Wakristo Wasiokuwamo Katika Ulimwengu Wenye Madoa ya Damu

“Atakayemwaga damu ya mwanadamu, damu yake huyo itamwagwa na mwanadamu; maana kwa mfano wake Mungu alimfanya mwanadamu”​—MWANZO 9:6.

 1. Ni matukio gani ya ulimwengu tangu mwaka 1914 yaliyo sababu ya kuhangaisha?

BAHARI zenye damu, ile ya wanadamu zaidi ya milioni mia moja, imemwagwa vitani tangu mwaka 1914. Na taraja kwa wakati ujao ni nini? Kuharibiwa kwa miji miwili ya Kijapani katika mwaka 1945 kulifagilia mbali maisha za watu wapatao 200,000 na mwishowe kukatokeza fundisho jipya, lililotajwa na yale mataifa mawili yaliyo na nguvu nyingi zaidi za kijeshi na kwa kufaa likaitwa Uhakikishiano wa Kuangamizana (kwa Kiingereza “MAD,” yaani, Mutually Assured Destruction). Huo umekuwa ndio msingi wa hofu nyingi upande wa kila moja la mataifa hayo, hofu yenye kutegemea kurundikwa sana kwa silaha ambazo zingeweza kurudia-rudia kuibomoa dunia yetu mara sita. Nyambizi (Submarine) zimepeleka silaha hizo za kiibilisi ndani ya bahari zile kuu, na hivi majuzi tisho la kutokea vita ya anga za juu limeongeza hatari hiyo. Hata usawa wa hofu sasa umetikiswa kwenye misingi yayo. Je! kuna njia yo yote ya kutoka katika kichaa hicho?

 2. Yesu alitoa unabii gani kuhusu nyakati hizi, lakini akawapa Wakristo uhakikisho gani?

² Ndiyo, iko. Lakini njia hiyo haitachaguliwa na mataifa yenyewe. Yesu alitoa unabii kuhusu hali ile inayoyatatanisha mataifa wakati wa sasa, akisema: “Kutakuwako ishara katika jua na katika mwezi na katika nyota, na duniani huzuni kuu ya mataifa, wasijue njia ya kutokea kwa sababu ya mngurumo wa bahari na msukosuko wake, huku wanadamu wakizimia kwa sababu ya hofu na kwa kutazamia mambo yanayokuja juu ya dunia inayokaliwa na watu; kwa maana nguvu za mbingu zitatikiswa.” Yesu alimalizia unabii huu kwa kutoa uhakikisho wa kwamba Wakristo ‘wanaoendelea kukesha huenda wakafaulu katika kuyakimbia mambo hayo yote ambayo yamekusudiwa yatukie.’​—Luka 21:25, 26, 36, NW.

Kufuatia Amani Pamoja na Mungu

 3. (a) Ni kwa njia gani mataifa yanatumikia mapendezi ya “mungu wa ulimwengu huu”? (b) Yehova atatatuaje suala linalohusika?

³ Mataifa, hasa yale yenye silaha za nyukilia, yamekwama katika shindano la kung’ang’ania utawala wa ulimwengu, ambalo linaaminiwa lingeweza kuishia katika kuangamiza ulimwengu. Jambo hilo linatumikia mapendezi ya “mungu wa ulimwengu huu.” Mataifa ‘wamejipanga pamoja juu ya Yehova, na juu ya Kristo wake,’ ambaye sasa ametawazwa katika mbingu. Wakati Yehova atakapotoa amri, Kristo atayavunja mataifa hayo kama kwamba kwa fimbo ya chuma ya kifalme. Hivyo ndivyo itakavyotimia ahadi hii: “Mungu wa amani atamseta Shetani chini ya miguu yenu upesi.”​—2 Wakorintho 4:4, tafsiri ya King James; Zaburi 2:2, 6-9; Warumi 16:20.

