Michango Inayoufurahisha Moyo
KATIKA sanduku lililo chini mna barua mbili halisi ambazo dini katika Jumuiya ya Wakristo zinapelekea watu. Je! wewe unaziona kuwa zenye kuchangamsha moyo? Ni vigumu kusema hivyo! Hata hivyo, pesa zinahitajiwa kabisa kwa njia nyingi leo ili kusaidia kuendeleza ibada ambayo Mungu anakubali. Kwa hiyo, je! ni kwa njia gani tengenezo la Kikristo linapata pesa zinazohitajiwa ili kufanya mapenzi ya Mungu?
Jibu linaweza kupatikana kwa kuchunguza desturi za kundi la Kikristo la karne ya kwanza na maneno ya Mwanzishi walo, Yesu Kristo. “Wapeni watu vitu, nanyi mtapewa,” Yesu anashauri kwenye Luka 6:38. “Kipimo cha kujaa na kushindiliwa, na kusukwa-sukwa hata kumwagika, ndicho watu watakachowapa vifuani mwenu. Kwa kuwa kipimo kile kile mpimacho ndicho mtakachopimiwa.” Mfano huo ulisikika kuwa wenye kufaa barabara kwenye masikio ya wasikilizaji wa Yesu wakati huu. Mavazi yao ya Mashariki yalikuwa na mfuko uliotengenezwa ndani wa kuchukulia au kuwekea vitu. Neno ‘kifua’ (Kigiriki, kolʹpos), linamaanisha shimo linalofanyizwa na mkunjo wa vazi refu lililolegea-legea pale juu tu karibu na mshipi, na ndani ya mfuko huo ndimo wauzaji walikuwa wakimwaga vitu vilivyonunuliwa kwa kupimwa.
Ni wafanya biashara wangapi ambao wangeshindilia kwanza vitu hivyo ndipo wavisuke-suke ili kuingiza vingi iwezekanavyo ndani ya shimo la vazi la mnunuzi, hata kufikia kumwagika? Ni wachache sana, ikiwa kunao! Ingawa hivyo, Wakristo wangelipwa kwa wingi kwa kuonyeshwa rehema wakichanga kwa ukunjufu mwingi vitendo vya kuwaonyesha huruma wale walio katika uhitaji. Kipimo cha jinsi sisi wenyewe tunavyotendea wengine, iwe ni kwa ukarimu au kwa unyimi-nyimi, kinatumiwa kupima kiasi ambacho sisi tutavuna kwa kufanya hivyo, si kutoka kwa wanadamu tu bali, kwa umaana zaidi, kutoka kwa Yehova Mungu.—Linganisha 2 Wakorintho 9:6; Wagalatia 6:7.
Kwa kujichanga kwa ukunjufu mwingi yeye mwenyewe na nguvu zake, Yesu aliona matokeo ya kanuni hiyo yakifanya kazi. Yeye alikuwa ndiye utu wa ukarimu. Aliwahubiria maskini habari njema za Ufalme wa Mungu kwa bidii na bila ubinafsi. Yeye hakutoza pesa kwa utumishi wake wala hakutazamia alipwe mshahara fulani. Hata hivyo yeye hakupungukiwa kamwe na cho chote. Katika huduma yake watu walimsaidia kwa ukarimu na kwa kujitolea.—Luka 7:22; 8:1-3.
Upaji wa Yesu ulitia nguvu mpya katika mioyo ya wengine—Simoni Petro, Yakobo, Yohana, na wengine wa wale 12—waonyeshe ukarimu kama huo kwa kuacha vitu vyote ili washiriki katika huduma. (Luka 5:10, 11; 9:1-6) Namna hiyo ya mchango inazaa matokeo yale yale leo. Mashahidi wa Yehova wanatoa wakati wao, nishati, na mali zao ili kuacha wengine wasikie habari njema za Ufalme wa Mungu. Na wakati wao wanaodhihirisha ukarimu kwa kuhubiri, watu zaidi wanachochewa waonyeshe ukarimu kwa kushiriki pamoja nao katika kueneza habari njema.—Mithali 11:25
Ijapokuwa hivyo, kuna jambo fulani kuongezea mchango wetu wa kuhubiri ambalo linachangamsha. Kuchanga pesa tukiwa na kusudio linalofaa na kwa sababu zinazofaa ni sehemu ya ibada ya kweli. (2 Wakorintho 9:9-14) Jambo hilo lilifanywaje na Wakristo wa karne ya kwanza?
Jinsi Wakristo wa Kwanza Walivyofanya
Katika siku ya kwanza ya kuzaliwa kwa kundi la Kikristo katika mwaka 33 W. K., ‘ushiriki wa mtu na mwenzake, kula vyakula, na kutoa sala’ ni mambo yaliyozoewa na waongofu wale 3,000 waliokuwa wamebatizwa karibuni. Kwa sababu gani nzuri? Ili kufanya iwezekane kuikaza imani yao changa ‘kwa kuwa wakidumu katika fundisho la mitume.’—Matendo 2:41, 42.
