‘Kulitumia Sawasawa Neno la Ile Kweli’

NENO la Mungu ni bohari la kanuni zilizo muhimu ili kuwa na maisha yenye mafanikio. Laweza kumsaidia mhudumu kufundisha, kukaripia, na kusahihisha. (2 Timotheo 3:16, 17) Hata hivyo, ili kunufaika kikamili kutokana na mwongozo huu ulioandaliwa kimungu, ni lazima tufuate shauri la mtume Paulo kwa Timotheo: “Fanya yote uwezayo kabisa ili kujitoa mwenyewe ukiwa mwenye kukubalika kwa Mungu, mtenda-kazi asiye na lolote la kuaibikia, ukilitumia sawasawa neno la ile kweli.”—2 Timotheo 2:15, NW.

Neno la Mungu linafananishwa na maziwa yenye lishe, chakula kigumu, maji yenye kuburudisha na yenye kusafisha, kioo, na upanga mkali, miongoni mwa vitu vinginevyo. Kuelewa kinachodokezwa na maneno hayo kwamsaidia mhudumu kuitumia Biblia kwa ustadi.

Kutoa Maziwa ya Neno la Mungu

Maziwa ndiyo chakula ambacho vitoto vilivyozaliwa karibuni huhitaji. Kitoto kikuapo, kinapewa chakula kigumu hatua kwa hatua, lakini mwanzoni, chaweza tu kuyeyusha maziwa tumboni. Wale wajuao kidogo kuhusu Neno la Mungu ni kama vitoto kwa njia nyingi. Iwe mtu amependezwa hivi karibuni na Neno la Mungu au amelifahamu kwa muda fulani, ikiwa ana uelewevu wa msingi tu wa kile ambacho Biblia husema, yeye ni kitoto cha kiroho naye ahitaji lishe iliyo rahisi kuyeyushwa—“maziwa” ya kiroho. Yeye hawezi bado kuyeyusha “chakula kigumu,” mambo ya ndani kabisa ya Neno la Mungu.—Waebrania 5:12.

Ndivyo hali ilivyokuwa katika kutaniko lililotoka tu kufanyizwa katika Korintho wakati Paulo alipowaandikia hivi: “Naliwanywesha maziwa sikuwalisha chakula; kwa kuwa mlikuwa hamjakiweza.” (1 Wakorintho 3:2) Wakorintho walihitaji kwanza kujifunza “mafundisho ya kwanza ya maneno ya Mungu.” (Waebrania 5:12) Katika hatua yao ya ukuzi, wao wasingaliweza kuyeyusha “mambo ya ndani kabisa ya Mungu.”—1 Wakorintho 2:10, HNWW.

Kama vile Paulo, wahudumu Wakristo leo huonyesha kuhangaikia kwao vitoto vya kiroho kwa kuvipa “maziwa,” yaani, kwa kuvisaidia viwe thabiti katika mafundisho ya Kikristo ya msingi. Wao huwatia moyo wapya hao au wale wasio wakomavu ‘wafanyize hamu sana ya maziwa yasiyoghushiwa yaliyo ya lile neno.’ (1 Petro 2:2, NW) Mtume Paulo alionyesha kwamba alitambua ule uangalifu wa pekee ambao wapya wahitaji alipoandika hivi: “Kila mtu atumiaye maziwa hajui sana neno la haki, kwa kuwa ni mtoto mchanga.” (Waebrania 5:13) Subira, ufikirio, uelewevu, na uanana zinatakwa kwa wahudumu wa Mungu washirikipo maziwa safi ya Neno pamoja na wapya na wale wasio na uzoevu kupitia mafunzo ya Biblia nyumbani na kutanikoni.

Kukitumia Chakula Kigumu cha Neno la Mungu

Ili kukua kufikia wokovu, Mkristo ahitaji zaidi ya “maziwa.” Mara kweli za msingi za Biblia zielewekapo kwa wazi na kukubaliwa, yeye yuko tayari kuanza kula ‘chakula kigumu kilicho cha watu wazima.’ (Waebrania 5:14) Yeye aweza kufanyaje hili? Kwa msingi, ni kupitia utaratibu wa kawaida wa funzo la kibinafsi na ushirika kwenye mikutano ya Kikristo. Mazoea mazuri ya jinsi hiyo yatasaidia kumfanya Mkristo awe mwenye nguvu kiroho, awe mkomavu, na mwenye matokeo katika huduma. (2 Petro 1:8) Hatupaswi kusahau kwamba zaidi ya ujuzi, chakula cha kiroho kinatia ndani pia kufanya mapenzi ya Yehova.—Yohana 4:34.

