Fuata Nuru ya Ulimwengu
“Yeye anifuataye . . . atakuwa na nuru ya uzima.”—YOHANA 8:12.
1. Nuru ni ya muhimu jinsi gani?
SISI tungeweza kufanya nini bila nuru? Jaribu kuwazia ukiamka kila siku ya mwaka mzima katika giza la muda wa saa 24. Jaribu kuwazia ulimwengu bila rangi, kwani bila nuru hakuna rangi. Kwa kweli ikiwa nuru isingekuwako hata sisi tusingekuwako. Kwa nini? Kwa sababu katika utendaji uitwao fotosinthesisi (usanidimwanga), mimea ya kijani kibichi hutumia nuru ili kutengeneza chakula tunachokula—yaani nafaka, mboga, na matunda. Ni kweli, nyakati nyingine tunakula nyama ya wanyama. Lakini wanyama hao walikula mimea au wanyama wengine waliotegemea mimea kuwa chakula. Hivyo, maisha zetu za kimwili hutegemea nuru kikamili.
2. Ni vyanzo vipi vya nuru vyenye nguvu vilivyoko, na hilo hutuambia nini kuhusu Yehova?
2 Nuru yetu hutoka kwenye jua, ambalo ni nyota. Ingawa jua letu hutoa kiasi kikubwa ajabu cha nuru, hilo ni nyota yenye ukubwa wa kiasi tu. Nyota nyingi ni kubwa zaidi. Na kikundi cha nyota tunamoishi, kiitwacho galaksi ya Njia ya Maziwa, kina nyota zaidi ya bilioni mia moja. Kwa kuongezea, kuna mabilioni mengi ya magalaksi katika ulimwengu wote mzima. Jinsi idadi hiyo ya nyota ilivyo kubwa ajabu! Ni kiasi kikubwa cha nuru kama nini kinachotokana nazo! Yehova aliyeumba vyote hivyo, ni chanzo cha nuru chenye nguvu kama nini! Isaya 40:26 lajulisha hivi: “Inueni macho yenu juu, mkaone; ni nani aliyeziumba hizi; aletaye nje jeshi lao kwa hesabu; aziita zote kwa majina; kwa ukuu wa uweza wake, na kwa kuwa yeye ni hodari kwa nguvu zake; hapana moja isiyokuwapo mahali pake.”
Aina Nyingine ya Nuru
3. Nuru ya kiroho kutoka kwa Yehova ni ya maana jinsi gani?
3 Yehova pia ndiye Chanzo cha aina nyingine ya nuru, inayotuwezesha tuwe na mwono wa kiroho, tutiwe nuru kiroho. Kamusi moja hufasili “nurisha” hivi: “Kutolea ujuzi; kufundisha; kutolea mwono-ndani wa kiroho.” Inafasili “-enye kutiwa nuru” kuwa: “kuondolewa ujinga na maarifisho mabaya.” Mnurisho wa kiroho kutoka kwa Yehova huandaliwa kupitia ujuzi sahihi wa Neno lake, Biblia. Huo ndio hutuwezesha kumjua Mungu ni nani na makusudi yake ni nini. “Kwa kuwa Mungu, aliyesema, Nuru itang’aa toka gizani, ndiye aliyeng’aa mioyoni mwetu, atupe nuru ya elimu ya utukufu wa Mungu katika uso wa Yesu Kristo.” (2 Wakorintho 4:6) Hivyo, kweli zilizo katika Neno la Mungu hakika hutuondolea ujinga na maarifisho mabaya. Yesu alisema: “Mtaifahamu kweli, nayo hiyo kweli itawaweka huru.”—Yohana 8:32.
4, 5. Ujuzi kutoka kwa Yehova hutumikiaje kama nuru maishani mwetu?
