Je, Kweli Unaweza ‘Kumkaribia Mungu’?

1, 2. (a) Huenda watu wengi wakahisi jambo gani haliwezekani, lakini Biblia inatuhakikishia nini? (b) Abrahamu alifurahia uhusiano gani wa karibu, na kwa nini?

UNGEHISIJE ikiwa Muumba wa mbingu na dunia angesema hivi kukuhusu, “Huyu ni rafiki yangu”? Huenda watu wengi wakahisi kwamba hilo ni jambo lisilowezekana. Wanasema kwamba mwanadamu hawezi kuwa na urafiki wa karibu na Mungu. Hata hivyo, Biblia inatuhakikishia kwamba tunaweza kumkaribia Mungu.

² Abrahamu aliyeishi zamani alifurahia uhusiano wa karibu na Mungu. Yehova alimwita mzee huyo wa ukoo “rafiki yangu.” (Isaya 41:8) Naam, Yehova alimwona Abrahamu kuwa rafiki yake wa karibu. Abrahamu alifurahia uhusiano huo wa karibu kwa sababu “alikuwa na imani katika Yehova.” (Yakobo 2:23) Leo pia, Yehova hutafuta nafasi za kuwa na urafiki wa karibu na wale wanaomtumikia na “kudhihirisha upendo wake” kwao. (Kumbukumbu la Torati 10:15) Neno lake linatusihi hivi: “Mkaribieni Mungu, naye atawakaribia ninyi.” (Yakobo 4:8) Maneno hayo yanamaanisha nini?

3. Yehova anatualika tufanye nini, naye anatuahidi nini?

³ Yehova anatualika tumkaribie. Yuko tayari na anataka tuwe rafiki zake. Anaahidi kwamba tukijitahidi kumkaribia, atatukaribia pia. Hivyo, tunaweza kufurahia jambo lenye thamani sana—“urafiki wa karibu pamoja na Yehova.” (Zaburi 25:14) Maneno “urafiki wa karibu” yanaleta wazo la mazungumzo ya siri pamoja na rafiki wa pekee.

4. Rafiki wa karibu ni rafiki wa aina gani, na Yehova amethibitikaje kuwa rafiki wa karibu kwa wale wanaomkaribia?

⁴ Je, una rafiki wa karibu unayemwambia mambo yako ya siri? Huyo ni rafiki anayekujali. Unamwamini kwa sababu amekuwa mshikamanifu. Unafurahi hata zaidi unapomwambia mambo yanayokufurahisha. Anakusikiliza kwa huruma unapomwambia mambo yanayokuhuzunisha na hivyo unapata utulivu. Hata inapoonekana kwamba hakuna mtu mwingine anayeelewa hali zako, yeye hukuelewa. Vivyo hivyo, unapomkaribia Mungu, unapata Rafiki wa pekee ambaye anakuthamini kikweli, anakujali sana, na anakuelewa kabisa. (Zaburi 103:14; 1 Petro 5:7) Unajua kwamba unaweza kumweleza hisia zako za ndani kabisa, kwa kuwa yeye ni mshikamanifu kwa walio washikamanifu kwake. (Zaburi 18:25) Hata hivyo, Mungu ndiye ametuandalia nafasi ya kuwa na urafiki wa karibu pamoja naye.

Yehova Amefungua Njia

5. Yehova alifanya nini ili tuweze kumkaribia?

⁵ Tukiwa wanadamu wenye dhambi hatungeweza kamwe kumkaribia Mungu bila msaada wake. (Zaburi 5:4) Mtume Paulo aliandika hivi: “Lakini Mungu hupendekeza upendo wake kwetu kwa kuwa tulipokuwa bado watenda dhambi, Kristo alikufa kwa ajili yetu.” (Waroma 5:8) Ndiyo, Yehova alimtuma Yesu duniani ili ‘atoe uhai wake uwe fidia badala ya wengi.’ (Mathayo 20:28) Imani yetu katika dhabihu hiyo ya fidia hutuwezesha kumkaribia Mungu. Kwa kuwa Mungu “alitupenda kwanza,” alituwekea msingi wa kuwa na urafiki pamoja naye.​—1 Yohana 4:19.

6, 7. (a) Tunajuaje kwamba Yehova anataka tumjue? (b) Yehova ametumia njia zipi ili tumjue?

