Kuonyesha Uthamini kwa Mawonyesho Mawili Yaliyo Makubwa Zaidi Sana ya Upendo
“Sisi twapenda kwa maana yeye alitupenda sisi kwanza.”—1 Yohana 4:19.
1. Ni mfano gani ambao Yesu alituwekea sisi?
NI JINSI gani sisi tunaweza kuonyesha kwa njia iliyo bora zaidi uthamini wetu kwa upendo mkuu ambao Yehova Mungu na Yesu Kristo wameonyesha kutuelekea sisi? Njia moja ya msingi ni kwa kumwiga Yesu, ambaye alitolea ushahidi bila kuchoka jina na Ufalme wa Baba yake. (1 Petro 2:21) Yeye alifanya hivyo katika nyumba za watu, katika masinagogi, katika hekalu, kando-kando za milima na kwenye ufuo wa bahari. Acheni tufikirie njia tisa zilizo wazi sana ambazo huenda zikawa zimetufungukia sisi.
Utendaji wa Nyumba kwa Nyumba
2. Ni jinsi gani wewe unaweza kuvumilia katika kazi ya nyumba kwa nyumba?
2 Njia ile ya kwanza, na labda iliyo wazi zaidi ya zote, ambayo katika hiyo tunaweza kuonyesha upendo wetu na uthamini ni kwa kwenda nyumba kwa nyumba tukiwa na habari njema za Ufalme wa Mungu. Kufanya hivyo kunataka uhuru halisi wa kusema kwa sababu kunaendelea wakati wote kuhusisha ndani mkabiliano wa moja kwa moja na watu wengine, ambao wengi wao watatuona kuwa wasumbuaji. Inahitaji upendo wa kikweli kwa Mungu na kwa jirani kuendelea kwenda mlango kwa mlango, tujapokutana na ubaridi, udhia, madharau, au upinzani wa moja kwa moja.—Linganisha Ezekieli 3:7-9.
3. Ni msingi gani wa Kimaandiko ambao wewe unao kwa utendaji wa nyumba kwa nyumba?
3 Kumbukumbu la maandishi ya Injili juu ya maagizo ya Yesu kwa mitume wake 12, na baadaye kwa waeneza evanjeli 70, linaonyesha waziwazi kwamba walipaswa kwenda nyumba kwa nyumba katika kuzihubiri habari njema za Ufalme wa Mungu. (Mathayo 10:5-14; Luka 10:1-7) Kwenye Matendo 20:20 Paulo anaeleza juu ya kwenda nyumba kwa nyumba. Maneno hayo yametumiwa katika maana ya kwamba yeye alifanya ziara za uchungaji, lakini mstari 21 hauachi shaka lo lote juu ya utendaji uliomaanishwa, kwa maana Paulo anaongeza hivi: “Nikiwashuhudia Wayahudi na Wayunani”—si ndugu na dada Wakristo—“wamtubie Mungu, na kumwamini Bwana wetu Yesu Kristo.” Wanapofanya ziara za uchungaji, kwa kawaida mzee hahimizi ‘kutubia Mungu na kumwamini Yesu.’ Bali, yeye anatia Wakristo wenzake moyo wawe na uthamini ulioongezeka juu ya mikutano au huduma au anawasaidia matatizo ya kibinafsi.
4. Ni nini kinachotutia moyo tushiriki katika kuhubiri nyumba kwa nyumba?
4 Si kwamba kuna msingi unaofaa wa Kimaandiko tu wa kwenda kwetu nyumba kwa nyumba bali pia kuna matunda ya utendaji huo yanayoonyesha kwamba baraka ya Yehova iko juu yao. Ndiyo, “hekima inathibitishwa kuwa adilifu na kazi zayo.” (Mathayo 11:19, NW) Mara kwa mara, wale wanaoenda nyumba kwa nyumba wameona ushuhuda wa mwelekezo wa kimalaika unaowaongoza kwa wale wanaoona njaa na kiu ya uadilifu. Mwenye nyumba amesema kwamba yeye alikuwa amekuwa akisali kuomba msaada na kwamba ziara ya Shahidi huyo ilijibu sala hiyo.
