Fundisha Peupe Na Kutoka Nyumba Kwa Nyumba
“Mimi sikujikunyata niepe . . . kuwafundisha peupe na kutoka nyumba kwa nyumba.”—MATENDO 20:20, “Byington.”
1. Padri Mkatoliki alitoaje maelezo juu ya matokeo kwa huduma ya nyumba kwa nyumba ya Mashahidi wa Yehova?
“WAKATOLIKI Wapeleka Gospeli Mlango kwa Mlango.” Ndivyo kilivyosema kichwa kimoja kikubwa katika The Providence Sunday Journal la Oktoba 4, 1987. Gazeti hilo liliripoti kwamba lengo kubwa la utendaji huu lilikuwa “kualika wengine wa wanamtaa wa kanisa lao walio watendaji zaidi warudie maisha ya utendaji zaidi katika mtaa wa kanisa.” Padri John Allard, mkurugenzi wa Ofisi ya Uenezaji Evanjeli katika Dayosisi ya Majaliwa, alinukuliwa kuwa akisema hivi: “Ndiyo ni kweli, kutakuwa na kutiliwa sana mashaka. Watu watasema, ‘Ona sasa, ndio hawa wakifanya sawasawa na Mashahidi wa Yehova.’ Lakini Mashahidi wa Yehova wana matokeo, sivyo? Mimi nakuhakikishia kwamba unaweza kuingia ndani ya Jumba la Ufalme lolote katika mkoa [wa Kisiwa cha Rhode, U.S.A.,] na upate makundi ambayo yamejaa waliokuwa Wakatoliki hapo zamani.”
2. Ni swali gani ambalo kwa kufaa linatokezwa?
2 Ndiyo, Mashahidi wa Yehova wanajulikana vema kwa huduma yao yenye matokeo ya kutoka nyumba kwa nyumba. Lakini kwa nini wao hutoka nyumba kwa nyumba?
Ile Njia ya Kimitume
3. (a) Ni utume gani ambao Yesu Kristo aliwapa wanafunzi wake? (b) Ni kwa njia gani kuu wafuasi wa mapema wa Kristo walitimiza utume wao?
3 Yesu Kristo aliwapa wafuasi wake utume huu wenye kujaa maana: “Kwa hiyo nendeni mkafanye wanafunzi kutoka kwa watu wa mataifa yote, kuwabatiza katika jina la Baba na la Mwana na la roho takatifu, kuwafundisha kushika mambo yote ambayo nimewaamuru nyinyi. Na, tazama! mimi nipo pamoja na nyinyi siku zote mpaka umalizio wa mfumo wa mambo.” (Mathayo 28:19, 20, NW) Njia kuu ambavyo kazi hiyo ingefanywa ikaja kuonekana wazi mara tu baada ya siku ya Pentekoste 33 W.K. “Kila siku katika hekalu na kutoka nyumba kwa nyumba waliendelea bila kuacha wakifundisha na kuzitangaza habari njema juu ya Kristo, Yesu.” (Matendo 5:42, NW) Kama miaka 20 baadaye, mtume Paulo alikuwa akijihusisha katika huduma ya kutoka nyumba kwa nyumba, kwa maana aliwakumbusha wazee Wakristo wa kutoka jiji la Efeso hivi: “Sikujiepusha kuwaambia nyinyi lo lote la mambo yaliyokuwa yenye faida wala kuwafundisha peupe na kutoka nyumba kwa nyumba.”—Matendo 20:20, NW.
4. Kwa nini tunaweza kusema kwamba Matendo 5:42 na Matendo 20:20 humaanisha kwamba kuhubiri kwa wafuasi wa Yesu kuligawizwa kutoka nyumba kwa nyumba?
