Kujipanga Upande Mmoja na Washika-Ukamilifu wa Yehova

“Ila mimi nitakwenda kwa ukamilifu wangu . . . Katika makusanyiko nitamhimidi [Yehova].”​—ZABURI 26:11, 12.

 1, 2. (a) Dini fulani katika Jumuiya ya Wakristo zimewezaje kupata wafuasi? (b) Ni njia gani za kufundisha alizotumia Yesu? (Mathayo 11:28-30)

KATIKA mwaka 1985 watu 189,800 walibatizwa kuonyesha wakfu wao kwa Yehova wakiwa mashahidi Wakristo wake. Hiyo ni wastani ya watu 520 kwa siku. Watu wote hao walifanyaje uamuzi wao wa kubatizwa? Je! walihudhuria mikutano yenye umati wa watu, wakasikiliza mhubiri mwenye kusema kwa nguvu nyingi, halafu wakafanya uamuzi wa kumfuata Kristo kwa sababu ya msisimuko usioongozwa na akili? Hivyo ndivyo dini fulani za Kiprotestanti na za Kievanjeli zinavyofanya kazi. Lakini je, hiyo ndiyo njia ambayo Kristo anatumia ili kujipatia wafuasi?

² Tunapochunguza kwa uangalifu kuhubiri kwa Yesu hadharani, hatumwoni yeye akitumia njia zenye kusisimua watu watende mambo bila kufikiri. Kwa mfano, je, yeye alivuta wasikilizaji wake kwa kutumia waimbaji na nyimbo? Au je, yeye alitumia werevu wa kuwasoma watu na kutambua kwamba akiingiza katika wasikilizaji wake hali ya kujisikia wakiwa na hatia wangeingiza mikono yao mifukoni ili wamtolee pesa? Tofauti na hivyo, njia yake ya kufundisha ilikusudiwa kufanya watu wafikiri na kuona sababu ya mambo. Kwa kuwa walio wengi kati ya wasikilizaji wake walikuwa Wayahudi, walikuwa tayari wanajua mambo fulani katika Maandiko ya Kiebrania. Yeye angeweza kuwafanya waone sababu ya mambo kwa kutegemea maarifa waliyotangulia kuwa nayo kisha wapate kumtambua yeye kuwa ndiye Masihi.​—Mathayo, sura 5-7; Luka 13:10-21.

 3. Tunajuaje kwamba Paulo hakutumia werevu avute misisimuko ya moyoni ya watu katika kufundisha kwake?

³ Vivyo hivyo, Paulo alivuta watu watumie uwezo wa kufikiria sababu ya mambo, ingawa anaonwa na wengine kama mtu asiyekuwa na uwezo wa kusema. (Matendo 20:7-9; 2 Wakorintho 10:10; 11:6) Yeye aliandika hivi: “Mimi nawasihi ninyi kwa huruma za Mungu, ndugu, mtoe miili yenu iwe dhabihu iliyo hai, takatifu, yenye kukubalika kwa Mungu, utumishi mtakatifu pamoja na nguvu zenu za kufikiri. . . mgeuzwe kwa kubadili akili zenu [“ili kwamba mwelekeo wote wenu wa akili ubadilishwe”, Phillips], ili mpate kujithibitishia wenyewe mapenzi ya Mungu yaliyo mema na yenye kukubalika na makamilifu.”​—Warumi 12:1, 2, NW.

