“Nilitumwa Kufanya Hivyo”

1-4. (a) Yesu anamfundishaje mwanamke Msamaria kwa ustadi, na anapata matokeo gani? (b) Mitume wake wana maoni gani kuhusu jambo hilo?

YESU na mitume wake wamekuwa wakitembea kwa muda fulani. Wanaelekea kaskazini, kutoka Yudea kwenda Galilaya. Wanatumia njia fupi zaidi, inayopita Samaria na safari hiyo inawachukua siku tatu hivi. Saa sita hivi mchana, wanakaribia jiji dogo linaloitwa Sikari ambapo wanapumzika.

² Mitume wake wanapoenda kununua chakula, Yesu anapumzika kando ya kisima kilicho nje ya jiji hilo. Mwanamke fulani anakuja kuchota maji. Yesu angeweza kumpuuza, “kwa kuwa alikuwa amechoka kwa sababu ya safari.” (Yohana 4:6) Ingeeleweka ikiwa Yesu angempuuza mwanamke huyo Msamaria na kuendelea na shughuli zake. Kama tulivyoona katika Sura ya 4 ya kitabu hiki, mwanamke huyo angetazamia mtu yeyote ambaye ni Myahudi ampuuze. Hata hivyo, Yesu anaanza kuzungumza naye.

³ Anaanza kwa mfano unaohusu maisha ya kila siku ya mwanamke huyo. Anazungumzia jambo ambalo mwanamke huyo anafanya sasa hivi. Amekuja kuchota maji, naye Yesu anazungumza kuhusu maji ya uzima yatakayomaliza kiu yake ya kiroho. Mara kadhaa, mwanamke huyo anataja mambo yanayoweza kutokeza mabishano.a Kwa busara Yesu anaepuka mambo hayo na kuzungumzia habari aliyokuwa nayo akilini. Anakazia mambo ya kiroho, yale yanayohusu ibada safi na Yehova Mungu. Maneno yake yana matokeo sana, kwa sababu mwanamke huyo anawasimulia watu wa jiji hilo, nao pia wanataka kumsikiliza Yesu.​—Yohana 4:3-42.

⁴ Mitume wanaporudi, wana maoni gani kuhusu ushahidi wa pekee ambao Yesu anatoa? Hawaonyeshi kwamba wamefurahishwa na jambo hilo. Wanashangaa kumwona Yesu akizungumza na mwanamke huyo, na inaonekana kwamba hawaongei na mwanamke huyo hata kidogo. Mwanamke huyo anapoondoka, wanaendelea kumsihi Yesu tena na tena ale chakula ambacho wameleta. Hata hivyo, Yesu anawaambia: “Nina chakula ambacho hamkijui.” Wanashangaa! Mwanzoni, wanafikiri kwamba Yesu anazungumzia chakula cha kimwili. Kisha, anaeleza hivi: “Chakula changu ni kufanya mapenzi ya yule aliyenituma na kuimaliza kazi yake.” (Yohana 4:32, 34) Hivyo, Yesu anawafundisha kwamba anaiona kazi yake kuu maishani kuwa jambo muhimu kuliko kula. Anataka wao pia wawe na maoni kama hayo kuhusu kazi hiyo. Ni kazi gani hiyo?

5. Ni kazi gani kuu ambayo Yesu alifanya maishani, na tutachunguza nini katika sura hii?

⁵ Pindi moja Yesu alisema: “Ni lazima pia nitangaze habari njema ya Ufalme wa Mungu . . . , kwa sababu nilitumwa kufanya hivyo.” (Luka 4:43) Yesu alitumwa kuhubiri na kufundisha habari njema ya Ufalme wa Mungu.b Leo, wafuasi wa Yesu wanafanya kazi hiyo pia. Hivyo, ni muhimu kwetu kuchunguza ni kwa nini Yesu alihubiri, habari alizohubiri, na mtazamo aliokuwa nao kuhusu mgawo wake.

Kwa Nini Yesu Alihubiri?

6, 7. Yesu alitaka kila “mwalimu wa watu wote” awe na maoni gani kuhusu kuwaeleza wengine habari njema? Toa mfano.