⁶ Yehova amechukua hatua nyingine: Ametuambia yeye ni nani. Katika urafiki wowote ule, uhusiano wa karibu hutegemea kumjua mtu vizuri, na kuthamini sifa na mwenendo wake. Kwa hiyo, hatungeweza kamwe kumkaribia Yehova ikiwa hangetuambia yeye ni nani. Yeye hajifichi, anataka tumjue. (Isaya 45:19) Isitoshe, amemruhusu kila mtu ajifunze kumhusu, hata wale ambao wanaonwa na ulimwengu kuwa watu wasioweza kupata ujuzi huo.​—Mathayo 11:25.

⁷ Yehova ametusaidiaje kumjua? Uumbaji wake unafunua sifa mbalimbali za utu wake—nguvu zake zisizo na mipaka, hekima yake nyingi, na upendo wake mwingi. (Waroma 1:20) Licha ya uumbaji, Yehova hutusaidia kumjua kupitia njia nyingine. Kupitia Neno lake, Biblia, Yehova ametufundisha kwa njia bora sana mambo mengi kujihusu.

Yehova Anatueleza Kujihusu Kupitia Neno Lake

8. Kwa nini tunaweza kusema Biblia yenyewe ni uthibitisho wa kwamba Yehova anatupenda?

⁸ Biblia inatuthibitishia kwamba Yehova anatupenda. Katika Neno lake, yeye hutufahamisha jinsi alivyo kwa kutumia lugha tunayoweza kuelewa—na hilo huthibitisha kwamba anatupenda na anataka tumjue na kumpenda. Habari tunazosoma katika kitabu hiki cha pekee hutusaidia kumkaribia Yehova. (Zaburi 1:1-3) Tuzungumzie baadhi ya njia zenye kuvutia ambazo Yehova hujieleza katika Neno lake.

9. Ni baadhi ya mistari gani ya Biblia inayotaja sifa za Mungu moja kwa moja?

⁹ Maandiko yana mistari mingi inayotaja sifa za Mungu moja kwa moja. Ona mifano kadhaa. “Yehova anapenda haki.” (Zaburi 37:28) Mungu ana “nguvu nyingi.” (Ayubu 37:23) “‘Mimi ni mshikamanifu,’ asema Yehova.” (Yeremia 3:12) “Yeye ni mwenye hekima moyoni.” (Ayubu 9:4) Yeye ni ‘Mungu mwenye rehema na huruma, si mwepesi wa hasira, ana upendo mwingi mshikamanifu na kweli.’ (Kutoka 34:6) “Wewe, Ee Yehova, ni mwema na uko tayari kusamehe.” (Zaburi 86:5) Na kama ilivyotajwa katika sura iliyotangulia, kuna sifa moja kuu zaidi: “Mungu ni upendo.” (1 Yohana 4:8) Unapotafakari sifa hizi zenye kupendeza, bila shaka ungependa kuwa karibu na Yehova Mungu.

10, 11. (a) Yehova ametaja nini katika Neno lake ili kutusaidia kuelewa utu wake vizuri zaidi? (b) Ni simulizi gani la Biblia linalotusaidia kuona Mungu akionyesha nguvu zake?

¹⁰ Mbali na kutueleza sifa zake, kwa upendo Yehova ametaja pia katika Neno lake mifano hususa inayoonyesha jinsi alivyodhihirisha sifa hizo kwa matendo. Masimulizi hayo yanatokeza picha akilini inayotusaidia kufahamu vizuri zaidi sifa mbalimbali za utu wake. Na hilo hutusaidia kumkaribia. Fikiria mfano mmoja.