5. Ni msaada gani mzuri sana tulio nao kwa huduma yetu ya nyumba kwa nyumba, nao unaweza kutusaidia kwa njia gani mbalimbali?
5 Tuna msaada mkubwa kama nini kwa ajili ya utumishi wa shambani katika kitabu Reasoning From the Scriptures! Hicho kina tangulizi nyingi za kuvutia za kuanzisha mazungumzo ya Biblia na pia habari zenye mafaa juu ya mambo mengi sana ya Kimaandiko au kidini. Kwa hiyo, zaidi ya kwenda ukiwa nacho sikuzote, endelea ukirejeza kwacho. Hasa mapainia wameeleza wana uthamini mkuu kwa msaada bora huo wa utumishi wa shambani. Je! wewe ungeweza kudhihirisha unathamini upendo wa Mungu kwa kutumia zaidi kitabu hicho, na kwa matokeo zaidi?
6. Tunakuwa katika hali ya kupata manufaa gani ya kibinafsi kwa kwenda nyumba kwa nyumba tukiwa na ujumbe wa Ufalme?
6 Haitupasi kusahau uhakika wa kwamba sisi binafsi tunapata manufaa makubwa kwa kushiriki katika huduma ya nyumba kwa nyumba. Wakati sisi Wakristo tunapotendesha kazi imani yetu, inakuwa imara zaidi; tunaposema kwa usadikisho, usadikisho wetu unatiwa nguvu. Hatuwezi kueleza wengine juu ya tumaini letu bila tumaini letu wenyewe kuwa jangavu zaidi. Ili kusitawisha matunda ya roho yanayotajwa kwenye Wagalatia 5:22, 23, hakuna cho chote kinachofanana na kushiriki kwa ukawaida katika huduma ya nyumba kwa nyumba. Ni lazima iwe hivyo tu, kwa maana Biblia inatuhakikishia hivi: “Mtu mkarimu atasitawi; yeye anayeburudisha wengine ataburudishwa mwenyewe.”—Mithali 11:25, New International Version.
Kufanya Ziara za Kurudia
7, 8. Ni kwa sababu gani za kiakili na zenye mafaa inatupasa tufanye ziara za kurudia?
7 Njia ya pili kwetu kuitikia upendo ambao Mungu na Kristo wametuonyesha sisi ni kwa kufanya ziara za kurudia juu ya watu ambao hapo kwanza walionyesha kupendezwa na ujumbe wa Ufalme. Paulo na Barnaba walihangaikia wale ambao walikuwa wamehubiri. (Matendo 15:36) Kwa kweli, upatani katika kutenda mambo unataka kwamba sisi tufanye ziara za kurudia. Tunapokuwa tukitoa ushahidi mlango kwa mlango, kwa njia isiyo rasmi, au katika barabara, tunakuwa tukitafuta wale “wanaoona uhitaji wao wa kiroho.” (Mathayo 5:3, NW) Kwa wazi, kuwapa wao kile ambacho ni kama bilauri moja ya maji ya kiroho au kipande kimoja cha mkate wa kiroho hakutoshi kwa vyo vyote. Ili wao waje kwenye barabara inayoongoza kwenye uzima, wanahitaji msaada zaidi.
8 Jitihada zetu za kwanza zingeweza kufananishwa na kupanda mbegu za ukweli. Lakini kama vile mtume Paulo alivyoonyesha kwenye 1 Wakorintho 3:6, 7, mengi zaidi yanahitajiwa. Kupanda kwake hakukutosha. Mbegu zilitaka maji pia, kama yale ambayo Apolo alizitilia. Ndipo ingeweza kutazamiwa kwamba Mungu angefanya zikue. Jambo hilo lililo sehemu ya kazi hii linaachiliwa hivi tu na wengine, na bado wengi wanalifikiria kwa kweli kuwa ndilo jambo lililo rahisi zaidi ya yote katika huduma ya Kikristo. Kwa sababu gani? Kwa sababu watu tunaowazuru wamekwisha tayari kuonyesha kupendezwa fulani.
