Wahitimu wa Gileadi—“Wamishonari Halisi!”
“MISHONARI ni nini?” Swali hilo liliulizwa na uhariri wa gazeti moja karibu miongo minne iliyopita. Mwandikaji alitoa hoja kwamba wamishonari wa kweli walikuwa watumishi wa kufanyiza marekebisho ya kijamii na kiuchumi. Hata hivyo, Jumapili, Machi 5, 1995, katika Jersey City Assembly Hall of Jehovah’s Witnesses, jibu tofauti kabisa lilitolewa kwa mkazo. Ilikuwa ni pindi gani? Kuhitimu kwa darasa la 98 la Watchtower Bible School of Gilead—Shule ambayo imepeleka wamishonari kotekote ulimwenguni!
Baada ya wimbo na sala ya kufungua, Albert D. Schroeder wa Baraza Linaloongoza alikaribisha kwa uchangamfu wale wote 6,430 waliohudhuria. Katika maneno yake ya utangulizi, Ndugu Schroeder alieleza wazi sababu iliyofanya wahitimu wa Gileadi wawe tofauti na wengine ambao wamejiita wamishonari. Alisema: “Biblia ndiyo kitabu kikubwa cha mafundisho cha Gileadi.” Wahitimu wa Gileadi huzoezwa kuwa, si wafanyakazi wa kufanyiza marekebisho ya kijamii, bali kuwa walimu wa Neno la Mungu. Hivyo, wao wamestahili kipekee kutunza mahitaji ya kiroho ya watu katika mashamba ya kigeni.
Wasemaji waliofuata waligusia maeneo kadhaa ambayo wahitimu wa Gileadi hutoa uthibitisho wa kuwa wamishonari “halisi.” Charles Molohan aliwazungumzia kwa kichwa “Endeleeni Kuzaa Matunda Mema Mkiwa Wamishonari.” Akirejezea maneno ya mtume Paulo katika Wakolosai 1:9, 10, NW, Ndugu Molohan aliwakumbusha wahitimu kwamba miezi yao mitano iliyokuwa imepita wakiwa Gileadi ilikuwa imewasaidia kuongezeka katika “ujuzi sahihi wa Mungu.” Huo ungewasaidia kuzaa matunda kwa njia mbili: kwa kudhihirisha matunda ya roho ya Mungu na kwa kushiriki kweli za Biblia na wengine.
Daniel Sydlik wa Baraza Linaloongoza alifuatia kwa kichwa chenye uzito “Usihatarishe Uhai Wako.” Alitaja swali la Yesu: “Mtu atatoa nini badala ya nafsi yake?” (Mathayo 16:26) Ndugu Sydlik alisema: “Wanadamu wametoa nafsi zao ili wafuate njia ya maisha iliyo rahisi, isiyo ngumu.” Hata hivyo, wale wenye imani iliyo hai hawawezi kuridhiana wajapokabiliwa na majaribu na mitihani. Maneno ya Yesu yaonyesha kwamba ni lazima mtu awe tayari ‘kutoa,’ yaani, kujidhabihu, ili apate nafsi yake, au uhai. Wamishonari wapya walihimizwa kumpa Yehova nafsi yao yote, ubora wao kabisa, katika utumishi wake!
Kisha, William Van de Wall wa Halmashauri ya Idara ya Utumishi alisema juu ya kichwa “Mtume Paulo—Kielelezo Kifaacho Kuigwa.” Ndugu Van de Wall alieleza: “Paulo aliongoza kazi ya mishonari katika karne ya kwanza.” Basi, kwa kufaa, maeneo manne yalitajwa ambamo mtume Paulo aliweka kielelezo chema kwa wamishonari leo: (1) Hangaiko la kweli la Paulo na upendo kwa watu, (2) kuwa kwake mwenye matokeo katika huduma, (3) kukataa kwake kujikweza kwa sababu alikuwa mwenye kiasi, (4) tumaini lake lisilotilika shaka kwa Yehova.
“Acha Yehova Akuchunguze Katika Mgawo Wako Mpya” ilikuwa habari iliyozungumzwa na Lyman A. Swingle wa Baraza Linaloongoza. Akitumia andiko la siku, Zaburi 139:16, Ndugu Swingle alikiri kwamba, wakiwa wamishonari wapya, wangepata matatizo katika migawo yao na kwamba Yehova ajua masuluhisho. “Mwendee,” akahimiza, “zungumza naye ukiwa na matatizo. Tafuta ujue mapenzi yake.”
Kisha John E. Barr wa Baraza Linaloongoza akasema juu ya habari “Imani Yenu Inazidi Sana.” (2 Wathesalonike 1:3) Kwenye Luka 17:1, twasoma kwamba Yesu alisema: “Makwazo hayana budi kuja.” Baadhi ya wamishonari wamekwazika kwa sababu ya nyutu za wamishonari wenzao. Lakini Ndugu Barr alitia moyo wamishonari kuwa na imani inayohitajika ili kuwa mwenye kusamehe. Hakika, ni katika muktadha huo kwamba wanafunzi wa Yesu waliomba: “Tuongezee imani.” (Luka 17:2-5) Huenda imani ya wamishonari pia ikajaribiwa kwa marekebisho kadhaa ya kitengenezo. “Je, tuna imani ya kukubali hayo,” akauliza Ndugu Barr, “au yatakuwa vikwazo vikubwa kama milima?”
