Jinsi Kugeuka Umbo kwa Kristo Kwakuathiri Wewe
WANAUME wanne walikuwa wamepanda sasa hivi mlima mrefu. Katika marefu hayo, jambo la kustaajabisha lilitukia. Huku wanafunzi watatu wa Yesu Kristo wenye kumaka sana wakitazama, yeye alibadilika mbele ya macho yao. Sikiliza wakati Marko mwandikaji Gospeli aripotipo tukio hili la kusisimua:
“YESU akawatwaa Petro, na Yakobo, na Yohana, akawaleta juu ya mlima mrefu faraghani, peke yao; akageuka sura [umbo, NW] yake mbele yao; mavazi yake yakimeta-meta, meupe mno, jinsi asivyoweza dobi duniani kuyafanya meupe. Wakatokewa na Eliya pamoja na Musa, nao walikuwa wakizungumza na Yesu. Petro akajibu, akamwambia Yesu, Rabi, ni vizuri sisi kuwapo hapa; na tufanye vibanda vitatu, kimoja chako wewe, kimoja cha Musa, na kimoja cha Eliya. Maana, hakujua la kunena, kwa kuwa waliingiwa na hofu nyingi. Kisha likatokea wingu, likawatia uvuli; sauti ikatoka katika lile wingu, Huyu ni Mwanangu, mpendwa wangu, msikieni yeye. Mara hiyo walipotazama huku na huku, hawakuona mtu pamoja nao ila Yesu peke yake.”—Marko 9:2-8.
Ebu fikiri! Uso wa Yesu ulikuwa uking’aa kama jua lenyewe. (Mathayo 17:2) Mavazi yake yalikuwa yakimetameta, “meupe mno, jinsi asivyoweza dobi duniani kuyafanya meupe.” Ulikuwako mvumo wa sauti ya Mungu mwenyewe yenye nguvu ikifanya tangazo rasmi juu ya Mwana wake. Lo, tukio la ajabu kama nini!
Neno la Kigiriki lililofasiriwa hapa kuwa ‘kugeuka umbo’ lamaanisha “kubadilika kuingia katika umbo jingine.” Laonekana pia kwenye Warumi 12:2, NW, ambapo Wakristo hushauriwa ‘wageuzwe umbo’ kwa kubadili akili zao.—An Expository Dictionary of New Testament Words, na W. E. Vine, Buku 4, ukurasa 148.
Ndiyo, tukio la kutazamisha lilitukia Yesu alipogeuzwa umbo muda fulani baada ya mwadhimisho wa Kupitwa wa 32 W.K. Ni nini kilichoongoza kwenye mwujiza huo? Je! una kusudi maalumu? Kwa nini Musa na Eliya walihusika? Na kugeuka umbo kwa Kristo kwakuathirije wewe?
Matukio Yaliyotangulia
Kabla ya kuupanda mlima, Yesu na wanafunzi wake walikuwa katika ujirani wa Kaisaria Filipi. Kwa kuwa jiji hilo lilikuwa karibu kilometa 25 kusini-magharibi mwa Mlima Hermoni, huenda ikawa kugeuka umbo kulitukia juu ya kimoja cha vigongo vyao virefu.
Walipokuwa wakitembea kwenda kwenye “mlima mrefu” huo, Yesu aliwauliza wanafunzi wake hivi: “Watu huninena mimi kuwa ni nani?” Wakajibu: “Yohana Mbatizaji; wengine, Eliya; wengine, Mmojawapo wa manabii.” Ndipo Kristo akauliza: “Na ninyi mnasema ya kuwa mimi ni nani?” Petro akajibu: “Wewe ndiwe Kristo.” Hapo, Yesu “akawaonya wasimwambie mtu habari zake. Akaanza kuwafundisha kwamba imempasa Mwana wa Adamu kupatikana na mateso mengi, na kukataliwa na wazee, na wakuu wa makuhani, na waandishi, na kuuawa, na baada ya siku tatu kufufuka.”—Marko 8:27-31.
Yesu akaendelea kutoa ahadi hii: “Pana watu katika hawa wasimamao hapa, ambao hawataonja mauti kabisa, hata watakapouo-na ufalme wa Mungu umekuja kwa nguvu.” (Marko 9:1; Mathayo 16:28) Ahadi hii ilitimizwa “baada ya siku sita,” Yesu alipokuwa akisali na kugeuzwa umbo mbele ya Petro, Yakobo, na Yohana. Luka asema hilo lilitukia “siku nane” baada ya hapo, yaonekana kwa sababu alitia ndani ile siku ya kutolewa kwa ahadi na ile ya kutimizwa kwayo.—Mathayo 17:1, 2; Marko 9:2; Luka 9:28.