4 Kwenye Matendo 5:42 maneno “kutoka nyumba kwa nyumba” yametafsiriwa kutokana na katʹ oiʹkon. Hapa ka·taʹ linatumiwa katika maana “ya ugawaji.” Hivyo, kuhubiri kwa wanafunzi kuligawizwa kutoka nyumba moja mpaka nyingine. Akieleza juu ya Matendo 20:20, Randolph O. Yeager aliandika kwamba Paulo alifundisha “katika makusanyiko ya peupe [de·mo·siʹa] na kutoka nyumba kwa nyumba (maana ya kugawa [ka·taʹ] kwa kuhusisha hiki na hiki). Paulo alikuwa ametumia miaka mitatu katika Efeso. Alizuru kila nyumba, au angalau aliwahubiri watu wote (mstari 26). Hiki hapa ni kibali cha kimaandiko cha uenezaji evanjeli kutoka nyumba kwa nyumba na pia ule unaoendeshwa katika mikutano ya peupe.”
5. Kwenye Matendo 20:20, kwa nini Paulo hakuwa akimaanisha ziara za kirafiki tu juu ya wazee au ziara za uchungaji?
5 Utumizi kama huo wa ka·taʹ unaonekana kwenye Luka 8:1, ambayo inasema juu ya Yesu akihubiri “jiji kwa jiji na kijiji kwa kijiji.” Paulo alitumia ile namna ya wingi kat’ oiʹkous kwenye Matendo 20:20. Hapa tafsiri fulani za Biblia zinazomwa “katika nyumba zenu.” Lakini mtume hakuwa akirejezea ziara ya kirafiki za kutembelea wazee wala ziara za uchungaji katika makao ya waamini wenzake. Maneno yake yanayofuata yanaonyesha kwamba alikuwa akisema juu ya huduma ya nyumba kwa nyumba kati ya wasioamini, kwa maana alisema hivi: “Lakini nilitoa ushuhuda kikamili kwa wote Wayahudi na Wagiriki juu ya toba kwa Mungu na kumwamini Bwana yetu Yesu.” (Matendo 20:21, NW) Waamini wenzake walikuwa tayari wametubu na kujizoeza imani katika Yesu. Hivyo, yote mawili Matendo 5:42 na Matendo 20:20 yanahusiana na kuhubiria wasioamini “kutoka nyumba kwa nyumba,” au kutoka mlango kwa mlango.
Hakuna Badala ya Hivyo
6. Ni nini limesemwa juu ya hali ya kazi ya kuhubiri kwa Paulo katika Efeso?
6 Akieleza juu ya maneno ya Paulo kwenye Matendo 20:20, katika 1844 Abiel Abbot Livermore aliandika hivi: “Yeye hakuridhika kutoa tu hotuba katika kusanyiko la peupe, na kueneza habari kwa kutumia vyombo vingine, bali alifuatia kazi yake kubwa kwa bidii katika faragha, kutoka nyumba kwa nyumba, na kwa uhalisi akapeleka nyumbani ukweli wa mbinguni kwenye maskani na mioyo ya Waefeso.” Majuzi zaidi, imeonwa hivi: “Uenezaji wa gospeli nyumba kwa nyumba ulikuwa kawaida ya Wakristo wa karne ya kwanza tangu mwanzo (ling. Matendo 2:46; 5:42). . . . [Paulo] alikuwa ametimiza kabisa kabisa daraka lake kwa Wayahudi na Wasio Wayahudi pia kule Efeso, nao waliachwa bila udhuru ikiwa waliangamia katika dhambi zao.”—The Wesleyan Bible Commentary, Buku 4, kurasa 642-3.
7. Kwa nini inaweza kusemwa kwamba Mungu anakubalia huduma ya nyumba kwa nyumba ya Mashahidi wa Yehova?
7 Ingawa kuhutubu peupe kuna mahali katika kutangaza habari njema, hakuwi badala ya upashanaji habari wa kibinafsi mlangoni. Katika habari hii, mwanachuo Joseph Addison Alexander alisema hivi: “Mpaka sasa kanisa halijavumbua kitu chochote kilicho badala au cha kushindana na tokeo la kuhubiri kanisani na kwenye nyumba za watu.” Kama vile mwanachuo O. A. Hills alivyoweka wazo hilo: “Kufundisha peupe na kufundisha nyumba kwa nyumba ni lazima yaambatane.” Mashahidi wa Yehova wanatoa maagizo kupitia hotuba kwenye Mikutano ya Watu Wote ya kila juma. Wao wana ushuhuda wa wazi pia kwamba njia ya kimitume ya kueneza ukweli wa Biblia kutoka nyumba kwa nyumba ina matokeo. Na kwa uhakika Yehova anaikubali, kwa maana kutokana na huduma hiyo, anasababisha maelfu yamiminike kwenye ibada yake iliyokwezwa kila mwaka.—Isaya 2:1-4; 60:8, 22.