 4. Kabla mtu hajaweza kubatizwa leo kuwa mmoja wa Mashahidi wa Yehova, ni lazima achukue hatua gani?

⁴ Vivyo hivyo leo, wale wanaobatizwa ni watu ambao wamejifunza na wakafikiri kwa uangalifu wakiona sababu za Maandiko kabla ya kuichukua ile hatua nzito ya ubatizo, au kuzamishwa kabisa katika maji. (Matendo 17:11, 12, NW) Uamuzi wao haukuwa wa haraka haraka, wa msisimuko wa moyoni tu usioongozwa na akili. Bali, kabla ya wao kukubaliwa kubatizwa, wamehudhuria kwa ukawaida mikutano ya Kikristo wakikusudia kupata maarifa sahihi ya kumjua Yehova Mungu na makusudi yake kupitia Kristo Yesu. (Waebrania 10:25) Wao wameshiriki pia kwa ukawaida katika huduma ya Kikristo, wakishiriki habari njema za Ufalme pamoja na wengine. (Matendo 5:42; 1 Wakorintho 9:16) Halafu, katika yale majuma ya mwisho kabla ya ubatizo wao, wamerudia kwa uangalifu pamoja na wazee mbalimbali wa kundi maulizo zaidi ya 120 juu ya mafundisho na mwenendo wa Kikristo, pia wakafikiria mamia ya maandiko ya Biblia yenye kuunga mkono, kusudi la yote hayo ni kwamba waweze kuwa washika-ukamilifu wanaokubaliwa kabla ya ubatizo wao.​—Matendo 8:34-36.a

Tofauti Inayoletwa na Ubatizo

 5. Mtu anatambulishwa na ubatizo kuwa mwenye mwenendo gani?

⁵ Mtu anatimiza nini kwa kubatizwa? Kwanza, anajitambulisha kuwa anahusiana na yule mshika-ukamilifu aliye mkubwa zaidi aliyepata kuwapo duniani​—Kristo Yesu. Yeye mwenyewe aliweka mfano kwa kubatizwa alipokuwa na umri wa miaka karibu 30. (Luka 3:21-23) Baadaye yeye aliamuru wafuasi wake wafundishe na kubatiza katika sehemu zote za ulimwengu. (Mathayo 28:19, 20) Lakini je, alimaanisha kwamba wanafunzi wake wabatize watu ovyo ovyo tu, bila kufikiria mwenendo wao wa sasa?

 6, 7. (a) Ni nini kinachotakwa kwa mfuasi wa kweli wa Kristo? (b) Utakatifu unaonyesha wazo gani?

⁶ Mtume Petro anaonyesha maoni yanayofaa anapoandika hivi: “Ninyi nanyi iweni watakatifu katika mwenendo wote; kwa maana imeandikwa, Mtakuwa watakatifu kwa kuwa mimi ni mtakatifu.” (1 Petro 1:15, 16) Sasa, kwa Mkristo aliye wakfu, maana yake nini kuwa ‘mtakatifu’?

⁷ Kulingana na kamusi Expository Dictionary of New Testament Words ya W. E. Vine, neno la Kigiriki ha’gios (lililotafsiriwa ‘mtakatifu’) “kwa msingi linamaanisha hali ya kutenganishwa . . . na kwa hiyo, katika Maandiko linahusika katika maana ya kiadili na kiroho, kutenganishwa na dhambi na hivyo kuwekwa kwa ajili ya Mungu.” Mwanachuo mwingine Mgiriki anasema kwamba “linaonyesha hali ya kimungu.” Ufahamu huo unawawekea kiwango cha juu wale wanaotaka kubatizwa wawe Wakristo wa kweli. Ni kiwango cha ukamilifu, na ukamilifu ni ‘kushika sana mkusanyo wa viwango vya maadili’​—kwa Mkristo, viwango anavyopaswa kushika ni vile vya Kristo.​—Yohana 17:17-19; 18:36, 37.

 8. (a) Ni viwango gani vilivyokuwamo sana katika kundi la kwanza la Kikristo kuhusu mwenendo? (b) Je! Jumuiya ya Wakristo imefuata viwango hivyo? Toa mifano kutokana na matukio ya mahali penu.

