Je! Utauitikia Upendo wa Yesu?

“Upendo wa Kristo watubidisha [watulazimisha, NW].”—2 WAKORINTHO 5:14.

1. Upendo wa Yesu waweza kuelezwaje?

KWELI kweli, upendo wa Yesu ni wenye kustaajabisha kama nini! Tunapotafakari juu ya jinsi alivyoteseka kusivyoelezeka alipotoa fidia, ambayo kwayo pekee twaweza kupata uhai wa milele, kwa hakika mioyo yetu inasukumwa na uthamini kwa ajili yake. Yehova Mungu na Yesu mwenyewe ndio waliochukua hatua ya kwanza. Walitupenda kwanza, tulipokuwa tungali watenda dhambi. (Warumi 5:6-8; 1 Yohana 4:9-11) Kuujua “upendo wake Kristo,” akaandika mtume Paulo, ‘kwapita ufahamu.’ (Waefeso 3:19) Kwa kweli, upendo wa Yesu wapita sana maarifa ya kichwani ya kisomo. Wapita chochote ambacho binadamu wamepata kuona.

2. Ni nini kisichoweza kumzuia Yesu asitupende?

² Akiwaandikia Wakristo katika Roma, Paulo aliuliza hivi: “Ni nani atakayetutenga na upendo wa Kristo? Je! ni dhiki, au shida, au adha, au njaa, au uchi, au hatari, au upanga?” Hakuna lolote la mambo kama hayo liwezalo kumzuia Yesu asitupende sisi. Nimekwisha kujua hakika,” Paulo aendelea, “ya kwamba, wala mauti, wala uzima, wala malaika, wala wenye mamlaka, wala yaliyopo, wala yatakayokuwapo, wala wenye uwezo, wala yaliyo juu, wala yaliyo chini, wala kiumbe kinginecho chote hakitaweza kututenga na upendo wa Mungu ulio katika Kristo Yesu Bwana wetu.”—Warumi 8:35-39.

3. Ni nini pekee kiwezacho kumfanya Yesu na Baba yake watuache sisi?

³ Upendo wa Yehova Mungu na Yesu Kristo kwako ni wenye nguvu kadiri hiyo. Kuna kitu kimoja tu kiwezacho kuwazuia wasikupende, na hicho ni kukataa kwako mwenyewe kwa hiari yako upendo wao kwa kukataa kufanya wanavyokuomba ufanye. Nabii mmoja wa Mungu alimweleza mfalme mmoja wa Yudea hivi: “BWANA [Yehova, NW] yu pamoja nanyi, mkiwa pamoja naye; nanyi mkimtafuta ataonekana kwenu; lakini mkimwacha atawaacha ninyi.” (2 Mambo ya Nyakati 15:2) Ni nani kati yetu angetaka wakati wowote kuwakataa marafiki wazuri ajabu kama hao, wenye huruma kama Yehova Mungu na Mwana wake, Yesu Kristo?

Itikio Linalofaa kwa Upendo wa Yesu

4, 5. (a) Upendo wa Yesu wapasa kuwa na matokeo gani katika uhusiano wetu mbalimbali pamoja na wanadamu wenzetu? (b) Twapaswa tusukumwe kumpenda nani mwingine kwa sababu ya upendo wa Yesu kwa ajili yetu?

⁴ Upendo wa Yesu usio na mipaka unakuwa na matokeo gani kwako binafsi? Wapaswa kuwa mtu wa aina gani? Naam, Yesu alionyesha matokeo ambayo kielelezo chake kilipaswa kuleta katika mahusiano yetu na wanadamu wenzetu. Baada ya kuwatumikia mitume wake kwa unyenyekevu kwa kuiosha miguu yao, Yesu alisema hivi: “Nimewapa kielelezo; ili kama mimi nilivyowatendea, nanyi mtende vivyo [hivyo].” Aliongeza hivi: “Amri mpya nawapa, Mpendane. Kama vile nilivyowapenda ninyi, nanyi mpendane vivyo hivyo.” (Yohana 13:15, 34) Wanafunzi wake walijifunza, nao walisukumwa wajaribu kutenda kama alivyotenda. “Katika hili tumelifahamu pendo,” mtume Yohana aliandika, “kwa kuwa yeye aliutoa uhai wake kwa ajili yetu; imetupasa na sisi kuutoa uhai wetu kwa ajili ya hao ndugu.”—1 Yohana 3:16.