Wayahudi na wageni waliobadilika kufuata dini ya Wayahudi walikuwa wamekuja Yerusalemu wakipanga kukaa kwa kipindi cha Sikukuu ya Pentekoste tu. Lakini wale ambao walipata kuwa Wakristo walitamani kubaki kwa muda mrefu zaidi wajifunze mengi zaidi ili kuitia nguvu imani yao mpya. Jambo hilo lilitokeza tatizo la dharura la chakula na mahali pa kulala. Wengine wa watu hao wenye kuzuru hawakuwa na pesa za kuwatosha, hali wengine walikuwa na ziada. Kwa hiyo mchango wa muda ulifanywa na wenye uhitaji wakagawiwa vitu vya kimwili.—Matendo 2:43-47.
Kuwalisha na kuwapa mahali pa kukaa kulisimamiwaje? Mitume, wakitenda kama baraza linaloongoza, ndio waliopanga ukusanyaji na ugawaji wa vitu vilivyochangwa. Hivyo, matukio ya kwanza ya kundi la Kikristo hayawaonyeshi washiriki wakihesabu vitu vyao vya kimwili kuwa vyao wenyewe bali kuwa kitu cha kutumiwa kwa faida ya kundi zima. (Matendo 2:44; 4:32) Kwa kuongeza, “wote wale waliokuwa wenyeji wa mashamba au nyumba wakawa wakiziuza na kuleta thamani za vitu vilivyouzwa na wakawa wakiziweka miguuni pa mitume. Ugawaji ukawa ukifanywa kwa kila mmoja, sawasawa na vile yeye angekuwa na uhitaji.”—Matendo 34, 35, NW.
Kuuza shamba na majengo na kugawana vitu vyote hivyo na wengine kulikuwa jambo la mtu mwenyewe kujitolea. Hakuna mtu aliyeshurutishwa kuuza wala kutoa upaji; wala hiyo haikuwa njia ya kutia watu moyo wawe maskini. Wazo linaloonyeshwa si kwamba washiriki walio matajiri zaidi waliuza uwanja wao wote na hivyo wakawa maskini. Bali, kwa sababu ya kuhurumia waamini wenzao chini ya hali zilizokuwako wakati huo, wao waliuza uwanja na kuchanga pesa zote zilizopatikana ili waandae kilichohitajiwa kwa kusudi la kusogeza mbele faida za Ufalme.—Linganisha 2 Wakorintho 8:12-15.
Vilevile leo, watu mmoja mmoja wameandikisha kisheria uwanja wao uwe haki ya Sosaiti ya Mnara wa Mlinzi au wakataja tengenezo hili katika wasia wao, na kwa njia hiyo wakatolea Baraza Linaloongoza la Mashahidi wa Yehova hiari ya matumizi ya pesa zao mahali ambako uhitaji wa Ufalme ni mkubwa zaidi ya pengine-po. Upaji wote huo unasaidia kueneza nuru ya kiroho kama ilivyokuwa kwenye Pentekoste. Wo wote wa upaji huo haufanywi kamwe kwa kuamrishwa.
Ukawaida Ndio Ufunguo
Yapata miaka 20 baada ya Pentekoste ya 33 W.K., mtume Paulo anakumbusha kundi la Korintho juu ya uhitaji wa mchango fulani. “Sasa kuhusu ule mkusanyo ambao ni kwa ajili ya watakatifu, sawasawa na vile mimi nilivyotoa maagizo kwa makundi ya Galatia, fanyeni hivyo pia ninyi wenyewe,” yeye anaandika. Ndipo anapoongeza shauri hili kidogo: “Kila siku ya kwanza ya juma kila mmoja wenu na aweke kando kitu fulani akibani katika nyumba yake mwenyewe kadiri yeye anavyofanikiwa, ili kwamba nifikapo mikusanyo haitatukia wakati huo. Lakini wakati nitakapofika huko, watu wo wote ambao ninyi mnakubali kwa barua, hao mimi nitatuma wapeleke zawadi yenu ya fadhili Yerusalemu.” Azimio la kiasi cha kutoa lilionekana kuwa lilifanywa kwa kutiwa ndani jamaa nzima, iwe ni tajiri au maskini, kwa sababu utoaji huo ungetukia kwenye ‘nyumba yao wenyewe.’—1 Wakorintho 16:1-3, NW.
Dokezo la Paulo juu ya namna ya kuchanga linaweza kutumiwa na washiriki wa kundi leo. Jinsi gani? Ukawaida ndio ufunguo. Ili kundi lenu liweze kulipa kodi ya kila mwezi na gharama za kudumisha mahali pa mikutano yenu au Jumba la Ufalme, itahitajiwa “kuchanga, sana-sana si kiasi chenyewe, bali ukawaida wa kuweka kando kitu fulani kila juma au mwezi kwa ajili ya faida za Ufalme,” inaandika afisi ya tawi katika Peru. Je! wazo hilo linakuvutia wewe? Hata watoto wanaweza kufundishwa kuthamini jinsi ukawaida katika kuchanga ulivyo sehemu ya ibada yao.