⁸ Siku zote kundi la kweli la Kikristo limesisitiza juu ya kushika ukamilifu, kudumisha tengenezo safi. Hivyo Paulo aliagiza Wakristo wa kwanza ‘wasichangamane na mtu aitwaye ndugu, akiwa ni [mwasherati] au mwenye kutamani au mwenye kuabudu sanamu au mtukanaji au mlevi au mnyang’anyi; mtu wa namna hii msikubali hata kula naye . . . Ninyi mwondoeni yule mbaya miongoni mwenu.’ (1 Wakorintho 5:9-13; 2 Yohana 10, 11) Je! viongozi wa kidini wa Jumuiya ya Wakristo wametumia kiwango hicho cha juu cha ukamilifu kuhusu makundi yao? Jumuiya ya Wakristo inawakubali​—hata kama ni washiriki wasiotenda au walio watendaji​—watu wanaofanya kwa ukawaida kila aina ya dhambi nzito na uhalifu. Kanuni za Biblia haziruhusu uendekevu wa namna hiyo.​—Linganisha Yeremia 8:5, 6, 10.

 9. Ni nini kinachovuta watu wengi wajiweke wakfu na kubatizwa?

⁹ Ni kwa sababu hasa ya kiwango hicho cha juu kati ya Mashahidi wa Yehova, wale wanaopenda ukweli na ukamilifu wanavutwa wajiweke wakfu kwa Bwana Mwenye Enzi Kuu wa ulimwengu wote, Yehova Mungu. (Habakuki 3:18, 19) Wao wanaona tofauti ya wazi kati ya mwenendo wa dini za kilimwengu na ule wa Mashahidi wa Yehova. Ni kweli kwamba, watu walio wengi wanadharau sana ibada safi. (1 Petro 4:3, 4) Hata hivyo wanaopenda ukamilifu wanageukia ukweli kwa maelfu. Wanaonyesha wanapenda Mungu na viwango vyake wakati wanapojitiisha chini ya ubatizo wa maji.​—Linganisha Marko 1:10; Yohana 3:23; Matendo 8:36.

Ukamilifu Unaotegemea Upendo na Uvumilivu

10. Ni nini kinachotakwa ili Mkristo ashike ukamilifu?

¹⁰ Ukamilifu una bei inayolipwa. Yesu alionyesha wazi jambo hilo alipokaribisha watu wawe wafuasi wake. “Ikiwa mtu ye yote anataka anifuate mimi, acheni ajikane mwenyewe [“ajiache nyuma,” The New English Bible] na kuinua mti wa mateso wake na kuendelea kunifuata mimi.” (Marko 8:34 NW) Mwendo wa ukamilifu wa Kikristo unatia ndani majaribu na dhabihu nyingi kwa sababu ile ile iliyomfanya Kristo atende hivyo​—sisi sote tuna adui yule yule mmoja Shetani. (Waefeso 6:11, 12) Hivyo uvumilivu unatakwa ili “tuendelee” kumfuata Yesu. Kwa sababu hiyo, uamuzi unaohusika katika kujiweka wakfu si mwepesi; haupasi kuwa kama msisimuko wa muda tu. Hata hivyo kuna watu kadha ambao wameuacha ukweli baada ya miezi au miaka michache ya ubatizo wao. Sababu ya jambo hilo inaweza kuonekana kuwa nini?

11. Labda ni nini kimefanya wengine wasiendelee katika mwendo wa ukamilifu?

¹¹ Labda wengine waliuelekea ubatizo kwa kusisimuka maoni ya moyoni tu badala ya sababu yenye akili ya kufanya hivyo. Huenda wengine wakawa walitazamia matokeo ya haraka na kufanya wakfu wa kujifikiria wao wenyewe, wa muda mfupi tu. Hata sababu iwe nini, wao walipoteza uhusiano wao wenye nguvu pamoja na Yehova. Wao ‘hawakumkazia sana macho’ Kielelezo wao, Yesu Kristo. (Waebrania 12:1, 2, NW) Basi upendo wao kwa Mungu ulififia na ukamilifu wao ukawa wa muda mfupi tu. Kwa sababu gani upendo ni jambo la maana sana? Ni kwa sababu huo tu ndiyo msingi imara wa kufanyia wakfu unaodumu kwa Yehova.​—Marko 12:30,31; 1 Yohana 4:7, 8, 16; 5:3