⁶ Acheni tuone jinsi Yesu alivyoziona kweli alizofundisha; kisha tutazungumzia maoni yake kuelekea watu aliowafundisha. Yesu alitumia mfano rahisi kuonyesha jinsi alivyohisi kuhusu kuwaeleza wengine kweli ambazo Yehova alimfundisha. Alisema hivi: “Kila mwalimu wa watu wote, anapofundishwa kuhusu Ufalme wa mbinguni ni kama bwana wa nyumba, ambaye hutoa katika hazina yake vitu vipya na pia vya zamani.” (Mathayo 13:52) Kwa nini katika mfano huo mwenye nyumba anatoa vitu katika hazina yake?

⁷ Kusudi la mwenye nyumba huyo si kuonyesha tu mali yake kama Mfalme Hezekia alivyofanya na kujiletea matatizo. (2 Wafalme 20:13-20) Kwa nini mwenye nyumba anaonyesha mali yake? Fikiria mfano huu: Wazia kwamba umeenda kumtembelea mwalimu unayempenda nyumbani kwake. Anafungua kabati la meza na kutoa barua mbili, moja imezeeka na kubadilika rangi, na nyingine ni mpya. Alipokea barua hizo kutoka kwa baba yake, moja ilitumwa zamani sana mwalimu huyo alipokuwa kijana mdogo tu, na nyingine imetumwa hivi karibuni. Kwa uchangamfu, anakueleza jinsi anavyothamini barua hizo na jinsi ambavyo ushauri uliomo umebadili maisha yake na kwamba unaweza kukusaidia. Ni wazi kwamba mwalimu huyo anathamini sana barua hizo na ni za pekee kwake. (Luka 6:45) Anakuonyesha barua hizo, si ili kujigamba au kujinufaisha kwa njia fulani, bali ni kukunufaisha na kukuonyesha kwamba barua hizo ni zenye thamani.

8. Kwa nini tuna sababu nzuri ya kuziona kweli tunazojifunza katika Neno la Mungu kuwa hazina?

⁸ Mwalimu Mkuu, Yesu, alikuwa na nia kama hiyo alipowaeleza wengine kweli kumhusu Mungu. Aliziona kweli hizo kuwa zenye thamani sana. Alizipenda, naye alitamani kuwaambia wengine. Alitaka “kila mwalimu wa watu wote,” yaani, wafuasi wake wote, wawe na maoni kama yake. Je, sisi tuna maoni kama hayo? Tuna sababu nzuri za kupenda kila kweli tunayojifunza katika Neno la Mungu. Tunathamini kweli zenye thamani, iwe ni mafundisho ambayo tumeamini kwa muda mrefu au yale yaliyorekebishwa hivi karibuni. Kwa kuzungumza kwa uchangamfu na kuendelea kupenda mambo ambayo Yehova ametufundisha, tunaonyesha upendo huo, kama Yesu.

9. (a) Yesu alihisije kuhusu watu aliowafundisha? (b) Tunawezaje kuiga mtazamo wa Yesu kuwaelekea watu?

⁹ Kama tutakavyozungumzia kwa undani katika Sehemu ya 3, Yesu aliwapenda pia watu aliowafundisha. Biblia ilitabiri kwamba Masihi “atamhurumia mtu wa hali ya chini na maskini.” (Zaburi 72:13) Kwa kweli, Yesu aliwahangaikia watu. Alihangaikia mawazo na mitazamo iliyowaathiri; alihangaikia mizigo iliyowalemea na mambo yaliyowazuia wasielewe kweli. (Mathayo 11:28; 16:13; 23:13, 15) Kwa mfano, mfikirie yule mwanamke Msamaria. Bila shaka, alivutiwa sana kwa kuwa Yesu alipendezwa naye. Utambuzi ambao Yesu alikuwa nao kuhusu maisha ya mwanamke huyo ulimchochea mwanamke huyo kumkubali kuwa nabii na kuwaeleza wengine kumhusu Yesu. (Yohana 4:16-19, 39) Ni kweli kwamba wafuasi wa Yesu leo hawawezi kusoma mioyo ya watu wanaowahubiria. Hata hivyo, tunaweza kupendezwa na watu kibinafsi kama Yesu alivyofanya; tunaweza kuwaonyesha kwamba tunawahangaikia; na tunaweza kuchagua maneno yatakayofaa mapendezi, matatizo, na mahitaji yao.