Kuongoza Mafunzo ya Nyumbani ya Biblia
9. Kwa sababu gani kuongoza funzo la nyumbani la Biblia kunapasa kuwe mradi wako?
9 Wakati ziara za kurudia zinapofanywa kwa ukawaida juu ya watu ambao wameonyesha kupendezwa na ujumbe wa Ufalme, mara nyingi tokeo linakuwa funzo la nyumbani la Biblia—hiyo ikiwa ni njia ya tatu ambayo katika hiyo sisi tunaweza kuonyesha uthamini wetu. Hilo kwa kweli linaweza kuwa ndilo jambo lenye kufurahisha na kuthawabisha zaidi ya yote katika huduma yetu. Kwa sababu gani? Basi, ni furaha kama nini kuona watu wakikua katika maarifa na uthamini wa kweli za Biblia, kuwaona wakifanya mabadiliko katika maisha zao, na kuwasaidia mpaka wajiweke wakfu kufanya mapenzi ya Mungu na kubatizwa! Watu kama hao wanaweza kikweli kuonwa kuwa watoto wetu wa kiroho, na sisi kuwa wazazi wao wa kiroho.—Linganisha 1 Wakorintho 4:14, 15; 1 Petro 5:13.
10. Ni mfano gani halisi unaoonyesha ubora wa kuongoza mafunzo ya Biblia?
10 Fikiria mfano halisi. Mmisionari mmoja alipokuwa akienda nyumba kwa nyumba katika kisiwa kimoja cha Karibea alikuta mwanamume na mwanamke mahipi ambao nyumba yao ilikuwa cho chote kile, lakini si nadhifu wala yenye utaratibu. Hata hivyo wao walionyesha kupendezwa. Msaada wa kujifunzia Biblia ukaangushwa, na funzo la nyumbani la Biblia likaanzwa pamoja na watu hao wawili, ambao hawakuwa wamefunga ndoa ingawa walikuwa na watoto kadha. Funzo lilipoendelea, nyumba ile ilianza kuonekana zaidi kuwa yenye kupendeza macho ndivyo pia watu hao wawili na watoto wao. Muda si muda watu hao wawili wakamwomba yule mmisionari awafungishe ndoa, kuwafungulia njia ya kubatizwa. Halafu siku moja ndugu huyo mpya akaonyesha kwa furaha leseni yake ya udereva wa gari, ikiwa ndiyo ya kwanza kabisa yeye kupata. Ndiyo, kabla hajawa mmoja wa Mashahidi wa Yehova hakuwa ameona uhitaji wa kupata ama leseni ya ndoa ama leseni ya udereva, lakini sasa alikuwa akitii sheria za Mungu hata zile za Kaisari.
Kutoa Ushahidi Barabarani
11, 12. (a) Tuna kitia-moyo gani cha Kimaandiko cha kushiriki kutoa ushahidi wa barabarani? (b) Kuna sababu gani za kutufanya tutende hivyo?
11 Njia ya nne ambayo katika hiyo sisi tunaweza kuonyesha uthamini wetu kwa yale ambayo Mungu na Kristo wametufanyia ni kwa kutoa ushahidi wa barabarani. Tunaposhiriki, tunakuwa tukisaidia kutimiza Mithali 1:20, 21 (NW) katika njia iliyo halisi kidogo: “Hekima ya kweli yenyewe inaendelea kulia kwa sauti kubwa katika barabara yenyewe. Katika wanja za watu wote inaendelea kutokeza sauti yayo. Kwenye mwisho ule wa juu zaidi wa barabara zenye makelele inapaaza sauti.”
12 Ziko sababu nzuri nyingi sana za kutufanya tushiriki kwa ukawaida katika jambo hilo la kuhubiri Ufalme. Katika maeneo mengi, inakuwa vigumu zaidi na zaidi kupata watu nyumbani. Wao wanakuwa wakishiriki ama katika namna fulani ya tafrija, wakinunua vitu dukani, au wakiwa kazini. Watu wengi wanaishi katika nyumba zenye ghorofa au majengo makubwa yenye nyumba nyingi, bila kutaja wale wanaoishi katika mahoteli. Lakini Kwa kawaida kuna watu wanaoweza kuonekana katika barabara.