Si Ndoto Wala Kukosa Uhalisi
Kugeuka umbo kwa Yesu hakukuwa ndoto. Mitume hao watatu wasingalipata ndoto ile ile moja, na Yesu aliiita “njozi.” Hiyo haidokezi jambo lisilo halisi, kwa maana neno la Kigiriki lililotumiwa kwenye Mathayo 17:9, NW, lafasiriwa mahali pengine kuwa “maono.” (Matendo 7:31) Hivyo basi wenye kuangalia walikuwa macho kabisa, nao kwa kweli waliona na kusikia kwa macho na masikio yao jambo lililokuwa likitukia.—Luka 9:32.
Akiwa macho kabisa lakini asijue la kusema, Petro alidokeza kwamba mahema matatu yasimamishwe—moja moja kwa ajili ya Yesu, Musa, na Eliya. (Luka 9:33) Wingu lililofanyika Petro alipokuwa akiongea kwa wazi lilionyesha kuwapo kwa Mungu juu ya mlima, kama vile kwenye hema la kukutania la Israeli katika jangwa. (Kutoka 40:34-38; Luka 9:34) Na hakika mitume wasingekuwa wamelala wakati “Mungu Baba” alipotangaza rasmi hivi: “Huyu ni Mwanangu, mteule wangu, msikieni yeye.”—2 Petro 1:17, 18; Luka 9:35.
Kwa Nini Musa Alionwa
Kugeuka umbo kulipotukia, Musa alikuwa ‘hajui neno lo lote,’ kwa maana alikuwa amekufa karne kadhaa mapema. (Mhubiri 9:5, 10) Kama Daudi, alikuwa hajafufuliwa na kwa hiyo yeye hakuwapo kibinafsi. (Matendo 2:29-31) Lakini kwa nini Musa alionwa pamoja na Kristo katika njozi hiyo?
Mungu alikuwa amemwambia Musa hivi: “Nitawaondokeshea nabii miongoni mwa ndugu zao mfano wako wewe, nami nitatia maneno yangu kinywani mwake, naye atawaambia yote nitakayomwamuru.” (Kumbukumbu 18:18) Petro alitumia unabii huo kwa Yesu Kristo hasa. (Matendo 3:20-23) Mbali ya Yesu, Musa ndiye aliyekuwa nabii mkubwa zaidi wa Mungu aliyetumwa kwa taifa la Israeli.
Kuna ufanano mbalimbali kati ya Musa na Musa Mkubwa Zaidi, Yesu Kristo. Mathalani, walipokuwa vitoto vichanga, uhai wa wote wawili ulihatarishwa na watawala waonevu, lakini Mungu akahakikisha kwamba watoto wachanga hao waliponyoshwa. (Kutoka 1:20–2:10; Mathayo 2:7-23) Wanaume wote hao wawili walitumia siku 40 wakifunga mwanzoni mwa kazi-maisha zao wakiwa watumishi maalumu wa Yehova. (Kutoka 24:18; 34:28; Kumbukumbu 9:18, 25; Mathayo 4:1, 2) Na Musa na Yesu walifanya miujiza wote wawili kwa nguvu ya Mungu.—Kutoka 14:21-31; 16:11-36; Zaburi 78:12-54; Marko 4:41; Luka 7:18-23; Yohana 14:11.
Mungu alimtumia Musa kukomboa Israeli kutoka utumwa wa Kimisri, hata kama vile Yesu huleta ukombozi wa kiroho. (Kutoka 12:37–14:31; Yohana 8:31, 32) Musa alipata pendeleo kupatanisha agano la Sheria kati ya Mungu na Waisraeli, hali Yesu ndiye Mpatanishi wa agano jipya. (Kutoka 19:3-9; 34:3-7; Yeremia 31:31-34; Luka 22:20; Waebrania 8:3-6; 9:15) Pia Yehova alimtumia Musa kujifanyia Yeye mwenyewe jina mbele ya Waisraeli, Wamisri, na wengine, kama vile Yesu Kristo ametukuza jina takatifu la Yehova. (Kutoka 9:13-17; 1 Samweli 6:6; Yohana 12:28-30; 17:5, 6, 25, 26) Kwa kufanya Musa aonekane pamoja na Yesu aliyegeuzwa umbo, Mungu alionyesha kwamba Kristo angetumikia katika vyeo hivyo kwa kadiri ambayo yazidi hiyo kwa mbali.