Mambo Ambayo Yesu Alihubiri

10, 11. (a) Yesu alihubiri nini? (b) Kwa nini watu wanahitaji Ufalme wa Mungu?

¹⁰ Yesu alihubiri nini? Kulingana na mafundisho ya dini nyingi zinazodai kuwa za Kikristo, huenda ikaonekana kwamba Yesu alitaka kuboresha haki za wanadamu au kufanya mabadiliko ya kijamii. Huenda ukafikiri kwamba aliunga mkono mabadiliko ya kisiasa au aliamini kwamba wokovu wetu ndio jambo muhimu zaidi. Hata hivyo, kama tulivyoona, Yesu alisema hivi waziwazi: “Ni lazima . . . nitangaze habari njema ya Ufalme wa Mungu.” Hilo lilihusisha nini?

¹¹ Kumbuka, Yesu alikuwa mbinguni Shetani alipolichongea jina takatifu la Yehova na kutilia shaka njia ya Mungu ya kutawala. Bila shaka, Yesu aliumia sana alipoona Baba yake mwadilifu akishtakiwa kuwa Mtawala asiyetenda kwa haki, ambaye anawanyima viumbe Wake mema! Lazima Mwana wa Mungu alihuzunika sana Adamu na Hawa, waliokuja kuwa wazazi wa wanadamu wote, walipouamini uchongezi wa Shetani! Mwana huyo aliona kwamba familia ya wanadamu imerithi dhambi na kifo kwa sababu ya uasi huo. (Waroma 5:12) Hata hivyo, alifurahi sana kujua kwamba siku moja Baba yake atanyoosha mambo!

12, 13. Ufalme wa Mungu utaondoa mambo gani yasiyo ya haki, na Yesu alionyeshaje kwamba Ufalme ndio kichwa kikuu cha huduma yake?

¹² Ni suala gani kuu lililohitaji kutatuliwa? Jina takatifu la Yehova lilihitaji kutakaswa, kuondolewa shutuma zote za Shetani na wote wanaomuunga mkono. Kwa kuwa jina la Yehova linatia ndani haki yake akiwa mtawala, enzi yake kuu na njia yake ya kutawala ilihitaji kutetewa. Yesu alielewa masuala hayo muhimu kuliko mwanadamu mwingine yeyote. Katika sala ya mfano, aliwafundisha wafuasi wake waombe kwanza jina la Baba yake litakaswe, Ufalme wa Baba yake uje, kisha mapenzi ya Mungu yatendeke duniani. (Mathayo 6:9, 10) Hivi karibuni Kristo Yesu akiwa Mtawala, Ufalme wa Mungu utaondolea mbali mfumo wenye ufisadi wa Shetani na kuthibitisha utawala wenye uadilifu wa Yehova.​—Danieli 2:44.

¹³ Ufalme huo ulikuwa kichwa kikuu cha huduma ya Yesu. Maneno na matendo yake yote yalionyesha wazi maana ya Ufalme huo na jinsi utakavyotimiza kusudi la Yehova. Yesu hakuruhusu jambo lolote limkengeushe aache kazi yake ya kuhubiri habari njema ya Ufalme wa Mungu. Wakati huo, kulikuwa na matatizo ya kijamii na ukosefu mwingi wa haki, lakini alikazia fikira ujumbe aliohubiri na kazi yake. Kwa kuwa Yesu aliendelea kukazia fikira mambo hayo, je, hilo linamaanisha kwamba Yesu alikosa usawaziko, alifundisha kwa njia isiyovutia na yenye kuwachosha watu? Sivyo hata kidogo!

14, 15. (a) Yesu alijithibitishaje kuwa “mkuu kuliko Sulemani”? (b) Tunawezaje kumwiga Yesu tunapohubiri?

