Jinsi Yehova Anafanikisha Kazi Yake
KATIKA makumi ya miaka ya hivi majuzi Mashahidi wa Yehova wamepata ukuzi wa ajabu. Katika miaka kumi tu iliyopita, wamepanuka kutoka makundi 42,600 kuwa jumla ya 60,192 katika mabara 212. Kwa sababu hiyo, watu fulani wameuliza: Kazi ya Mashahidi wa Yehova inatolewaje pesa? Watch Tower Society inafurahi kujibu hilo na maswali yanayohusiana katika makala hii.
Je! Mashahidi wa Yehova wanazoea kutoa fungu la kumi?
Sivyo. Katika Israeli ya kale, kutoa fungu la kumi kuliamriwa chini ya Sheria ya Kimusa ili kutegemeza wafanya kazi wa Mungu hekaluni, Walawi na makuhani. (Hesabu 18:21, 24-29) Hawa hawakuwa na ardhi za kikabila isipokuwa majiji fulani tu, hivyo basi walihitaji tegemezo hili la pekee. Kwa kuongezea, Waisraeli waaminifu walikuwa huru kutoa michango ya hiari kwa miradi ya pekee, kama vile ujenzi wa hema takatifu na, baadaye, hekalu.—Kutoka 25:1-8; 1 Nyakati 29:3-7.
Hata hivyo, Yesu alipokufa, Biblia inasema kwamba ‘aliiondoa sheria ya amri zilizo katika maagizo.’ (Waefeso 2:15; Wakolosai 2:13, 14) Ndiyo kusema, katika macho ya Mungu Sheria haikufunga tena ama Wayahudi ama Wakristo. Hivyo, pamoja na mambo mengine ya Sheria, kama dhabihu za kawaida hekaluni, kutoa fungu la kumi hakukutakwa tena kwa waaminifu.
Miongoni mwa Wakristo, kutoa kunasukumwa na upendo, si sheria. Mtume Paulo alieleza kanuni hiyo alipokuwa akitengeneza mchango kwa ajili ya Wakristo wahitaji katika Yudea. Alisema hivi: “Kila mtu na atende kama alivyokusudia moyoni mwake, si kwa huzuni, wala si kwa lazima; maana Mungu humpenda yeye atoaye kwa moyo wa ukunjufu.” (2 Wakorintho 9:7) Njia hii ya Kimaandiko ya upaji wa hiari inazoewa na Mashahidi wa Yehova.
Je! nyinyi mnageukia kutayarisha milo mikuu, bahasha za michango, kuzunguka mkiomba pesa, na njia kama hizo za kukusanya pesa?
Sivyo, Wakristo wa kweli si lazima wakazwe au wahongwe kutoa upaji kwa kuwekewa-wekewa zawadi nono mbele yao. Vikundi vya kidini ambavyo vinageukia kutayarisha michezo ya kamari, minada, bahati-nasibu, sherehe murua za kupiga vitu bei, kukodisha viti vya kanisa, au kupitisha sahani za sadaka vinafunua kwamba havikuwapa watu chakula cha kiroho, na hivyo basi roho ya Mungu haisukumi wanamitaa wao wachange pesa kwa hiari. Hilo hilo lingeweza kusemwa juu ya wale wanaogeukia lile zoea la kikale la kutoa fungu la kumi.—Mathayo 10:8.
Nyinyi mnapataje pesa za miradi kama vile ujenzi wa Majumba ya Ufalme na ofisi za tawi zilizo mpya, na pia mpanuko wenu kwenye makao makuu ya ulimwengu katika Brooklyn na kule Patterson, New York?
Yehova anamimina roho takatifu yake juu ya Mashahidi wake, akiwawezesha “watende mema, wawe matajiri kwa kutenda mema, wawe tayari kutoa mali zao, washirikiane na wengine kwa moyo; huku wakijiwekea akiba iwe msingi mzuri kwa wakati ujao, ili wapate uzima ulio kweli kweli.” (1 Timotheo 6:18, 19) Roho hii inasukuma Mashahidi wa Yehova wategemeze kazi ya Ufalme kwa kila njia.