Basi, wakati michango inapofanywa kwa kusudio linalofaa na kwa sababu inayofaa, inachangamsha moyo wa Mungu na wanadamu pia. Linasema hivi andiko la 2 Wakorintho 9:7: “Kila mtu na atende kama alivyokusudia moyoni mwake, si kwa huzuni, wala si kwa lazima; maana Mungu humpenda yeye atoaye kwa moyo wa ukunjufu.”
[Sanduku katika ukurasa wa 28]
Njia Zinazotumiwa na Jumuiya ya Wakristo
“Bwana alinena nami ili nikuandikie barua hii . . . Hakuna jambo lo lote ulimwenguni lingenifanya nikuandikie wewe barua kama hii kama Mungu asingalinena nami nikuandikie wewe barua hii na kukuambia kwamba ukifanya haraka sana kuleta dola 20.00 ili unisaidie mimi sasa yeye angekubariki kwa njia ambayo hujapata kubarikiwa kamwe.”—Barua ya namna ya fomu kutoka kwa padri mmoja Mkanada iliyotiwa sahihi, “Mchungaji na Mwenzi wako.”
“Fungua haya Mafuta Matakatifu ya Upakaji, (usipoteze hata tone moja). Yesu yumo katika mafuta haya ya imani. Yatumie kuchora msalaba katika kipaji cha uso wako, ndipo kwa imani uingie ndani ya chumba fulani wewe peke yako na utoe humo pesa zo zote ulizo nazo na uchore msalaba juu ya kila noti ili Mungu aponye matatizo yako ya pesa, na kuzidisha pesa zako kama katika Luka 6:38 . . . Wakati unapopaka pesa ulizo nazo mafuta haya matakatifu ya upakaji, paka kila noti uliyo nayo. Chora msalaba katika kila noti, ndipo, ikiwa noti iliyo kubwa zaidi ambayo unayo ni ya dola 20.00, dola 10.00 au dola 5.00, uichore msalaba kwa mafuta ya upakaji na kuipeleka kwa njia ya posta ikafanye kazi ya Mungu.”—Barua ya namna ya fomu kutoka kwa “reverendi” katika United States iliyotiwa sahihi, “Nabii wa Mungu kwa miaka 30.”
[Sanduku katika ukurasa wa 30]
Jinsi Wengine Wanavyochangia Kazi ya Ufalme
◆ ZAWADI: Upaji wa kipesa unaweza kupelekwa moja kwa moja kwenye afisi ya tawi ya Sosaiti. Uwanja na majengo yanaweza pia kutolewa kama upaji. Barua fupi yenye kusema kwamba huo ni upaji wa kujitolea inapasa iambatane na michango hiyo.
◆ MPANGO WA UPAJI WENYE MASHARTI: Pesa, hisa, dhamana, na uwanja na majengo yaliyomo vinaweza kutolewa na kuipa Sosaiti kwa masharti ya kwamba uhitaji wa kibinafsi ukitokea, mpaji arudishiwe vitu hivyo. Njia hiyo inaepuka ile gharama na matatizo yanayoweza kutokea wakati hatua rasmi zinapochukuliwa kuthibitisha kwamba wasia unaohusu mali hizo uliandikishwa kisheria. Inahakikisha pia kwamba Sosaiti itapokea mali hizo baada ya mtu huyo kufa.
◆ BIMA: Sosaiti ya Mnara wa Mlinzi inaweza kutajwa kuwa ndiyo mfadhiliwa wa mpango wa mtu wa bima ya maisha baada ya yeye kufa. Pesa zilizowekwa benki pia zinaweza kukabidhiwa mikononi mwa Sosaiti. Lo lote la mambo hayo mawili linapofanywa, Sosaiti inapasa kujulishwa.
◆ WASIA: Uwanja na majengo au pesa vinaweza kutolewa kwa kutumia wasia ulioandikishwa kisheria ili viwe vya Sosaiti ya Mnara wa Mlinzi baada ya mtu kufa. Nakala ya wasia huo inapasa ipelekewe kwa Sosaiti.
Habari au mashauri zaidi juu ya mambo hayo zinaweza kupatikana kwa kuandikia afisi ya tawi ya Sosaiti.
[Picha katika ukurasa wa 31]
Njia ambazo katika hizo Baraza Linaloongoza la Mashahidi wa Yehova limegawanya michango yako ili kusogeza mbele faida za Ufalme katika miaka miwili iliyopita:
Kugharimia wamisionari na mapainia wa pekee zaidi ya 12,700
Kujenga au kupanua matawi 40
Kusaidia waangalizi wanaosafiri zaidi ya 5,000 pamoja na wake zao
Kununua mashine nane mpya za rotari zenye mwendo wa kasi sana
Kuwaandalia mahitaji yao Wanabetheli zaidi ya 8,400
Kusaidia wanaopatwa na maafa