Maswali Kutoka kwa Wasomaji

■ Yesu alimaanisha nini kwa kusema kwamba “maji” aliyoyatoa yangekuwa “chemchemi ya maji, yakibubujikia uzima wa milele”?

Yesu aliambia mwanamke Msamaria hivi: “Kila anywaye maji haya [kwenye kisima cha Yakobo] ataona kiu tena; walakini ye yote atakayekunywa maji yale nitakayompa mimi hataona kiu milele; bali yale maji nitakayompa yatakuwa ndani yake chemchemi ya maji, yakibubujikia uzima wa milele.”—Yohana 4:13, 14.

Hapa Yesu alielekeza fikira hasa juu ya faida za kiroho anazopata mtu ambaye ameyapokea maneno Yake na akawa mwanafunzi wa Kristo. Mtu kama huyo ambaye ameendelea kutwaa maarifa sahihi ya kujua Yehova Mungu na Yesu Kristo kisha akatenda kulingana na maarifa hayo kwa imani angekuwa katika hali ya kuweza kupata uzima wa milele. (Yohana 17:3) Yesu alifananisha hatua hizo zinazotukia katika akili na moyo wa mtu kama chemchemi inayobubujika faida, ikiendelea kuitia nguvu imani yake na kuongoza hatua zake katika njia ya uzima wa milele.

Ingawa mkazo ulio katika Yohana 4:14 umetiwa kuhusiana na faida ambazo mtu mwenyewe anapokea, mwanafunzi Mkristo aliye na wingi wa maji hayo ya kiroho anatamani kwa asili kuwagawia wengine. Anataka wengine wausikie ujumbe wa Kikristo kisha wawe ndani yao wenyewe na chemchemi inayobubujika faida zile zile za kiroho zinazoongoza kwenye uzima wa milele. Kugawia wengine ujumbe huo kunaonekana kuwa ndilo wazo linalomaanishwa katika maneno yaliyosemwa na Yesu katika Yohana 7:37-39: “Mtu akiona kiu, na aje kwangu anywe. Aniaminiye mimi, kama vile maandiko yalivyonena, mito ya maji yaliyo hai itatoka ndani yake.” Na neno hilo alilisema katika habari ya [roho, ambayo] wale wamwaminio [wataipokea] baadaye.”

Kwa kusukumwa na kani yenye kutendesha ya roho ya Mungu, iliyopokewa kuanzia Pentekoste ya 33 W.K. na kuendelea, mitume na wanafunzi wa Yesu walifanya maajabu ya kupelekea wengine maji yenye uhai. Roho ya Mungu inatimiza sehemu ya maana pia katika kutayarisha na kusukuma wanafunzi wa Yesu leo, mabaki wapakwa mafuta na hata “mkutano mkubwa” wa “kondoo wengine,” ili wawape maji yenye uhai wanadamu walio na kiu, wakati wanapozihubiri habari njema za Ufalme wa Mungu ulimwenguni pote. Kwa hiyo ni lazima mwenye kiu amjie yule anayetumiwa na Mungu kuyatoa maji ya ukweli unaoongoza kwenye uzima wa milele.—Mathayo 24:14; 28:19, 20; Yohana 7:37; 10:16; Ufunuo 7:9.