13. Ushahidi wa barabarani unaweza kuwa na matokeo gani? Toa mfano.
13 Mzee mmoja katika United States anaongoza kwa sasa mafunzo manne ya nyumbani pamoja na watu aliokutana nao mara ya kwanza katika utendaji wa kutoa ushahidi barabarani. Bila shaka, yeye hasimami mahali pamoja kama bubu (ingawa katika nchi nyingi hivyo tu ndivyo sheria inavyoruhusu mtu kufanya). Bali, akiwa na tabasamu ya kirafiki na sauti yenye uchangamfu, yeye anafikia watu ambao wamesimama, wakingojea basi, au wanaotembea kistarehe tu. ‘Matamko yake yana neema, yakiwa yamekolezwa chumvi,’ huku akitumia utambuzi ajue jinsi ya kufikia kila mmoja. (Wakolosai 4:5, 6; 1 Petro 3:15, NW) Si kwamba amepata mafunzo ya nyumbani ya Biblia tu kwa ushahidi huo wa barabarani bali pia ana matokeo sana katika kuangushia wengi vitabu. Ndiyo, kwa kujipamba kwa unadhifu na ukiwa na tabasamu ya kirafiki pamoja na uhuru wa kusema, wewe unaweza kuwa na matokeo mazuri sana katika kutoa ushahidi barabarani. Kwa kweli, hivi majuzi Mashahidi watano waliangusha zaidi ya nakala 30 za kitabu Life—How Did It Get Here? By Evolution or by Creation? katika maeneo ya maduka, na vingi vya vitabu hivyo waliangushiwa watu wenye kuketi katika magari yao.
Kutoa Ushahidi wa Vivi Hivi
14. Ni jinsi gani ubora wa kutoa ushahidi wa vivi hivi unavyoonekana wazi?
14 Njia ya tano ya kuonyesha uthamini kwa upendo mkuu ambao Mungu na Kristo wametuonyesha sisi ni kwa kutoa ushahidi wa vivi hivi. Jambo hilo mara nyingi limekuwa na matokeo kama nini, katika kupata watu wanaoona njaa na kiu ya uadilifu na pia katika kuangusha vitabu! Hakika hiyo ni njia moja ambayo kwayo sisi tunaweza kutii shauri linalopatikana kwenye Waefeso 5:15, 16, ‘kununua kabisa wakati unaofaa kwa ajili yetu wenyewe.’ (NW) Mmisionari mmoja alianzisha maongezi pamoja na abiria mwenzake katika taksi. Mwanamume yule alionyesha kupendezwa. Ziara za kurudia zilifanywa na funzo la Biblia likaanza. Leo mwanamume huyo ni mzee Mkristo. Mahali kwingine mzee alianza maongezi na mwanamke ambaye, ikawa kwamba, yeye alikuwa akibadili dini yake aolewe na Myahudi. Yeye alitaka kujua ni nani aliyekuwako kwanza, Musa, Noa, Daudi, na vivyo hivyo. Mzee akamwambia mwanamke huyo kwamba alichohitaji ni kitabu Hadithi za Biblia, ambacho kinaonyesha matukio ya Biblia kulingana na utaratibu wa tarehe. Ingawa mwanamume alikuwa mtu asiyejulikana, mwanamke huyo alimpa kwa vyepesi jina lake na anwani na mchango uliohitajiwa ili aweze kumpelekea kitabu hicho kwa njia ya posta.
15. Ni nini kitakachotusaidia tuwe chonjo kutumia nafasi za ushahidi wa vivi hivi?
15 Nyakati nyingine, kwa kuogopa kwamba huenda tukajibiwa vikali, huenda tukasita-sita kuanza maongezi na msafiri aliyeketi karibu nasi. Ingawa hivyo, ni mara nyingi kama nini tunapothawabishwa sana tukikaza moyo tuwe na ushujaa wa kufanya hivyo! Kuthamini wema wa Mungu na uhitaji ambao watu wanao kutatusaidia tuwe na ushujaa unaohitajiwa kabisa. Ndiyo, kumbuka kwamba “Mungu hakutupa sisi roho ya woga-woga, bali roho ya nguvu, ya upendo na ya kujitia nidhamu.”—2 Timotheo 1:7, NW.