⁵ Hata hivyo, sisi tungekosa kusudi la maisha na huduma ya Yesu ikiwa tungesukumwa na kielelezo chake cha upendo ili tupende na kutumikia tu masilahi ya binadamu wenzetu. Je! upendo wa Yesu kwetu haupasi utusukume nasi pia tumpende yeye na hasa kumpenda Baba yake, aliyemfundisha yale yote ajuayo? Je! wewe utaitikia upendo wa Kristo na kumtumikia Baba yake kama alivyofanya?—Waefeso 5:1, 2; 1 Petro 1:8, 9.

6. Upendo wa Yesu kwa ajili ya mtume Paulo ulikuwa na matokeo gani kwake?

⁶ Ebu fikiria kisa cha Sauli, ambaye baadaye aliitwa Paulo. Wakati mmoja alimnyanyasa Yesu, “akizidi kutisha na kuwaza kuwaua wanafunzi.” (Matendo 9:1-5; Mathayo 25:37-40) Paulo alipopata kumjua Yesu kweli kweli, alishukuru sana kwa kupata msamaha hivi kwamba hakuwa tayari kuteseka tu kwa ajili yake bali pia alikuwa tayari kufa kwa ajili yake. ‘Nimetundikwa pamoja na Kristo,’ aliandika. “Ni hai; wala si mimi tena . . . uhai nilio nao sasa katika mwili, ninao katika imani ya Mwana wa Mungu, ambaye alinipenda akajitoa nafsi yake kwa ajili yangu.”—Wagalatia 2:20.

7. Upendo wa Yesu wapasa utulazimishe tufanye nini?

⁷ Lo! ule upendo Yesu alio nao kwa ajili yetu wapasa kuwa nguvu yenye kulazimisha kama nini maishani mwetu! “Maana, upendo wa Kristo watubidisha [watulazimisha, NW],” Paulo akawaandikia Wakorintho ‘tusiwe hai tena kwa ajili ya nafsi zetu wenyewe, bali kwa ajili yake yeye aliyekufa akafufuka kwa ajili yetu.’ (2 Wakorintho 5:14, 15) Kwa kweli, shukrani kwa Yesu kwa ajili ya kutoa uhai wake kwa ajili yetu yapasa itusukume kufanya lolote analotuomba tufanye. Ni kwa njia hiyo pekee ambayo twaweza kuthibitisha kwamba twampenda kweli kweli. “Mkinipenda, mtazishika amri zangu,” Yesu akasema. “Yeye aliye na amri zangu, na kuzishika, yeye ndiye anipendaye.”—Yohana 14:15, 21; linganisha 1 Yohana 2:3-5.

8. Upendo wa Yesu umekuwa na matokeo gani katika maisha ya watenda mabaya wengi?

⁸ Walipokuja kujifunza amri za Yesu, waasherati, wazinzi, walawiti, wevi, walevi, na watamanio katika Korintho ya kale waliitikia upendo wa Yesu kwa kuyaacha mazoea hayo. Paulo aliandika hivi juu yao: “Mlioshwa, . . . mlihesabiwa haki katika jina la Bwana Yesu Kristo.” (1 Wakorintho 6:9-11) Vivyo hivyo, upendo wa Kristo umewalazimisha wengi leo wafanye mabadiliko makubwa sana katika maisha zao. “Ushindi wa kweli wa Ukristo ulionwa katika kuwafanya wawe watu wema wale waliodai [kufuata] mafundisho yake,” akaandika mwanahistoria John Lord. “Tuna ushuhuda wa maisha zao zisizo na lawama, wa maadili yao yasiyoweza kushutumiwa, wa uraia wao mwema, na wa neema zao za Kikristo.” Mafundisho ya Yesu yamefanya hali iwe tofauti kama nini!