 4. Tunaweza kufuatiaje amani pamoja na Mungu? (1 Petro 3:11)

⁴ Sisi, kwa upande wetu, tunapaswa tutake kufuatia amani pamoja na Mungu huyo. Tunaweza kufanyaje hivyo? Kwanza, inatupasa tutake kuwa na maoni ya Mungu kuhusu utakato wa uhai wa kibinadamu na juu ya damu ya uhai yenye thamani kubwa inayotiririka katika mishipa na vishipa vyetu.

 5. Ni mifano gani inayoonyesha kwamba Yehova analipizia kisasi umwagaji damu wa ovyo ovyo?

⁵ Yehova ndiye Muumba wa mwanadamu na wa mkondo mzuri sana wa damu unaopelekea wanadamu vitu vya kuulisha mwili wa kibinadamu, na kwa njia hiyo kuendeleza uhai wetu. Mungu hakukusudia kamwe damu ya kibinadamu imwagwe ovyo ovyo. Baada ya Kaini kutenda uuaji wa kwanza, Yehova alitangaza kwamba damu ya Abeli ilikuwa ikilia kwa sauti ili ilipizwe kisasi. Baadaye, mmoja wa wazao wa Kaini, Lameki, akawa mwuaji na kusema kwa njia ya shairi kwamba yeye mwenyewe akiuawa, basi hatia yake ya kumwaga damu na ilipizwe kisasi. Baadaye, ulimwengu wenye ufisadi ukajawa na jeuri. Yehova aliipeleka gharika kuharibu ulimwengu huo wa kwanza wa wanadamu. Ni jamaa ya Noa mwenye amani tu iliyookoka, jina lake likiwa linamaanisha “Pumziko.”​—Mwanzo 4:8-12, 23, 24; 6:13; 7:1.

 6. Sheria ya Mungu ni nini kuhusu damu, nayo inapasa kushikwa na nani?

⁶ Ndipo Yehova alipojulisha Noa juu ya mapenzi Yake ya waziwazi kabisa kuhusu damu. Alifikisha jambo hilo kwenye upeo kwa kusema: “Atakayemwaga damu ya mwanadamu, damu yake huyo itamwagwa na mwanadamu; maana kwa mfano wake Mungu alimfanya mwanadamu.” (Mwanzo 9:3-6) Wanadamu wote leo ni wazao wa Noa, na kwa hiyo sheria hii ya kimungu inayokazia kuheshimu uhai inapasa kufuatwa na wanadamu wote wanaotamani kibali cha Mungu. Ya sita ya zile amri kumi ilitangaza hivi: “Usiue.” Kuwa na hatia ya damu kunahitaji hatua inayofaa ichukuliwe kisha kuwe na malipo.​—Kutoka 20:13; 21:12; Kumbukumbu la Torati 21:1-9; Waebrania 10:30.

 7. (a) Kwa sababu gani ilifaa Yehova akaamuru Israeli waende vitani? (b) Wakristo leo wanafanya vita gani?

⁷ Kwa kuwa umwagaji wa damu ulikatazwa waziwazi sana, mbona Yehova aliruhusu na hata akaamuru, taifa la Israeli lijitie vitani? Inatupasa tukumbuke kwamba hiyo ilikuwa vita yenye kutakaswa, ambayo Yehova, yule Hakimu wa dunia yote, aliitumia kuangamiza mataifa yenye kuabudu mashetani. Kwa mfano, Wakanaani walikuwa wakaaji wasioruhusiwa katika Nchi ya Ahadi na walifuata mtindo wa maisha ya kishetani yenye ukosefu wa adili ambayo yangehatirisha watu watakatifu wa Mungu. Yehova aliifanya nchi ‘ikawatapika’ wanadamu hao wenye tabia zilizoshuka watoke katika eneo lao akitumia vita ya kitheokrasi kufanya hivyo. (Mambo ya Walawi 18:1-30; Kumbukumbu la Torati 7:1-6, 24) Jambo hilo linaitetea haki ya vita ya kiroho inayofanywa na Mkristo leo.​—2 Wakorintho 10:3-5; Waefeso 6:11-18.

