Maisha na Huduma ya Yesu

Kisafari cha Siri cha Kwenda Yerusalemu

NI KATIKA vuli ya 32 W.K., na Sikukuu ya Mahema (Vibanda) iko karibu. Yesu amezuilia utendaji wake uwe sana-sana wa Galilaya, tangu sikukuu ya Kupitwa ya 31 W.K., wakati Wayahudi walipojaribu kumuua. Inaelekea kwamba wakati mmoja tu ambao Yesu amezuru Yerusalemu tangu hapo umekuwa kwa kusudi la kuhudhuria zile sikukuu tatu za kila mwaka za Wayahudi.

Sasa ndugu za Yesu wanahimiza hivi: “Pita usonge mbele kutoka hapa na uende kuingia Yudea.” Yerusalemu ndio mji mkuu wa Yudea na ndicho kitovu cha kidini cha nchi nzima. Ndugu zake wanawaza hivi: “Hakuna mtu ambaye hufanya jambo lo lote katika siri na huku yeye mwenyewe anatafuta kujulikana peupe.”

Ingawa Yakobo, Simoni, Yusufu, na Yuda hawaitikadi kwamba ndugu yao mkubwa, Yesu, ndiye Mesiya kweli kweli, wao wanataka yeye aonyeshe nguvu zake za kimuujiza kwa wote wale waliokusanyika kwenye sikukuu ile. Hata hivyo, Yesu anajua hatari ya kufanya hivyo. “Ulimwengu hauna sababu ya kuchukia ninyi,” yeye anasema, “lakini huo huchukia mimi, kwa sababu mimi natoa ushuhuda kuhusu huo kwamba kazi zao ni za uovu.” Kwa hiyo Yesu anaambia ndugu zake: “Ninyi pandeni mwende kwenye sikukuu; mimi bado sipandi kwenda kwenye sikukuu hii.”

Sikukuu ya Mahema ni mwadhimisho wa siku saba, ambao unamaliziwa kwa utendaji mbalimbali wenye kufanywa kwa fikira nzito siku ya nane. Sikukuu hiyo ni alama ya mwisho wa mwaka wa ukulima na ni wakati wa kufanya shangwe kubwa na utoaji-shukrani. Siku kadhaa baada ya ndugu za Yesu kuondoka wakahudhurie pamoja na ule msafara mkuu, yeye na wanafunzi wake wanaenda kwa siri, wakikaa mbali ili watu wasiwaone. Wao wanafuata ile njia ya kupitia Samaria, badala ya ile ambayo watu walio wengi wanafuata karibu na Mto Yordani.

Kwa kuwa Yesu na andamano lake watahitaji mahali pa kulala katika kijiji cha Kisamaria, yeye anapeleka wajumbe mbele yake wakafanye matayarisho. Hata hivyo, watu wa huko wanakataa kufanyia Yesu jambo lo lote baada ya kujua kwamba yeye anaelekea Yerusalemu. Kwa kughadhibika, Yakobo na Yohana wanauliza: “Bwana, je! wewe unataka tuambie moto uje chini kutoka mbinguni na kuwaangamiza? ” Yesu anawakemea kwa kudokeza jambo kama hilo, nao wanasafiri kwenda kijiji kingine.

Wanapokuwa wakitembea njiani, mwandishi mmoja anaambia Yesu: “Mwalimu, mimi nitakufuata wewe mahali ko kote ambako wewe uko karibu kwenda.”

“Mbweha wana mapango na ndege wa mbinguni wana viota,” Yesu anajibu, “lakini Mwana wa binadamu hana mahali po pote pa kulaza kichwa chake.” Yesu anaonyesha kwamba mwandishi huyo atapatwa na ugumu ikiwa atakuwa mfuasi Wake. Na maana inayogusiwa inaonekana kwamba mwandishi huyo ni mwenye kiburi mno asiweze kukubali maisha ya namna ile.

Kwa mwanamume mwingine, Yesu anasema: “Uwe mfuasi wangu.”

“Niruhusu mimi kwanza niondoke na kuzika baba yangu,” mwanamume huyo anajibu.

“Acha wafu wazike wafu wao,” Yesu anajibu, “lakini wewe nenda zako na kutangaza kote kote ufalme wa Mungu.” Ni dhahiri kwamba baba ya mwanamume huyo hajafa bado, kwa maana kama angalikuwa amekufa haingalielekea kwamba mwanaye angekuwa hapo akimsikiliza Yesu. Inaonekana mwana huyo anaomba wakati wa kungojea kifo cha baba yake. Yeye hayuko tayari kuweka Ufalme wa Mungu kwanza katika maisha yake.

Wanaposonga mbele njiani kuelekea Yerusalemu, mwanamume mwingine anaambia Yesu: “Mimi nitakufuata wewe, Bwana; lakini kwanza niruhusu mimi kusema baki-salama kwa wale walio katika nyumba yangu.”

Katika kujibu Yesu anasema: “Hakuna mtu ambaye ametia mkono wake kwenye plau na kutazama vitu vilivyo nyuma anafaa vizuri kwa Ufalme wa Mungu.” Wale ambao watakuwa wanafunzi wa Yesu lazima wakaze macho yao juu ya utumishi wa Ufalme. Sawa na vile mfuo wa kulimwa utakavyoelekea kupotoka-potoka ikiwa mshika-plau haendelei kutazama mbele kabisa, ndivyo mtu ye yote anayetazama nyuma kwenye huu mfumo wa kale wa mambo anavyoweza kujikwaa atoke katika ile njia inayoongoza kwenye uhai. Yohana 7:​2-10; Luka 9:​51-62; Mathayo 8:​19-22, NW.

♦ Ni nani ndugu za Yesu, nao wanahisi jinsi gani juu yake?

♦ Kwa nini Wasamaria ni washenzi, na Yakobo na Yohana wanataka kufanya nini?

♦ Ni maongezi gani matatu ambayo Yesu anakuwa nayo njiani, na ni jinsi gani yeye anakazia uhitaji wa utumishi wa kujidhabihu?