4 Yehova, aliye Chanzo cha mnurisho wa kiroho wa kweli, ni “mkamilifu wa maarifa.” (Ayubu 37:16) Pia Zaburi 119:105 lajulisha hivi juu ya Mungu: “Neno lako ni taa ya miguu yangu, na mwanga wa njia yangu.” Kwa hiyo yeye aweza kunurisha si tu hatua ifuatayo ya maisha yetu bali pia ile barabara iliyo mbele. Bila mnurisho huo, uhai ungekuwa kama vile kuendesha gari katika usiku wenye giza kwenye barabara ya mlima yenye kupindika bila taa kwenye gari au kwingineko. Nuru ya kiroho kutoka kwa Mungu yaweza kulinganishwa na ile nuru inayoandaliwa na taa za mbele za gari. Nuru hiyo huinurisha njia ili tuweze kuona tunakoenda hasa.
5 Unabii kwenye Isaya 2:2-5 huonyesha kwamba katika wakati wetu Mungu anakusanya kutoka mataifa yote watu wanaotaka mnurisho wa kiroho ili waweze kujifunza na kujizoeza ibada ya kweli. Mstari wa 3 husema: “Naye atatufundisha njia zake, nasi tutakwenda katika mapito yake.” Mstari wa 5 hualika watafutaji kweli: “Njoni, twende katika nuru ya BWANA [Yehova, NW].”
6. Nuru kutoka kwa Yehova itatuongoza wapi hatimaye?
6 Hivyo, Yehova ndiye chanzo cha aina mbili za nuru zilizo muhimu kwa uhai: ile ya kiasili na ile ya kiroho. Nuru ya kiasili husaidia miili yetu ya kiasili iendelee kuwa hai sasa, labda miaka ipatayo 70 au 80 hivi. Lakini nuru ya kiroho huongoza kwenye uhai wa milele katika dunia-paradiso. Ni kama Yesu alivyosali kwa Mungu: “Na uzima wa milele ndio huu, Wakujue wewe, Mungu wa pekee wa kweli, na Yesu Kristo uliyemtuma.”—Yohana 17:3.
Ulimwengu Umo Katika Giza la Kiroho
7. Kwa nini twahitaji kutiwa nuru kiroho sasa kuliko wakati mwingine wowote?
7 Leo tunahitaji nuru ya kiroho kuliko wakati mwingine wowote. Unabii wa Biblia, kama vile Mathayo sura ya 24 na 2 Timotheo sura ya 3 huonyesha kwamba tuko karibu sana na mwisho wa mfumo huu wa mambo. Unabii huo mbalimbali na mwingineo ulitabiri mambo ya kutisha ambayo yametukia katika wakati wetu, ukitufanya tujue kwamba tumo katika “siku za mwisho.” Kupatana na unabii huo mbalimbali, karne hii imepatwa na msiba baada ya msiba. Uhalifu na jeuri umeongezeka kufikia viwango vyenye kuhofisha. Vita vimeua zaidi ya watu milioni mia moja. Magonjwa, kama vile UKIMWI unaohofiwa, yananyemelea mamilioni, kukiwa na zaidi ya watu 160,000 ambao tayari wamekufa kwa UKIMWI katika United States pekee. Maisha ya familia yamevunjika na maadili ya ngono yanaonwa kuwa mtindo wa zamani.
8. Ainakibinadamu inakabili hali gani, na kwa nini?
8 Aliyekuwa katibu mkuu wa Umoja wa Mataifa, Havia Perez di Kweya alisema: “Hali ya ulimwengu inatoa uthibitisho mwingi kwamba umaskini [unadhoofisha] ushikamano wa jamii.” Yeye alisema kwamba “watu zaidi ya bilioni moja huishi katika umaskini mkubwa,” na kwamba “hilo limesababisha ugomvi wenye jeuri.” “Masumbufu hayo makubwa,” akasema, “hayawezi kutatuliwa na utatuzi ambao Serikali zaweza kutoa.” Na kiongozi wa shirika moja maarufu alithibitisha hayo hivi: “Tatizo kuu linalopata jamii ya watu ni kwamba imekuwa isiyotawalika.” Jinsi maneno ya Zaburi 146:3 yalivyo ya kweli: “Msiwatumainie wakuu, wala binadamu ambaye hakuna wokovu kwake.”
