Maisha na Huduma ya Yesu

Yesu Alisha Maelfu kwa Mwujiza

WALE mitume 12 wamefurahia ziara nzuri ajabu ya kuhubiri katika sehemu zote za Galilaya. Sasa, muda mfupi tu baada ya Yohana kuuawa, wanarudia Yesu na kusimulia mambo mazuri ajabu waliyoona. Anapoona kwamba wamechoka na kwamba watu wengi sana wanakuja na kwenda hivi kwamba wao hawana wakati wa kula, Yesu anasema: ‘Acheni sisi twende peke yetu wenyewe mahali pa upweke ambapo ninyi mnaweza kupumzika vya kutosha.’

Wakipanda mashua yao, labda karibu na Kapernaumu, wanaelekea mahali palipo kando kabisa kwa wazi mashariki ya Yordani kupita Bethsaida. Hata hivyo, watu wengi wanawaona wakiondoka, na wengine wanapata kujua jambo hilo. Wote hao wanapiga mbio kuwatangulia wakiwa kando-kando ya ufuo, na wakati mashua inapotua, wanakuwa pale kuwalaki.

Anapotoka mashuani na kuliona kundi kubwa lile, Yesu anasukumwa na sikitikio kwa sababu watu wale wako kama kondoo bila mchungaji. Kwa hiyo anawaponya na kuanza kuwafundisha mambo mengi.

Wakati unapita kwa haraka, na wanafunzi wa Yesu wanamjia na kusema: “Mahali hapa pako peke yapo, na tayari saa imeenda sana. Waambie wao waende zao, kwamba wapate kwenda wakaingie upande wa mashambani na vijijini huku na huku na kujinunulia wenyewe kitu fulani cha kula.”

Hata hivyo, kwa kujibu Yesu anasema: “Ninyi wapeni wao kitu fulani cha kula.” Ndipo, kwa kuwa tayari Yesu alijua jambo ambalo angefanya, alijaribu Filipo kwa kuuliza: “Tutanunua wapi mikate ili hawa wale?”

Kutokana na maoni ya Filipo hali hiyo haiwezekani. Kwani, kuna wanaume karibu 5,000, na labda watu wanaozidi sana 10,000 wa kuhesabu pia wanawake na watoto! “Dinari mia mbili [wakati huo dinari ilikuwa mshahara wa siku nzima] za kima cha mikate haziwatoshi wao, ili kwamba kila mmoja apate kidogo,” Filipo anajibu.

Labda ili aonyeshe kutowezekana kulisha watu wengi hivyo, Andrea anajitolea kusema: “Hapa yupo kivulana aliye na mikate mitano ya shayiri na samaki wadogo wawili,” akiongezea hivi: “Lakini hivi ni nini miongoni mwa wengi hivyo?”

Kwa kuwa ni wakati wa masika, kabla tu ya Kupitwa kwa 32 W.K., kuna majani mabichi mengi. Kwa hiyo Yesu anaagiza wanafunzi wake waambie watu waketi kwenye majani wakiwa vikundi-vikundi vya watu 50 na vya 100. Yeye anachukua ile mikate mitano na samaki wawili, anatazama mbinguni, na kusema baraka. Ndipo anapoanza kuimega mikate ile na kugawanya-gawanya samaki wale. Anawapa wanafunzi wake, ambao, nao, wanawagawia watu. Jambo la kustaajabisha ni kwamba watu wote wanakula mpaka wanapokuwa wameshiba!

Baadaye Yesu anaambia wanafunzi wake: “Kusanyeni pamoja vijipande vinavyobakia, ili kwamba kitu cho chote kisitapanywe.” Wanapofanya hivyo, wanajaza makapu 12 yenye masazo kutokana na vitu walivyokula! Mathayo 14:13-21; Marko 6:30-44; Luka 9:10-17; Yohana 6:1-13, NW.

◆ Kwa sababu gani Yesu anatafutia wanafunzi wake mahali pa faragha?

◆ Yesu anapeleka wanafunzi wake wapi, na kwa sababu gani uhitaji wao wa pumziko unapita bila kutimizwa?

◆ Saa inapoenda sana, wanafunzi wanahimiza nini, lakini Yesu anawatunzaje watu wale?