 8. Ni nini kinachoonyesha kwamba Mungu hakubali umwagaji damu isiyo na hatia

⁸ Lakini, Yehova hakukubalia kumwaga damu bila kujali ni ya nani inayomwagwa. Hivyo, imeandikwa hivi kuhusu mfalme wa Yuda: “Na Manase akazimwaga damu zisizo na hatia, nyingi sana, hata alipokuwa ameijaza Yerusalemu tangu upande huu hata upande huu.” Ingawa baadaye Manase alitubu na kujinyenyekeza mbele za Yehova, hatia hiyo ya damu ilibaki juu yake na ukoo wake wa kifalme. Mfalme Yosia, mjukuu wa Manase mwenye kuogopa Mungu, alichukua hatua ya uhakika akaisafisha nchi na kurudisha ibada ya kweli. Lakini yeye hangeweza kuiondoa hatia hiyo ya damu. Wakati wa utawa wa Yehoyakimu mwana wa Yosia, Yehova alichukua hatua ya kuleta Nebukadreza dhidi ya Yuda ili kufikiliza hukumu dhidi ya taifa hilo. “Hakika kwa amri ya [Yehova] mambo hayo yalimpata Yuda, ili waondoshwe kutoka machoni pake, kwa sababu ya dhambi zake Manase, kadiri ya yote aliyoyafanya; tena kwa ajili ya damu zisizo na hatia alizozimwaga; kwani aliujaza Yerusalemu damu zisizo na hatia; wala [Yehova] hakukubali kusamehe.​—2 Wafalme 21:16; 24:1-4; 2 Mambo ya Nyakati 33:10-13.

Kiwango kwa Wakristo

 9. Ni kiwango gani ambacho Yesu aliwekea Wakristo kuhusu kumwaga damu?

⁹ Tungetazamia kwamba Yesu, Mwanzilishi wa Ukristo, angeweka kiwango cha kufuatwa na Wakristo kwa habari ya kumwaga damu. Je! alikiweka? Basi, muda mfupi baada ya yeye kuanzisha ukumbusho wa kifo chake, Yesu alihakikisha kwamba wanafunzi wake wamekuwa na panga mbili. Kwa kusudi gani? Ili kusimamisha kanuni fulani ya maana sana, ambayo Wakristo wote wangehitaji kuifuata. Wakati kile kikosi cha askari kilipokuja kukamata Yesu katika Gethsemane, Petro mwenye kusisimuka-sisimuka mno alitumia upanga, akalipiga na kulitoa sikio la kuume la Malko mtumwa wa kuhani mkuu wa Kiyahudi. Je! halikuwa jambo zuri sana kupigana hivyo kwa ajili ya Mwana wa Mungu? Yesu hakufikiri hivyo. Yeye aliponya sikio la mtumwa huyo na kumkumbusha Petro kwamba Baba Yake wa kimbingu angeweza kutuma majeshi 12 ya malaika yakamsaidie Yesu. Hapo Yesu aliitaja kanuni ile ya msingi: “Wote waushikao upanga, wataangamia kwa upanga.”​—Mathayo 26:51-53; Luka 22:36, 38, 49-51; Yohana 18:10, 11.

10. (a) Ni kanuni gani ya maana imethibitishwa kwenye Yohana 17:14, 16, na 18:36? (b) Ni mwendo gani uliowaletea wokovu Wakristo wa karne ya kwanza?