9. Ni nani wenye daraka kubwa zaidi la giza linaloikumba ainabinadamu, na ni nani awezaye kutuondolea uvutano huo?
9 Hali leo ni kama ile ambayo Isaya 60:2 lilitabiri: “Maana, tazama, giza litaifunika dunia, na giza kuu litazifunika kabila za watu.” Hilo giza linalowafunika wengi wa wakaaji wa dunia liko kwa sababu wao hawafyonzi nuru ya kiroho inayotoka kwa Yehova. Na sababu ya msingi ya giza hilo la kiroho ni Shetani Ibilisi na roho waovu wake, maadui wakubwa wa Mungu wa nuru. Wao ni “wakuu wa giza hili.” (Waefeso 6:12) Kama vile 2 Wakorintho 4:4 husema, Ibilisi ni “mungu wa dunia hii [huu mfumo wa mambo, NW],” ambaye “amepofusha fikira zao wasioamini, isiwazukie nuru ya injili ya utukufu wake Kristo aliye sura yake Mungu.” Hakuna utawala wowote wa kibinadamu uwezao kuuondolea ulimwengu uvutano wa Shetani. Ni Mungu tu awezaye kufanya hivyo.
“Nuru Kuu”
10. Isaya alitabirije kwamba katika siku yetu nuru ingeiangazia ainabinadamu?
10 Na bado, ingawa giza kubwa lafunika walio wengi wa ainabinadamu, Neno la Mungu lilitabiri hivi pia kwenye Isaya 60:2, 3: “Bali BWANA [Yehova, NW] atakuzukia wewe, na utukufu wake utaonekana juu yako. Na mataifa wataijilia nuru yako.” Hilo linapatana na unabii kwenye Isaya sura ya 2, ulioonyesha kwamba ibada ya kweli ya Yehova iliyotiwa nuru ingeimarishwa katika siku hizi za mwisho na, kama mistari ya 2 na 3 isemavyo, “na mataifa yote watauendea makundi makundi. Na mataifa mengi watakwenda na kusema, Njoni, twende juu mlimani kwa BWANA [Yehova, NW],” yaani, kwenye ibada yake ya kweli iliyotukuka. Kwa hiyo ingawa ulimwengu unaoongozwa na Shetani, nuru kutoka kwa Mungu inaangazwa na inawakomboa wengi kutoka kwa giza.
11. Ni nani ambaye angekuwa mashuhuri zaidi katika kuiangaza nuru ya Yehova, na Simeoni alimtambulishaje?
11 Ule unabii kwenye Isaya 9:2 ulitabiri kwamba Mungu angetuma mtu fulani ulimwenguni ili kuangaza nuru yake. Huo hutaarifu hivi: “Watu wale waliokwenda katika giza wameona nuru kuu; wale waliokaa katika nchi ya uvuli wa mauti, nuru imewaangaza.” “Nuru [hiyo] kuu” ni Msemaji wa Yehova, Yesu Kristo. Yesu alisema: “Mimi ndimi nuru ya ulimwengu, yeye anifuataye hatakwenda gizani kamwe, bali atakuwa na nuru ya uzima.” (Yohana 8:12) Hilo lilijulikana na wengine hata wakati Yesu alipokuwa mtoto mchanga. Luka 2:25 husema kwamba mtu aitwaye Simeoni alikuwa “mwenye haki, mcha Mungu” na kwamba “Roho Mtakatifu [roho takatifu, NW] alikuwa juu yake.” Simeoni alipomwona yule mtoto mchanga Yesu, alisema hivi katika sala kwa Mungu: “Macho yangu yameuona wokovu wako, uliouweka tayari machoni pa watu wote; nuru ya kuwa mwangaza wa [kuondolea shela, NW] Mataifa.”—Luka 2:30-32.
