Maisha na Huduma ya Yesu

Chanzo cha Furaha

WAKATI wa huduma yake katika Galilaya, Yesu alifanya miujiza, na sasa yeye anairudia katika Yudea. Mathalani, yeye anatupa nje ya mwanamume mmoja roho mbaya ambaye amemzuia kunena. Makutano yanastaajabu, lakini wachambuzi wanatokeza kikinzano kama kile kile kilichotokezwa katika Galilaya. “Yeye hufukuza roho wabaya kwa njia ya Beelzebuli yule mtawala wa roho wabaya,” wao wanadai. Wengine wanataka ithibati kubwa zaidi kutoka kwa Yesu ya kutambulisha yeye ni nani, na wanajaribu kumshawishi kwa kuomba ishara moja kutoka mbinguni.

Akijua jambo wanalofikiria, Yesu anawapa wachambuzi wake katika Yudea jibu lile lile alilowapa wale waliokuwa katika Galilaya. Yeye anaonelea kwamba kila ufalme uliogawanyika dhidi yao wenyewe utaanguka. “Kwa hiyo,” yeye anauliza, “ikiwa Shetani pia amegawanyika dhidi yake mwenyewe, ni jinsi gani ufalme wake utasimama?” Yeye anaonyesha msimamo hatari wa wachambuzi wake kwa kusema: “Ikiwa ni kwa njia ya kidole cha Mungu mimi hufukuza roho wabaya, ufalme wa Mungu umewapita ninyi kweli kweli.”

Wale wanaotazama miujiza ya Yesu wanapaswa kuiitikia jinsi ile ile walivyoiitikia wale ambao karne zilizotangulia walimwona Musa akifanya mwujiza. Wao walipaaza sauti ya mshangao wakisema: “Ni kidole cha Mungu!” Pia “kidole cha Mungu” ndicho kilichongelea zile Amri Kumi juu ya mbao-mawe. Na “kidole cha Mungu”​—roho takatifu yake, au kani ya utendaji​—ndicho kiliwezesha Yesu kutupa nje roho wabaya na kuponya wagonjwa. Kwa hiyo Ufalme wa Mungu umewapita wachambuzi hawa kweli kweli, kwa kuwa Yesu, aliye Mfalme mkusudiwa wa ule Ufalme, yupo pale pale katikati yao.

Ndipo Yesu anapotoa kielezi cha kuonyesha kwamba uwezo wake wa kufukuza roho wabaya ni ithibati ya nguvu zake juu ya Shetani, hata kama vile ilivyo wakati mwanamume mwenye imara zaidi anapokuja na kumshinda nguvu mwanamume mwenye silaha za kutosha anayelinda jumba lake la kifalme. Pia anarudia kielezi kile alichosimulia katika Galilaya kuhusu roho asiye safi anayeondoka katika mwanamume fulani, lakini wakati mwanamume huyo anapokosa kujazia utupu huo kwa mambo mema, roho huyo anarudi pamoja na wengine saba, na hali ya mwanamume huyo inakuwa mbaya kuliko hapo kwanza.

Anapokuwa akisikiliza mafundisho hayo, mwanamke mmoja kutoka kwenye lile kutano anasukumwa kupaaza sauti ya mshangao hivi: “Ni lenye furaha tumbo-uzazi ambalo lilikuchukua wewe na matiti ambayo wewe ulinyonya!” Kwa kuwa tamaa ya kila mwanamke Myahudi ni kuwa mama ya nabii na hususa yule Mesiya, inaeleweka kwamba mwanamke huyu angesema hivyo. Inaonekana alifikiri Mariamu angeweza kuwa mwenyewe furaha ya pekee kwa sababu ya kuwa ndiye mama ya Yesu.

Hata hivyo, Yesu anamsahihisha haraka mwanamke huyo kuhusu chanzo cha kweli cha furaha. “Sivyo,” yeye anajibu, “bali, Wenye furaha ni wale ambao wanasikia neno la Mungu na kulishika!” Yesu hakumaanisha kamwe kwamba Mariamu, mama yake, anapaswa kupewa heshima ya pekee. Badala ya hivyo, yeye alionyesha kwamba furaha ya kweli inapatwa kwa kuwa mtumishi mwaminifu wa Mungu, si katika mahusiano wala matimizo yo yote ya kimwili,

Kama alivyofanya katika Galilaya, Yesu anaendelea pia kuwakemea watu kwa kuomba ishara kutoka mbinguni. Yeye anawaambia kwamba hakuna ishara itakayotolewa isipokuwa ile ishara ya Yona. Yona alikuja kuwa ishara kwa kuwamo kwake siku tatu katika yule samaki na pia kwa kuhubiri kwake kijasiri, na tokeo likawa ni kuwasukuma Waninawi kwenye toba. “Lakini, tazameni!” Yesu anasema, “kitu fulani kilicho zaidi ya Yona kipo hapa.” Vilevile, malkia wa Sheba aliona ajabu kuhusu hekima ya Sulemani. “Lakini, tazameni!” Yesu anasema pia, “kitu fulani kilicho zaidi ya Sulemani kipo hapa.”

Yesu anaeleza kwamba wakati mtu anapowasha taa, yeye haitii katika chumba cha chini ya sakafu au chini ya kikapu bali juu ya kinara cha taa ili kwamba watu waweze kuiona nuru. Labda yeye anatokeza wazi usiri wa kwamba kufundisha na kufanya miujiza mbele ya watu hawa wenye mioyo migumu katika wasikilizaji kunalinganika na kuficha nuru ya taa. Macho ya watazamaji kama hao si rahisi, au hayakazwi mahali pale panapofaa, kwa hiyo madhumuni yaliyokusudiwa ya miujiza yake hayatimizwi.

Yesu ametoka sasa tu kufukuza roho mbaya na kusababisha mtu bubu anene. Jambo hili linapasa kusukuma watu wenye macho rahisi, au yaliyokazwa mahali panapofaa, wasifu kitendo hodari hiki kilicho kitukufu na kutangaza habari njema hizo! Na bado, wachambuzi hawa hawafanyi hivyo. Kwa hiyo Yesu anamalizia hivi: “Kwa hiyo, uwe chonjo. Labda ile nuru ambayo imo ndani yako wewe ni giza. Kwa hiyo, ikiwa mwili wako mzima ni mwangavu bila hata sehemu yo yote kuwa na giza, wote utakuwa mwangavu kama wakati ambapo taa inakupa wewe nuru kwa mionzi yayo.” Luka 11:14-36; Kutoka 8:18,19; 31:18; Mathayo 12:22, 28, NW.

◆ Ni nini itikio la kuponya kwa Yesu yule mwanamume?

◆ Kidole cha Mungu ni nini, na ni jinsi gani Ufalme wa Mungu ulikuwa umewapita wasikilizaji wa Yesu?

◆ Ni nini chanzo cha furaha ya kweli?

◆ Ni jinsi gani mtu anavyoweza kuwa na jicho rahisi?