¹⁰ Wakristo wa karne ya kwanza wangekumbuka baadaye sala ambayo Yesu alimpelekea Yehova kwa bidii nyingi, ambamo alisema hivi juu ya wanafunzi wake: “Wao si sehemu ya ulimwengu, kama vile mimi si sehemu ya ulimwengu.” Wao wangekumbuka jibu lenye maelezo ambalo Yesu alimtolea Pontio Pilato: “Ufalme wangu si sehemu ya ulimwengu huu. Kama ufalme wangu ungalikuwa sehemu ya ulimwengu huu, wahudumu wangu wangalikuwa wamepiga vita kwamba nisitolewe nipewe kwa Wayahudi. Lakini, kama ilivyo, ufalme wangu si wa kutoka chanzo hiki.” (Yohana 17:14, 16; 18:36, NW) Katika siku hizo, vyama vya, Kiyahudi vilikuwa vikipigana, kwa maneno na kwa kumwaga damu pia. Lakini wanafunzi wa Yesu hawakujihusisha katika shughuli hizo za kutaka mapinduzi. Kwa miaka ipatayo 30 wao walingoja katika Yerusalemu. Ndipo wakaitii ishara ya kiunabii ya Yesu kwa ‘kukimbilia milimani.’ Kukimbia kwao kuliwaletea wokovu.​—Mathayo 24:15, 16.

11, 12. (a) Ni uamuzi gani ambao Kornelio na Sergio Paulusi walilazimika kufanya walipokuja kuwa waamini? (b) Wangepokea wapi msaada ili wafanye uamuzi unaofaa? (c) Jambo hilo linatuonyesha nini leo?

¹¹ Huenda wengine wakauliza, ‘Namna gani Kornelio, yule mkuu wa askari mia moja, na Sergio Paulusi, gavana mwenye kuungwa mkono na jeshi katika Kipro? Je! wanaume hao hawakushirikiana na uanajeshi?’ Ndiyo, wakati ule walipoukubali ujumbe wa Kikristo walikuwa hivyo. Ingawa hivyo, Maandiko hayatuambii Kornelio na wengine walifanya nini baada ya kuongolewa. Bila shaka, Sergio Paulusi, aliyekuwa mwanamume mwenye akili “akiyastaajabia mafundisho ya [Yehova],” angeuchunguza kwa makini sana msimamo wake wa kikazi kulingana na imani mpya aliyokuwa amepata kisha afanye uamuzi wenye kufaa. Ingetazamiwa kuwa Kornelio alifanya vivyo hivyo. (Matendo 10:1, 2, 44-48; 13:7, 12) Hakuna kumbukumbu lililoandikwa kuonyesha kwamba wanafunzi waliwaambia watu hao hatua waliyopaswa kuchukua. Wangeweza kuiona hatua hiyo kutokana na funzo lao wenyewe la Neno la Mungu.​—Isaya 2:2-4; Mika 4:3.

¹² Kwa njia iyo hiyo, haiwapasi Wakristo leo wawatolee wengine maagizo ya kibinafsi juu ya msimamo ambao ni lazima wachukue katika masuala yanayohusu kutokuwamo kwa Kikristo. Ni lazima kila mtu ajifanyie maamuzi yake mwenyewe ya kidhamiri kupatana na ufahamu wake wa kanuni za Biblia.​—Wagalatia 6:4, 5.

Katika Nyakati za Kisasa

13. Wanafunzi wa Biblia walipata matokeo gani katika kujaribu kuepuka hatia ya damu wakati wa Vita ya Ulimwengu ya Kwanza?

¹³ Mwaka 1914 ndipo vita ya ujumla ilipotokea mara ya kwanza ulimwenguni. Nazo mali zote za mataifa, kutia na watu wao wenye nguvu, zilielekezwa vitani. Wengi wa Wanafunzi wa Biblia, kama Mashahidi walivyokuwa wakiitwa wakati huo, walifanya jitihada za kusifika ili kuepuka hatia ya damu. Waliteswa vikali, sawa na vile Yesu alivyosema wangetendwa.​—Yohana 15:17-20.

14, 15. (a) Yehova aliandaaje mwongozo wakati wa Vita ya Ulimwengu ya Pili? (b) Ni msimamo gani wa waziwazi kabisa ambao Mashahidi wa Yehova walichukua wakati huo? (c) Jambo hilo lilitofautianaje na walilokuwa wakifanya wanadini wa kilimwengu?

