Hakuwa Mzee Mno Asimtumikie Yehova

WATU wengi wazee-wazee huhisi kwamba miaka yao inayobaki haina tumaini kubwa la kupata furaha. Hata mwigizaji mmoja mashuhuri anayezeeka alisema hivi: “Nimeharibu maisha yangu, na ni kuchelewa mno kuyabadili . . . Ninapoenda kutembea nikiwa peke yangu, mimi hukumbuka maisha yangu yaliyopita, na sifurahi vile nilivyoishi . . . Nina wasiwasi kila mahali na nashindwa kutulia.”

Mwanamke mzee-mzee aliyeishi karibu miaka 2,000 iliyopita hakuwa na tatizo la aina hiyo. Alikuwa mjane wa miaka 84, lakini alikuwa mwenye bidii, mwenye furaha, na mwenye kupendelewa ajabu na Mungu. Aliitwa Ana, naye alikuwa na sababu ya pekee ya kushangilia. Hiyo ilikuwa nini?

“Haondoki Katika Hekalu”

Mwandikaji wa Gospeli Luka atujulisha kwa Ana. “Palikuwa,” yeye asema, “na nabii mke, jina lake Ana, binti Fanueli, wa kabila ya Asheri” katika Israeli. Akiwa nabii wa kike, alikuwa na karama ya roho takatifu ya Mungu, au kani ya utendaji, katika maana ya pekee. Na Ana alikuwa na fursa nzuri sana ya kutoa unabii kwenye pindi moja yenye kutokeza.

Luka asimulia: “Umri wake ulikuwa miaka mingi, alikuwa amekaa na mume miaka saba baada ya uanawali wake. Naye ni mjane wa miaka themanini na minne.” (Luka 2:36, 37) Yaelekea kwamba Ana alikuwa mjane alipokuwa mchanga sana. Wanawake Wakristo walio wajane wa umri wowote wajua jinsi kupoteza mume mpendwa katika kifo kunavyohuzunisha. Hata hivyo, kama vile wanawake wengi wenye kumcha Mungu leo, Ana hakuacha ono hilo lenye kusikitisha likomeshe utumishi wake kwa Mungu.

Luka atuambia kwamba Ana ‘hakuondoka kamwe katika hekalu’ katika Yerusalemu. (Luka 2:37) Yeye alithamini sana baraka zinazotokana na utumishi kwenye nyumba ya Mungu. Matendo yake yalionyesha kwamba yeye, kama vile mfalme-mtunga-zaburi Daudi wa Israeli, alikuwa na jambo moja tu la kumwomba Yehova. Na hilo lilikuwa nini? Daudi aliimba hivi: “Neno moja nimelitaka kwa BWANA, nalo ndilo nitakalolifuata, nikae nyumbani mwa BWANA siku zote za maisha yangu. Niutazame uzuri wa BWANA, na kutafakari hekaluni mwake.” (Zaburi 27:4) Katika jambo hilo pia, Ana ni kama wanawake Wakristo leo wanaofurahia kuwa kwenye mahali pa ibada pa Yehova kwa ukawaida.

Ana alitoa utumishi mtakatifu kwa Yehova usiku na mchana. Yeye alifanya hivyo “kwa kufunga na kuomba,” ikionyesha kuomboleza na kutazamia kwa hamu. (Luka 2:37) Kutiishwa kwa Wayahudi kwa karne nyingi chini ya mataifa ya Wasio Wayahudi, kutia na hali ya kidini yenye kuzorota zilizofikia hata kwenye hekalu na ukuhani walo, kungeweza sana kuwa sababu iliyomfanya Ana kufunga na kumwomba Yehova Mungu. Lakini pia alikuwa na sababu ya kufurahi, hasa kwa sababu ya jambo fulani lisilo la kawaida lililotukia katika siku yenye matukio ya maana katika mwaka 2 K.W.K.

Baraka Isiyotazamiwa

Katika siku ya maana sana, kitoto Yesu aliletwa kwenye hekalu la Yerusalemu na mamake, Mariamu, na babake mlezi, Yusufu. Simeoni mzee-mzee alikiona kitoto hicho na kutoa maneno ya kiunabii kwenye pindi hiyo. (Luka 2:25-35) Kama kawaida, Ana alikuwa kwenye hekalu. “Alitokea,” aripoti Luka, “saa ile ile.” (Luka 2:38) Ni lazima iwe Ana alisisimka kama nini macho yake yenye kuzeeka yalipomwona Mesiya wa wakati ujao!

