Yehova Hupendezwa Sana na Utumishi Wako wa Nafsi Yote
“Lolote mnalofanya, lifanyeni kwa nafsi yote kama kwa Yehova, na si kwa wanadamu.”—WAKOLOSAI 3:23.
1, 2. (a) Pendeleo kubwa zaidi tuwezalo kuwa nalo ni gani? (b) Kwa nini nyakati nyingine huenda tukashindwa kufanya yote ambayo tungependa kufanya katika kumtumikia Mungu?
KUMTUMIKIA Yehova ni pendeleo kubwa zaidi tuwezalo kuwa nalo. Kwa sababu iliyo nzuri, jarida hili kwa muda mrefu limetia moyo Wakristo wajihusishe katika huduma, hata kutumikia “kwa ukamili zaidi” wakati wowote iwezekanapo. (1 Wathesalonike 4:1) Hata hivyo, hatuwezi kufanya sikuzote yote ambayo moyo wetu hutamani sana kufanya katika kumtumikia Mungu. “Hali zangu zafanya nihitaji kufanya kazi wakati wote,” aeleza dada mseja aliyebatizwa karibu miaka 40 iliyopita. “Sababu yangu ya kufanya kazi, si kujipatia mavazi ya gharama ya juu yenye mitindo-mitindo au kwenda likizo za gharama ya juu, bali kuandaa mahitaji ya lazima, kutia ndani gharama za kitiba na meno. Nahisi kana kwamba namtolea Yehova masalio.”
2 Kumpenda Mungu hutusukuma tutake kufanya mengi zaidi tuwezayo katika kazi ya kuhubiri. Lakini hali maishani mara nyingi huwekea mipaka yale tuwezayo kufanya. Kushughulikia madaraka mengine ya Kimaandiko, kutia ndani wajibu wa familia, kwaweza kula kabisa wakati na nishati yetu nyingi. (1 Timotheo 5:4, 8) Katika “nyakati [hizi] za hatari zilizo ngumu kushughulika nazo,” maisha ni magumu hata zaidi. (2 Timotheo 3:1) Tunaposhindwa kufanya yote ambayo tungependa kufanya katika huduma, huenda moyo wetu ukatutaabisha kwa kadiri fulani. Huenda tukajiuliza kama Mungu anapendezwa na ibada yetu.
Uzuri wa Utumishi wa Nafsi Yote
3. Yehova anatarajia nini kutoka kwetu sote?
3 Kwenye Zaburi 103:14, Biblia hutuhakikishia kwa uchangamfu kwamba Yehova “anatujua umbo letu, na kukumbuka ya kuwa sisi tu mavumbi.” Zaidi ya mtu mwingine yeyote, yeye huelewa udhaifu wetu mbalimbali. Hahitaji mengi zaidi ya tuwezayo kutoa. Yeye hutarajia nini? Jambo fulani ambalo kila mtu aweza kutoa, bila kujali hali yake maishani ni ipi: “Lolote mnalofanya, lifanyeni kwa nafsi yote kama kwa Yehova, na si kwa wanadamu.” (Wakolosai 3:23) Ndiyo, Yehova hututazamia—sisi sote—tumtumikie kwa nafsi yote.
4. Kumtumikia Yehova kwa nafsi yote kwamaanisha nini?
4 Kumtumikia Yehova kwa nafsi yote kwamaanisha nini? Neno la Kigiriki linalotafsiriwa “nafsi yote” humaanisha hasa “kutoka katika nafsi.” “Nafsi” hurejezea mtu mzima, akiwa na uwezo wake wote wa kimwili na kiakili. Hivyo kutumikia kwa nafsi yote kwamaanisha kujitoa wenyewe, tukitumia uwezo wetu wote na kuelekeza nishati zetu kikamili iwezekanavyo katika utumishi wa Mungu. Kwa usahili, kwamaanisha kufanya yote ambayo nafsi yetu yaweza kufanya.—Marko 12:29, 30.