¹⁴ Wakati pigano la duniani pote lilipozuka tena mwaka 1939, Yehova aliandalia watumishi wake mwongozo ulio wazi. Katika muda wa miezi miwili tangu kutangazwa kwa vita, mwongozo huo ulitolewa kwa namna ya habari ya kujifunza Biblia yenye kichwa “Kutokuwamo” katika tolea la Novemba 1, 1939 la Mnara wa Mlinzi. Habari hiyo ilimalizia kwa sentensi hii: “Wote walio upande wa Bwana hawatakuwa upande wo wote wa mataifa yanayopigana, na watakuwa upande wa yule THEOKRATI na Mfalme wake kabisa na kwa ukamili.”

¹⁵ Matokeo yakawa nini? Wakiwa udugu wa ulimwenguni pote, Mashahidi wa Yehova waliepuka bila ugeugeu kumwaga damu ya watu wasio na hatia, kutia na ndugu zao katika nchi nyinginezo. Wakati Wakatoliki, Waprotestanti, Wabuddha, na wengine walipokuwa wakichinjana, wanafunzi wa kweli wa Yesu walikuwa wakitii amri mpya yake: “Kama vile nilivyowapenda ninyi, nanyi mpendane vivyo hivyo.”​—Yohana 13:34.

16. (a) Mashahidi wa Yehova walionyeshaje kwamba wao wenyewe ni raia wanyofu? (b) Mashahidi walidumuje katika kumlipa Mungu mambo ya Mungu, na nyakati nyingine matokeo yalikuwa nini?

¹⁶ Wakristo hao waliendelea kumlipa Kaisari mambo ya Kaisari. Walitii sheria za nchi wakiwa raia wanyofu. (Mathayo 22:17-21; Warumi 13:1-7) Lakini jambo la maana zaidi ni kwamba, wao walimlipa Mungu mambo yaliyo yake, kutia na maisha zao zilizo wakfu na ibada yao ya Kikristo. Kwa hiyo, wakati Kaisari alipodai kwamba apewe mambo ya Mungu, wao walitenda kupatana na kanuni zilizotajwa kwenye Matendo 4:19 na 5:29. Kama suala lililohusika lilikuwa kumwaga damu, kufanya kazi ya kijeshi isiyo ya kupigana, utumishi wa namna isiyohusika na mambo hayo, au kusalimu mfano kama vile bendera ya kitaifa, Wakristo waaminifu walifuata maoni ya kwamba hakukuwa na msimamo wa katikati. Katika visa fulani wao waliuawa kwa sababu ya msimamo huo.​—Mathayo 24:9; Ufunuo 2:10.

Wao Hawakuacha Msimamo Wao

17. (a) Kulingana na kitabu kimoja, Mashahidi wa Yehova walitendwaje na Wanazi? (b) Katika kuukabili mwito huo wa ushindani, Mashahidi wa Yehova watofautianaje na wengine?

¹⁷ Kitabu kimoja cha hivi majuzi chenye kichwa Of Gods and Men kilisema kwamba wakati wa Utawala wa Tatu wa Hitler, Mashahidi wa Yehova ndicho kikundi cha kidini kilichopatwa na “upinzani ulio mkali kupindukia.” Mashahidi wa Yehova hawakuacha msimamo wao. Watu wa dini zile nyingine katika Ujeremani walifuata makasisi wao wenye kuombea majeshi, hivyo wakaipa serikali ya Kijeremani ibada ya kidini na kupokea ile “chapa” ya mnyama-mwitu wa kisiasa “katika mkono wao wa kuume, au katika vipaji vya nyuso zao.” (Ufunuo 13:16) Walikipa chama cha kisiasa cha Ujeremani mkono wao wa kuume kwa kukitegemeza kwa bidii na wakaonyesha waziwazi msimamo wao kwa kusema Hitler ndiye mwokozi na kusalimu bendera yenye alama ya swastika.

18. (a) Ni kumbukumbu gani linaloonyesha kama Mashahidi wa Yehova walikuwa watu “wasiokuwamo kisiasa?” (b) Tukio hilo la kihistoria linapasa liwe na matokeo gani juu yetu mmoja mmoja leo?

