Maisha na Huduma ya Yesu

Endeleeni Kuwa Tayari!

BAADA ya kuonya umati wa watu juu ya choyo, na kutahadharisha wanafunzi wake juu ya kuelekeza fikira zisizofaa kwenye vitu vya kimwili, Yesu anatia moyo hivi: “Msiogope, enyi kundi dogo; kwa kuwa Baba yenu ameona vema kuwapa ule ufalme.” Hivyo yeye anafunua kwamba ni hesabu ndogo tu kwa kulinganishwa (ambayo baadaye ilitambulishwa kuwa 144,000) ambayo ingekuwa katika Ufalme wa kimbingu. Wengi wa wale wanaopokea uhai wa milele watakuwa raia za kidunia za ule Ufalme.

Lo, zawadi nzuri kama nini, “ule ufalme”! Akieleza juu ya itikio ambalo wanafunzi wanapaswa kuwa nalo wanapoupokea, Yesu anawahimiza hivi: “Viuzeni mlivyo navyo, mtoe sadaka [zawadi za rehema, NW].” Ndiyo inawapasa wao watumie mali zao kunufaisha wengine kiroho na hivyo wajenge “akiba isiyopungua katika mbingu.”

Ndipo Yesu anapoonya wanafunzi wake kwa upole waendelee kuwa tayari kwa ajili ya kurudi kwake. Yeye anasema: “Viuno vyenu na viwe vimefungwa, na taa zenu ziwe zinawaka; nanyi iweni kama watu wanaomngojea bwana wao, atakaporudi kutoka arusini, ili atakapokuja na kubisha, wamfungulie mara. Heri watumwa wale, ambao bwana wao ajapo atawakuta wanakesha. Amin, nawaambieni, atajifunga na kuwakaribisha chakulani, atakuja na kuwahudumia.”

Katika kielezi hiki, utayari wa wale watumishi kwa ajili ya kurudi kwa bwana wao unaonyeshwa kwa kuvuta kwao kanzu zao na kuzifunga chini ya mishipi yao ya kiunoni; halafu wanaendelea kutunza wajibu wao mbalimbali mpaka usiku wakiwa katika nuru ya taa zilizotiwa mafuta ya kutosha. Yesu anaeleza hivi: ‘Bwana akiwasili katika zamu ya pili [kuanzia karibu saa tatu usiku mpaka usiku wa manane], hata ikiwa ni katika ya tatu [kuanzia usiku wa manane mpaka karibu saa tisa alfajiri na mapema], na kuwakuta tayari, wenye furaha ni wao!’

Bwana huyo anathawabisha watumishi wake kwa njia isiyo ya kikawaida. Yeye anafanya waegemee kwenye meza na kuanza kuwatumikia. Yeye anawatendea, si kama watumwa, bali kama rafiki washikamanifu. Hiyo ni thawabu nzuri kama nini kwa ajili ya kuendelea kwao kumfanyia kazi bwana wao muda wote wa usiku wakati wanapokuwa wakingojea kurudi kwake! Yesu anamalizia hivi: “Nanyi jiwekeni tayari [endeleeni kuwa tayari, NW], kwa kuwa saa msiyodhani ndipo ajapo Mwana wa Adamu.”

Sasa Petro anauliza hivi: “Bwana, mithali hiyo [kielezi hicho, NW] umetuambia sisi tu, au watu wote pia?”

Badala ya kujibu kwa njia ya moja kwa moja, Yesu anatoa kielezi kingine. “Ni nani, basi, aliye wakili mwaminifu,” yeye anauliza, “ambaye bwana wake atamweka juu ya utumishi (“baraza la mahadimu,” NW) wake wote, awape watu posho kwa wakati wake? Heri mtumwa yule, ambaye bwana wake ajapo atamkuta anafanya hivyo. Kweli nawaambia, atamweka juu ya vitu vyake vyote.”

Kwa uwazi “bwana” huyo ni Yesu Kristo. Yule “wakili” anafananisha lile “kundi dogo” la wanafunzi wakiwa baraza la mjumlisho, na lile “baraza la mahadimu” linarejezea kikundi hicho hicho cha 144,000 ambacho kinapokea Ufalme wa kimbingu, lakini linakazia kazi yao wakiwa watu mmoja mmoja. “Vitu” ambavyo yule wakili mwaminifu anawekwa rasmi avitunze ni masilahi ya kifalme ya bwana huyo yaliyo duniani, ambayo ni kutia ndani raia za kidunia za ule Ufalme.

Akiendelea na kielezi kile, Yesu anaonyesha uwezekano wa kwamba si washiriki wote wa jamii hiyo ya wakili au mtumwa, ambao watakuwa washikamamfu, akieleza hivi: “Mtumwa yule akisema moyoni mwake [wakati wo wote, NW], Bwana wangu anakawia kuja, akaanza kuwapiga wajoli wake, wanaume kwa wanawake, akila na kunywa na kulewa; bwana wake mtumwa huyo atakuja siku asiyodhani . . . . [na yeye atamwadhibu kwa ukali ulio mkubwa kupita wote, NW].”

Yesu anaendelea kusema kwamba kuja kwake kumeleta wakati wenye moto kwa Wayahudi, kwa kuwa baadhi yao wanakubali na wengine wanakataa mafundisho yake. Zaidi ya miaka mitatu mapema kidogo, yeye alibatizwa katika maji, lakini sasa ubatizo wake ndani ya kifo unazidi kukaribia umalizio, na kama vile yeye anavyosema: “Nina dhiki kama nini hata utimizwe!”

Baada ya kuelekeza maelezo hayo kwa wanafunzi wake, Yesu anahutubia tena ule umati wa watu. Yeye anaombolezea katao lao la shingo ngumu la kutotaka kukubali ile ithibati ya wazi juu ya yeye ni nani na maana ya jambo hilo. Yeye anaonelea kwamba, “kila mwonapo wingu likizuka pande za magharibi mara husema, Mvua inakuja; ikawa hivyo. Na kila ivumapo kaskazi, husema, Kutakuwa na joto; na ndivyo ilivyo. Enyi wanafiki, mwajua kuutambua uso wa nchi na mbingu; imekuwaje, basi, kuwa hamjui kutambua majira haya?” Luka 12:32-59.

◆ Ni wangapi wanaojumlika kuwa lile “kundi dogo,! nao wanapokea nini?

◆ Yesu anakazia jinsi gani uhitaji wa watumishi wake kuwa tayari?

◆ Katika kielezi cha Yesu, ni nani walio “bwana,” yule “wakili,” “baraza la mahadimu.” na vile “vitu”?