9. Ni nini kinachotiwa ndani katika kumsikiliza Yesu?

⁹ Hakika hakuna funzo lingeweza kufanywa na mtu fulani ambalo lingekuwa la maana zaidi leo kuliko lile linalohusu maisha na huduma ya Yesu Kristo. ‘Tazameni sana Yesu kwa kumkazia macho,’ akahimiza mtume Paulo. “Kweli kweli, mtafakarini sana [huyo].” (Waebrania 12:2, 3, NW) Wakati wa Yesu kugeuka sura, Mungu mwenyewe aliamuru kwa habari ya Mwana wake hivi: “Msikieni yeye.” (Mathayo 17:5) Lakini, yapasa ikaziwe kwamba kumsikiliza Yesu kunatia ndani zaidi ya kusikia tu yale ambayo anasema. Kunamaanisha kutii maagizo yake, naam, kumwiga kwa kufanya lile alilofanya katika namna alivyolifanya. Tunauitikia upendo wa Yesu kwa kumweka yeye kuwa kielelezo chetu, kwa kufuata nyayo zake kwa ukaribu.

Lile Ambalo Yesu Anataka Tufanye

10. Yesu aliwazoeza nani na kwa kusudi gani?

¹⁰ Utume wa Yesu kutoka kwa Mungu ulikuwa kuhubiri juu ya Ufalme wa Baba yake, na aliwazoeza wafuasi wake wafanye kazi iyo hiyo. “Twendeni mahali pengine,” akawaambia wanafunzi wake wa kwanza, “nipate kuhubiri huko nako; maana kwa hiyo nalitokea.” (Marko 1:38; Luka 4:43) Baadaye, baada ya kuwazoeza kikamili wale mitume 12, Yesu aliwaagiza hivi: “Na katika kuenenda kwenu, hubirini, mkisema, Ufalme wa mbinguni umekaribia.” (Mathayo 10:7) Miezi kadha baadaye, baada ya kuwazoeza wengine 70, aliwatuma kwa amri hii: “Waambieni, Ufalme wa Mungu umewakaribia.” (Luka 10:9) Kwa wazi, Yesu alitaka wafuasi wake wawe wahubiri na walimu.

11. (a) Wanafunzi wa Yesu wangefanyaje kazi zilizo kubwa kuliko zile alizofanya? (b) Ni nini kilichowapata wanafunzi baada ya Yesu kuuawa?

¹¹ Yesu aliendelea kuwazoeza wanafunzi wake kwa ajili ya kazi hiyo. Wakati wa jioni ya mwisho kabla ya kifo chake, aliwatia moyo kwa maneno haya: “Yeye aniaminiye mimi, kazi nizifanyazo mimi, yeye naye atazifanya; naam, na kubwa kuliko hizo atafanya. (Yohana 14:12) Kazi za wafuasi wake zingekuwa kubwa kuliko zake kwa sababu katika huduma yao wangefikia watu wengi zaidi kwenye eneo lililo kubwa zaidi na kwa wakati ulio mrefu zaidi. Hata hivyo, baada ya Yesu kuuawa, wanafunzi wake waliacha kutenda kwa sababu ya woga. Walijificha na hawakuendeleza ile kazi ambayo alikuwa amewazoeza wafanye. Baadhi yao hata walirudia ile biashara ya uvuvi. Ingawa hivyo, kwa njia isiyosahaulika, alikazia akilini mwa wale saba lile ambalo alitaka wao, pamoja na wafuasi wake wote, wafanye.

12. (a) Yesu alifanya muujiza gani kwenye Bahari ya Galilaya? (b) Yaelekea, Yesu alimaanisha nini alipomwuliza Petro kama alimpenda Yeye “kuliko hawa”?

