Maisha na Huduma ya Yesu

Kwenye Sikukuu ya Mahema

YESU amekuwa mwenye kujulikana sana wakati wa ile miaka karibu mitatu tangu ubatizo wake. Maelfu wengi wameona miujiza yake, na ripoti juu ya utendaji wake mbalimbali zimeenea katika sehemu zote za nchi. Sasa, wakati watu wanapokusanyika kwa ajili ya ile Sikukuu ya Mahema (Vibanda) katika Yerusalemu, wao wanamtafuta huko. “Yuko wapi yule mwanamume?” wao wanataka kujua.

Yesu amekuwa kibishanio. “Yeye ni mwanamume mwema,” watu fulani wanasema. “Yeye si mwema, bali yeye anaongoza vibaya lile kundi la watu,” wengine wanakazania. Maongezi mengi ya namna hiyo yanafanywa kwa sauti za chini-chini wakati wa zile siku za kufungua sikukuu hiyo. Na bado hakuna mtu mwenye ushujaa wa kunena peupe kwa kumtetea Yesu. Hiyo ni kwa sababu watu wanaogopa kisasi cha viongozi wa Kiyahudi.

Wakati nusu ya sikukuu inapokuwa imemalizika, Yesu anafika. Yeye anapanda kwenda hekaluni, ambako watu wanastaajabia uwezo wake wa kufundisha ulio mzuri sana. Kwa kuwa Yesu hakuhudhuria kamwe zile shule za kirabi, Wayahudi wanaanza kushangaa: “Ni jinsi gani mwanamume huyu ana maarifa ya kuzijua herufi, hali yeye hajajifunza kwenye zile shule?”

“Mambo ambayo mimi nafundisha si yangu,” Yesu anaeleza, “bali ni ya huyo aliyenituma mimi. Ikiwa mtu ye yote anatamani kufanya mapenzi Yake, yeye atajua kuhusu fundisho hilo kama ni kutoka kwa Mungu au mimi nanena ya asili yangu mwenyewe.” Fundisho la Yesu linashikilia sheria ya Mungu kwa ukaribu. Hivyo, inapasa kuwa wazi kwamba yeye anatafuta utukufu wa Mungu, si wake mwenyewe. “Musa aliwapa ninyi ile Sheria, sivyo?” Yesu anauliza. Na kwa njia ya kukemea, yeye akaendelea kusema: “Hakuna hata mmoja wa ninyi hutii ile Sheria.”

“Kwa sababu gani ninyi mnatafuta kuniua mimi?” ndipo Yesu anauliza.

Lile kundi la watu, ambalo labda ni watu waliozuru kwenye sikukuu hiyo, halina habari kwamba kuna jitihada za kufanya hivyo. Wao wanaona ni jambo lisilowazika kwamba mtu ye yote angetaka kuua mwalimu mwenye kufundisha vizuri hivyo. Kwa hiyo wao wanaitikadi kwamba bila shaka Yesu ana kasoro kwa kufikiria hivyo. “Wewe una roho mbaya,” wanasema. “Ni nani anatafuta kuua wewe?”

Viongozi wa Kiyahudi wanataka Yesu auawe, hata ingawa huenda lile kundi la watu likawa haling’amui jambo hilo. Wakati Yesu alipoponya mwanamume mmoja siku ya Sabato mwaka mmoja na nusu kabla ya hapo, viongozi hao walijaribu kumuua yeye. Kwa hiyo sasa Yesu anaonyesha ukosefu wao wa kuona sababu za jambo hilo kwa kuwauliza: “Ikiwa mwanamume hupokea tohara siku ya sabato ili sheria ya Musa ipate kutovunjwa, je! ninyi mnanikasirikia mimi kijeuri kwa sababu mimi nilifanya mwanamume awe mzima kabisa katika afya siku ya sabato? Acheni kuhukumu kutokana na sura ya nje, bali hukumuni kwa hukumu ya uadilifu.”

Wakaaji wa Yerusalemu, ambao wanajua hali ile, sasa wanasema hivi: “Huyu ndiye yule mwanamume ambaye wao wanatafuta kuua, sivyo? Na bado, ona! yeye ananena peupe, na wao hawamwambii yeye kitu. Watawala hawajapata kujua kwa uhakika kwamba huyu ndiye Kristo, sivyo?” Wakaaji hawa wa Yerusalemu wanaeleza ni kwa sababu gani wao hawaitikadi kwamba Yesu ndiye Kristo: “Sisi tunajua ambako mwanamume huyo ametoka; lakini wakati Kristo ajapo, hakuna mtu atapaswa kujua ambako yeye ametoka.”

Yesu anajibu: “Ninyi mnanijua mimi na hata mnajua ambako mimi natoka. Vilevile, mimi nimekuwa sikuja kwa kujichukulia mwenyewe hatua ya kwanza, bali yeye ambaye alinituma mimi ni halisi, na ninyi hammjui huyo. Mimi namjua huyo, kwa sababu mimi ni mwakilishi wa kutoka kwake, na Mmoja huyo ndiye aliyenituma mimi.” Kusikia hivyo, wao wanajaribu kumkamata, labda ili wamtie gerezani au wakafanye auawe. Hata hivyo wao hawafanikiwi kwa sababu sio wakati wa Yesu kufa.

Na bado, wengi wanatia imani katika Yesu, kama vile wanavyopaswa kufanya kweli kweli. Kwani, yeye ametembea juu ya maji, amezituliza pepo, amenyamazisha bahari zenye dhoruba, kwa muujiza akalisha maelfu mikate na samaki wachache, akaponya wagonjwa, akafanya viwete watembee, akafungua macho ya vipofu, akaponya wenye ukoma, na hata akawainua wafu. Kwa hiyo wao wanauliza: “Wakati Kristo awasilipo, yeye hatafanya ishara nyingi zaidi ya zile ambazo mwanamume huyu amefanya, sivyo?”

Wakati Mafarisayo wanaposikia lile kundi la watu likinung’unika juu ya mambo hayo, wao na wakuu wa makuhani wanatuma maafisa wakakamate Yesu. Yohana 7:11-32, NW.

◆ Ni wakati gani Yesu anapofika kwenye ile sikukuu, na m maongezi gani yaliyoko juu yake?

◆ Kwa sababu gani huenda ikawa kwamba watu fulani wanasema Yesu ana roho mbaya?

◆ Ni maoni gani ambayo wakaaji wa Yerusalemu wanayo juu ya Yesu?

◆ Kwa sababu gani watu wengi wanatia imani katika Yesu?