Kukaribisha Watu Tusiowajua
16. Kwa sababu gani inatupasa tuwe chonjo kuwaona watu tusiowajua wanaotembelea Jumba la Ufalme letu?
16 Njia ya sita ambayo katika hiyo sisi tunaweza kuonyesha shukrani zetu kwa Mungu na Kristo ni kwa kukaribisha watu tusiowajua ambao wanakuja kwenye Jumba la Ufalme letu. Upendo kwa jirani unapasa kutufanya tuwe chonjo kuona mtu ye yote tusiyemjua anayetembelea mahali petu pa ibada. Acheni tujitahidi kumfanya ahisi amestarehe, ahisi kwamba yeye yumo miongoni mwa rafiki wanaopendezwa kwa moyo mweupe na masilahi yake ya kiroho. Inaelekea zaidi kwamba kilichomleta pale si utafiti mtupu tu. Huenda yeye akawa anaona kweli kweli njaa na kiu ya uadilifu. Kumjali kikweli huenda kukafanya funzo la nyumbani la Biblia lianzwe, hivyo akisaidiwa aingie katika barabara inayoenda uzimani. (Mathayo 5:3, 6; 7:13,14) Kwa kweli, jambo ilo hilo limetukia mara nyingi. Mmisionari mmoja kutoka darasa lile la kwanza la Shule ya Biblia ya Gileadi ya Mnara wa Mlinzi alisema kwamba wanafunzi wake wawili wa Biblia wenye maendeleo mazuri zaidi walikuwa wale aliokuta kwanza kwenye Jumba la Ufalme.
Kutoa Ushahidi kwa Kuandika Barua
17. Kutoa ushahidi kwa kuandika barua kunaweza kuwa na matokeo gani?
17 Njia ya saba ya sisi kutoa ushahidi, kwa kuitikia upendo ambao Mungu na Kristo wametuonyesha, ni kwa kuandika barua. Wale wanaotumia namna hiyo ya kutoa ushahidi wanapata mara nyingi barua za majibu yenye uthamini mwingi. Hiyo ni njia inayotumiwa mara nyingi na wahudumu wa wakati wote ambao huenda kwa muda wasiweze kwenda nyumba kwa nyumba kwa sababu ya udhaifu wa kimwili. Kwa mfano: Kulikuwa na jamaa moja yenye watoto 12, siku moja baba alikuja nyumbani akakuta watano kati yao walipigwa risasi bila huruma na mmoja wa wapenzi wa binti yake. Alitafuta faraja miongoni mwa viongozi wa kidini wa Jumuiya ya Wakristo, lakini wapi. Halafu siku moja akapokea barua kutoka kwa mtu asiyemjua, Shahidi aliyekuwa amesoma katika magazeti juu ya msiba wake na aliyetaka kumfariji, akatia ndani ya bahasha kitabu Kweli. Hicho hasa ndicho kitu alichokuwa akitafuta mwanamume yule. Leo yeye, pia, ni Shahidi mwenye bidii.a
Kupiga Simu
18, 19. Ni njia gani nyingine ya kuhubiri habari njema ambayo wengine wameiona kuwa yenye matokeo, na kwa sababu gani?
18 Kutaja njia ya nane ya kutoa ushahidi, kuna ile nafasi ya kutumia simu katika kuzihubiri habari njema za Ufalme. Hiyo inazidi kuwa namna ya kufurahisha na yenye matokeo ya kutoa ushahidi. Mashahidi wengi zaidi na zaidi wanaendelea kuwa na ustadi katika jambo hilo la huduma, nalo lina mengi ya kulipendekeza. Kwa njia hiyo sisi tunafikia watu fulani ambao tunashindwa kuwakuta katika utendaji wa nyumba kwa nyumba. Wakati ushahidi wa kutumia simu unapofanywa kwa akili, kwa fadhili, busara, na ustadi, wengine wamepata itikio zuri hata zaidi ya walilopata kwa kutembelea watu hao nyumbani kwao.
19 Kundi moja la Kijapani katika nchi moja inayosema Kiingereza linatumia kitabu cha simu kuwa sehemu ya eneo lao. Wahubiri wanapigia simu watu wenye majina ya Kijapani na kupanga kufanya ziara ya kibinafsi mahali wanapopata mtu wa kupendezwa. Wao wameanza mafunzo mengi sana kwa njia hiyo.
Kutoa Ushahidi kwa Mwenendo Mwema
20, 21. Mwenendo wetu unaweza kuwa na matokeo gani mema? Toa mfano.
