Maisha na Huduma ya Yesu

Kuwajibu Washtaki Wake

NI siku ya Sabato. Yesu anaponya mtu ambaye amekuwa mgonjwa kwa miaka 38. Lakini, viongozi wa kidini Wayahudi wanamshtaki juu ya kuvunja Sabato. Yesu anajibu: “Baba yangu anatenda kazi hata sasa, nami ninatenda kazi.”

Ijapokuwa Mafarisayo wanadai hivyo, kazi ya Yesu si ya namna ile iliyokatazwa na sheria ya Sabato. Kazi yake ya kuhubiri na kuponya ni mgawo kutoka kwa Mungu, na kwa kufuata mfano wa Mungu, yeye anaendelea kuifanya kila siku. Lakini, jibu lake linawafanya Wayahudi wakasirike hata zaidi ya walivyokuwa hapo kwanza, na wanatafuta kumwua. Kwa sababu gani?

Ni kwa sababu sasa si kwamba wanaamini tu kwamba Yesu anaivunja Sabato, bali wanalifikiria dai lake la kuwa Mwana wa Mungu binafsi kuwa ni kufuru pia. Lakini, Yesu haogopi na anawatolea jibu zaidi kuhusu uhusiano wake uliopendelewa na Mungu. “Baba ampenda Mwana,” anasema “naye humwonyesha yote ayatendayo mwenyewe.”

“Kama Baba awafufuavyo wafu na kuwahuisha,” Yesu anaendelea, “vivyo hivyo na Mwana awahuisha wale awatakao.” Kwa kweli, tayari Mwana anafufua wafu kwa njia ya kiroho! “Yeye alisikiaye neno langu na kumwamini yeye aliyenipeleka,” Yesu anasema, “amepita kutoka mautini kuingia uzimani.” Ndiyo, yeye anaendelea hivi: “Saa inakuja, na sasa ipo, wafu watakapoisikia sauti ya Mwana wa Mungu, na wale waisikiao watakuwa hai.”

Ingawa kufikia wakati huu, hakuna kumbukumbu la kuonyesha kwamba Yesu amekwisha kufufua mtu ye yote kwa uhalisi kutoka kwa wafu, anawambia washtaki wake kwamba ufufuo wa wafu kwa njia hiyo halisi utatukia pia. “Msistaajabie maneno hayo,” anasema, “kwa maana saa yaja, ambayo watu wote waliomo makaburini wataisikia sauti yake. Nao watatoka.”

Mpaka sasa, inaonekana kwamba Yesu hajapata kueleza hadharani daraka lake la maana sana katika kutimiza kusudi la Mungu kwa njia ya wazi na ya uthabiti mwingi hivyo. Hata hivyo, si ushahidi wake mwenyewe tu ambao washtaki wa Yesu wanao kuhusu mambo hayo. “Ninyi mlituma watu kwa Yohana,” Yesu anawakumbusha, “naye akaishuhudia kweli.”

Miaka miwili tu kabla ya hapo, Yohana Mbatizaji aliwaambia viongozi hao wa kidini Wayahudi juu ya Yule mwenye kuja baada yake. Akiwakumbusha jinsi wakati mmoja walivyomheshimu sana Yohana ambaye sasa amefungwa gerezani, Yesu anasema: “Nanyi mlipenda kuishangilia nuru yake kwa muda.” Yesu anawakumbusha jambo hilo akiwa na matumaini ya kuwasaidia, ndiyo, kuwaokoa. Hata hivyo yeye hategemei ushuhuda wa Yohana.

“Kazi hizo zenyewe ninazozitenda [kutia na mwujiza ambao ameufanya sasa hivi], zanishuhudia ya kwamba Baba amenituma.” Lakini zaidi ya hilo, Yesu anaendelea kusema: “Naye Baba aliyenipeleka amenishuhudia.” Mungu alitoa ushuhuda juu ya Yesu, kwa mfano, wakati wa ubatizo wake, akisema: “Huyu ni Mwanangu, mpendwa wangu.”

Kwa kweli washtaki wa Yesu hawana udhuru wa kumkataa. Maandiko yale yale wanayodai kwamba wanayachunguza yanashuhudia juu yake! “Kama mngalimwamini Musa, mngeniamini mimi,” Yesu anamalizia, “kwa sababu yeye aliandika habari zangu. Lakini msipoyaamini maandiko yake, mtayaamini wapi maneno yangu?” Yohana 5:17-47; 1:19-27; Mathayo 3:17.

◆ Kwa sababu gani kazi ya Yesu haivunji Sabato?

◆ Yesu anaelezaje daraka lake la maana sana katika kusudi la Mungu?

◆ Kuthibitisha yeye ni Mwana wa Mungu, Yesu anaonyesha ushuhuda wa nani?