Kuhesabu Gharama ya Ukamilifu

12. Ni mwendo gani wa hekima kuchukua kabla ya ubatizo?

¹² Yesu hakuwatia moyo wafuasi wake wamfuate kwa upofu bila kuhesabu gharama. Yeye alishauri hivi: “Ni nani katika ninyi, kama akitaka kujenga mnara, asiyeketi kwanza na kuhesabu gharama, kwamba anavyo vya kuumalizia?” Ndiyo, mtu mwenye busara anapima kwa uangalifu mwendo wake wa wakati ujao. Ni lazima awe na uhakika juu ya sababu inayomsukuma kabla hajalikubali daraka kamili la wakfu na ubatizo wa Kikristo. Naye Yesu alionyesha jambo hilo lingeweza kumaanisha nini alipokata shauri hivi: “Basi, kadhalika kila mmoja wenu asiyeacha vyote alivyo navyo, hawezi kuwa mwanafunzi wangu.”​—Luka 14:28-32.

13. Ikiwa jambo kuu katika fundisho la Yesu ni upendo, yeye alimaanisha nini aliposema juu ya ‘kuchukia’ washiriki wa jamaa ya mtu? (Mathayo 22:37-40)

¹³ Kujiweka wakfu kumwelekea Yehova kunahitaji mtu awe na ukamilifu wa nafsi yote katika kufanya mapenzi ya kimungu. Hakuna watu wala mali zinazoweza kuruhusiwa ziuzidi upendo alio nao kwa Mungu. Hiyo ndiyo sababu Yesu alisema hivi bila kuficha: “Kama mtu akija kwangu naye hamchukii baba yake, na mama yake, na mke wake, na wanawe, na ndugu zake waume na wake; naam, na hata nafsi yake mwenyewe, hawezi kuwa mwanafunzi wangu.” (Luka 14:26) Sasa Yesu alikuwa na maana gani aliposema juu ya kuchukia washiriki wa jamaa ya mtu mwenyewe na hata mtu binafsi? Kwa sababu yeye alifundisha wafuasi wake wapende hata adui zao, ni katika maana gani alitumia neno chuki hapa? (Luka 6:27, 35) Chuki hapa ina wazo la kupenda kwa kiasi kidogo zaidi.​—Linganisha Mathayo 12:46-50.

14. Marafiki wengine na watu wa ukoo wanatendaje wakati mtu anapokuwa shahidi wa Yehova? (Yohana 15:18, 19)

¹⁴ Kwa uhakika wakati mtu anapokuwa shahidi Mkristo wa Yehova, kwa ghafula anagundua ni nani walio rafiki zake wa kweli. Wengine labda watamwepuka au wamgomee kwa sababu ameacha dini yake ya kwanza, ingawa wao wenyewe hawazoei dini yo yote kikweli. Lakini Yesu aliahidi kwamba mtu angerudishiwa malipo kwa hasara yo yote ya namna hiyo, akisema: “Hakuna mtu aliyeacha nyumba, au ndugu waume, au ndugu wake, au mama, au baba, au watoto, au mashamba, kwa ajili yangu, na kwa ajili ya Injili, ila atapewa mara mia sasa wakati huu . . . na katika ulimwengu ujao uzima wa milele.”​—Marko 10:29, 30.