5. Kielelezo cha mitume chaonyeshaje kwamba si lazima wote wafanye yaleyale katika huduma?
5 Je, kuwa wenye nafsi yote kwamaanisha kwamba lazima sisi sote tufanye kiwango kilekile katika huduma? Hilo lisingewezekana hata kidogo, kwa kuwa hali na uwezo hutofautiana kati ya nafsi moja na ile nyingine. Wafikirie mitume waaminifu wa Yesu. Wote hawakuweza kufanya kiwango kilekile. Mathalani, twajua machache sana kuhusu baadhi ya mitume hao, kama vile Simoni Mkananayo na Yakobo mwana wa Alfayo. Labda utendaji wao wakiwa mitume ulikuwa kidogo. (Mathayo 10:2-4) Kwa kutofautisha, Petro aliweza kukubali madaraka mengi mazito kwani, hata Yesu alimpa “funguo za ufalme wa mbingu”! (Mathayo 16:19) Hata hivyo, Petro hakuinuliwa kuliko wale wengine. Yohana alipopokea ile njozi ya Yerusalemu Jipya katika Ufunuo (wapata mwaka wa 96 W.K.), aliona mawe 12 ya msingi na “majina kumi na mawili ya mitume kumi na wawili” yaliandikwa juu yake.a (Ufunuo 21:14) Yehova alithamini utumishi wa hao mitume wote, hata ingawa baadhi yao kwa wazi waliweza kufanya mengi zaidi kuliko wengine.
6. Katika kielezi cha Yesu cha mpanzi, ni nini kinachoipata ile mbegu iliyopandwa kwenye “udongo ulio bora,” na ni maswali gani ambayo hutokea?
6 Vivyo hivyo, Yehova hadai kwetu sote kiwango kilekile cha kuhubiri. Yesu alionyesha hilo katika kielezi cha mpanzi, ambacho kilifananisha kazi ya kuhubiri na ile ya kupanda mbegu. Mbegu ilianguka katika udongo wa aina tofauti-tofauti, ikionyesha hali tofauti-tofauti za moyo zinazoonyeshwa na wale wanaosikia ujumbe. “Kwa habari ya yule aliyepandwa juu ya udongo ulio bora,” akaeleza Yesu, “huyo ndiye anayelisikia neno na kupata maana yalo, ambaye kwa kweli huzaa matunda na kutokeza, huyu mara mia, yule sitini, yule mwingine thelathini.” (Mathayo 13:3-8, 18-23) Hayo matunda ni nini, na kwa nini yanatokezwa katika viwango tofauti-tofauti?
7. Matunda ya mbegu iliyopandwa ni nini, na kwa nini yanatokezwa katika viwango tofauti-tofauti?
7 Kwa kuwa mbegu inayopandwa ni “neno la ufalme,” kuzaa matunda hurejezea kueneza neno hilo, kulisema kwa wengine. (Mathayo 13:19) Kiwango cha matunda yanayotokezwa hutofautiana—kuanzia thelathini hadi mia moja—kwa sababu uwezo na hali maishani hutofautiana. Mtu aliye na afya nzuri na nguvu za kimwili huenda akaweza kutumia wakati mwingi zaidi katika kuhubiri kuliko yule ambaye nguvu yake imedhoofishwa na hali mbaya ya afya yenye kudumu sana au na uzee. Kijana mseja ambaye hana madaraka ya familia huenda akaweza kufanya zaidi kuliko yule alazimikaye kufanya kazi wakati wote ili kuandalia familia.—Linganisha Mithali 20:29.
8. Yehova anaonaje wale wanaotoa yote wawezayo ambayo nafsi yao yaweza kutoa?
8 Kwa maoni ya Mungu, je, mtu anayetoa thelathini kwa nafsi yote, hajitoi kama yule anayetoa mia? Hata kidogo! Huenda kiwango cha matunda kikatofautiana, lakini Yehova anapendezwa maadamu utumishi unaotolewa ni bora zaidi ambao nafsi yetu yaweza kutoa. Kumbuka, viwango tofauti vya matunda vyote vyatoka kwenye mioyo ambayo ni “udongo ulio bora.” Neno la Kigiriki (ka·losʹ) litafsiriwalo “bora” lafafanua kitu fulani kilicho na “uzuri” na ambacho “hupendeza moyo, na kuyafurahisha macho.” Jinsi inavyofariji kujua kwamba tunapofanya yote tuwezayo, moyo wetu ni mzuri machoni pa Mungu!