¹⁴ Kama tutakavyoona katika sehemu hii, Yesu alifanya mafundisho yake yavutie na yawe yenye kupendeza. Maneno yake yaligusa mioyo ya watu. Huenda hilo likatukumbusha kumhusu Mfalme Sulemani mwenye hekima, aliyetafuta maneno yenye kupendeza na maneno sahihi ya kweli ili kueleza mambo ambayo Yehova alimwongoza kuandika. (Mhubiri 12:10) Yehova alimpa mtu huyo asiye mkamilifu “moyo wenye uelewaji mwingi” uliomwezesha kuzungumza kuhusu mambo mengi, kutia ndani ndege, samaki, miti, na wanyama. Watu walitoka mbali ili kumsikiliza Sulemani akizungumza. (1 Wafalme 4:29-34) Hata hivyo, Yesu alikuwa “mkuu kuliko Sulemani.” (Mathayo 12:42) Alikuwa na hekima nyingi na “moyo wenye uelewaji mwingi” kuliko Sulemani. Yesu alipokuwa akiwafundisha watu, alitumia ujuzi mwingi wa Neno la Mungu aliokuwa nao na pia, mambo mengi aliyojua kuhusu ndege, wanyama, samaki, kilimo, hali ya hewa, matukio ya karibuni, historia, na hali za kijamii. Lakini Yesu hakutumia ujuzi wake kujionyesha. Ujumbe wake ulikuwa wazi na rahisi. Haishangazi kwamba watu walifurahia kumsikiliza alipozungumza!—Marko 12:37; Luka 19:48.

¹⁵ Leo, Wakristo wanajitahidi kufuata mfano wa Yesu. Hatuna hekima na ujuzi mwingi kama wake, lakini sisi sote tuna kiasi fulani cha ujuzi na uzoefu ambao tunaweza kutumia tunapowafundisha wengine kweli za Neno la Mungu. Kwa mfano, wazazi wanaweza kutumia uzoefu wao katika kuwalea watoto ili kuonyesha jinsi Yehova anavyowapenda watoto Wake. Wengine wanaweza kutumia mifano kutokana na kazi yao ya kimwili, shule, au ujuzi wao kuhusu watu na matukio ya karibuni. Wakati huohuo, tunaepuka jambo lolote linaloweza kuwakengeusha watu wasisikilize habari njema ya Ufalme wa Mungu.​—1 Timotheo 4:16.

Jinsi Yesu Alivyoiona Huduma Yake

16, 17. (a) Yesu alikuwa na maoni gani kuhusu huduma yake? (b) Yesu alionyeshaje kwamba huduma yake ilikuwa jambo kuu maishani mwake?

¹⁶ Yesu aliiona huduma yake kuwa hazina yenye thamani. Alifurahia kuwasaidia watu wamjue vizuri Baba yake wa mbinguni, bila kuwachanganya na mafundisho na mapokeo ya wanadamu. Yesu alipenda kuwasaidia watu wawe na uhusiano mzuri pamoja na Yehova na wawe na tumaini la uzima wa milele. Alifurahia kuwafundisha watu habari njema yenye kufariji na kuwasaidia wawe na furaha. Ni nini kinachoonyesha kwamba alikuwa na hisia kama hizo? Fikiria njia tatu.

¹⁷ Kwanza, Yesu alifanya huduma kuwa jambo kuu maishani mwake. Kazi yake kuu maishani ilikuwa kuhubiri kuhusu Ufalme. Hiyo ndiyo sababu Yesu alitenda kwa hekima kwa kuishi maisha rahisi, kama tulivyoona katika Sura ya 5. Alifanya kama tu alivyowashauri wengine, alikazia fikira jambo muhimu zaidi. Hakukengeushwa na vitu vingi ambavyo angehitaji kulipia, kutunza, kurekebisha, au kubadili baada ya muda. Aliishi maisha rahisi ili asikengeushwe kutoka kwenye huduma yake.​—Mathayo 6:22; 8:20.

