Maoni ya Biblia

Msamaha wa Mung Ni Kamili Kadiri Gani?

“Nahisi kwamba Mungu hatasamehe kamwe dhambi zangu. Hawezi kunitaka kamwe kwa ajili ya yale niliyofanya.”—Gloria.

GLORIA hakuwa na tatizo lolote kueleza wengine kwamba Yehova angeweza kusamehe dhambi zao.a Lakini alipofikiria makosa yake mwenyewe, Gloria alihisi amekuhumiwa. Aliona kama hangeweza kusamehewa na Yehova.[1]

Kutambua kitendo kibaya au mwendo usiofaa kwaweza kusumbua dhamiri. “Nilikuwa nimechoka kutokana na kulia mchana kutwa,” akaandika Daudi baada ya yeye kutenda dhambi. “Nguvu zangu zilikwisha kabisa.”[2] (Zaburi 32:3, 4, Today’s English Version; linganisha Zaburi 51:3.) Kwa furaha, Yehova hufurahia kusamehe makosa. Yeye ni “tayari kusamehe.”—Zaburi 86:5; Ezekieli 33:11.

Hata hivyo, Yehova huuona moyo. Msamaha wake hautegemei msahama wa kijuu-juu tu. (Kutoka 34:7; 1 Samweli 16:7) Ni lazima mtenda dhambi akiri waziwazi dhambi yake, aonyeshe sikitiko la kweli, na kukataa mwendo wake mbaya kuwa kitu cha kukirihiwa na chenye kuchukiwa. (Zaburi 32:5; Warumi 12:9; 2 Wakorintho 7:11) Ndipo tu mtenda mabaya awezapo kusamehewa na apate “nyakati za kuburudishwa” kutoka kwa Yehova.—Matendo 3:19.

Lakini hata baada ya kutubu, watu fulani bado huhisi wamehukumiwa. Je! wabebe mzigo wa hatia milele? Kuna faraja gani katika Biblia kwa ajili ya wale ambao wametubu dhambi zao na kuziacha nyuma, lakini ambao bado wahisi uchungu wa moyoni?—Zaburi 94:19.

Kuondoa Mzigo

Akisononeka juu ya makosa yake, Daudi alisali hivi kwa Yehova: “Utazame teso langu na taabu yangu; [uniachilie, NW] dhambi zangu zote.” (Zaburi 25:18) Hapo Daudi alimwomba Yehova afanye zaidi ya kusamehe tu. Aliomba kwamba Yehova ‘amwachilie’ dhambi zake, kwamba aziondoe au azichukue, azibebe mbali.[3] Dhambi ina matokeo mabaya sana, na bila shaka kwa Daudi hilo lilihusisha mzigo wa dhamiri yenye kuugua.

Kila mwaka Waisraeli walikumbushwa kwa vi-tendo kwamba Yehova angeweza kuondolea mbali dhambi za taifa hilo. Katika Siku ya Upatanisho kuhani mkuu aliweka mikono yake juu ya kichwa cha mbuzi, akiungama dhambi za watu juu yake, na kisha kumpeleka mbuzi huyo mbali jangwani. Mtu yeyote aliyekuwapo angeona kuondolewa kwa dhambi za taifa hilo.[4]—Mambo ya Walawi 16:20-22.

Basi, watu mmoja-mmoja ambao wametubu dhambi zao waweza kupata faraja. Mambo yaliyotendeka katika Siku ya Upatanisho yalionyesha kimbele uandalizi mkubwa zaidi wa kuondolea mbali dhambi—dhabihu ya fidia ya Yesu Kristo.[5] Isaya aliandika hivi kiunabii juu ya Yesu: “Alichukua dhambi za watu wengi.” (Isaya 53:12) Kwa hiyo, dhambi za zamani hazipasi kulemea dhamiri. Lakini, je, Yehova atakumbuka dhambi hizo baadaye?