¹¹ Biblia inatuambia kwamba Mungu ana ‘nguvu zenye kuogopesha.’ (Isaya 40:26) Hata hivyo, tunashangazwa tunapojifunza jinsi anavyotumia nguvu zake tunaposoma kuhusu mifano ya jinsi alivyowaokoa Waisraeli katika Bahari Nyekundu na kuwapatia kila kitu walichohitaji walipokuwa nyikani kwa miaka 40. Hebu wazia yale maji yenye nguvu yakigawanyika. Na taifa hilo—lenye jumla ya watu 3,000,000 hivi—likitembea katika nchi kavu katikati ya bahari, maji yakiwa yameganda na kusimama wima kama kuta kubwa upande huu na upande huu. (Kutoka 14:21; 15:8) Unaweza kuona uthibitisho wa kwamba Mungu aliwatunza na kuwalinda nyikani. Maji yalibubujika kutoka kwenye mwamba. Chakula kilichofanana na mbegu ndogo nyeupe, kilisambaa ardhini. (Kutoka 16:31; Hesabu 20:11) Kisa hicho kinaonyesha kwamba Yehova ana nguvu na yeye huzitumia kuwasaidia watu wake. Je, si jambo lenye kutia moyo kujua kwamba sala zetu humfikia Mungu mwenye nguvu ambaye “ni kimbilio letu na nguvu zetu, msaada unaopatikana kwa urahisi nyakati za taabu”?​—Zaburi 46:1.

12. Yehova hutusaidiaje kufahamu jinsi alivyo kwa kutumia usemi tunaoweza kuelewa?

¹² Yehova, ambaye ni Roho, amefanya mengi zaidi ili kutusaidia kumjua. Tukiwa wanadamu, uwezo wetu wa kuona una mipaka na hivyo hatuwezi kuona makao ya roho. Kama Mungu angetueleza utu wake kwa kutumia usemi wa roho ingekuwa ni kama kujaribu kumweleza mtu aliyezaliwa kipofu kila jambo kuhusu sura yako, kama vile rangi ya macho yako au madoa katika ngozi yako. Badala yake, Yehova hutusaidia kwa fadhili kufahamu jinsi alivyo kwa kutumia usemi tunaoweza kuelewa. Nyakati nyingine, yeye huongea kwa kutumia mifano, akijifananisha na vitu tunavyojua. Hata anajieleza kuwa ana viungo fulani vya kibinadamu.a

13. Andiko la Isaya 40:11 linaleta picha gani akilini, na linakufanya uhisije?

¹³ Ona jinsi Yehova anavyofafanuliwa katika Isaya 40:11: “Atalitunza kundi lake kama mchungaji. Atawakusanya pamoja wanakondoo kwa mkono wake, naye atawabeba kwenye kifua chake.” Hapa Yehova anafananishwa na mchungaji ambaye hubeba wanakondoo “kwa mkono wake.” Hilo linaonyesha uwezo wa Mungu wa kuwalinda na kuwategemeza watu wake, hata wale walio dhaifu. Tunaweza kuhisi tukiwa salama katika mikono yake yenye nguvu, kwa sababu hatatuacha kamwe tukiwa waaminifu kwake. (Waroma 8:38, 39) Mchungaji Mkuu huwabeba wanakondoo “kwenye kifua chake”​—usemi huo unarejelea vazi la juu ambalo nyakati nyingine mchungaji alibebea mwanakondoo aliyetoka kuzaliwa. Kwa hiyo, tunahakikishiwa kwamba Yehova anatupenda sana naye anatutunza kwa wororo. Kwa sababu hiyo tunapenda kumkaribia.

“Mwana Anapenda Kumfunulia”

14. Kwa nini tunaweza kusema kwamba Yehova hutusaidia tumjue zaidi kupitia Yesu?

¹⁴ Katika Neno lake, Yehova ametusaidia kumjua vizuri kupitia Mwana wake mpendwa, Yesu. Ni Yesu peke yake aliyeweza kutusaidia kujua hisia na maoni ya Mungu au kutueleza utu wa Yehova kwa njia iliyo wazi zaidi. Aliweza kufanya hivyo kwa sababu Mwana huyo mzaliwa wa kwanza aliishi na Baba yake kabla ya kuumbwa kwa viumbe wengine mbinguni na duniani. (Wakolosai 1:15) Yesu alimjua Yehova kabisa. Ndiyo sababu alisema: “Hakuna mtu anayemjua Mwana isipokuwa Baba, wala hakuna anayemjua Baba isipokuwa Mwana, na yeyote ambaye Mwana anapenda kumfunulia.” (Luka 10:22) Alipokuwa mwanadamu duniani, Yesu alitusaidia kumjua Baba yake kwa njia mbili muhimu.

15, 16. Yesu alitumia njia gani mbili kutusaidia kumjua Baba yake?