12. Yesu alianza kuondoa shela ya giza iliyowafunika watu wakati gani na kwa jinsi gani?
12 Yesu alianza kuondoa shela ya giza kutoka kwa ainabinadamu punde tu baada ya kubatizwa kwake. Mathayo 4:12-16 hutuambia kwamba hilo lilitimiza Isaya 9:1, 2, lililosema juu ya “nuru kuu” ambayo ingeanza kuangazia watu waliotembea katika giza la kiroho. Mathayo 4:17 husema: “Tokea wakati huo Yesu alianza kuhubiri, na kusema, Tubuni; kwa maana ufalme wa mbinguni umekaribia.” Kwa kuhubiri kuhusu habari njema za Ufalme wa Mungu, Yesu aliwatia watu nuru kuhusu makusudi ya Mungu. Yeye ‘aliufunua [aliangazia nuru] uzima na kutokuharibika, kwa ile Injili.’—2 Timotheo 1:10.
13. Yesu alisema nini juu yake mwenyewe, na kwa nini angeweza kufanya hivyo kwa uhakika?
13 Yesu aliangaza nuru ya Mungu kwa uaminifu. Yeye alisema hivi: “Mimi nimekuja ili niwe nuru ya ulimwengu, ili kila mtu aniaminiye mimi asikae gizani. . . . Mimi sikunena kwa nafsi yangu tu; bali Baba aliyenipeleka, yeye mwenyewe ameniagiza nitakayonena na nitakayosema. Nami najua ya kuwa agizo lake ni uzima wa milele.”—Yohana 12:44-50.
“Ndani Yake Ndimo Ulimokuwa Uzima”
14. Yesu hutambulishwaje kwenye Yohana 1:1, 2?
14 Naam, Yehova alimtuma Mwanae duniani awe nuru ya kuonyesha watu njia ya uhai wa milele. Ona jinsi hilo linavyoonyeshwa katika Yohana 1:1-16. Mistari ya 1 na 2 husomwa hivi: “Hapo mwanzo kulikuwako Neno, naye Neno alikuwako kwa Mungu, naye Neno alikuwa Mungu [mungu, NW]. Huyo mwanzo alikuwako kwa Mungu.” Hapo Yohana amwita Yesu kabla ya kuwa binadamu kwa cheo “Neno.” Hilo latambulisha sehemu aliyokuwa nayo akiwa Msemaji wa Yehova Mungu. Na Yohana anaposema kwamba “hapo mwanzo kulikuwako Neno,” inamaanisha kwamba Neno alikuwa wa kwanza katika kazi za uumbaji za Yehova, “mwanzo wa kuumba kwa Mungu.” (Ufunuo 3:14) Cheo chake cha juu miongoni mwa viumbe vyote vya Mungu hutoa msingi halisi wa kuweza kuitwa “mungu,” yule mweza. Isaya 9:6, NW humwita “Mungu Mweza,” ingawa si Mungu Mweza Yote.
15. Yohana 1:3-5 hututolea habari gani ya ziada kuhusu Yesu?
15 Yohana 1:3 hutaarifu: “Vyote vilifanyika kwa huyo; wala pasipo yeye hakikufanyika cho chote kilichofanyika.” Wakolosai 1:16 husema kwamba “kwa kuwa katika yeye vitu vyote viliumbwa, vilivyo mbinguni na vilivyo juu ya nchi.” Yohana 1:4 husema kwamba “ndani yake ndimo ulimokuwa uzima, nao ule uzima ulikuwa nuru ya watu.” Kwa hiyo kupitia Neno, aina nyingine zote za uhai ziliumbwa; pia kupitia Mwanae, Mungu hufanya iwezekane kwa ainabinadamu yenye dhambi, inayokufa, kupata uhai wa milele. Kwa kweli, Yesu ndiye yule mweza ambaye Isaya 9:2 huita “nuru kuu.” Na Yohana 1:5 husema: “Nayo nuru yang’aa gizani, wala giza halikuiweza.” Nuru huwakilisha kweli na uadilifu, kwa kutofautisha na giza, linalowakilisha makosa na ukosefu wa uadilifu. Hivyo Yohana aonyesha kwamba giza halitashinda nuru.