Kwa mfano, katika 1989, Mashahidi 3,787,188 katika mabara 212 walitumia saa 835,426,538 katika kufundisha wengine Neno la Mungu. Na waliongoza kwa ukawaida mafunzo ya nyumbani ya Biblia 3,419,745 kwa watu wanaopendezwa. Gharama zozote zilizopatikana katika kazi hii zililipiwa na watu mmoja mmoja wenye kuifanya. Yehova alithawabisha kazi hii ya upendo kwa ongezeko la Mashahidi wapya waliobatizwa 263,855.
Roho kama hiyo ya upaji inasukuma Mashahidi na watu wanaopendezwa kutegemeza kazi kwa njia ya fedha. Mbali na kusaidia kulipia gharama za ukawaida za kundi la kwao, wao wanategemeza kazi yoyote ya ujenzi ambayo huenda ikahitajiwa, kama kurekebisha au kupanua Jumba la Ufalme au Jumba la Kusanyiko lao au kujenga jipya. Kila mwaka, kwa sababu ya ukuzi wa haraka sana, inakuwa lazima hesabu kubwa ya Majumba ya Ufalme yajengwe, mengine hata yakigharimu mamia ya maelfu ya dola. Gharama ya hayo inalipiwa na Mashahidi wa mahali kupitia michango yao na kazi ya hiari.
Zaidi ya hilo, imekuwa lazima katika mabara mengi vifaa vya kuchapia na vya ofisi katika matawi na pia majengo yaliyo makao vipanuliwe—au vipya vijengwe—ili kutoa nafasi ya wafanya kazi na vifaa vinavyohitajiwa sana na tengenezo linalokua. Jambo hili pia linategemezwa na michango na kazi ya hiari, ndivyo na ile miradi ya ujenzi na urekebishaji katika Brooklyn na katika Patterson, New York. Inapowezekana, Mashahidi wa mahali ndio wanaotoa pesa za ujenzi. Katika visa fulani, Watch Tower Society inapanga matawi yapokee msaada—wa kifedha na kwa namna ya kazi ya wastadi—kutoka mabara mengine. Hivyo, chini ya mwelekeo wa Sosaiti, “usawazisho” hutukia.—2 Wakorintho 8:14, NW.
Kwa nini nyinyi hamwendeshi hospitali au kliniki na kujitia katika kazi ya kusaidia wenye shida na huduma nyingine za kijamii kama vile vikundi vingi vya kidini vinavyofanya?
Mashahidi wa Yehova wanaitikia upesi hali za dharura baada ya vita au msiba wa kiasili wakati wanapoweza. Kwa uhakika, kwa kawaida wao wanakuwa miongoni mwa walio wa kwanza kufika kwenye tamasha hiyo wakiwa na chakula, nguo, na wafanya kazi wa hiari ili kusaidia kujenga upya. Hata hivyo, Mashahidi wa Yehova hawaendeshi hospitali au kliniki, kama vile wasivyoendesha idara za moto au majeshi ya polisi, ambayo pia ni ya kuhifadhi uhai.
Wao ni wahudumu waliojiweka wakfu wa gospeli, na mgawo wao ni kuhubiri na kufundisha habari njema za Ufalme wa Mungu katika ulimwengu wote kwa ushahidi kabla ya mwisho kuja. (Mathayo 24:14) Kama Yesu alivyosema, mavuno ni makubwa na wafanya kazi ni wachache. Lingekuwa jambo lisiloweza kusamehewa kuachilia kazi hii yenye umaana wote ili kuanza utendaji mwingine, hata kama unastahili sifa namna gani.—Mathayo 9:37, 38.
Kama vile inavyotendeka, idadi ya Mashahidi wa Yehova ni madaktari, wauguzi, na wasaidizi wa hospitali. Lakini wao wanaona kazi hii kuwa nyongeza kwenye kazi kuu ambayo wameitiwa, ile huduma ya Kikristo.
