‘Wao Waijua Sauti Yake’
“BWANA [“Yehova,” NW] ndiye mchungaji wangu.” Hayo ndiyo maneno ya kufungua Zaburi 23. Maandiko tena yamlinganisha Yehova Mungu na mchungaji katika unabii wa Isaya, usemao hivi: “Atalilisha kundi lake kama mchungaji, atawakusanya wana-kondoo mikononi mwake; na kuwachukua kifuani mwake, nao wanyonyeshao atawaongoza polepole.”—Isaya 40:11.
Yesu Kristo vilevile afananishwa na mchungaji. Yeye alisema hivi: “Mimi ndimi mchungaji mwema. mchungaji mwema huutoa uhai wake kwa ajili ya kondoo.” (Yohana 10:11) Yesu alisema kwamba “kondoo humsikia sauti yake [mchungaji], naye huwaita kondoo wake kwa majina yao, na kuwapeleka nje.” Aliongezea kwamba “kondoo humfuata [mchungaji], kwa maana waijua sauti yake. Mgeni hawatamfuata kabisa, bali watamkimbia, kwa maana hawazijui sauti za wageni.”—Yohana 10:2-5.
Wote wawili Yehova Mungu na Mwana wake, Yesu Kristo, wametimiza ufafanuzi unaoandaliwa katika maandiko hayo yaliyotajwa. Wao hutendea kondoo wao wa mifano kwa wororo na kwa utunzi wenye upendo. Matokeo ni kwamba wale wenye mfano wa kondoo wahisi wamependwa, ni salama, na kulindwa.
Uhusiano huo umefananishwa kwa njia ifaayo na kondoo halisi na mchungaji wao. Kule nyuma katika 1831, John Hartley aliandika juu ya uchunguzi wake kwa habari hiyo. Yeye alisema kwamba nchini Ugiriki, kulikuwa na desturi ya wachungaji kuwapa kondoo zao majina. Kondoo akiitwa kwa jina, angeitikia sauti ya mchungaji. Miaka yapata 51 baadaye, katika 1882, J. L. Porter aliona jambo kama hilo. Yeye mwenyewe alijionea wachungaji “wakitamka . . . sauti nyembamba ya kuita isiyo ya kawaida” ambayo kondoo wangeitikia na kwa utii kuwafuata wachungaji. Mwaka uo huo William M. Thomson aliandika juu ya majaribio yaliyorudiwa-rudiwa kufanywa yaliyothibitisha kwamba kondoo waweza kufunzwa kufuata mchungaji wao na kutambua sauti yake.
Je! uhusiano huo wa kipekee kati wachungaji na kondoo zao umeonekana katika nyakati za karibuni? Ndiyo. Katika toleo la National Geographic la Septemba 1993, mjasiri Mwaustralia Robyn Davidson aliandika mambo yafuatayo kuhusu wachungaji wa kabila la Rabari walioko kaskazini-magharibi mwa India: “Kila mchungaji anaita kwa njia iliyo tofauti kidogo, miito tofauti-tofauti. Kuna maneno ya kuita wakati wa asubuhi ya kuondoka, maneno ya kupeleka kondoo majini, na kadhalika. Kila mtu ajua kondoo wake mwenyewe, na kila kondoo ajua mtu wake, na kundi lake hasa litajitoa kutoka kwenye kundi kubwa na kumfuata asubuhi.”
Bila shaka, Yesu aliona mambo ambayo yametoka kufafanuliwa na wasafiri wanne waliotoka tu kutajwa. Uchunguzi wake uliongezea uhalisi wa kielezi chake cha kondoo kuijua sauti yake. Je! wewe ni mmoja wa kondoo wa Yesu? Je! waijua sauti yake na kuisikiliza? Kama unatambua na kukubali mafundisho yake kuwa kweli na kama unatii na kufuata amri zake na mwongozo wake katika kumwabudu Yehova, basi unaweza kuchungwa kwa upendo na kwa wororo na Yehova Mungu pamoja na Mwana wake, Yesu Kristo.—Yohana 15:10.