Kufuta Deni

Katika sala yake ya kigezo, Yesu alisema hivi: “Utusamehe deni zetu.” (Mathayo 6:12) Neno la Kigiriki lililotafsiriwa hapa ‘samehe’ ni namna ya kitenzi kinachomaanisha “achilia.” Hivyo, kusamehewa dhambi kwafananishwa na kuachilia, au kufuta deni.[6]—Linganisha Mathayo 18:23-35.

Petro alifafanua jambo hilo zaidi aliposema hivi: “Tubuni basi, mrejee ili [madoa ya, NW] dhambi zenu zifutwe.” (Matendo 3:19) ‘Futa doa’ yamaanisha kuharibu, au kuondoa kabisa. Kwadokeza tendo la kufuta rekodi iliyoandikwa, kufuta deni ya awali.[7]—Linganisha Wakolosai 2:13, 14.

Kwa hiyo, wale ambao wametubu hawahitaji kuogopa kwamba Mungu atadai malipo juu ya deni alilokwisha kufuta. Yeye ataarifu hivi: “Sitazikumbuka dhambi zako.” (Isaya 43:25; Warumi 4:7, 8) Hilo lamaanisha nini kwa ajili ya mtenda dhambi mwenye kutubu?

Kuondoa Waa

Kupitia nabii Isaya, Yehova alisema hivi: “Dhambi zenu zijapokuwa nyekundu sana, zitakuwa nyeupe kama theluji; zijapokuwa nyekundu kama bendera, zitakuwa kama sufu.”—Isaya 1:18.

Mara nyingi jitihada za kuondoa waa zito kwenye vazi hazifanikiwi. Waa huwa hafifu lakini bado huonekana. Inafariji kama nini kwamba Yehova aweza kuchukua dhambi zionekanazo sana kama rangi nyekundu-nyangavu ua bendera nyekundu na kuzifanya kuwa nyeupe kama theluji.—Linganisha Zaburi 51:7.

Kwa hiyo, mtenda dhambi mwenye kutubu hahitaji kuhisi kwamba ana waa kwa muda wote wa maisha yake. Yehova haweki makosa, akifanya mwenye kutubu aishi katika aibu ya milele.—Linganisha Matendo 22:16.

Utegemezo Kutoka kwa Wengine

Ingawa Yehova huondoa mzigo, hufuta deni, na kuondoa waa la dhambi, nyakati nyingine mwenye kutubu huenda akahisi amelemewa na majuto. Paulo aliandika kuhusu mtenda kosa mwenye kutubu katika kutaniko la Korintho aliyesamehewa na Mungu lakini ambaye ‘angemezwa katika huzuni yake ipitayo kiasi [“angekuwa mwenye huzuni sana hivi kwamba angekata tamaa kabisa,” TEV].’[8]—2 Wakorintho 2:7.

Mtu huyo angeweza kusaidiwaje? Paulo aendelea kusema: “Nawasihi kumthibitishia upendo wenu.” (2 Wakorintho 2:8) Neno ambalo Paulo alitumia kwa ‘kuthibitisha’ ni neno la kisheria limaanishalo “kuhakikisha.”[9] Naam, wenye kutubu ambao wamesamehewa na Yehova wahitaji pia uhakikisho, au ishara ya kukubaliwa, kutoka kwa Wakristo wenzao.

Kwa kueleweka, jambo hilo laweza kuchukua muda mrefu. Ni lazima mwenye kutubu aondoe kabisa mabaya ya dhambi yake na kuweka rekodi yenye kusadikisha ya uadilifu. Ni lazima avumilie kwa subira hisia za wowote ambao wameathiriwa binafsi na makosa yake yaliyopita. Wakati uo huo, aweza kuwa na hakika juu ya msamaha kamili wa Yehova, kama alivyofanya Daudi: “Kama mashariki ilivyo mbali na magharibi, ndivyo [Yehova] alivyoweka dhambi zetu mbali nasi.”—Zaburi 103:12.

[Maelezo ya Chini]

[Hisani ya Picha katika ukurasa wa 18]

Return of the Prodigal Son cha Rembrandt, 1660-1669: Scala/Art Resource, N.Y.