Sababu Eliya Alionekana
Ingawa yule nabii mfu Eliya hakuwa amefufuliwa, ilifaa aonekane katika njozi ya kugeuka umbo. Eliya alifanya kazi kubwa katika kurudisha ibada safi na kutakasa jina la Yehova miongoni mwa Waisraeli. Yesu Kristo alifanya hivyo hivyo akiwa duniani na hata mengi zaidi kurudisha dini safi na kutetea Baba yake wa kimbingu kwa njia ya Ufalme wa Kimesiya.
Nabii Malaki alionyesha kwamba kazi ya Eliya ilitangulia kuwa kivuli cha utendaji wa wakati ujao. Kupitia Malaki, Mungu alisema hivi: “Angalieni, nitawapelekea Eliya nabii, kabla haijaja siku ile ya BWANA [Yehova, NW], iliyo kuu na kuogofya. Naye ataigeuza mioyo ya baba iwaelekee watoto wao, na mioyo ya watoto iwaelekee baba zao, ili nisije nikaipiga dunia kwa laana.”—Malaki 4:5, 6.
Unabii huo ulipata utimizo wao mdogo katika kazi ya Yohana Mbatizaji. Yesu alionyesha hilo wazi baada ya kule kugeuka umbo, wakati wanafunzi wake walipouliza ni kwa nini waandishi walisema kwamba Eliya ni lazima aje kwanza—kabla ya kutokea kwa Mesiya. Yesu alisema hivi: “Kweli Eliya yuaja kwanza, naye atatengeneza yote; ila nawaambia, ya kwamba Eliya amekwisha kuja, wasimtambue, lakini wakamtenda yote waliyotaka. Vivyo hivyo Mwana wa Adamu naye yuaenda kuteswa kwao.” Usimulizi waongezea hivi: “Ndipo wale wanafunzi walipofahamu ya kuwa amesema nao habari za Yohana Mbatizaji.”—Mathayo 17:10-13.
Yohana alifanya kazi kama ya Eliya alipobatiza Wayahudi waliotubu juu ya dhambi zao dhidi ya agano la Sheria. La maana zaidi, Yohana alikuwa mtangulizi wa Mesiya naye alijulisha Yesu Kristo. (Mathayo 11:11-15; Luka 1:11-17; Yohana 1:29) Lakini kwa nini kazi ya Yohana ilikuwa utimizo mdogo tu wa unabii wa Malaki?
Katika njozi hii, Eliya alionwa akinena na Yesu. Hiyo ilikuwa baada ya kifo cha Yohana Mbatizaji, hivyo ikidokeza kwamba kazi fulani ya Eliya ingefanywa wakati ujao. Zaidi ya hilo, ule unabii ulionyesha kwamba kazi hiyo ingefanywa kabla “haijaja siku ile ya BWANA [Yehova, NW], iliyo kuu na kuogofya” kwenye Har–Magedoni, au Armagedoni. (Ufunuo 16:14-16) Hiyo ilimaanisha kwamba usimamisho wa Ufalme wa kimbingu wa Mungu ambao wakati huo ulikuwa bado wa wakati ujao ungetanguliwa na kazi yenye kulingana na utendaji wa Eliya na mwandamizi wake, Elisha. Na kwa zaidi ya karne moja, Mashahidi wa ki-siku-hizi wa Yehova wamekuwa wakiendesha kazi inayohusisha kurudisha ibada safi na kukweza jina la Mungu.—Zaburi 145:9-13; Mathayo 24:14.
Kusudi la Kugeuka Huko
Ni lazima kugeuka umbo kuwe kuliimarisha Yesu kwa ajili ya mateso na kifo kilichokuwa karibu kumpata. Kumsikia Baba yake wa kimbingu akisema juu yake kuwa ndiye Mwana Wake mkubaliwa ni lazima kuwe kuliimarisha imani ya Yesu. Lakini kugeuka umbo kulifanyia wengine nini?
Kugeuka umbo kwa Yesu kuliimarisha pia imani ya wenye kutazama. Kulikaza katika akili zao kwamba Yesu Kristo ndiye Mwana wa Mungu. Kwa kweli, kwa kuwa Msemaji Mkuu wa Yehova, yule Neno, alikuwa katikati yao wakati huo, wao walisikia sauti ya Mungu mwenyewe ikitangaza rasmi hivi: “Huyu ni Mwanangu, mpendwa wangu, ninayependezwa naye.” Ingawa Yehova alikuwa ametoa ushuhuda kama huo wakati Yesu alipobatizwa, wakati wa kugeuka umbo Mungu aliongezea kwamba wanafunzi wapaswa kusikiliza Mwana Wake.—Mathayo 3:13-17; 17:5; Yohana 1:1-3, 14.