Kisha yakaja maonyo mapole ya wafunzi wawili wa Gileadi. Jack Redford aliwahimiza wahitimu kudumisha mtazamo chanya. Alisimulia juu ya mishonari mmoja aliyeacha mgawo wake kwa sababu ya kufanyiwa utani na wamishonari wenzake. Hata hivyo, Maandiko hutuonya dhidi ya kuchokozeka bila sababu. (Mhubiri 7:9) “Mwe na mtazamo chanya,” akahimiza. “Mwe wenye kusamehe makosa na kutokamilika kwa wengine walio karibu nanyi.”
Kisha U. V. Glass, msajili wa Gileadi akauliza: “Je u tayari kupambana kwa mafanikio na ‘wakati na tukio lisilotazamiwa’”? (Mhubiri 9:11, NW) “Mtindo wetu wa maisha sikuzote hupatwa na mabadiliko,” akasema Ndugu Glass, “na mengine yaweza kutamausha sana.” Wamishonari fulani bila kutazamia wamekabili afya mbaya, maradhi, na matatizo ya familia, wakilazimika kuacha migawo yao. “Hata tukio lisilotazamiwa liwe nini,” akasema Ndugu Glass, “twajua kwamba Yehova analijua naye analijali. Tukimtegemea, twajua tutashinda!”
Hotuba yenye kichwa “Waliowekwa Kando Kwa Ajili Ya Utumishi wa Mishonari” ilikuwa tamati ya mfululizo wa hotuba za asubuhi. Theodore Jaracz wa Baraza Linaloongoza alizungumzia swali lililoulizwa hapo mwanzoni, yaani, “Mishonari ni nini?” Akijibu, alizungumza juu ya Matendo sura za 13 na 14 kuhusu kazi ya mishonari ya Paulo na Barnaba. Kwa wazi, kazi hiyo ilikazia akili, si kusuluhisha maovu ya kijamii, bali ‘kuhubiri habari njema.’ (Matendo 13:32) Ndugu Jaracz aliuliza: “Je, hamkubali kwamba Paulo na Barnaba walionyesha jinsi mishonari halisi anavyopasa kuwa?” Kisha mishonari mwenye uzoefu sana Robert Tracy wa Mexico aliombwa asimulie baadhi ya maono yake yenye kuchangamsha moyo akiwa mweneza-evanjeli.
Programu ya asubuhi ilifikia upeo wayo Ndugu Schroeder alipowapa diploma wahitimu 48. Wahudhuriaji walisisimuka kusikia majina ya nchi 21 ambayo wamishonari hawa walikuwa wamepewa migawo: Barbados, Benin, Bolivia, Côte d’Ivoire, Ekuado, Estonia, Guinea-Bissau, Guinea ya Ikweta, Honduras, Jamhuri ya Afrika ya Kati, Kosta Rika, Latvia, Mauritius, Msumbiji, Nikaragua, Paraguai, Peru, Senegal, Taiwan, Venezuela na Visiwa vya Leeward.
Baada ya pumziko la chakula cha mchana, wahudhuriaji walikusanyika tena na kufurahia funzo changamfu la Mnara wa Mlinzi, lililoongozwa na Robert P. Johnson wa Idara ya Utumishi. Washiriki wa darasa la 98 walijibu maswali. Hilo lilifuatwa na mifululizo yenye kufurahisha ya mahoji yaliyoongozwa na washiriki wa wafanyakazi wa Gileadi. Wahudhuriaji walitiwa moyo sana wahitimu walipoeleza maono yao ya shambani na kuonyesha hisia zao juu ya migawo yao ya kigeni.
Kwa miaka sita na nusu, Gileadi ilikuwa katika majengo ya Watchtower Society katika Wallkill, New York. Hata hivyo, katika Aprili 1995, shule hiyo ilihamishwa Watchtower Educational Center iliyo mpya katika Patterson, New York. Familia ya Betheli iliyo Wallkill ilihisije juu ya badiliko hili? Katika uhitimu huu, baadhi ya wale waliotoka Wallkill walihojiwa. Maelezo yao yenye kugusa moyo yalionyesha wazi kwamba wanafunzi wa Gileadi waliacha alama zisizofutika kwao. Kwa wazi, wanaume na wanawake hao wenye hiari ni mishonari halisi—wanyenyekevu, wenye kujidhabihu, wenye kuhangaikia kusaidia wengine.
Uhitimu ulipokwisha, wote katika hudhurio walikuwa na hakika kwamba Shule ya Gileadi itaendelea kufanya kwa mafanikio yale ambayo imefanya kwa miaka zaidi ya 50—kutokeza wamishonari halisi!
[Sandukupage 18]
Takwimu za Darasa:
Idadi ya nchi zilizowakilishwa: 8
Idadi ya nchi walikogawiwa: 21
Idadi ya wanafunzi: 48
Wastani wa umri: 32.72
Wastani wa miaka katika kweli: 15.48
Wastani wa miaka katika huduma ya wakati wote: 10.91
[Picha katika ukurasa wa18]
Darasa la 98 la Kuhitimu la Watchtower Bible School of Gilead
Katika orodha iliyopo chini, mistari imepewa nambari kuanzia mbele kurudi nyuma, na majina yameorodheshwa kuanzia kushoto kuelekea kulia katika kila mstari.
(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.