Mtu na Mwenzake Hawalinganishwi
9, 10. (a) Huenda moyo wetu ukatuongoza kwenye kusababu gani kusikofaa? (b) Kielezi kwenye 1 Wakorintho 12:14-26 chaonyeshaje kwamba Yehova hatulinganishi na wengine katika yale tufanyayo?
9 Hata hivyo, huenda moyo wetu usio mkamilifu ukakadiria mambo tofauti. Huenda ukalinganisha utumishi wetu na ule wa wengine. Huenda ukasababu, ‘Wengine wanafanya zaidi sana katika huduma kuliko nifanyavyo. Yehova angeweza kupendezwaje na utumishi wangu wakati wowote?’—Linganisha 1 Yohana 3:19, 20.
10 Mawazo na njia za Yehova ziko juu zaidi kuliko zetu. (Isaya 55:9) Sisi hupata ufahamu fulani wenye kina katika njia ambayo Yehova huona jitihada zetu mmoja-mmoja kutoka 1 Wakorintho 12:14-26, ambapo kutaniko lafananishwa na mwili ulio na viungo vingi, yaani, macho, mikono, masikio, na kadhalika. Kwa kitambo kidogo, fikiria kwa uangalifu, mwili halisi. Lingekuwa jambo la kujiaibisha kama nini kulinganisha macho yako na mikono yako au miguu yako na masikio yako! Kila kiungo huwa na utendaji tofauti, na bado viungo vyote ni vyenye mafaa na vyathaminiwa. Vivyo hivyo, Yehova hupendezwa sana na utumishi wako wa nafsi yote iwe wengine wanafanya zaidi au kidogo.—Wagalatia 6:4.
11, 12. (a) Kwa nini huenda watu fulani wakahisi kwamba ni “dhaifu” au ‘wanaheshimika kidogo’? (b) Yehova anaonaje utumishi wetu?
11 Kwa sababu ya udhaifu mbalimbali unaotwikwa kutokana na afya mbaya, uzee, au hali nyingine, nyakati nyingine huenda baadhi yetu tukahisi kwamba ‘tu dhaifu zaidi’ au ‘twaheshimika kidogo.’ Lakini hivyo si vile ambavyo Yehova huona mambo. Biblia hutuambia: “Viungo vya mwili vionekanavyo kuwa dhaifu zaidi ni vya lazima, na zile sehemu . . . ambazo twafikiri zaheshimika kidogo, hizo twazizingira kwa heshima nyingi zaidi . . . Hata hivyo, Mungu aliuungamanisha mwili, akiipa heshima iliyo nyingi zaidi sehemu iliyokuwa na upungufu.” (1 Wakorintho 12:22-24) Kwa hiyo kila mtu aweza kuwa mwenye thamani kwa Yehova. Yeye huthamini sana utumishi wetu tufanyao tukiwa na udhaifu wetu mbalimbali. Je, moyo wako haukusukumi kutaka kufanya yote uwezayo kumtumikia Mungu huyo mwenye uelewevu na upendo?
12 Basi, la maana kwa Yehova, si kwamba ufanye mengi kama vile mtu mwingine afanyavyo bali kwamba ufanye yale ambayo wewe—nafsi yako, yaani, uwezayo kufanya mmoja-mmoja. Kuthamini kwa Yehova jitihada zetu kibinafsi kulionyeshwa kwa njia yenye kugusa moyo sana ambayo Yesu alishughulika na wanawake wawili walio tofauti sana wakati wa siku zake za mwisho za maisha yake duniani.
Zawadi “Ghali Sana” ya Mwanamke Mwenye Uthamini
13. (a) Hali zilikuwaje Maria alipokuwa akimwaga mafuta yenye marashi juu ya kichwa na miguu ya Yesu? (b) Thamani ya kimwili ya mafuta ya Maria ilikuwa kiasi gani?
