhusu roho ya Mungu ituchochee kwenye “vitendo vitakatifu vya mwenendo na matendo ya ujitoaji kimungu.” (2 Petro 3:11-14, NW) Ndipo wakati wa dhiki kubwa sisi hatutakumbwa na fikira kama hizi zenye kufadhaisha: ‘Je! mimi nina ustahili hakika wa kupokea himaya ya Yehova? Je! mimi ningaliweza kufanya mengi zaidi katika utumishi wake? Kweli mimi nilitia bidii ya kutosha ili ‘kuuvaa utu mpya’? Je! mimi ni aina ya mtu ambaye Yehova ataka katika ulimwengu mpya?’ Maswali kama hayo ya kufikiria mambo kwa uzito yapasa kutusababisha tuchanganue imani yetu na kutia bidii kuiimarisha sasa hivi!—Wakolosai 3:8-10.

Imani ya Kutuponya

15. Nyakati fulani Yesu aliwaambia nini wale aliowaponya, lakini kwa nini jambo hilo haliungi mkono kuponya kwa imani kwa kisasa?

¹⁵ Yesu hakuwekea mipaka kazi zake za kuponya kimwili zifanyike kwa watu wenye imani peke yao. (Yohana 5:5-9, 13) Hivyo basi utendaji wake hauungi mkono lile fundisho lisilo la Kimaandiko la kuponya kwa imani. Ni kweli, nyakati fulani Yesu aliwaambia hivi wale aliowaponya: “Imani yako imekuponya.” (Mathayo 9:22; Marko 5:34; 10:52; Luka 8:48; 17:19; 18:42) Lakini kwa kusema hilo, alikuwa akionyesha tu kweli ya wazi: Kama wale wenye kusumbuka na ugonjwa wasingekuwa na imani katika uwezo wa Yesu wa kuponya, kwanza hata wasingalimjia ili waponywe.

16. Ni programu gani ya uponyaji ambayo Yesu anaelekeza leo?

¹⁶ Leo, Yesu Kristo anaelekeza programu ya uponyaji wa kiroho, na watu mmoja mmoja zaidi ya 4,000,000 wamejitia katika mstari wa kunufaika kutokana nayo. Wakiwa Mashahidi wa Yehova, wao wanaonea shangwe afya ya kiroho japo maradhi ya kimwili ambayo huenda wakawa wanayo. Wakristo wapakwa-mafuta miongoni mwao wana tumaini la kimbingu, nao ‘wanaviangalia visivyoonekana ambavyo ni vya milele.’ (2 Wakorintho 4:16-18; 5:6, 7) Na Wakristo walio na tumaini la kidunia watazama mbele kwenye vitendo vizuri ajabu vya uponyaji wa kimwili utakaotukia katika ulimwengu mpya wa Mungu.

17, 18. Ni uandalizi gani wa Yehova uelezwao kwenye Ufunuo 22:1, 2, na imani inatakiwaje ili sisi tunufaike?

¹⁷ Mtume Yohana alielekeza kwenye maandalizi ya Mungu ya uhai wa milele katika maneno haya kwenye Ufunuo 22:1, 2, NW: “Akanionyesha mto wa maji ya uhai, mwangavu kama fuwele ukitiririka nje kutoka kiti cha ufalme cha Mungu na cha Mwana-Kondoo kuteremka chini katikati ya njia pana yalo. Na upande huu wa mto na upande ule kulikuwa na miti ya uhai ikifanyiza mazao kumi na mawili ya tunda, ikitoa matunda yayo kila mwezi. Na majani ya miti yalikuwa kwa ajili ya kuponeshwa kwa mataifa.” “Maji ya uhai” yatia ndani Neno la Mungu la kweli na kila uandalizi wa Yehova wa kuponesha wanadamu watiifu kutoka dhambi na kifo na kuwapa uhai wa milele juu ya msingi wa dhabihu ya ukombozi ya Yesu. (Waefeso 5:26; 1 Yohana 2:1, 2) Wakiwa duniani, wafuasi wa Yesu 144,000 wapakwa-mafuta hunywa kutokana na uandalizi wa Mungu wa uhai kupitia Kristo na huitwa “miti mikubwa ya uadilifu.” (Isaya 61:1-3; Ufunuo 14:1-5, NW) Wamezaa tunda jingi la kiroho duniani. Wakiwa wafufuliwa mbinguni, wakati wa Utawala wa Kristo wa Miaka Elfu, watashiriki katika kutoa maandalizi ya ukombozi yatakayotumika kwa “kuponeshwa kwa mataifa” kutoka dhambi na kifo.