¹² Yesu alivaa mwili wa kibinadamu na kutokea kwenye Bahari ya Galilaya. Wale mitume saba walikuwa wameondoka kwa mashua lakini walishindwa kunasa samaki wowote usiku kucha. Yesu akapaaza sauti kutoka kwa ukingo wa bahari: “Litupeni jarife [wavu, NW] upande wa kuume wa chombo, nanyi mtapata.” Wavu ulipojaa samaki kimuujiza kufikia hatua ya kupasuka, wale waliokuwa katika mashua walitambua kwamba Yesu ndiye aliyekuwa ukingoni mwa bahari, wakaharakisha kwenda mahali alipokuwa akingojea. Baada ya kuwapa kiamsha kinywa, Yesu, labda akitazama kuelekea ule mvuo mkubwa wa samaki, alimwuliza Petro hivi: “Je! Simoni wa Yohana, wewe wanipenda kuliko hawa?” (Yohana 21:1-15) Yesu bila shaka alimaanisha, Je! umefungamana zaidi na shughuli ya uvuvi kuliko kazi ambayo nimekutayarisha ufanye?

13. Yesu alikaziaje kwa nguvu akilini mwa wafuasi wake jinsi wanavyopaswa kuuitikia upendo wake?

¹³ Petro akaitikia hivi: “Naam, Bwana, wewe wajua kuwa nakupenda.” Yesu akajibu: “Lisha wana-kondoo wangu.” Mara ya pili Yesu akamwuliza: “Simoni wa Yohana, wanipenda?” Tena Petro akajibu, bila shaka akiwa na uhakika zaidi: “Ndiyo Bwana, wewe wajua kuwa nakupenda.” Yesu akaamuru hivi tena: “Chunga kondoo zangu.” Kwa mara ya tatu Yesu akauliza: “Simoni wa Yohana, wanipenda?” Kufikia sasa Petro alihuzunika kweli kweli. Siku chache tu kabla ya hapo, alikuwa amekana mara tatu kwamba hamjui Yesu, basi huenda akawa ameshangaa akitaka kujua kama Yesu alionea shaka uaminifu wake wa ushikamanifu. Kwa hiyo kwa mara ya tatu, Petro akaitikia, labda katika sauti ya kusihi: “Bwana, wewe wajua yote; wewe umetambua ya kuwa nakupenda.” Yesu akajibu tu: “Lisha kondoo zangu.” (Yohana 21:15-17) Je! kwaweza kuwa shaka lolote juu ya lile ambalo Yesu alitaka Petro na washirika wake wafanye? Alikazia kwa nguvu kama nini akilini mwao—na pia akilini mwa wowote ambao wangekuwa wanafunzi wake leo—kwamba ikiwa wanampenda, watashiriki katika kazi ya kufanya wanafunzi!

14. Katika pindi nyingine, Yesu alionyeshaje jinsi wanafunzi wake wapasavyo kuuitikia upendo wake?

¹⁴ Siku chache baada ya mazungumzo hayo ya ukingoni mwa bahari, Yesu alitokea kwenye mlima katika Galilaya akaagiza mkusanyiko wenye furaha wa wafuasi karibu 500: “Basi, enendeni, mkawafanye mataifa yote kuwa wanafunzi, . . . kuwafundisha kuyashika yote niliyowaamuru.” (Mathayo 28:19, 20; 1 Wakorintho 15:6) Ebu fikiria hilo! Wanaume, wanawake, na watoto wote walipokea utume huo huo. Baadaye zaidi, kabla tu ya kupaa mbinguni, Yesu aliwaambia wanafunzi wake hivi: “Mtakuwa mashahidi wangu . . . hata mwisho wa nchi.” (Matendo 1:8) Baada ya himizo hilo lote, haishangazi kwamba Petro miaka kadha baadaye, alisema hivi: “[Yesu] akatuagiza tuwahubiri watu na kushuhudia.”—Matendo 10:42.

15. Hakuwezi kuwa shaka lolote juu ya nini?

¹⁵ Hakuwezi kuwa na shaka lolote kuhusu jinsi ambavyo twapaswa kuuitikia upendo wa Yesu. Kama alivyowaambia mitume wake: “Mkizishika amri zangu, mtakaa katika pendo langu . . . Ninyi mmekuwa rafiki zangu, mkitenda niwaamuruyo.” (Yohana 15:10-14) Swali ni, Je! utaonyesha uthamini kwa ajili ya upendo wa Yesu kwa kutii amri yake ya kushiriki katika kazi ya kufanya wanafunzi? Ni kweli, hiyo huenda isiwe rahisi kwako kwa sababu fulani fulani. Lakini haikuwa rahisi hata kwa Yesu. Ebu fikiria mabadiliko ambayo alipaswa afanye.