Leo “mtumwa mwaminifu mwenye akili” amewekwa rasmi ili kuwaandalia watumishi wa Mungu chakula kwa wakati ufaao na kuwasaidia waelewe “hekima ya Mungu iliyo ya namna nyingi.” Yehova, kupitia roho yake, hufunua kweli za Kimaandiko za ndani kabisa kupitia mtumwa huyu mwaminifu-mshikamanifu, ambaye huchapisha kwa uaminifu “chakula [cha kiroho] kwa wakati wake.” (Mathayo 24:45-47; Waefeso 3:10, 11; linganisha Ufunuo 1:1, 2.) Kila Mkristo mmoja-mmoja ana daraka la kuyatumia kikamili maandalizi hayo yaliyochapishwa.—Ufunuo 1:3.

Bila shaka, mambo fulani katika Biblia “ni vigumu kuelewa nayo,” hata kwa Wakristo wakomavu. (2 Petro 3:16) Kuna semi, unabii mbalimbali, na vielezi, vyenye kutatanisha vinavyotaka kujifunza kwingi na kutafakari. Kwa hiyo, funzo la kibinafsi latia ndani kuchimba katika Neno la Mungu. (Mithali 1:5, 6; 2:1-5) Wazee hasa wana daraka kuhusiana na jambo hili wanapofundisha kutaniko. Iwe wanaongoza Funzo la Kitabu la Kutaniko au Funzo la Mnara wa Mlinzi, wanatoa hotuba za watu wote, au wanatumikia katika daraka jingine lolote la kufundisha, wazee wapaswa wafahamu kabisa habari yao na wawe tayari kukazia uangalifu “usanifu [wao] wa kufundisha” wanapotolea kutaniko chakula kigumu cha kiroho.—2 Timotheo 4:2, NW.

Maji Yanayoburudisha na Kusafisha

Yesu alimwambia yule mwanamke Msamaria kisimani kwamba angempa kinywaji ambacho kingekuwa ndani yake “chemchemi ya maji, yakibubujikia uzima wa milele.” (Yohana 4:13, 14; 17:3) Maji hayo yenye kutoa uhai yatia ndani maandalizi yote ya Mungu kwa ajili ya kupata uhai kupitia Mwana-Kondoo wa Mungu, na maandalizi hayo yanaelezwa katika Biblia. Tukiwa watu mmoja-mmoja waonao kiu ya kuyanywa “maji” hayo, sisi twakubali mwaliko unaotolewa na roho na bibi-arusi wa Kristo wa ‘kuyatwaa maji ya uhai bure.’ (Ufunuo 22:17) Kuyanywa maji hayo kwaweza kumaanisha uhai udumuo milele.

Zaidi, Biblia huwekea Wakristo wa kweli viwango vya kiadili na vya kiroho. Tutumiapo viwango hivi vilivyowekwa kimungu, tunasafishwa na Neno la Yehova, ‘twaoshwa safi’ na mazoea yote ambayo Yehova Mungu huchukia. (1 Wakorintho 6:9-11) Kwa sababu hiyo, kweli iliyomo katika Neno lililopuliziwa linaitwa “mwosho wa maji.” (Waefeso 5:26, NW) Tusiporuhusu kweli ya Mungu itusafishe katika njia hii, ibada yetu haitakubalika kwake.

Kwa kupendeza, wazee ambao ‘hulitumia sawasawa neno la ile kweli’ wanafananishwa pia na maji. Isaya asema kwamba wao ni kama “mito ya maji mahali pakavu.” (Isaya 32:1, 2) Wazee wenye upendo hutimiza ufafanuzi huo wanapowazuru ndugu zao wakiwa wachungaji wa kiroho, wakitumia Neno la Mungu lenye kuburudisha ili kutoa habari ya kiroho, yenye kujenga, yenye kufariji, inayoimarisha na kutia nguvu.—Linganisha Mathayo 11:28, 29.a