Kugeuka umbo kulikuwa jambo lenye kuimarisha imani kwa njia nyingine. Wakati wa njozi hiyo, Yesu, “Musa,” na “Eliya” walinena juu ya “kifo chake [mwondoko wake, NW] ambacho kingekamilishwa huko Yerusalemu.” (Luka 9:31, HNWW) “Mwondoko” limetafsiriwa kutokana na namna ya neno la Kigiriki eʹxo·dos. Huku kutoka, au mwondoko, kwa wazi kulihusisha mambo yote mawili, kufa kwa Yesu na kufufuliwa kwake na Mungu, kwenye uhai wa roho. (1 Petro 3:18) Hivyo basi kugeuka umbo kuliimarisha imani katika ufufuo wa Kristo. Hasa kulijenga imani kwa kuandaa ithibati yenye kusadikisha kwamba Yesu angekuwa Mfalme wa Ufalme wa Kimesiya wa Mungu. Zaidi ya hilo, njozi hiyo ilionyesha kwamba Ufalme huo ungekuwa mtukufu.
Kugeuka umbo pia kuliimarisha imani katika unabii wa Kimaandiko. Yapata miaka 32 baadaye (karibu 64 W.K.), bado Petro alikumbuka ono hilo akaandika hivi: “Maana hatukufuata hadithi zilizotungwa kwa werevu, tulipowajulisha ninyi nguvu zake Bwana wetu Yesu Kristo na kuja kwake; bali tulikuwa tumeuona wenyewe ukuu wake. Maana alipata kwa Mungu Baba heshima na utukufu, hapo alipoletewa sauti iliyotoka katika utukufu mkuu, Huyu ni Mwanangu, mpendwa wangu, ninayependezwa naye. Na sauti hiyo sisi tuliisikia ikitoka mbinguni tulipokuwa pamoja naye katika mlima ule mtakatifu. Nasi tuna lile neno la unabii lililo imara zaidi, ambalo, mkiliangalia, kama taa ing’aayo mahali penye giza, mwafanya vyema, mpaka kutakapopambazuka, na nyota ya asubuhi kuzuka mioyoni mwenu.”—2 Petro 1:16-19.
Ambacho Kugeuka Huko Kwamaanisha Kwako
Ndiyo, Petro aliona kugeuka umbo kwa Yesu kuwa uthibitisho wenye nguvu wa neno la kiunabii la Mungu. Mtume Yohana huenda pia akawa aligusia habari za njozi hiyo aliposema hivi: “Naye Neno alifanyika mwili, akakaa kwetu; nasi tukauona utukufu wake, utukufu kama wa Mwana pekee atokaye kwa Baba; amejaa neema na kweli.” (Yohana 1:14) Vivyo hivyo, kugeuka umbo kwaweza kujenga imani yako katika neno la kiunabii la Yehova.
Kugeuka umbo na matukio yenye kushirikiana nako yaweza kuimarisha imani yako kwamba Yesu Kristo ni Mwana wa Mungu na ndiye Mesiya aliyeahidiwa. Kwaweza kuimarisha sana imani yako kwamba Yesu alifufuliwa kwenye uhai wa roho mbinguni. Njozi hiyo ya kustaajabisha yapasa pia kuongezea imani yako katika serikali ya Mungu, kwa maana kugeuka umbo kulikuwa mwono wa mapema wa utukufu na nguvu ya Ufalme wa Kristo.
Inaimarisha imani hasa kujua kwamba kugeuka umbo kwa Kristo kulielekeza kwenye siku yetu, ambapo kuwapo kwa Yesu ni halisi. (Mathayo 24:3-14, NW) Tangu 1914 yeye amekuwa akitawala akiwa Mfalme mwekwa rasmi wa Mungu katika mbingu. Mamlaka na nguvu yake alivyopewa na Mungu vitatumiwa karibuni dhidi ya adui wote wa utawala wa kimungu, hiyo ikiufungulia njia ulimwengu mpya. (2 Petro 3:13) Wewe waweza kuonea shangwe baraka zao zisizo na mwisho ikiwa utazoea imani katika mambo mazuri ajabu yaliyoonyeshwa katika kugeuka umbo kwa Yesu Kristo.