Siku arobaini kabla ya hapo, malaika wa Mungu alikuwa amewashangaza wachungaji karibu na Bethlehemu kwa maneno haya: “Mimi ninawaletea habari njema ya furaha kuu itakayokuwa kwa watu wote; maana leo katika mji wa Daudi amezaliwa, kwa ajili yenu, Mwokozi, ndiye Kristo Bwana.” Jeshi kubwa la kimbingu lilimsifu Yehova na kuongeza: “Atukuzwe Mungu juu mbinguni, na duniani iwe amani kwa watu aliowaridhia.” (Luka 2:8-14) Vilevile, Ana sasa alisukumwa kutoa ushahidi juu ya Yule ambaye angekuwa Mesiya!

Baada ya kumtazama kitoto Yesu, Ana “akamshukuru Mungu, na wote waliokuwa wakiutarajia ukombozi katika Yerusalemu akawatolea habari zake.” (Luka 2:38) Kama vile Simeoni mzee-mzee, ambaye pia alipendelewa kumwona kitoto Yesu kwenye hekalu, bila shaka Ana alikuwa ametamani, ameomba, na kungojea Mkombozi aliyeahidiwa. Habari njema kwamba Yesu alikuwa ndiye Yule zilimfanya awaambie wengine hayo.

Ingawa huenda Ana hakutazamia kuwa hai Yesu alipokuwa mkubwa, yeye alifanya nini? Yeye alitoa ushahidi kwa wengine kwa furaha juu ya ukombozi ambao karibuni ungetolewa kupitia Mesiya huyo ajaye.

Kielelezo Chema cha Ana

Ni watu wangapi wa kidini ulimwenguni wangetoa ushahidi kama huo au wawe bado wakitoa ibada usiku na mchana wakiwa na umri wa miaka 84? Yaelekea kwamba, wangekuwa wameomba malipo ya uzeeni miaka mingi mapema. Ana na Simeoni walikuwa tofauti. Waliweka vielelezo vyema kwa watumishi wote wa Yehova walio wazee-wazee. Kwa kweli, wao walipenda nyumba ya ibada ya Yehova na kumsifu kwa moyo wao wote.

Ana anatutolea kielelezo chema sana cha mjane mwenye kumcha Mungu. Kwa kweli, masimulizi ya Luka ya mwanamke huyo mzee-mzee mwenye unyenyekevu yalingana vema na sifa za mjane anayestahili zinazoonyeshwa kwenye 1 Timotheo 5:3-16. Hapo mtume Paulo asema kwamba mjane kama huyo “hudumu katika maombi na sala mchana na usiku,” naye ni “mke wa mume mmoja,” na ‘hufuata kwa bidii kila tendo jema.’ Ana alikuwa mwanamke kama huyo.

Leo, twaona wajane waaminifu walio wazee-wazee wakitoa utumishi mtakatifu kwa Mungu usiku na mchana katika maelfu ya makutaniko ya Mashahidi wa Yehova duniani pote. Jinsi tunavyothamini kuwa na “Ana” hao wa kisasa miongoni mwetu!

Hata wakiwa na umri mkubwa, wanaume na wanawake waweza kujiweka wakfu kwa Mungu na wafananishe hilo kwa ubatizo wa maji. Wale walio wazee-wazee si wazee mno wasimtumikie Yehova na kutoa ushahidi juu ya Ufalme wa Kimesiya ambao sasa umesimamishwa mbinguni na karibuni utaleta baraka nyingi kwa wanadamu watiifu. Watu wazee-wazee ambao sasa watoa utumishi mtakatifu kwa Mungu waweza kutoa ithibati juu ya baraka za Yehova kwao, kama vile Ana alivyobarikiwa kipekee karne nyingi zilizopita. Yeye hakuwa mzee mno asimtumikie Yehova na kulisifu jina lake takatifu—wala wao si wazee mno.