¹⁸ Kadiri imani yetu ilivyo na nguvu katika maandalizi hayo ya Mungu, ndivyo nia yetu itakavyokuwa kubwa zaidi kufuata miongozo ya roho yake kuyashiriki. Ukamilifu wa kimwili kwa wazi utakuja kwa kadiri mtu azoeavyo imani katika Kristo na kufanya maendeleo ya kiroho. Ingawa mtu atakuwa ameponywa kimwujiza kasoro kubwa za udhaifu mbalimbali, ataletwa karibu zaidi na ukamilifu kwa kadiri azoeavyo mambo yafaayo. Atakuwa akishiriki kwa ukawaida uandalizi wa Mungu wa uponyaji kwa njia ya dhabihu ya Kristo. Hivyo basi imani itaongoza kuponywa kwetu na kukamilishwa kwa njia ya kimwili.

‘Kaokolewa kwa Njia ya Imani’

19. Kwa nini ni muhimu sana kubaki imara katika imani?

¹⁹ Mpaka wakati pambazuko la ulimwengu mpya wa Mungu litakapofukuza giza la ulimwengu mwovu wa sasa, ni muhimu kama nini watumishi wa Yehova wabaki imara katika imani! Watu “wasioamini” watatupwa ndani ya “ziwa liwakalo moto na kiberiti,” kifo cha pili. Ikiwa hilo litatukia baadaye sana, itakuwa ni baada ya mtihani wa tamati kwenye mwisho wa Utawala wa Kristo wa Miaka Elfu. (Ufunuo 20:6-10; 21:8) Litakuwa lenye baraka kama nini fungu la wale waendeleao kuzoea imani ambao wataokoka waonee shangwe wakati ujao usio na mwisho!

20. Ni jinsi gani 1 Wakorintho 13:13 itakuwa na maana maalumu kwenye mwisho wa Utawala wa Kristo wa Miaka Elfu?

²⁰ Ndipo maneno haya ya Paulo kwenye 1 Wakorintho 13:13 yatakapopata maana maalumu: “Inadumu imani, tumaini, upendo, haya matatu; na katika hayo lililo kuu ni upendo.” Hapo hatutahitaji tena kuzoea imani kwamba ile ahadi ya kiunabii kwenye Mwanzo 3:15 itakuwa halisi wala kutumaini kwamba itatimizwa. Hilo litakuwa limekwisha kutukia. Tukiwa washikaji wa uaminifu wa kimaadili, tutaendelea kutumaini katika Yehova, tuwe na imani katika yeye na Mwana wake, na kuwapenda wao wakiwa ndio waliotimiliza unabii huo. Zaidi ya hilo, upendo wa kina kirefu na shukrani zenye kuhisiwa moyoni kwa ajili ya wokovu wetu zitatufunga kwa Mungu katika ujitoaji usiovunjika kwa umilele wote.—1 Petro 1:8, 9.

21. Sisi leo twapaswa kufanya nini ili ‘tuokolewe kwa njia ya imani’?

²¹ Kupitia tengenezo lake lionekanalo, Yehova amefanya maandalizi mazuri ajabu ya kuimarisha imani. Jifaidi na hayo yote kikamili. Hudhuria na ushiriki kikawaida katika mikutano ya watu wa Mungu. (Waebrania 10:24, 25) Jifunze Neno lake na vichapo vya Kikristo kwa bidii ya uendelevu. Mtolee ombi rasmi la kupata roho takatifu yake. (Luka 11:13) Iga imani ya wale wanaoongoza kwa unyenyekevu katika kundi. (Waebrania 13:7) Kinza vishawishi vya kilimwengu. (Mathayo 6:9, 13) Ndiyo, tena ongeza kina cha uhusiano wako wa kibinafsi pamoja na Yehova katika kila njia iwezekanayo. Juu ya yote, endelea kuzoea imani. Ndipo uwezapo kuwa miongoni mwa wale wafurahishao Yehova na kufikia wokovu, kwa maana Paulo alitaarifu hivi: “Kwa neema ya Mungu mmekombolewa kwa njia ya imani. Jambo hili si matokeo ya juhudi zenu, bali ni zawadi ya Mungu.”—Waefeso 2:8, HNWW.

Majibu Yako Ni Nini?

◻ Ni mitihani gani ya imani iliyo pale pale mbele yetu?

◻ Ni kwa njia gani mbili imani yetu yaweza kutuponya?

◻ Kulingana na 1 Petro 1:9, ni lazima tudumishe imani kwa muda mrefu kadiri gani?

◻ Tuna maandalizi gani ya kuimarisha imani yetu?

[Picha katika ukurasa wa 15]

Kama yule baba ambaye Yesu aliponya mwana wake, je! wewe wahisi uhitaji wa kibinafsi kuwa na imani zaidi?

[Picha katika ukurasa wa 17]

Imani kama ile ya Noa na familia yake itahitajiwa ili kuokoka “dhiki kubwa”