¹⁵ Kwanza, mafundisho ya Yesu yanatusaidia kumjua Baba yake. Yesu alieleza jinsi Yehova alivyo kwa kutumia maneno yanayogusa moyo wetu. Kwa mfano, alipoeleza kuhusu Mungu mwenye rehema anayewakaribisha tena watenda dhambi wanaotubu, Yesu alimlinganisha Yehova na baba mwenye rehema. Baba huyo anapomwona mwana wake aliyepotea akirudi, anamsikitikia, anamkimbilia, anamkumbatia, na kumbusu kwa wororo. (Luka 15:11-24) Yesu alionyesha pia kwamba Yehova ni Mungu ambaye ‘anawavuta’ watu wenye mioyo minyoofu kwa sababu anampenda kila mmoja wao. (Yohana 6:44) Hata anajua shore mdogo anapoanguka chini. Yesu alisema hivi: “Msiogope; ninyi ni wenye thamani kuliko shore wengi.” (Mathayo 10:29, 31) Bila shaka, tunavutiwa kumkaribia Mungu huyo anayejali.

¹⁶ Pili, kielelezo cha Yesu kinatuonyesha utu wa Yehova. Yesu alimwiga kabisa Baba yake hata alisema hivi: “Yeyote ambaye ameniona mimi amemwona Baba pia.” (Yohana 14:9) Hivyo, tunaposoma kumhusu Yesu katika vitabu vya Injili—hisia zake na jinsi alivyowatendea wengine—zinaonyesha jinsi Baba yake alivyo. Hii ndiyo njia bora zaidi aliyotumia Yehova kutueleza jinsi alivyo. Kwa nini?

17. Toa mfano unaoonyesha jambo ambalo Yehova amefanya ili kutusaidia tumjue.

¹⁷ Kwa mfano: Hebu jiwazie ukijaribu kueleza maana ya fadhili. Huenda ukaifafanua kwa maneno. Lakini ukimzungumzia mtu fulani anayetenda tendo la fadhili na kusema, “Yule anafanya tendo la fadhili,” neno “fadhili” huwa wazi na hueleweka kwa urahisi zaidi. Yehova amefanya vivyo hivyo ili kutusaidia tumjue. Zaidi ya kutueleza kuhusu utu wake kwa maneno, ametupatia Mwana wake ili atuonyeshe kwa matendo. Matendo ya Yesu yanaonyesha wazi sifa za Mungu. Tunaposoma vitabu vya Injili vinavyosimulia habari za Yesu, ni kana kwamba Yehova anasema hivi: “Hivyo ndivyo nilivyo.” Biblia inatuambia nini kumhusu Yesu?

18. Yesu alionyeshaje sifa za nguvu, haki, na hekima?

¹⁸ Sifa nne kuu za Mungu zilidhihirishwa kwa njia ya pekee sana na Yesu. Alikuwa na nguvu za kukomesha magonjwa, njaa, hata kifo. Lakini, hakutumia kamwe nguvu zake za kufanya miujiza ili kujifaidi au kuwaumiza wengine kama wanadamu wenye ubinafsi wanavyotumia vibaya nguvu zao. (Mathayo 4:2-4) Alipenda haki. Alikasirika sana kwa njia ya uadilifu alipoona wafanyabiashara wenye hila wakiwadhulumu watu. (Mathayo 21:12, 13) Hakuwabagua maskini na watu waliodharauliwa, badala yake ‘aliwaburudisha.’ (Mathayo 11:4, 5, 28-30) Mafundisho ya Yesu ambaye alikuwa “mkuu kuliko Sulemani,” yalikuwa na hekima nyingi. (Mathayo 12:42) Lakini Yesu hakujigamba kwa sababu ya hekima hiyo. Maneno yake yaligusa hisia za watu wa hali ya chini, kwa kuwa mafundisho yake yalikuwa wazi, rahisi, na yaliwanufaisha.

19, 20. (a) Yesu alionyeshaje upendo kwa njia ya pekee sana? (b) Tunaposoma na kutafakari kielelezo cha Yesu, tunapaswa kukumbuka nini?