8. (a) Ni jambo gani limesemwa juu ya sababu kwa nini kuhubiri nyumba kwa nyumba kuna matokeo? (b) Ni jinsi gani Mashahidi wa Yehova wanaweza kulinganishwa na Paulo katika kuhubiri milangoni na utoaji mwingine wa ushahidi?
8 Mamlaka nyingine imesema hivi: “Watu wanaona ni rahisi zaidi kukumbuka mafundisho mlangoni pao kuliko kanisani.” Basi, Paulo alikuwa milangoni kwa ukawaida, akiweka mfano mzuri sana akiwa mhudumu. “Hakutosheka na kufundisha na kutoa hotuba katika sinagogi na soko,” akaandika mwanachuo wa Biblia Edwin W. Rice. “Wakati wote alikuwa ‘akifundisha’ kwa bidii ya uendelevu ‘kutoka nyumba kwa nyumba.’ Lilikuwa shindano la kuelekeana na uovu nyumba kwa nyumba, mkono kwa mkono, uso kwa uso, na kuvuta wanaume waje kwa Kristo, ambalo alifanya katika Efeso.” Mashahidi wa Yehova wanafahamu kwamba mazungumzo ya mtu kwa mtu mlangoni yana matokeo. Zaidi ya hilo, wanafanya ziara za kurudia na wanafurahi kuongea hata na wapinzani ikiwa watu hawa mmoja mmoja wataruhusu kuweko mazungumzo mazuri. Jinsi wanavyofanana na Paulo! Kuhusu yeye, F. N. Peloubet aliandika hivi: “Kazi ya Paulo haikuwa kamwe katika mikutano. Bila shaka alizuru watu wengi kibinafsi kwenye nyumba zao mahali popote alipopata habari juu ya mtu aliyekuwa akiulizia habari, au mwenye kupendezwa sana au hata mwenye kupinga asitake kuongea juu ya dini.”
Wazee Kuchukua Uongozi
9. Ni mfano gani ambao Paulo aliwekea wazee wenzake?
9 Ni mfano gani ambao Paulo aliwekea wazee wenzake? Alionyesha kwamba wanapaswa kuwa wajasiri na wapiga mbiu wa habari njema wasiochoka kwenda nyumba kwa nyumba. Katika 1879, J. Glentworth Butler aliandika hivi: “[Wazee Waefeso] walijua kwamba katika kuhubiri [kwa Paulo] yeye hakuwa ameathiriwa kamwe na wazo la hatari ya kibinafsi au kupendwa na wengi; kwamba hakuwa amezuia chochote cha ukweli uliohitajiwa; kwamba hakuwa ameendelea tu na mambo ya ukweli ya kiajabuajabu au ya kigeni kigeni kwa kuegemea upande mmoja, bali alikuwa amehimiza yale tu na yote ambayo ni yenye faida ‘kwa utumizi wa kufunza mema,’ au kujenga: shauri zima la Mungu likiwa lenye utakato na ukamili! Na ‘onyesho’ hili la uaminifu, ‘fundisho” hili lenye bidii la ukweli wa Kikristo lilikuwa limekuwa zoea lake, si katika shule ya Tirano na mahali pengine tu pa kukusanyikia wanafunzi, bali katika kila nyumba iliyoingilika. Kutoka nyumba kwa nyumba, na kutoka nafsi kwa nafsi, yeye akawa amepeleka zile habari za kufurahisha akiwa na tamaa na hamu nyingi kama ya Kristo. Kwa watu wa tabaka na rangi zote, kwa Myahudi mhasama na Mgiriki mwenye madharau, kichwa chake kimoja—kile ambacho, kilifafanuliwa kikamili, kinatia ndani kweli nyingine zote muhimu zenye kuokoa—kilikuwa toba kuelekea Mungu, na imani kuelekea Bwana wetu Yesu Kristo.”