15. Kwa sababu gani huenda wengine wakadharau Mashahidi wa Yehova?

¹⁵ Katika visa fulani mwendo wa wakfu na ukamilifu unaweza kufanya mtu apoteza heshima machoni pa watu wengine. (1 Wakorintho 4:12, 13) Kwa sababu gani iwe hivyo? Kwa sababu sasa unazoea dini isiyofikiriwa kuwa “yenye kuheshimika.” (Linganisha Marko 2:15, 16.) Wanaona kwamba si jambo la kuheshimika ‘kwenda ukisumbua-sumbua watu wale wengine na dini yako nyumba kwa nyumba.’ Wanaona si jambo la kuheshimika kwenda gerezani badala ya kuvunja hali yako ya kutokuwamo kuhusiana na mambo ya utaifa na uzalendo. (Yohana 18:36) Wanaona si jambo la kuheshimika kukataa kutiwa damu mishipani kwa sababu ya dhamiri iliyozoezwa na Biblia . . . ingawa pigo la sasa la ugonjwa wa UKIMWI linafanya watu fulani wawe na mawazo tofauti juu ya jambo hilo.​—Linganisha Matendo 15:28, 29; 17:6, 7; 24:5.

16. Tunasaidiwaje ili tushike ukamilifu wetu?

¹⁶ Ingawa njia ya ukamilifu wa Kikristo ni nyembamba na yenye kujaribu, sisi tuna msaada wa daima. (Mathaya 7:13, 14) Basi Paulo angeweza kusema hivi: “Nayaweza mambo yote katika yeye anitiaye nguvu.” (Wafilipi 4:13) Na tunaweza kupata nguvu hizo kupitia sala ya daima, kupitia funzo katika Neno la Mungu, na kupitia katika ushirika pamoja na kundi la Kikristo. Tukiwa washika-ukamilifu waliobatizwa, tunaweza kubaki tukiwa waaminifu na washikamanifu, kwa sababu ya nguvu ambazo Mungu anatutolea.​—Waefeso 4:11-13; 6:18; Zaburi 119:105.

Faida za Mwendo wa Kushika Ukamilifu

17. Ubatizo unaweza kuongoza kwenye gani?

¹⁷ Hatua ya wakfu na ubatizo inaongoza kwenye baraka nyingi. Kwanza, inaweza kufanya huduma ipanuke na iwe yenye kuridhisha zaidi. Kuna taraja la mtu kufanya utumishi kwa wakati ujao akiwa painia msaidizi, ambao mara nyingi unaongoza kwenye utendaji wa painia wa kawaida na wa pekee, utumishi wa umisionari, kazi ya mzunguko na wilaya, na utumishi wa Betheli. (Ona Sanduku katika ukurasa 26.) Kwa ndugu waliobatizwa njia inafunguka ya kutumikia wengine kundini kama mtumishi wa huduma na, baadaye, kama mzee. Lakini ili kupata baraka zote hizo, takwa ni lile lile la msingi​—ukamilifu.​—1 Timotheo 3:1-10.

18. Maisha yetu ya wakfu yanapasa yawe na matokeo gani juu ya wengine tunaoonana nao?

¹⁸ Faida za maisha ya kujiweka wakfu na kushika ukamilifu zinaenea na kufikia wengine. Kwa sababu ya kufuata sana mfano wa Kristo, mtu anakuwa mume au mke bora, baba au mama bora. (1 Petro 2:21; Waefeso 5:21-33; 6:4) Vijana wanakuza uhusiano wenye kujenga pamoja na wazazi wao, walimu, na wazee wa kundi. (Tito 2:6, 7) Kila Mkristo aliyebatizwa anakuwa jirani bora, mwajiri-kazi aliye bora, au mwajiriwa-kazi aliye bora. (Mathayo 22:39; Waefeso 6:5-9; Tito 2:9, 10) Na kama Kristo, kila Mkristo anapaswa kuwa mshirika mwenye kuburudisha wengine, kama vile Yesu alivyosema: “Jitieni nira yangu, mjifunze kwangu; kwa kuwa mimi ni mpole na mnyenyekevu wa moyo; nanyi mtapata raha nafsini mwenu.”​—Mathayo 11:29.