Fuata Mfano wa Yesu

16. Ni mfano gani mzuri ajabu ambao Yesu aliandaa?

¹⁶ Mwana mzaliwa wa pekee wa Mungu alionea shangwe cheo kikubwa cha utukufu wa kimbingu ulio wa hali ya juu kuliko ule wa malaika wote. Alikuwa tajiri kweli kweli! Hata hivyo alijifanya utupu kwa kupenda kwake mwenyewe, akazaliwa akiwa mshiriki wa familia iliyokuwa maskini, na kukua mtu mzima akiwa kati ya wanadamu wagonjwa, wanaokufa. Alifanya hivyo kwa ajili yetu, kama mtume Paulo alivyoeleza: “Mmejua neema ya Bwana wetu Yesu Kristo, jinsi alivyokuwa maskini kwa ajili yenu, ingawa alikuwa tajiri, ili kwamba ninyi mpate kuwa matajiri kwa umaskini wake.” (2 Wakorintho 8:9; Wafilipi 2:5-8) Ni mfano ulioje! Ni wonyesho wa upendo ulioje! Hakuna yeyote ambaye amesalimisha mengi zaidi au kuteseka zaidi kwa ajili ya wengine. Na hakuna yeyote ambaye amewezesha wengine waonee shangwe utajiri mkubwa zaidi naam, uhai wa milele katika ukamilifu!

17. Ni mwendo gani uliowekwa mbele yetu, na tokeo la kuufuata litakuwa nini?

¹⁷ Twaweza kuufuata mfano wa Yesu na kuwanufaisha watu vivyo hivyo. Tena na tena, Yesu aliwasihi watu wawe wafuasi wake. (Marko 2:14; Luka 9:59; 18:22) Kwa kweli, Petro aliandika hivi: “Kwa sababu ndio mlioitiwa; maana Kristo naye aliteswa kwa ajili yenu, akawaachia kielelezo, mfuate nyayo zake.” (1 Petro 2:21) Je! utauitikia upendo wa Yesu hata ikiwa ingemaanisha kuteseka ili kumtumikia Baba yake kama alivyofanya? Mwendo wa jinsi hiyo waweza kuwa na manufaa kama nini kwa wengine! Kwa kweli, kwa kufuata mfano wa Yesu, kwa kutumia kikamili mafundisho yake aliyopokea kutoka kwa Baba yake, “utajiokoa nafsi yako na wale wakusikiao pia.”—1 Timotheo 4:16.

18. (a) Yesu aliweka mfano gani kuhusu mtazamo wake kuelekea watu? (b) Watu waliitikiaje utu wa Yesu?

¹⁸ Ili kusaidia watu zaidi, ni lazima pia tuhisi juu ya watu jinsi Yesu alivyohisi. Unabii mmoja ulisema hivi kuhusu yeye: “Atamhurumia aliye dhaifu na maskini.” (Zaburi 72:13) Wafuasi wake wangeweza kuona kwamba Yesu ‘alipenda’ wale aliosema nao na kwamba alitaka kweli kweli kuwasaidia. (Marko 1:40-42; 10:21) “Alipowaona makutano,” Biblia yasema, “aliwahurumia, kwa sababu walikuwa wamechoka na kutawanyika kama kondoo wasio na mchungaji.” (Mathayo 9:36) Hata wenye kutenda dhambi mbaya sana walihisi upendo wake wakavutwa kwake. Kwa namna ya sauti yake, mwenendo wake, na njia yake ya kufundisha, walistareheshwa. Tokeo likawa, hata watoza ushuru na makahaba wenye kudharauliwa walimtafuta.—Mathayo 9:9-13; Luka 7:36-38; 19:1-10.

