Maisha na Huduma ya Yesu
Utume wa Kupeleka Rehema Katika Yudea
MAJUMA kadhaa mapema kidogo, wakati wa Sikukuu ya Wakfu katika Yerusalemu, Wayahudi walijaribu kumuua Yesu. Basi yeye akasafiri kaskazini, yaonekana ni kwenye eneo lisilo mbali na Bahari ya Galilaya.
Hivi majuzi, amekuwa akisonga tena kusini kuelekea Yerusalemu, akihubiri njiani katika vijiji vya Perea, wilaya iliyo mashariki ya Mto Yordani. Amemaliza sasa tu kueleza kielezi juu ya tajiri na Lazaro. Sasa anaendelea kufundisha wanafunzi wake mambo aliyokuwa amefundisha mapema kidogo alipokuwa katika Galilaya.
Kwa kielelezo, anasema ingekuwa faida kubwa zaidi “jiwe la kusagia lifungwe shingoni [mwa mtu], akatupwe baharini” kuliko yeye akwaze mmoja wa “wadogo” walio wa Mungu. Pia anakazia uhitaji wa msamaha, akieleza hivi: “Na kama [ndugu] akikukosa mara saba katika siku moja, na kurudi kwako mara saba, akisema, Nimetubu, msamehe.”
Wanafunzi wanapomtolea ombi hili, “Tuongezee imani,” Yesu anajibu: “Kama mngekuwa na imani kiasi cha chembe ya haradali, mngeuambia mkuyu huu, Ng’oka, ukapandwe baharini, nao ungewatii.” Kwa hiyo hata imani kidogo inaweza kutimiza mambo makubwa.
Halafu, Yesu anasimulia hali ya kweli katika maisha ambayo inatoa kielezi cha mwelekeo unaomfaa mtumishi wa Mungu mweza yote. “Ni nani kwenu mwenye mtumwa alimaye au achungaye ng’ombe,” Yesu anasema, “atakayemwambia mara arudipo kutoka shambani, Njoo upesi, keti, ule chakula? Je! hatamwambia, Nifanyie tayari chakula, nile; jifunge unitumikie, hata niishe kula na kunywa, ndipo nawe utakapokula na kunywa? Je! atampa asante yule mtumwa, kwa sababu ameyafanya aliyoagizwa? Vivyo hivyo nanyi, mtakapokwisha kuyafanya yote mliyoagizwa, semeni, Sisi tu watumwa wasio na faida; tumefanya tu yaliyotupasa kufanya.” Hivyo, watumishi wa Mungu hawapaswi kamwe kuhisi kwamba wanafanyia Mungu hisani kwa kumtumikia. Bali, inawapasa sikuzote wakumbuke pendeleo walilo nalo la kumwabudu wakiwa washiriki wanaoitibariwa wa nyumbani mwake.
Inaonekana ni muda mfupi baada ya kielezi hiki kwamba mjumbe anawasili. Ametumwa na Mariamu na Martha, dada zake Lazaro, wanaoishi katika Bethania ya Yudea. “Bwana, yeye umpendaye hawezi,” mjumbe huyo anasimulia.
Yesu anajibu hivi: “Ugonjwa huu si wa mauti, bali ni kwa ajili ya utukufu wa Mungu, ili Mwana wa Mungu atukuzwe kwa huo.” Baada ya yeye kubaki alipo kwa siku mbili, Yesu anasema hivi kwa wanafunzi wake: “Twendeni Uyahudi tena.” Hata hivyo, wao wanamkumbusha hivi: “Rabi, juzijuzi tu Wayahudi walikuwa wakitafuta kukupiga kwa mawe, nawe unakwenda huko tena?”
“Je! saa za mchana si kumi na mbili?” Yesu naye anawauliza. “Mtu akienda mchana hajikwai; kwa sababu aiona nuru ya ulimwengu huu. Bali akienda usiku hujikwaa; kwa sababu nuru haimo ndani yake.”
Yaonekana Yesu anamaanisha kwamba “saa za mchana,” au wakati ambao Mungu amepangia huduma yake ya kidunia, hazijaisha bado, na mpaka ziishapo, hakuna mtu anayeweza kumdhuru. Yeye anahitaji kuutumia kikamili wakati mfupi wa “mchana” uliombakia, kwa kuwa baada ya hapo utakuja “usiku” ambapo adui zake watakuwa wamekwisha kumuua.
Yesu anaongezea hivi: “Rafiki yetu, Lazaro, amelala; lakini ninakwenda nipate kumwamsha.”
Kwa kuonekana wazi kuwa wanafikiri Lazaro anapumzika katika usingizi na kwamba hii ni ishara hakika kwamba atapata nafuu, wanafunzi wanajibu hivi: “Bwana, ikiwa amelala, atapona.”
Ndipo Yesu anapowaambia wazi hivi: “Lazaro amekufa. Nami nafurahi kwa ajili yenu kwamba sikuwako huko, ili mpate kuamini; lakini na twendeni kwake.”
Kwa kung’amua kuwa inaelekea kwamba Yesu angeweza kuuawa katika Yudea, na bado akitamani kumuunga mkono, Tomaso anawatia moyo hivi wanafunzi wenzake: “Twendeni na sisi, ili tufe pamoja naye.” Basi kwa kuhatarisha maisha zao, wanafunzi wanaandamana na Yesu katika utume huu wa kupeleka rehema katika Yudea. Luka 13:22; 17:1-10; Yohana 10:22, 31, 40-42; 11:1-16.
◆ Yesu amekuwa akihubiri wapi hivi majuzi?
◆ Yesu anarudia mafundisho gani, naye anaeleza hali gani kutoa kielezi cha jambo gani?
◆ Yesu anapokea habari gani, naye anamaanisha nini kwa “mchana” na “usiku”?
◆ Tomaso anamaanisha nini anaposema, ‘Twendeni ili tufe pamoja naye’?