16. Yohana Mbatizaji alielekezeaje kadiri ya kazi ya Yesu?
16 Yohana sasa atoa hoja hivi kwenye mistari 6 hadi 9: “Palitokea mtu, ametumwa kutoka kwa Mungu, jina lake Yohana [Mbatizaji]. Huyo alikuja kwa ushuhuda, ili aishuhudie ile nuru, wote wapate kuamini kwa yeye. Huyo [Yohana] hakuwa ile nuru, bali alikuja ili aishuhudie ile nuru [Yesu]. Kulikuwako Nuru halisi, amtiaye nuru kila mtu, akija katika ulimwengu.” Yohana alisema kuhusu Mesiya ajaye na akaelekeza wafuasi wake Kwake. Hatimaye watu wa kila aina walipewa fursa ya kuikubali nuru. Kwa hiyo Yesu hakuja kwa faida ya Wayahudi tu bali pia kwa faida ya ainabinadamu yote—tajiri au maskini, bila kujali rangi.
17. Yohana 1:10, 11 hutuambia nini juu ya hali ya kiroho ya Wayahudi katika siku ya Yesu?
17 Mistari ya 10 na 11 yaendelea hivi: “Alikuwako ulimwenguni, hata kwa yeye ulimwengu ulipata kuwako, wala ulimwengu haukumtambua. Alikuja kwake, wala walio wake hawakumpokea.” Kabla ya kuwa binadamu, Yesu alikuwa yule ambaye kupitia kwake ulimwengu wa ainabinadamu uliumbwa. Lakini alipokuwa duniani, alikataliwa na wengi wa watu wake mwenyewe, Wayahudi. Wao hawakutaka uovu wala unafiki wao ufunuliwe. Walipendelea giza kuliko nuru.
18. Yohana 1:12, 13 huonyeshaje kwamba wengine wangekuwa watoto wa Mungu wenye urithi wa pekee?
18 Yohana asema hivi katika mistari ya 12 na 13: “Bali wote waliompokea aliwapa uwezo wa kufanyika watoto wa Mungu, ndio wale waliaminio jina lake; waliozaliwa, si kwa damu, wala si kwa mapenzi ya mwili, wala si kwa mapenzi ya mtu, bali kwa Mungu.” Mistari hiyo inaonyesha kwamba wafuasi wa Yesu hawakuwa wana wa Mungu hapo mwanzoni. Kabla ya Kristo kuja duniani, wala uana wa jinsi hiyo wala tumaini la kimbingu havikuwa vimefunguliwa kwa wanadamu. Lakini kwa faida ya dhabihu ya fidia ya Kristo ambayo katika hiyo walijizoeza imani, baadhi ya wanadamu walikubaliwa kuwa wana na wakaweza kuwa na tumaini la uhai wakiwa wafalme pamoja na Kristo katika Ufalme wa kimbingu wa Mungu.
19. Kwa nini Yesu yumo katika hali bora zaidi ya kuiangaza nuru ya Mungu, kama ionyeshwavyo kwenye Yohana 1:14?
19 Mstari wa 14 hutoa sababu hivi: “Naye Neno alifanyika mwili, akakaa kwetu; nasi tukauona utukufu wake, utukufu kama wa Mwana pekee atokaye kwa Baba.” Akiwa duniani, Yesu aliangaza utukufu wa Mungu kwa jinsi ambavyo Mzaliwa wa Kwanza wa Mungu tu angeweza kufanya. Kwa hiyo, kwa njia ya pekee, yeye alistahili kabisa kumfunua Mungu na makusudi Yake kwa watu.