13 Ijumaa jioni, Nisani 8, Yesu alifika Bethania, kijiji kidogo katika mteremko wa mashariki wa Mlima wa Mizeituni, karibu kilometa tatu kutoka Yerusalemu. Yesu alikuwa na rafiki wapendwa katika mji huu—Maria, Martha, na ndugu yao, Lazaro. Labda mara nyingi, Yesu alikuwa amekuwa mgeni nyumbani kwao. Lakini Jumamosi jioni, Yesu na rafiki zake walikuwa wakila mlo-mkuu nyumbani kwa Simoni, aliyekuwa mwenye ukoma hapo zamani ambaye labda aliponywa na Yesu. Yesu alipokuwa akiegama mezani, Maria alifanya kitendo cha unyenyekevu kilichoonyesha upendo wake wenye kina kwa mwanamume ambaye alikuwa amemfufua ndugu yake. Aliivunja ili kufungua chupa iliyokuwa na mafuta yenye marashi, “ghali sana.” Ghali, kwelikweli! Yalikuwa na thamani ya dinari 300, kiasi kinacholingana na mshahara wa mwaka mzima. Aliyamwaga mafuta haya yenye marashi kichwani mwa Yesu na juu ya miguu yake. Hata alipangusa miguu yake mpaka ikakauka kwa nywele zake.—Marko 14:3; Luka 10:38-42; Yohana 11:38-44; 12:1-3.
14. (a) Wanafunzi waliitikiaje tendo la Maria? (b) Yesu alimteteaje Maria?
14 Wanafunzi walihisi uchungu! ‘Kwa nini upotevu huu?’ wakauliza. Yudasi, akiwa na tamaa yake ya kuiba akisingizia kudokeza uhitaji wa kusaidia wenye uhitaji, alisema: “Kwa nini mafuta haya yenye marashi hayakuuzwa kwa dinari mia tatu na kupewa kwa maskini?” Maria alinyamaza. Hata hivyo, Yesu aliwaambia wanafunzi hivi: “Mwacheni. Kwa nini mwajaribu kumsumbua? Alifanya kitendo bora [namna ya ka·losʹ] kunielekea mimi. . . . Alifanya lile ambalo angeweza; alijitwalia daraka kimbele kutia mafuta yenye marashi juu ya mwili wangu kwa kufikiria maziko. Kwa kweli nawaambia nyinyi, Kokote ambako habari njema yahubiriwa katika ulimwengu wote, alilofanya mwanamke huyu hakika litasimuliwa pia kuwa ukumbuko juu yake.” Lazima iwe uchangamfu wa maneno ya Yesu uliutuliza moyo wa Maria jinsi gani!—Marko 14:4-9; Yohana 12:4-8.
15. Kwa nini Yesu alichochewa sana na lile ambalo Maria alifanya, nasi twajifunza nini kwa njia hiyo kuhusu utumishi wa nafsi yote?
15 Yesu alichochewa sana na lile ambalo Maria alikuwa amefanya. Kwa kukadiria kwake, alikuwa amefanya jambo lenye kustahiki sifa. Jambo la maana kwa Yesu halikuwa thamani ya kimwili ya zawadi bali uhakika wa kwamba “alifanya lile ambalo angeweza.” Alitumia kwa manufaa fursa hiyo, akatoa kile alichoweza kutoa. Tafsiri nyingine zimetafsiri maneno haya, “Amefanya yote ambayo angeweza,” au, “Amefanya lililokuwa katika uwezo wake kufanya.” (An American Translation; The Jerusalem Bible) Kutoa kwa Maria kulikuwa kwa nafsi yote kwa sababu alitoa yaliyo bora zaidi. Hiyo ndiyo maana ya utumishi wa nafsi yote.
“Sarafu Ndogo Mbili” za Mjane
16. (a) Yesu alipataje kuchunguza mchango wa mjane maskini? (b) Sarafu za mjane zilikuwa za kiasi gani?