Je! wowote wa maofisa au washiriki wa Watch Tower Society hupata mapesa kutokana na utendaji wenu mwingi wa kuchapa?
Kwa mkazo, sivyo! Kisheria, Sosaiti hii ni shirika lisilo la kujipatia faida. Hakuna washika-faida, wala migawano ya pesa, wala hata mishahara. Kila mhudumu kwenye makao makuu, kutia na msimamizi na wakurugenzi wa Sosaiti, amefanya nadhiri ya umaskini. Anapokea chakula, makao, na matibabu yanayohitajiwa, na pia marudishio kidogo ya pesa kwa gharama zilizotoka mfukoni mwake. Ikiwa Shahidi anasafiri katika shughuli ya Sosaiti, kwa kawaida gharama zake za usafiri zinalipiwa.
Kwa kuongezea, hakuna mahali ulimwenguni ambapo wahudumu wetu wanatoza pesa kwa kuongoza arusi, mabatizo, wala maziko. Na hakuna pesa zinazotozwa wala kuchangwa ili kuruhusiwa kuingia kwenye hotuba za watu wote au mikusanyiko.
Kwa kuwa sahani za sadaka hazipitishwi kamwe, makundi ya mahali yanapokeaje michango ili kutimiza gharama zao?
Masanduku ya michango yanawekwa katika Majumba ya Ufalme ili watu mmoja mmoja waweze kutoa michango ya hiari wakitaka. (2 Wafalme 12:9) Michango yote, iwe ni mikubwa au midogo, inathaminiwa. (Marko 12:42-44) Mara moja kwa mwezi, mhudumu anayetunza hesabu za kundi anasomea kundi taarifa fupi akiwajulisha jumla ya michango iliyopokewa, matumizi, na michango iliyofanywa na kundi kwenye Watch Tower Society ili kutegemeza kazi ya ulimwenguni pote ya kuhubiri na miradi mingine.
Watu mmoja mmoja wanapoelewa mpango huu, wanakuwa huru kushiriki ikiwa wanatamani hivyo, kila mmoja “kwa kadiri ya kufanikiwa kwake.” (1 Wakorintho 16:2) Hili ndilo zoea katika kila moja la yale makundi zaidi ya 66,000 ulimwenguni pote.
Kwenye Pentekoste Wakristo wa mapema walifanya mambo yote kishirika. Je! Mashahidi wa Yehova wanafanya hivi?
Hali ya dharura ilitokea kufuata Pentekoste 33 W.K. wakati ambapo Wayahudi wa kutoka mbali waliokuwa wamegeuzwa majuzi kuja kwenye Ukristo walibaki katika Yerusalemu kutwaa mwangazio zaidi wa kiroho. Walihitaji kupewa makao na chakula cha muda; hivyo, Wakristo wa mahali hapo waliendesha kuuza mali kwa hiari na ushirikiano wa ujumla wa vilivyopatikana kwa kufanya hivyo ili kuandaa kipindi kirefu zaidi cha ushirika. (Matendo 2:1, 38-47; 4:32-37) Hakuna mtu aliyelazimishwa kuuza wala kuchanga. (Matendo 5:1-4) Huu ushirikiano wa vitu pamoja haukuwa ukomunisti, kama vile watu fulani wanadhani. Ulikuwa mpango wa muda tu. Wakristo waliporudi kwenye makao yao wenyewe, ulikoma.
Je! nyinyi mnafundisha kwamba upaji wa kimwili ni njia ya kulipia dhambi?
Sivyo hata kidogo! Biblia inasema hivi: “Nanyi mfahamu kwamba mlikombolewa si kwa vitu viharibikavyo, kwa fedha au dhahabu; mpate kutoka katika mwenendo wenu usiofaa mlioupokea kwa baba zenu; bali kwa damu ya thamani, kama ya mwana-kondoo asiye na ila, asiye na waa, yaani, ya Kristo.”—1 Petro 1:18, 19.