¹⁹ Yesu alionyesha upendo kwa njia ya pekee sana. Katika huduma yake, alionyesha upendo kwa njia mbalimbali, kutia ndani hisia mwenzi na huruma. Alisikitika sana alipowaona watu wakiteseka. Mara nyingi, alichukua hatua kwa sababu ya kuwasikitikia wengine. (Mathayo 14:14) Ingawa aliwaponya wagonjwa na kuwalisha wenye njaa, Yesu aliwahurumia watu kwa njia muhimu hata zaidi. Aliwasaidia watu kujua, kukubali, na kupenda kweli kuhusu Ufalme wa Mungu ambao utawaletea wanadamu baraka za milele. (Marko 6:34; Luka 4:43) Isitoshe, Yesu alionyesha upendo wa kujidhabihu kwa kutoa uhai wake kwa hiari kwa ajili ya wengine.​—Yohana 15:13.

²⁰ Haishangazi kwamba watu wa kila umri na malezi walivutiwa na Yesu kwa sababu alikuwa mchangamfu na mwenye huruma. (Marko 10:13-16) Hata hivyo, tunaposoma na kutafakari maisha ya Yesu, tukumbuke kwamba sikuzote Mwana huyo anatuonyesha wazi utu wa Baba yake.​—Waebrania 1:3.

Kitabu cha Kutusaidia Kujifunza

21, 22. Kumtafuta Yehova kunatia ndani nini, na kitabu hiki kina mambo gani ya kutusaidia tufikie lengo hilo?

²¹ Bila shaka Yehova anataka tuwe karibu naye, kwa sababu ametueleza wazi utu wake kupitia Neno lake. Hata hivyo, hatulazimishi tuwe na uhusiano mzuri pamoja naye. Ni jukumu letu kumtafuta Yehova “wakati bado anapatikana.” (Isaya 55:6) Kumtafuta Yehova kunatia ndani kujua sifa zake na kujua njia yake ya kufanya mambo kama inavyoonyeshwa katika Biblia. Kitabu hiki kimekusudiwa kukusaidia ufikie lengo hilo.

²² Kitabu hiki kimegawanywa katika sehemu zinazozungumzia sifa nne kuu za Yehova: nguvu, haki, hekima, na upendo. Kila sehemu inaanza kwa muhtasari wa sifa inayozungumziwa. Sura kadhaa zinazofuata zinazungumzia jinsi Yehova anavyoonyesha sifa hiyo kwa njia mbalimbali. Kila sehemu pia ina sura inayoonyesha jinsi Yesu alivyoonyesha sifa hiyo, na sura moja inazungumzia jinsi tunavyoweza kuonyesha sifa hiyo maishani mwetu.

23, 24. (a) Eleza kuhusu sehemu ya pekee ya “Maswali ya Kutafakari.” (b) Kutafakari kunatusaidiaje kumkaribia Mungu zaidi?

²³ Kuanzia sura hii, kuna sehemu ya pekee yenye kichwa “Maswali ya Kutafakari.” Kwa mfano, ona sanduku kwenye ukurasa wa 28. Maandiko na maswali yaliyoonyeshwa hayakusudiwi kurudia tu sura. Badala yake, yanakusudiwa kukusaidia utafakari mambo mengine muhimu kuhusiana na habari hiyo. Unaweza kutumiaje sehemu hiyo kwa mafanikio? Fungua kila andiko lililotajwa, na ulisome kwa uangalifu. Kisha chunguza swali linaloambatana na kila andiko. Tafakari majibu yake. Unaweza kufanya utafiti. Jiulize maswali mengine ya ziada: ‘Habari hii inanifundisha nini kumhusu Yehova? Inanihusuje? Ninawezaje kuitumia kuwasaidia wengine?’

²⁴ Kutafakari kunaweza kutusaidia tumkaribie Yehova zaidi. Jinsi gani? Biblia inaonyesha kwamba kutafakari kunahusisha moyo. (Zaburi 19:14) Tunapothamini sana mambo tunayojifunza kumhusu Mungu, habari hizo hufika kwenye moyo wetu wa mfano, kisha zinabadili njia yetu ya kufikiri, zinagusa hisia zetu, na hatimaye zinatuchochea kutenda. Upendo huo hutia mizizi na kutuchochea tumfurahishe Rafiki yetu mpendwa, Yehova. (1 Yohana 5:3) Ili kuwa na uhusiano huo, tunapaswa kujua sifa za Yehova na jinsi anavyofanya mambo. Kwanza, tuzungumzie sifa moja ya utu wa Mungu ambayo hutuchochea tumkaribie—utakatifu wake.