¹⁸ Ni msimamo gani ambao Wakristo wa kweli walichukua katika nchi hiyo? Uchunguzi uliotangulia kutajwa unasema: “Ni Mashahidi wa Yehova peke yao walioupinga utawala huo. Wao walipambana kufa na kupona na kwa sababu hiyo nusu yao wakafungwa gerezani na robo wakauawa. . . . Wao, tofauti na [dini nyinginezo], si wa kilimwengu katika maana ya kwamba hawatafuti kibali au thawabu za ulimwengu huu wa vitu vya kimwili wala hawajifikirii kuwa ni washiriki wao. Wao ni ‘wasiokuwamo’ kisiasa kwa kuwa tayari wao ni wa ulimwengu mwingine​—wa Mungu. . . . Wao hawatafuti wala hawatolei wapinzani njia za kukubaliana nao ili waache msimamo walio nao. . . . Kutumikia katika jeshi, kupiga kura, au kutoa ile salamu ya Hitler kungalimaanisha kukubali kwamba madai ya ulimwengu huu yanayatawala madai ya Mungu.’ Kufuatia amani na kutokuwa na jeuri kwa Mashahidi wa Yehova hata kulitambuliwa katika kambi za mateso. Jinsi gani? Katika jambo la kwamba “Mashahidi peke yao ndio walioruhusiwa kuwanyoa walinzi wa S.S. wakitumia nyembe ndefu kama visu vidogo, kwa kuwa wao peke yao wangeweza kutumainiwa kuwa hawawezi kuua.”

19. Mashahidi wa Yehova wamefuataje mfano wa Yesu wa ushujaa, na matokeo yakawa nini?

¹⁹ Wakati wa vita ya ulimwengu ya pili, Mashahidi wa Yehova wakawa mfano wa kutokeza wa kutokuwamo kwa Kikristo. Bila ugeugeu, katika sehemu zote za dunia wao walifuata kwa ushujaa mfano wa Yesu kwa kutokuwa “sehemu ya ulimwengu”; waliushinda ulimwengu huu wenye hatia ya damu kama vile Kristo alivyokuwa amefanya.​—Yohana 17:16, NW; 16:33; 1 Yohana 5:4.

Kupata Kimbilio la Kutokuwa na Hatia ya Damu

20. (a) Kwa sababu gani ni jambo la haraka kukimbia kutoka katika dini ya uwongo? (b) Ni wapi tu kimbilio la kweli linaweza kupatikana leo?

²⁰ Katika muda wa karne zote, matengenezo yameshiriki kumwaga damu isiyo na hatia kupitia shughuli za kivita, vita “vitakatifu,” na mabaraza ya kugandamiza wazushi wa kidini. Yamefanya mapatano pamoja na watawala wanaotumia mabavu wakiwa na hamu nyingi ya kumwaga damu. Matengenezo hayo yalikubaliana na tendo la watawala wenye kutumia mabavu la kutupa Mashahidi wa Yehova katika magereza na kambi za mateso, ambako wengi wao walifia. Yaliunga mkono kwa nia viongozi walioua Mashahidi kwa kuwapiga risasi na kuwakata vichwa. Mifumo hiyo ya kidini haiwezi kuepuka hukumu ya Yehova ya uadilifu. Hukumu hiyo haitakawia. Wala haimpasi mtu ye yote anayependa uadilifu akawie kutoka katika dini ya uwongo, “Babuloni Mkuu,” na kutafuta kimbilio katika tengenezo la Mungu.​—Ufunuo 18:2, 4, 21, 24, NW.