Mashahidi wa Yehova wanatia imani katika dhabihu ya ukombozi ya Yesu kwa ajili ya wokovu. Hawafanyi michango ya hiari wakitazamia kwamba kufanya hivi kutawaletea wokovu. Hata hivyo, wanajua kwamba pesa za kadiri kubwa zinahitajiwa ili kueneza habari njema za ulimwengu mpya wenye uadilifu. (2 Petro 3:13) Nao wanahisi kwamba kuchanga kuelekea kupiga mbiu hii ni pendeleo walilopewa na Yehova.
Alipokuwa akifanya mchango mkubwa kuelekea hekalu la Yehova ambalo Sulemani mwana wake alipaswa kujenga, Mfalme Daudi alisali hivi: “Ee BWANA [Yehova, NW], ukuu ni wako, na uweza, na utukufu, na kushinda, na enzi; maana vitu vyote vilivyo mbinguni na duniani ni vyako . . . Lakini mimi ni nani, na watu wangu ni nani, hata tuweze kutoa kwa hiari hivi? kwani vitu vyote vyatoka kwako, na katika vitu vyako mwenyewe tumekutolea.”—1 Nyakati 29:11, 14.
Leo, Mashahidi wa Yehova na watu wengine wenye mwelekeo wa uadilifu wanajisikia kama vile Daudi alivyojisikia. Wao wana furaha kuwa na pendeleo la kufanya michango ili kutegemeza kazi ya kusifu Yehova, wakitambua kwamba kila kitu wanachotoa kwa utumishi huu kimetoka kwake ingawaje. Yehova anabariki roho hii, na hivi ndivyo yeye anafanikisha kazi yake.
[Sanduku katika ukurasa wa 23]
JINSI WENGINE WANAVYOCHANGIA KAZI YA UFALME
◻ ZAWADI: Michango ya hiari ya pesa inaweza kupelekwa moja kwa moja kwenye ofisi ya tawi la kwenu la Sosaiti. Mali kama vile rasilmali za urithi, na pia vito vyenye thamani au vitu vingine vya bei kubwa, vinaweza kuchangwa pia. Barua fupi ikisema kwamba huo ni mchango wa moja kwa moja inapasa kufuatana na michango hii.
◻ MPANGO WA MCHANGO WENYE MASHARTI: pesa zinaweza kupewa kwa Watch Tower Society zishikiliwe zikiwa amana, kukiwa na uandalizi wa kwamba kukitokea kisa cha uhitaji wa kibinafsi, zitarudishwa kwa mwenye kuchanga.
◻ BIMA: Watch Tower Society inaweza kutajwa kuwa mfaidikaji wa mpango wa bima ya maisha au katika mpango wa kustaafu kazi/malipo ya uzeeni. Sosaiti inapasa kujulishwa juu ya mipango yoyote kama hiyo.
◻ AMANA: Akiba za pesa zilizo benki zinaweza kuwekwa zikiwa amana kwa ajili ya Sosaiti. Jambo hili likifanywa, tafadhali julisheni Sosaiti. Rasilmali za hisa, dhamana, mali zinaweza pia kuchangwa chini ya mpango wa kufaidi mwenye kuchanga katika muda wa maisha yake. Njia hii inaondolea mbali gharama na shaka zinazotokana na ule mpango wa kuthibitisha usahihi wa wasia, huku njia hii ikihakikishia kwamba Sosaiti itapokea mali ikiwa kifo kitatukia.
◻ MAWASIA: Mali au pesa zinaweza kupangiwa kuwa urithi wa Watch Tower Society kwa njia ya wasia wenye kutekelezwa kisheria. Nakala moja inapasa kupelekwa kwa Sosaiti.
Kwa habari zaidi na ushauri juu ya mambo hayo, andikia ofisi ya tawi la kwenu la Sosaiti.
[Picha katika ukurasa wa 24]
Sehemu ya kitovu cha elimu ya Biblia cha Mashahidi wa Yehova kikijengwa kule Patterson, New York
[Picha katika ukurasa wa 25]
Yehova anafanikisha kazi ya ujenzi kwa kutumia watu wake wanaofanya michango ya hiari