16 Siku kadhaa baadaye, Nisani 11, Yesu alitumia siku ndefu katika hekalu, ambapo mamlaka yake ilitiliwa shaka na alitokeza maswali yenye kutatanisha ya ghafula juu ya kodi, ufufuo, na mambo mengine. Aliwashutumu waandishi na Mafarisayo kwa ‘kuzinyafua nyumba za wajane,’ kati ya mambo mengine. (Marko 12:40) Kisha Yesu akaketi, ni dhahiri katika Ua wa Wanawake, ambapo, kulingana na mapokeo ya Kiyahudi, kulikuwa na masanduku 13 ya hazina. Aliketi hapo kwa muda fulani, akitazama kwa uangalifu watu walipokuwa wakitumbukiza michango yao. Watu wengi matajiri walikuja, labda wengine wakionekana kuwa wenye kujiona kuwa waadilifu, hata kwa majivuno. (Linganisha Mathayo 6:2.) Yesu akamkodolea macho mwanamke mmoja mahususi. Macho ya kawaida huenda ikawa yasingeona jambo lolote lenye kutokeza kumhusu yeye au zawadi yake. Lakini Yesu, ambaye aliweza kujua mioyo ya wengine, alijua kwamba alikuwa “mjane maskini.” Yeye alijua pia kiwango barabara cha zawadi yake—“sarafu ndogo mbili, zenye thamani ndogo sana.”b—Marko 12:41, 42.
17. Yesu alithaminije mchango wa mjane, na hivyo twajifunza nini juu ya kumtolea Mungu?
17 Yesu aliwaita wanafunzi wake, kwa kuwa alitaka wajionee wenyewe somo ambalo alikuwa karibu kuwafundisha. “Alitumbukiza ndani zaidi ya wote wale waliokuwa wakitumbukiza fedha ndani ya masanduku ya hazina,” akasema Yesu. Kwa kukadiria kwa Yesu huyo mwanamke aliweka zaidi ya wengine wote wakijumlishwa. Alitoa “vyote alivyokuwa navyo”—fedha zake za mwisho. Kwa kufanya hivyo, alijiweka katika mikono ya Yehova ya utunzaji. Hivyo mtu aliyeteuliwa kuwa kielelezo cha kumtolea Mungu ni yule ambaye zawadi yake ilikuwa karibu isiyofaa kitu katika thamani ya kimwili. Hata hivyo, machoni pa Mungu, ilikuwa yenye thamani sana!—Marko 12:43, 44; Yakobo 1:27.
Kujifunza Kutokana na Maoni ya Yehova Kuhusu Utumishi wa Nafsi Yote
18. Twajifunza nini kutokana na kushughulika kwa Yesu na hao wanawake wawili?
18 Kutokana na kushughulika kwa Yesu na wanawake hawa wawili, twajifunza masomo fulani yenye kuchangamsha moyo juu ya jinsi Yehova anavyoona utumishi wa nafsi yote. (Yohana 5:19) Yesu hakumlinganisha mjane na Maria. Alithamini sarafu mbili za mjane kama vile alivyothamini mafuta “ghali sana” ya Maria. Kwa kuwa kila mwanamke alitoa zawadi yake iliyo bora zaidi, machoni pa Mungu zawadi zote mbili zilikuwa zenye thamani. Kwa hiyo ukijawa na hisia za kutofaa kitu kwa sababu huwezi kufanya yote unayotaka kufanya katika kumtumikia Mungu, usikate tumaini. Yehova anapendezwa kukubali yote uwezayo kutoa. Kumbuka, Yehova “huutazama moyo,” kwa hiyo yeye ajua kikamili tamaa za moyo wako.—1 Samweli 16:7.
19. Kwa nini hatupaswi kuhukumu yale ambayo wengine wanafanya wanapomtumikia Mungu?
19 Maoni ya Yehova kuhusu utumishi wa nafsi yote yapasa kuwa na uvutano kwenye njia tunayoona na kutendeana. Lingekuwa jambo la kukosa upendo jinsi gani ikiwa tungechambua jitihada za wengine au kulinganisha utumishi wa mtu mmoja na ule wa mtu mwingine! Kwa kusikitisha, Mkristo mmoja aliandika hivi: “Nyakati nyingine wengine huonyesha kwamba ama uwe painia ama wewe si kitu. Wale ambao kati yetu twajitahidi kuendelea tukiwa ‘tu’ wahubiri wa kawaida wa Ufalme twahitaji kuhisi twathaminiwa pia.” Na tukumbuke kwamba hatukuidhinishwa kuamua linalofanyiza utumishi wa nafsi yote kwa Mkristo mwenzi. (Waroma 14:10-12) Yehova hupendezwa sana na utumishi wa nafsi yote wa kila ya mamilioni ya wahubiri waaminifu wa Ufalme, nasi twapaswa kufanya hivyo.