21. Ni nini kinachofananishwa na mpango wa Mungu wa miji ya kimbilio?

²¹ Kabla hatujajifunza Neno la Mungu, wengi wetu huenda tukawa tulimwaga damu ya kibinadamu au tulikuwa washiriki wa matengenezo ya kidini au kisiasa yenye hatia ya damu. Katika jambo hilo huenda tukalinganishwa na mwuaji asiye wa kukusudia katika Israeli. Huyo angeweza kukimbilia mmoja wa ile miji sita iliyotajwa wazi akapate kimbilio na, mwishowe, aondolewe hatia yake kuhani mkuu wa Israeli akiisha kufa. Leo, hiyo inamaanisha kukubali na kubaki chini ya faida za utumishi wenye bidii wa Kuhani Mkuu wake, Yesu Kristo. Kwa kubaki hapo katika ushirika pamoja na wapakwa-mafuta wa Mungu, tunaweza kuokoka wakati “mlipiza-kisasi cha damu,” Kristo Yesu, atakapofikiliza hukumu ya Mungu juu ya wenye hatia ya damu. “Mkutano mkubwa” wanaokimbilia tengenezo la Mungu ni lazima wabaki katika kimbilio hilo mpaka Kristo, akiwa katika cheo cha Kuhani Mkuu, ‘atakapokufa’ kuhusiana na kumaliza kazi ya ukombozi.​—Hesabu 35:6-8, 15, 22-25, NW; 1 Wakorintho 15:22-26; Ufunuo 7:9, 14.

22. Kwa habari ya Isaya 2:4, mataifa ya UM yanatofautianaje na taifa takatifu la Mungu?

²² Katika njia kuu ya Umoja wa Mataifa katika New York, U.S.A. unaweza kuyasoma maneno haya yanayotegemea Isaya 2:4: “Nao watafua panga zao ziwe majembe, na mikuki yao iwe miundu; taifa halitainua upanga juu ya taifa lingine, wala hawatajifunza vita tena kamwe.” Lakini ni nani wanaotenda kupatana na maneno hayo leo? Hakuna hata mmoja wa washiriki wanaoitwa Umoja wa Mataifa. Ni lile tu “taifa” la duniani pote lenye kufuatia amani likiwa na mashahidi zaidi ya milioni 3 wa Yehova ambalo limeonyesha waziwazi jinsi kutokuwamo kwa Kikristo kunavyoweza kudumishwa katika ulimwengu wenye madoa ya damu.

Maulizo ya Kurudia

◻ Ni kwa njia gani tunaweza kufuatia amani pamoja na Mungu?

◻ Yehova anaonaje umwagaji damu wa ovyo ovyo?

◻ Kutokuwamo kwa Kikristo kuna maana gani?

◻ Sisi tuna mifano gani mizuri sana ya ukamilifu?

◻ Ni kwa njia gani tunaweza kupata kimbilio la wokovu?

[Sanduku katika ukurasa wa 21]

Kumbukumbu la Imani, Ushujaa, na Ukamilifu

Kitabu New Religious Movements: A Perspective for Understanding Society kinatoa maelezo haya zaidi juu ya ukamilifu wa Mashahidi wa Yehova katika kukabili mateso ya Nazi

“Kwa kukataa kukubali. Mashahidi wa Yehova walilitolea mwito wa ushindani lile wazo la mtawala mmoja mwenye mamlaka kamili ya ile jamii mpya, na mwito huo wa ushindani, na pia udumifu wayo, ulionekana ukisumbua maoni ya wenye kuanzisha ule utaratibu mpya Kadiri ambavyo Mashahidi walizidi kuteswa, ndivyo walivyozidi kutokeza mawazo yenye ushindani kweli kweli. Njia ambazo zilikuwa zimetumiwa kwa muda mrefu za mateso, kuwaumiza-umiza, kuwafunga gerezani na kuwadhihaki hazikuwa zikigeuza Mashahidi wo wote wafuate msimamo wa Nazi na kwa kweli njia hizo zilikuwa zikiwageukia wenye kuzianza Wanazi walipatwa na bumbuazi walipoona wakiitikiwa kwa njia hiyo wasiyokuwa wametazamia “