18. Ni katika njia gani Yesu alijitoa kabisa ili kutimiza huduma yake?

¹⁸ Pili, Yesu alijitoa kabisa kutimiza huduma yake. Alitumia nguvu nyingi katika huduma, akitembea kilomita nyingi nchini Palestina, huku akitafuta watu ambao angeweza kuwahubiria habari njema. Alizungumza nao kwenye nyumba zao, katika viwanja vya watu wote, sokoni, na mahali palipokuwa na watu wengi. Alizungumza nao hata alipohitaji kupumzika, kula, kunywa maji, au kutumia wakati pamoja na rafiki zake wa karibu. Hata alipokaribia kufa, aliendelea kuwahubiria wengine habari njema ya Ufalme wa Mungu!—Luka 23:39-43.

19, 20. Yesu alionyeshaje kwamba kazi ya kuhubiri inahitaji kufanywa kwa uharaka?

¹⁹ Tatu, Yesu alihubiri kwa bidii kwa sababu alijua kwamba ujumbe wake ni wa haraka. Kumbuka alipozungumza na yule mwanamke Msamaria kwenye kisima nje ya jiji la Sikari. Inaonekana kwamba mitume wa Yesu hawakuona uharaka wa kuwaeleza wengine habari njema katika pindi hiyo. Yesu aliwaambia hivi: “Je, ninyi hamsemi kwamba bado kuna miezi minne kabla ya mavuno? Tazama! Ninawaambia: Inueni macho yenu mtazame mashamba, kwamba ni meupe kwa ajili ya kuvunwa.”​—Yohana 4:35.

²⁰ Mfano wa Yesu ulitegemea majira ya wakati huo. Inaonekana kwamba ulikuwa mwezi wa Kislevu (Novemba auDesemba). Shayiri ingevunwa miezi minne baadaye, karibu na wakati wa Pasaka, Nisani 14. Hivyo, wakulima hawakuona uharaka wa kuvuna wakati huo. Bado kulikuwa na wakati wa kutosha. Namna gani kukusanywa kwa watu? Wengi walikuwa tayari kusikiliza, kujifunza, kuwa wanafunzi wa Kristo na kuwa na tumaini zuri ajabu ambalo Yehova aliwaahidi. Ni kana kwamba Yesu alitazama mashamba hayo ya mfano na kuyaona kuwa meupe huku nafaka zilizoiva zikipeperushwa na upepo uliovuma taratibu, kuonyesha ziko tayari kuvunwa.c Wakati wa mavuno ulikuwa umefika, na kazi hiyo ilipaswa kufanywa haraka! Hiyo ndiyo sababu watu wa jiji fulani walipotaka Yesu aendelee kukaa kwao, alisema hivi: “Ni lazima pia nitangaze habari njema ya Ufalme wa Mungu katika majiji mengine, kwa sababu nilitumwa kufanya hivyo.”​—Luka 4:43.

21. Tunawezaje kumwiga Yesu?

²¹ Tunaweza kumwiga Yesu katika njia zote tatu ambazo tumezungumzia. Tunaweza kufanya huduma ya Kikristo iwe jambo kuu maishani mwetu. Hata ingawa tunaweza kuwa na majukumu ya familia na shughuli nyingine maishani, tunaweza kuonyesha kwamba tunatanguliza huduma yetu kwa kuifanya kwa bidii na kwa ukawaida kama Yesu. (Mathayo 6:33; 1 Timotheo 5:8) Tunaweza kujitoa kabisa katika huduma, kwa kutumia wakati, nguvu, na mali zetu ili kuitimiza. (Luka 13:24) Sikuzote na tuendelee kukumbuka kwamba kazi yetu inahitaji kufanywa kwa uharaka. (2 Timotheo 4:2) Tunahitaji kutumia kila nafasi kuhubiri!

22. Ni nini kitakachozungumziwa katika sura inayofuata?

²² Pia, Yesu alionyesha kwamba alitambua umuhimu wa kazi hiyo, kwa kuhakikisha kwamba ingeendelea kufanywa hata baada ya kifo chake. Aliwaagiza wafuasi wake waendelee kufanya kazi ya kuhubiri na kufundisha. Kazi hiyo itazungumziwa katika sura inayofuata.