20. Kama ilivyorekodiwa kwenye Yohana 1:15, Yohana Mbatizaji hutuambia nini juu ya Yesu?
20 Halafu, Yohana aandika hivi katika mstari 15: “Yohana [Mbatizaji] alimshuhudia, akapaza sauti yake akasema, Huyu ndiye niliyenena habari zake ya kwamba, Ajaye nyuma yangu amekuwa mbele yangu; kwa maana alikuwa kabla yangu.” Yohana Mbatizaji alizaliwa miezi sita hivi kabla ya kuzaliwa kwa Yesu akiwa binadamu. Lakini Yesu alifanya kazi kubwa zaidi ya Yohana, hivi kwamba Yesu alimtangulia Yohana katika kila njia. Na Yohana alikubali kwamba Yesu alikuwako kabla yake, kwa kuwa Yesu alikuwako kabla ya kuwa binadamu.
Zawadi Kutoka kwa Yehova
21. Kwa nini Yohana 1:16 husema kwamba tumepokea “neema juu ya neema”?
21 Yohana 1:16 hutoa sababu hivi: “Kwa kuwa katika utimilifu wake sisi sote tulipokea, na neema juu ya neema.” Ingawa wanadamu wanazaliwa katika dhambi kwa sababu ya kuirithi kutoka kwa Adamu, Yehova akusudia uharibifu wa mfumo huu wa mambo, kuokolewa kwa mamilioni kuingia kwenye ulimwengu mpya, kufufuliwa kwa wafu, na kuondolewa kwa dhambi na kifo, kukitokeza uhai wa milele katika dunia paradiso. Baraka hizo zote hazistahiliwi, hazikuchumwa na wanadamu wenye dhambi. Hizo ni zawadi kutoka kwa Yehova kupitia Kristo.
22. (a) Zawadi ya Mungu iliyo kubwa zaidi huwezesha nini? (b) Ni mwaliko upi tunaonyooshewa katika kitabu cha mwisho cha Biblia?
22 Ni nini ile zawadi iliyo kubwa zaidi inayofanya yote hayo yawezekane? “Kwa maana jinsi hii Mungu aliupenda ulimwengu [wa ainabinadamu], hata akamtoa Mwanawe pekee, ili kila mtu amwaminiye [azoeaye imani katika yeye, NW] asipotee, bali awe na uzima wa milele.” (Yohana 3:16) Hivyo, ujuzi sahihi wa Mungu na Mwana wake, “yule Mkuu wa uzima,” ni wa muhimu kwa wale wote wanaotaka nuru ya kiroho na uhai wa milele. (Matendo 3:15) Ndiyo sababu kitabu cha mwisho cha Biblia hunyoosha mwaliko ufuatao kwa wote wanaopenda kweli na wanaotaka uhai: “Njoo! Naye mwenye kiu na aje; na yeye atakaye, na ayatwae maji ya uzima bure.”—Ufunuo 22:17.
23. Watu wenye mfano wa kondoo watafanya nini wanapoijia kweli?
23 Watu wanyenyekevu, wenye mfano wa kondoo hawataijia tu nuru ya ulimwengu bali pia wataifuata nuru hiyo: “Kondoo humfuata, kwa maana waijua [kweli ya] sauti yake.” (Yohana 10:4) Kwa kweli, wao hufurahia ‘kufuata nyayo zake kwa ukaribu’ kwa sababu wanajua kwamba kufanya hivyo kutamaanisha uhai wa milele kwao.—1 Petro 2:21.
Ungejibuje?
◻ Ni aina za nuru zipi mbili zinazotoka kwa Yehova?
◻ Kwa nini kutiwa nuru kiroho ni kwa maana leo?
◻ Yesu alikuwa “nuru kuu” katika njia gani?
◻ Yohana sura ya 1 hutuambia nini kuhusu Yesu?
◻ Ni zawadi zipi zinazowajia wale wanaofuata nuru ya ulimwengu?
[Picha katika ukurasa wa 10]
Simeoni alimwita Yesu “nuru ya kuwa mwangaza wa [kuondolea shela, NW] Mataifa”