“Kati ya pande hizi mbili zenye kung’ang’ania ushikamanifu, pambano lilikuwa kali sana, tena kali sana, kwa sababu Wanazi hao wenye nguvu nyingi zaidi za kimwili hawakuwa na uhakika sana kwa njia nyingi, hawakuwa na mizizi sana kama hao wapinzani wao katika uthabiti wa mambo ambayo wao wenyewe walisadiki, hawakuwa na uhakika mwingi kwamba Utawala wao ungeweza kuendelea kwa miaka 1,000 Mashahidi hawakutia shaka juu ya mizizi yao wenyewe, kwa maana imani yao ilikuwa inaonekana wazi tangu wakati wa Abeli Ingawa Wanazi walilazimika kugandamiza upinzani walioonyeshwa na kusadikisha wafuasi wao, mara nyingi wakitumia usemi na maneno ya mfano yanayotumiwa katika Ukristo wenye madhehebu mengi, Mashahidi walikuwa na uhakika kwamba washiriki wao wangeonyesha ushikamanifu kamili, usiotikisika mpaka kifo

Itakuwa siku yenye furaha kweli kweli wakati ushindi huo wa kutumia ushikamanifu wa Kikristo utakapokuwa umekamilishwa, (Warumi 8:35-39) Ndipo, chini ya utawala wa Ufalme wa “Mwana-Mfalme wa Amani,” Yesu Kristo aliyetukuzwa, kutakuwa na “wingi wa utawala wa mwana-mfalme na kwa amani hakutakuwa na mwisho ‘—Isaya 9 6, 7, NW

[Sanduku katika ukurasa wa 22]

Vijana Washika-ukamilifu

Mambo yafuatayo yameandikwa kutokana na kijitabu cha matukio ya kila siku kilichochapishwa hivi majuzi na mtazamaji mmoja katika nchi moja ya Ulaya Yanaonyesha jinsi Mashahidi vijana wamelikabili kwa ushujaa lile suala la kutokuwa “sehemu ya ulimwengu.”

“Mwaka 1945 Machi 12: Kulikuwa na kesi zenye kushughulikiwa na sheria ya kijeshi. Vijana wawili walio wafuasi wa Yehova ndio washtakiwa Shtaka lao: kukataa utumishi wa kijeshi (kulingana na roho ya dini yao). Yule mwenye umri mdogo zaidi, ambaye bado hajafika miaka 20, alihukumiwa kufungwa miaka 15 katika gereza la kuadhibia wavunja sheria. Lakini, yule mwenye umri mkubwa zaidi akahukumiwa kufa, na bila kukawia akaletwa kwenye mji wa kwao nyumbani auawe kule hadharani ili kuzuia wengine wasifuate mfano wake Yeye ndiye wa 14 kutendwa hivyo hapa. Na apate pumziko lenye amani Kisa hiki kimemgusa sana moyoni. Huwezi kufanikiwa dhidi ya wafuasi wa Yehova ukitenda kwa njia hiyo .Badala ya kufanikiwa kutumia mvulana huyo awe mfano wa kuonya wengine, walimfanya tu akafia imani. Yeye alikuwa mvulana mwenye afya Mimi namsikitikia

“Wakati wa alasiri, tumepata maelezo marefu juu ya kuuawa kwa kijana huyo, ambako kulifanywa mbele ya idadi kubwa ya watu sokoni. Mmoja wa askari waliosimama katika mstari ule wa wenye kuhusika na kazi ya kuua alijipiga risasi kwa kuona aibu kabla ya kijana yule kuuawa. Alifanya hivyo kwa sababu Kanali mmoja alimtaka yeye asaidie mtu yule mwenye kazi ya kunyonga watu Lakini yeye hakutaka kufanya hivyo. Aliona afadhali akomeshe uhai wake mwenyewe. Yule kijana alikufa kwa ushujaa. Hakutamka neno.”

Katika ufufuo, vijana wa namna hiyo watafurahi kama nini kwamba walichagua kuuonja uchungu kwa kifo badala ya kujipotezea nafasi yao katika mfumo mpya wa mambo ya Yehova.​—-Linganisha Hosea 13:14.