20. Kwa kawaida ni vizuri kudhania nini kuhusu waabudu wenzetu?
20 Ingawa hivyo, vipi wengine wakionekana kuwa wanafanya machache kuliko wanavyoweza kufanya katika huduma? Kupungua kwa utendaji wa mwamini mwenzi kwaweza kuonyesha wazee wenye kuhangaikia kwamba kuna uhitaji wa kusaidia au wa kitia-moyo. Wakati uleule, lazima tusisahau kwamba kwa watu fulani, utumishi wa nafsi yote waweza ukafanana sana na sarafu ndogo za mjane kuliko mafuta ghali ya Maria. Kwa kawaida ni vizuri kudhania kwamba ndugu na dada zetu wanapenda Yehova na kwamba upendo huo utawachochea wafanye mengi zaidi wawezavyo, na si machache wawezavyo. Kwa hakika hakuna mtumishi wa Yehova mwenye kudhamiria ambaye angechagua kufanya machache zaidi kuliko awezavyo katika kumtumikia Mungu!—1 Wakorintho 13:4, 7.
21. Wengi wanafuatia kazi-maisha gani yenye kuthawabisha, na ni maswali gani hutokea?
21 Hata hivyo, kwa watu wengi wa Mungu, utumishi wa nafsi yote umemaanisha kufuatia kazi-maisha yenye kuthawabisha sana—huduma ya painia. Wao hupokea baraka gani? Na vipi wale kati yetu ambao hatujaweza kupainia—twaweza kuonyeshaje roho ya upainia? Maswali haya yatazungumzwa katika makala ifuatayo.
[Maelezo ya Chini]
a Kwa kuwa Mathiasi alichukua mahali pa Yudasi akiwa mtume, jina lake—wala si jina la Paulo—lingeonekana miongoni mwa yale mawe 12 ya msingi. Ijapokuwa Paulo alikuwa mtume, hakuwa mmoja wa wale 12.
b Kila moja ya sarafu hizi ilikuwa leptoni, sarafu ndogo zaidi ya Kiyahudi iliyotumiwa wakati huo. Lepta mbili (moja ni leptoni, nyingi ni lepta) zilitoshana na sehemu moja ya 64 ya mshahara wa siku. Kulingana na Mathayo 10:29, kuwa na sarafu ya asarioni (inayolingana na lepta nane), mtu angeweza kununua shomoro wawili ambao walikuwa miongoni mwa ndege wa bei ya chini zaidi waliotumiwa kwa chakula na maskini. Kwa hiyo mjane huyo alikuwa maskini kwelikweli, kwa kuwa alikuwa na nusu tu ya kiasi cha kununua shomoro mmoja, ambacho hakingeweza kutosha hata mlo mmoja.
Ungejibuje?
◻ Kumtumikia Yehova kwa nafsi yote kwamaanisha nini?
◻ Kielezi kwenye 1 Wakorintho 12:14-16 chaonyeshaje kwamba Yehova hatulinganishi na wengine?
◻ Twajifunza nini juu ya utoaji wa nafsi yote kutoka katika maelezo ya Yesu juu ya mafuta ghali ya Maria na sarafu ndogo mbili za mjane?
◻ Maoni ya Yehova kuhusu utumishi wa nafsi yote yapaswa kuwa na uvutano gani juu ya jinsi tunavyoona mmoja na mwenzake?
[Picha katika ukurasa wa 15]
Maria alitoa yaliyo bora zaidi, kuupaka mwili wa Yesu marashi kwa kutumia mafuta “ghali sana”
[Picha katika ukurasa wa 16]
Sarafu za mjane—ambazo karibu hazikufaa kitu katika thamani ya kimwili lakini zenye thamani sana machoni pa Yehova