19. Ni faida gani nyingine iliyo kubwa inayotokana na hatua ya wakfu?

¹⁹ Faida iliyo kubwa zaidi ya hatua ya wakfu na kubatizwa tunapojiunga na Washika-ukamilifu wa Yehova ni kuwa na uhusiano wenye amani pamoja na Muumba. Huo una leta amani ya akili. Ni kama vile Paulo alivyoshauri: “Msijisumbue kwa neno lo lote; bali katika kila neno kwa kusali na kuomba pamoja na kushukuru, haja zenu na zijulikane na Mungu. Na amani ya Mungu, ipitayo akili zote, itawahifadhi mioyo yenu na nia zenu katika Kristo Yesu.”​—Wafilipi 4:6, 7

20. (a) “Amani ya Mungu” inategemea nini? (b) Ni mapendeleo gani yanayofungukia mtu anayebatizwa?

²⁰ “Amani ya Mungu” inategemea kufahamu kwa kina kirefu mfano wa Yesu na dhabihu yake. Maarifa hayo ya kumjua Kristo yanaongoza wengi kwenye toba ya kweli na badiliko la kikweli la mwenendo wao au ‘kugeuka’ waache dhambi. (Matendo 3:19, 20) Matokeo ni kwamba, watu waliojiweka wakfu wanasema, kama mtunga zaburi: “Ila mimi nitakwenda kwa ukamilifu wangu . . . Katika makusanyiko nitamhimidi [Yehova].” (Zaburi 26:11, 12) Mtu anayebatizwa katika maji kuonyesha wakfu wake kwa Mungu anajipanga upande mmoja na washika-ukamilifu kwa Yehova walioko ulimwenguni kote. (1 Petro 2:17) Anakuwa pia akishika ‘uzima ulio kweli kweli,’ uzima wa milele, ambao Yehova ameahidi kupitia Kristo Yesu.​— 1 Timotheo 6:19; Tito 1:2.

[Maelezo ya Chini]

Wewe Ungejibuje?

◻ Wakristo wa kwanza walivutwaje na ukweli uliofundishwa na Kristo na mitume?

◻ Utakatifu unahusianaje na Mkristo mmoja mmoja na kundi?

◻ Ni lazima ukamilifu utegemee nini?

◻ Ni nini kinachohusika katika kuhesabu gharama ya ukamilifu?

◻ Ni faida gani zinazotokana na kushika ukamilifu?

[Sanduku katika ukurasa wa 26]

Mapendeleo Katika Huduma ya Wakati Wote

Painia Msaidizi: Mhudumu aliyebatizwa mwenye kutumia saa zisizopungua 60 katika utendaji wa kuhubiri wakati wa mwezi.

Painia wa Kawaida: Mhudumu aliyebatizwa mwenye kutumia wastani wa saa 90 kwa mwezi katika utendaji wa kuhubiri.

Painia wa Pekee: Mhudumu aliyebatizwa mwenye kutumia angalau saa 140 kwa mwezi katika huduma na kupokea alawansi ndogo ya kila mwezi kwa gharama za mahitaji ya msingi. Mapainia hao kwa kawaida wanapewa mgawo kwenye vikundi vilivyo pekee yavyo na makundi madogo.

Mmisionari wa Gileadi: Mhudumu aliyebatizwa ambaye amezoezwa kwenye shule ya Gileadi ya Biblia ya Sosaiti yetu kwa ajili ya utumishi wa nchi za kigeni na pia mwenye kutumia saa zisizopungua’140 kwa mwezi katika huduma.

Waangalizi wa Mizunguko na Wilaya: Wazee wanaosafiri wenye kutembelea makundi na mizunguko kwa kusudi la kujenga akina ndugu katika huduma yao na mikutano. Wanatumia saa nyingi katika utumishi wa shambani.

Utumishi wa Betheli: Unafanywa na wahudumu wa wakati wote katika yo yote ya afisi za matawi ya Sosaiti yetu na viwanda vya uchapaji katika sehemu zote za ulimwengu.

[Picha katika ukurasa wa 24]

Ubatizo unafungua njia ya  . . .

[Picha katika ukurasa wa 25]

. . . huduma ya kushika ukamilifu