10, 11. (a) Kwa habari ya huduma ya Kikristo, Paulo alitazamia nini juu ya wazee Waefeso? (b) Kama Paulo, Mashahidi wa Yehova, kutia na wazee, wanajihusisha katika aina gani ya kuhubiri?
10 Basi, kwa kiini hasa Paulo alitazamia nini kwa wazee Waefeso? Mwanachuo E. S. Young alisimulia tofauti maneno ya mtume kwa njia hii: “Mimi sikusema peupe tu, bali nilijitaabisha kutoka nyumba kwa nyumba, kwa tabaka zote, Wayahudi na Wasio Wayahudi pia. Kichwa cha huduma yangu kwa tabaka zote kilikuwa ‘toba kuelekea Mungu na imani katika Bwana wetu Yesu Kristo.’” Akiweka maneno ya Paulo kwa njia nyingine, W. B. Riley aliandika hivi: “Maana ya wazi ilikuwa hii: ‘Mimi natazamia nyinyi mwendeleze kile nilichoanza, kufanya na kufundisha pia na ninatazamia nyinyi mkinze kama mimi nilivyokinza; kufundisha kwa faragha na peupe pia kama mimi nilivyofanya katika barabara na kutoka nyumba kwa nyumba, kutoa ushuhuda kwa Wayahudi hali moja na kwa Wagiriki toba kuelekea Mungu na imani kuelekea Bwana wetu Yesu Kristo, kwa maana haya ndiyo mambo ya msingi!’”
11 Kwa wazi, katika Matendo sura ya 20, Paulo alikuwa akionyesha wazee wenzake kwamba walitazamiwa kuwa mashahidi wa nyumba kwa nyumba wa Yehova. Kwa habari hii, wazee wa karne ya kwanza walipaswa kutoa uongozi, wakiwawekea mfano unaofaa washiriki wengine wa kundi. (Linganisha Waebrania 13:17.) Basi, kama Paulo, Mashahidi wa Yehova wanahubiri kutoka nyumba kwa nyumba, wakiambia watu wa mataifa yote juu ya Ufalme wa Mungu toba kuelekea Yeye, na imani katika Yesu Kristo. (Marko 13:10; Luka 24:45-48) Na katika kazi hiyo ya nyumba kwa nyumba, wazee waliowekwa kati ya Mashahidi wa ki-siku-hizi wanatazamiwa kutoa uongozi.—Matendo 20:28.
12. Watu fulani waliokuwa wazee hapo kwanza walikataa kufanya nini, lakini wazee wanatoa uongozi katika kufanya nini leo?
12 Katika 1879, Charles Taze Russell alianza kuchapisha Zion’s Watch Tower and Herald of Christ’s Presence, ambalo sasa linaitwa Mnara wa Mlinzi Unaotangaza Ufalme wa Yehova. Russell na Wanafunzi wa Biblia wengine walitangaza ujumbe wa Ufalme kwa njia ya kimitume. Hata hivyo, katika miaka ya baadaye wazee fulani wa kundi hawakuishi kulingana na madaraka yao ya kutoa ushahidi. Kwa mfano, Shahidi mmoja aliandika hivi: “Mambo yote yaliendelea vizuri mpaka tangazo lilipokuja kwamba wote washiriki katika kutoa ushahidi wa nyumba kwa nyumba wakiwa na vitabu na hasa kazi ya Jumapili ya nyumba kwa nyumba—hii ikiwa katika 1927. Wazee wetu wa kuchaguliwa walipinga na kujaribu kulivunja moyo darasa zima lisianze wala kujihusisha katika sehemu yoyote ya kazi hiyo.” Baada ya muda, wanaume ambao hawakutaka kujihusisha katika kuhubiri nyumba kwa nyumba hawakupendelewa tena kutumikia wakiwa wazee. Leo, pia, wale wanaotumikia wakiwa wazee na watumishi wa huduma wanatazamiwa kutoa uongozi katika kutoa ushahidi nyumba kwa nyumba na namna nyingine za huduma ya Kikristo.
