Maisha na Huduma ya Yesu

Suala la Urithi

INAONEKANA wazi kwamba watu wanajua Yesu amekuwa akila kwenye nyumba ya yule Farisayo. Kwa hiyo wao wanakusanyika nje kwa maelfu na wanakuwa wakingoja wakati Yesu anapotoka ndani. Tofauti na Mafarisayo ambao wanapinga Yesu na kujaribu kumshika katika kusema jambo lisilofaa, watu hao wanamsikiliza kwa hamu nyingi wakiwa na uthamini.

Akigeukia wanafunzi wake kwanza, Yesu anasema: “Mwe macho kuona chachu ya Mafarisayo, ambayo ni unafiki.” Kama ilivyoonyeshwa wakati wa ule mlo, mfumo mzima wa kidini wa Mafarisayo umejawa na unafiki. Lakini hata ingawa uovu wa Mafarisayo huenda ukafichwa kwa kujionyesha kuwa wenye utawa, mwishowe utafichuliwa. “Hakuna kitu ambacho kimefichwa kwa uangalifu,” Yesu anasema, “ambacho hakitafunuliwa, na siri ambayo haitakuja kujulikana.”

Yesu anaendelea kurudia kile kitia-moyo alichokuwa amewapa wale 12 wakati alipowatuma waende katika ziara ya kuhubiri ya Galilaya. Yeye anasema: “Msihofu wale ambao wanaua mwili na baada ya hilo hawawezi kufanya jambo lolote zaidi.” Kwa kuwa Mungu hasahau hata shomoro mmoja, Yesu anahakikishia wafuasi wake kwamba Mungu hatawasahau wao. Yeye anataarifu hivi: “Wakati wao wanapoleta ninyi ndani mbele ya makusanyiko ya peupe na maafisa wa serikali na wenye mamlaka,. . . roho takatifu itafundisha ninyi katika saa hiyo hiyo yenyewe mambo ambayo ninyi mnapaswa kusema.”

Mwanamume mmoja kutoka kwenye kutano hilo anajitokeza kunena. “Mwalimu,” yeye anafanya ombi rasmi, “ambia ndugu yangu agawanye urithi wake pamoja nami.” Sheria ya Musa inashurutisha kwamba mwana mzaliwa wa kwanza anapaswa kupokea sehemu mbili za urithi kwa hiyo hakuna sababu ya kuwa na ubishi’ Lakini inaonekana mwanamume yule anataka zaidi ya ushiriki wake halali wa urithi huo.

Kwa kufaa Yesu anakataa kujihusisha ndani. “Mwanamume, nani aliweka mimi rasmi niwe hakimu au mgawaji wa mafungu juu ya ninyi watu?” yeye anauliza. Ndipo yeye anatolea kutano hilo onyo hili la upole lililo muhimu: “Wekeni macho yenu yakiwa yamefunguka na mkinge dhidi ya kila namna ya uchoyo, kwa sababu hata wakati ambapo mtu ana utele uhai wake hautokani na vitu ambavyo yeye anamiliki.” Ndiyo, hata mtu aje kuwa na kiasi gani, kwa kawaida yeye atakufa na kuacha chote nyuma. Kukazia uhakika huo, na pia kuonyesha upumbavu wa kushindwa kujenga sifa njema pamoja na Mungu, Yesu anatumia kielezi. Yeye anaeleza hivi:

“Bara la mwanamume mmoja tajiri lilizaa vizuri. Basi yeye akaanza kusababu-sababu ndani yake mwenyewe, akisema, ‘Mimi nitafanya nini, kwa kuwa sasa sina mahali popote pa kukusanya mazao yangu?’ Kwa hiyo yeye akasema, ‘Mimi nitafanya hivi: Nitakwangusha chini nyumba zangu za kuwekea akiba na kujenga kubwa zaidi, na humo mimi nitakusanya nafaka yangu yote na vitu vyangu vyote vilivyo vyema; na mimi nitasema kwa nafsi yangu: “Nafsi, wewe una vitu vingi vyema ambavyo vimewekwa kwa ajili ya miaka mingi; starehe, ule, unywe, ujifurahishe mwenyewe.’” Lakini Mungu akasema kwake, ‘Mmoja usiyesababu vizuri, usiku huu wao wanadai nafsi yako kutoka kwa wewe. Ni nani, basi, atakuwa na vitu vile ambavyo wewe umejirundikia akibani?”’

Katika kumalizia, Yesu anaonelea hivi: “Ndivyo inavyoenda kwa mtu ambaye anaweka rundo kwa ajili yake mwenyewe lakini si tajiri kuelekea Mungu.” Ingawa huenda ikawa wanafunzi hawatiwi mtegoni na upumbavu wa kurundika utajiri, wao wangeweza kwa urahisi kuvutwa fikira na mahangaikio ya maisha ya kila siku hata zitoke kwenye kutumikia Yehova kwa nafsi yote. Kwa hiyo Yesu anatumia pindi hiyo kurudia yale mashauri mema aliyokuwa ametoa karibu mwaka mmoja na nusu mapema katika yale Mahubiri ya Mlimani. Akigeukia wanafunzi wake, yeye anasema:

“Kwa sababu hii mimi nasema kwa ninyi, Acheni kabisa kuwa wenye wasiwasi juu ya nafsi zenu kwa habari ya kile ambacho ninyi mtakula au juu ya miili yenu kwa habari ya kile ambacho ninyi mtavaa. . . . Angalieni vizuri kwamba kunguru hawapandi mbegu wala hawavuni, na wao hawana ghala wala nyumba ya kuwekea akiba, na bado Mungu analisha hao. . . . Angalieni vizuri jinsi maua-lili yanakua; hayo hayajitaabishi wala hayafumi; lakini mimi naambia ninyi, Wala hata Solomoni katika utukufu wake wote hakuvikwa kwa mpangilio mzuri kama moja la haya... .

“Kwa hiyo acheni kabisa kutafuta kile ambacho ninyi huenda mkala na kile ambacho ninyi huenda mkanywa, na acheni kabisa kuwa katika engoengo la wasiwasi; kwa maana hivi vyote ndivyo vitu ambavyo mataifa ya ulimwengu yanafuatia kwa hamu nyingi, lakini Baba yenu anajua ninyi mnahitaji vitu hivi. Hata hivyo, tafuteni ufalme wake kwa uendelevu, na vitu hivi vitaongezwa kwa ninyi.”

Maneno ya Yesu yanafaa kufikiriwa kwa ukaribu hasa katika nyakati za ugumu wa kiuchumi. Kwa uhakika, mtu ambaye anakuwa mwenye wasiwasi wa kupita kiasi juu ya mahitaji ya vitu vya kimwili na kuanza kulegea katika mifuatio ya kiroho anaonyesha ukosefu wa imani katika uwezo wa Mungu wa kuandalia watumishi Wake. Luka 12:1-31; Kumbukumbu 21:17, NW.

◆ Labda ni kwa nini mwanamume yule anauliza juu ya urithi, na ni onyo gani la upole ambalo Yesu anatoa?

◆ Ni kielezi gani ambacho Yesu anatumia, na maana yacho ni nini?

◆ Ni shauri gani ambalo Yesu anarudia, na kwa nini linafaa kwa pindi hiyo?