20 Njia ya tisa ambayo katika hiyo sisi tunaweza kumletea Mungu sifa ni kwa mwenendo wetu mwema. Mwandikaji Mrusi wa habari za jarida alisema wakati mmoja kwamba mwenendo wetu mzuri sana ulikuwa ndio mahubiri yetu yaliyo mazuri zaidi. Kwa kweli, magazeti yamerudia-rudia kueleza juu ya maadili bora sana ya Mashahidi wa Yehova. Gazeti moja liliripoti hivi: “Mashahidi wa Yehova wanatambulika kuwa ndio watu walio wanyofu zaidi katika Jamhuri ya Muungano wa Ujeremani.” Msichana mmoja Shahidi alimletea mwalimu wake broshua Shule mwanzoni mwa muhula wake wa shule. Mwalimu huyo wa kiume aliikataa kwa maneno makavu, akisema hakutaka cho chote kilichohusiana na Mashahidi. Ijapokuwa hivyo, baada ya muda mwenendo wake mzuri sana ulifanya mwalimu huyo amsifu kwa njia ya juu kabisa na akabadili kabisa mwelekeo wake juu ya Mashahidi. Yenye umaana kama huo ni barua ambayo wazazi Mashahidi walipokea kutoka kwa mwalimu wa shule ya watoto wao: “Kipimo kisichoweza kukanwa cha mafanikio ya imani zenu ni watoto wenu.”
21 Wale walio katika ulimwengu hawawezi kusema lo lote juu ya Mashahidi wa Yehova bila kuletea Mungu na Kristo heshima. Ndivyo inavyopasa iwe. Je! Yesu hakusema kwamba inatupasa tuache nuru yetu ing’ae ili watu waweze kuona kazi zetu njema na kumpa utukufu Baba yetu wa kimbingu? (Mathayo 5:16) Kwa kweli, kwa mwenendo wetu mzuri sana tunaweza kuupamba ukweli. (Tito 2:10) Kwa uhakika jambo la kwamba mwenendo wetu mzuri sana unaletea Mungu na Kristo sifa na kusaidia wengine waingie katika njia ya kwenda uzimani ni sababu yenye nguvu nyingi ya kutufanya tuhangaike sana kufanya mwenendo wetu uwe nyakati zote usioweza kusutwa.
22. Ni katika ipi ya njia za kuonyesha uthamini ambayo wewe utajitahidia, na kwa sababu gani?
22 Kama vile tumeona, ziko njia nyingi ambazo kwazo tunaweza kuonyesha uthamini wetu kwa yote ambayo Yehova na Yesu Kristo wametufanyia, na hasa katika mawonyesho yao makuu ya upendo. Katika kuendelea kwetu kufanya hivyo, tunaweza kuthibitisha upendo wetu kwa jirani.—Marko 12:30, 31.
23. Ni kwa njia gani ya mwisho wewe unaweza kuonyesha uthamini kwa Mungu na Yesu?
23 Mwisho acheni tuone kwamba tunaweza kuonyesha uthamini wetu kwa mawonyesho yale mawili yaliyo makubwa zaidi sana ya upendo kwa kuadhimisha Chakula cha Jioni cha Bwana. Katika usiku wake wa mwisho akiwa duniani kama mwanadamu, Yesu alianzisha mlo wa kukumbukwa kila mara wa mkate na divai, vinavyowakilisha mwili wake na damu yake. Aliamuru kwamba mlo huo uwe ukiadhimishwa kwa kukumbuka yeye. (1 Wakorintho 11:23-26) Mwaka huu Chakula cha Jioni cha Bwana kitaangukia siku ya Jumapili, Aprili 12, baada ya jua kushuka. Katika sehemu zote za dunia Mashahidi wa Yehova watakuja pamoja kwa kutii amri ya Yesu. Usikikose!
[Maelezo ya Chini]
a Kwa maelezo marefu ona Amkeni! toleo la Julai 1987.
Maulizo ya Kurudia
◻ Ni jinsi gani na wapi Yesu alitoa ushahidi?
◻ Ni kwa njia zipi sisi tunaweza kuiga Yesu katika kuonyesha uthamini kwa upendo mkuu wa Mungu?