Kila Mmoja Ni Shahidi
13. (a) Inatupasa tufanye nini hata ikiwa watu hawasikilizi ujumbe wa Ufalme? (b) Paulo amelinganishwaje na Ezekieli?
13 Kwa msaada wa Yehova, Wakristo wanapaswa kutangaza ujumbe wa Ufalme kutoka nyumba kwa nyumba, hata ikiwa haupokewi kwa uthamini. Akiwa mlinzi wa Mungu, Ezekieli alipaswa kuonya watu kama walisikiliza au sivyo. (Ezekieli 2:5-7; 3:11, 27; 33:1-6) Akichota ulinganifu kati ya Ezekieli na Paulo, E. M. Blaiklock aliandika hivi: “Kutoka kwenye [hotuba ya Paulo katika Matendo sura ya 20] inaibuka picha ya wazi juu ya ile huduma katika Efeso. Angalia yanayofuata: Kwanza, uaminifu wa Paulo uliohitajika haraka. Yeye hakuwa mtafuta kupendwa na wengi au kibali cha wingi wa watu. Akiwa amewekwa kama Ezekieli kwenye kazi ya mlinzi, alifanya wajibu wake kwa bidii ya kufuata haki na nguvu za kiadili ili kuunga mkono hotuba yake. Pili, huruma yake yenye upendo. Hakuwa mtu wa kubeba maneno ya msiba juu ya midomo yake bila kuyasisimukia. Tatu, uenezaji wake wa evanjeli bila kuchoka. Akawa amehubiri gospeli peupe na kutoka nyumba kwa nyumba, katika jiji na sehemu zote za mkoa.”
14. Kwa nini kutoa ushahidi ni daraka la kila mtu anayejiweka wakfu kwa Yehova Mungu katika sala kupitia Yesu Kristo?
14 Baraka nyingi za Mungu juu ya watumishi wake wa kisasa haziachi shaka kwamba yeye anapendezwa kuwaacha wabebe jina Mashahidi wa Yehova. (Isaya 43:10-12) Zaidi ya hilo, wao ni mashahidi wa Kristo pia, kwa maana Yesu aliwaambia hivi wafuasi wake: “Nyinyi mtapokea nguvu wakati roho takatifu itakapofika juu yenu nyinyi, na nyinyi mtakuwa mashahidi wangu mimi katika Yerusalemu na katika Yudea yote na katika Samaria na kwenye sehemu ya mbali zaidi sana ya dunia.” (Matendo 1:8, NW) Hivyo basi kutoa ushahidi ndilo daraka la kila mtu anayejiweka wakfu kwa Yehova Mungu katika sala kupitia Yesu Kristo.
15. Ni jambo gani limesemwa juu ya kazi ya kutoa ushahidi ya Wakristo wa mapema?
15 Imesemwa hivi juu ya kutoa ushahidi: “Kulihusisha ndani kanisa zima. Ile shughuli ya kimisionari ya kanisa la mapema haikuwa daraka la Sosaiti ya Wanawake ya Kimisionari wala ya Baraza la Umisheni wa Kigeni. Wala kazi ya kutoa ushahidi haikuachwa iwe ya wataalamu kama wazee, mashemasi, au hata mitume. . . . Katika siku hizo za mapema kanisa lilikuwa misheni. Programu ya kimisionari ya kanisa la mapema ilikuwa juu ya msingi wa dhana mbili: (1) Kazi kuu ya kanisa ni kueneza evanjeli ulimwenguni. (2) Daraka la kutekeleza kazi hii linakalia jamii yote nzima ya Kikristo.”—J. Herbert Kane.