19. Paulo alimwigaje Yesu, na tokeo litakuwa nini tukifanya sawa na hilo?

¹⁹ Wanafunzi wa Yesu wa karne ya kwanza waliiga mfano wake wa upendo. Paulo aliwaandikia wengine ambao alikuwa amewatumikia hivi: “Tulikuwa wapole katikati yenu, kama vile mlezi awatunzavyo watoto wake mwenyewe . . . kama baba awaonyavyo watoto wake mwenyewe, tukiwatia moyo na kushuhudia.” (1 Wathesalonike 2:7-11) Je! wewe huhisi ufikirio wa kweli kwa wale walio katika eneo lako kama ule ambao wazazi wenye upendo huhisi kwa watoto wao wapendwa? Kuonyesha ufikirio kama huo katika namna ya sauti yako, uso wako, na vitendo vyako kutafanya ujumbe wa Ufalme uvutie kwa wale wenye mfano wa kondoo.

20, 21. Ni baadhi gani ya mifano ya ki-siku-hizi ya watu waliofuata mfano wa Yesu wa upendo?

²⁰ Siku moja yenye baridi katika Hispania, Mashahidi wawili walikutana na mwanamke mzee-mzee mwenye kutembea kwa mikongojo ambaye nyumba yake ilikuwa baridi sana kwa sababu kuni zilikuwa zimeisha. Alikuwa akimngojea mwana wake arudi kutoka kazini ateme kuni zaidi. Mashahidi hao walitema kuni, na pia wakamwachia magazeti asome. Mwana wake aliporudi, alivutiwa sana na ufikirio wenye upendo wa Mashahidi hao kwa mama yake hivi kwamba alisoma vichapo hivyo, akaanza kujifunza Biblia, akabatizwa, na upesi akaingia katika utumishi wa upainia.

²¹ Katika Australia mwanamume mmoja pamoja na mke wake waliwaeleza Mashahidi waliokuwa wamewatembelea kwamba hawakuwa na pesa za kulisha familia yao. Wenzi wa ndoa hao Mashahidi waliondoka na kununua vyakula, kutia na peremende kwa ajili ya watoto. Wazazi walishindwa kujizuia wakalia, wakisema kwamba walikuwa na uhitaji mkubwa sana hivi kwamba walikuwa wametafakari juu ya kujiua. Wote wawili walianza kujifunza Biblia, na mke akabatizwa hivi karibuni. Mwanamke mmoja katika United States aliyekuwa na maoni ya ubaguzi dhidi ya Mashahidi wa Yehova aliripoti hivi baada ya kukutana na mmoja: “Kwa kweli siwezi kukumbuka lile tulilozungumzia, lakini lile nilalokumbuka ni jinsi alivyokuwa mwenye fadhili kwangu, na jinsi alivyokuwa mkarimu na mnyenyekevu. Kwa kweli nilihisi nimevutiwa kwake binafsi. Ninathamini sana urafiki wake hadi leo.”

22. Baada ya kuchunguza maisha ya Yesu, tunafikia mkataa gani kuhusu yeye?

²² Tunapouitikia upendo wa Yesu kwa kufanya kazi aliyofanya katika njia aliyoifanya, twaweza kuonea shangwe mibaraka mizuri ajabu kama nini! Ukuu wa Yesu unaonekana wazi na ni mwingi mno. Tunasukumwa kurudia maneno ya gavana Mroma Pontio Pilato: “Tazama, mtu huyu!” naam, kwa kweli, “Mtu huyu,” yule mtu mkuu zaidi aliyepata kuishi.—Yohana 19:5.

Ungejibuje?

◻ Upendo wa Yesu ni mkubwa kadiri gani?

◻ Upendo wa Yesu wapasa utufanye tumpende nani, na upendo wake wapasa utulazimishe tufanye nini?

◻ Yesu ataka tufanye kazi gani?

◻ Yesu alikuwaje tajiri, na ni kwa nini akawa maskini?

◻ Twapaswa kumwigaje Yesu katika njia aliyotumikia watu?

[Picha katika ukurasa wa 15]

Yesu aliweka kielelezo cha kuonyesha upendo

[Picha katika ukurasa wa 17]

Yesu alionyesha kwa nguvu jinsi wanafunzi wake wanapaswa kudhihirisha upendo kwa ajili yake