Washiriki wa kutaniko hutazamia kwa hamu ziara za wazee. “Najua jinsi wazee wawezavyo kuwa wenye kutuliza, nami nafurahi sana kwamba Yehova amefanya uandalizi huu,” asema Bonnie. Lynda, mama asiye na mume, aandika hivi: “Wazee walinisaidia nikabiliane na hali, kwa kitia-moyo cha Kimaandiko. Wao walisikiliza na kuonyesha huruma.” Michael asema hivi: “Walinifanya nihisi kuwa sehemu ya tengenezo linalojali.” “Ziara za wazee zilinisaidia nishinde vipindi vibaya sana vya mshuko-moyo,” asema mwingine. Ziara ya mzee yenye kujenga kiroho ni kama kinywaji baridi, chenye kuburudisha. Wale wenye mfano wa kondoo wanafarijiwa wakati wazee wenye upendo wanapowasaidia waone jinsi kanuni za Kimaandiko zinavyohusu hali yao.—Warumi 1:11, 12; Yakobo 5:14.

Litumie Neno la Mungu Kama Kioo

Mtu alapo chakula kigumu, kusudi si ili kufurahia ladha tu. Badala ya hivyo, yeye atazamia kupata lishe itakayomwezesha kufanya kazi. Ikiwa yeye ni mtoto, yeye atazamia kwamba chakula hicho kitamsaidia akue na kuwa mtu mzima. Ndivyo ilivyo na chakula cha kiroho. Funzo la Biblia la kibinafsi laweza kufurahisha, lakini hilo si sababu pekee ya kuwa nalo. Chakula cha kiroho chapaswa kitubadili. Chatusaidia tutambulishe na kutokeza matunda ya roho na chatusaidia tuvae “utu mpya unaofanywa upya upate ufahamu sawasawa na mfano wake yeye aliyeuumba.” (Wakolosai 3:10; Wagalatia 5:22-24) Chakula cha kiroho pia hutusaidia tukue kufikia ukomavu, kikitufanya tuweze kutumia kanuni za Kimaandiko vizuri zaidi katika kushughulikia matatizo yetu na katika kusaidia wengine washughulikie yao.

Twaweza kujuaje kama Biblia inatuathiri hivyo? Twaitumia Biblia kama kioo. Yakobo alisema hivi: “Iweni watendaji wa neno, wala si wasikiaji tu . . . Mtu akiwa ni msikiaji wa neno tu, wala si mtendaji, mtu huyo ni kama mtu anayejiangalia uso wake katika kioo. Maana hujiangalia, kisha huenda zake, mara akasahau jinsi alivyo. Lakini aliyeitazama sheria kamilifu iliyo ya uhuru, na kukaa humo, asiwe msikiaji msahaulifu, bali mtendaji wa kazi, huyo atakuwa heri katika kutenda kwake.”—Yakobo 1:22-25.

Sisi ‘twatazama’ katika Neno la Mungu tunapolichunguza kwa uangalifu na kulinganisha vile tulivyo na vile tupaswavyo kuwa kulingana na viwango vya Mungu. Tukifanya hivyo, tutakuwa “watendaji wa neno, wala si wasikiaji tu.” Biblia itakuwa ikituathiri vema.

Neno la Mungu Kama Upanga

Hatimaye, mtume Paulo atusaidia tuone jinsi tuwezavyo kulitumia Neno la Mungu kama upanga. Atuonyapo dhidi ya “falme na mamlaka, juu ya wakuu wa giza hili, juu ya majeshi ya pepo wabaya katika ulimwengu wa roho,” yeye atusihi ‘tupokee upanga wa roho ambao ni neno la Mungu.’ (Waefeso 6:12, 17) Neno la Mungu ni silaha ya lazima tuwezayo kutumia ili kuondosha mawazo yoyote ‘yajiinuayo juu ya elimu ya Mungu.’—2 Wakorintho 10:3-5.

Pasipo shaka, “Neno la Mungu li hai, tena lina nguvu.” (Waebrania 4:12) Yehova husema na wanadamu kupitia kurasa za Neno lake lililopuliziwa. Litumie vizuri katika kufundisha wengine na katika kufunua mafundisho bandia. Litumie wewe mwenyewe ili kutia moyo, kujenga, kuburudisha, kufariji, kuchochea, na kuwaimarisha wengine kiroho. Na Yehova ‘akufanye wewe kuwa mkamilifu katika kila tendo jema, upate kuyafanya mapenzi yake,’ ili sikuzote ufanye jambo “lipendezalo mbele zake.”—Waebrania 13:21.

[Maelezo ya Chini]

[Picha katika ukurasa wa 31]

Wazee hutia wengine moyo, ‘wakilitumia neno la kweli sawasawa’