16. Hata waandikaji katika Jumuiya ya Wakristo wanakiri nini kuhusu Wakristo na kutoa ushahidi?
16 Ingawa waandikaji wa ki-siku-hizi wa Jumuiya ya Wakristo hawakubaliani na ujumbe wa Ufalme, watu fulani wanakiri kwamba Wakristo wana wajibu wa kutoa ushahidi. Kwa mfano, katika kitabu Everyone a Minister, Oscar E. Feucht anatoa maoni haya: “Hakuna pasta anayeweza kutimiza huduma ambayo Mungu alimpa kila mwamini. Ubaya ni kwamba fikira yenye makosa ambayo imekuwa katika kanisa kwa karne nyingi imefanya kazi zinazopasa kufanywa na waumini 500 ziwe za pasta mmoja tu. Haikuwa hivyo katika kanisa la mapema. Wale walioamini walienda kila mahali wakihubiri lile Neno.”
17. Ni nini linaloweza kusemwa juu ya nafasi ambayo kutoa ushahidi kulikuwa nayo katika maisha za Wakristo wa mapema?
17 Kutoa ushahidi kulikuwa jambo kuu katika maisha za Wakristo wa mapema, hata kama vile kulivyo kati ya watu wa Yehova leo. “Ikisemwa kwa mapana,” akaandika Edward Caldwell Moore wa Chuo Kikuu cha Harvard, “karne tatu za kwanza za harakati ya Kikristo zilikuwa na bidii kubwa kwa ajili ya uenezaji wa ile imani. Harara ya Kikristo ilikuwa kueneza evanjeli, kueleza juu ya ujumbe wa ukombozi. . . . Hata hivyo, kuenea kwa uvutano na mafundisho ya Yesu kulikuwa katika kile kipindi cha mapema kabisa, lakini kukifanywa kwa sehemu ndogo tu na watu ambao tunapaswa kuwaita wamisionari. Kulikuwa timizo la watu wa kila namna ya kazi na shughuli ya maisha na wa kila daraja katika jamii ya watu. [Wao wa-]lipeleka kwenye miisho ya milki [ya Kiroma] siri ile ya maisha ya ndani, ule mtazamo mpya kuelekea ulimwengu, ambao wao walikuwa wamejionea wenyewe kuwa wokovu. . . . [Ukristo wa mapema] ulisadiki sana kwamba mwisho wa utaratibu wa ulimwengu wa sasa ulikuwa ukikaribia. Uliamini katika kuanzishwa ghafula na kimwujiza kwa utaratibu wa ulimwengu mpya.”
18. Ni tumaini gani kuu linalopita ndoto za viongozi wa kisiasa?
18 Katika kutoa ushahidi wa nyumba kwa nyumba na namna nyingine za huduma yao, kwa shangwe Mashahidi wa Yehova wanaelekeza wasikiaji wao kwenye ulimwengu mpya ambao Mungu ameahidi. Baraka zao zilizotabiriwa za uhai usioisha zinapita kwa mbali ndoto zozote za mambo yanayotamaniwa sana na watu wa leo ambao wangetaka eti kujenga utaratibu wa ulimwengu mpya. (2 Petro 3:13; Ufunuo 21:1-4) Ingawa ingeonekana kwamba kila mtu angetaka kuishi katika ulimwengu mpya wa Mungu ulio wa ajabu, sivyo ilivyo. Hata hivyo, sasa acheni tuangalie njia fulani zenye matokeo ambazo watumishi wa Yehova wanaweza kufundisha wale wanaotafuta uhai wa milele.
Wewe Ungeitikiaje?
◻ Kwa nini tunaweza kusema kwamba Matendo 5:42 na 20:20 humaanisha kwamba wafuasi wa Yesu wanapaswa kuhubiri kutoka nyumba kwa nyumba?
◻ Tunajuaje kwamba Mungu anakubalia huduma ya nyumba kwa nyumba ya Mashahidi wa Yehova?
◻ Kwa habari ya huduma, ni nini kinachotakwa kwa wazee na watumishi wa huduma?
◻ Kutoa ushahidi kunapasa kuwe na nafasi gani katika maisha ya Mkristo?
[Picha katika ukurasa wa 10]
Katika 33 W.K., wanafunzi wa Yesu walitoa ushahidi kutoka nyumba kwa nyumba bila kuacha
[Picha katika ukurasa wa 13]
Paulo alifundisha “kutoka nyumba kwa nyumba.”Namna hii ya huduma inaendeshwa na Mashahidi wa Yehova leo