Ndugu Vijana, Je, Mnajitahidi Kufikia Mapendeleo?
1. Ni wakati gani ambapo ndugu kijana anapaswa kuanza kutumia himizo linalopatikana kwenye 1 Timotheo 3:1?
1 “Ikiwa mwanamume yeyote anajitahidi kufikia [mapendeleo], yeye anatamani kazi njema.” (1 Tim. 3:1) Maneno hayo yaliyoongozwa na roho ya Mungu yanawatia moyo ndugu wajitahidi kuwa na sifa za kustahili kufikia mapendeleo ya utumishi katika kutaniko. Je, ni lazima uwe mtu mzima ili uweze kustahili? Kwa kweli, ni jambo linalofaa sana kuanza kujitahidi kufikia mapendeleo ukiwa ungali kijana. Kwa kufanya hivyo unaweza kuzoezwa na kuonyesha kwamba unastahili kutumika ukiwa mtumishi wa huduma utakapokuwa na umri mkubwa zaidi. (1 Tim. 3:10) Ikiwa wewe ni ndugu kijana ambaye amebatizwa, unawezaje kujitahidi kufikia mapendeleo?
2. Unawezaje kusitawisha na kuonyesha roho ya kujidhabihu?
2 Kujidhabihu: Kumbuka kwamba unajitahidi kufikia kazi njema na wala si cheo. Kwa hiyo, sitawisha tamaa ya kuwasaidia ndugu na dada zako. Njia moja ya kufanya hivyo ni kwa kutafakari mfano mzuri wa Yesu. (Mt. 20:28; Yoh. 4:6, 7; 13:4, 5) Mwombe Yehova akusaidie upendezwe na wengine. (1 Kor. 10:24) Je, unaweza kuwasaidia washiriki wa kutaniko ambao ni wazee au dhaifu? Je, wewe hujitolea kukata nyasi, au kufanya mambo mengine yanayohusiana na udumishaji wa Jumba la Ufalme? Je, unaweza kujitolea kutoa hotuba ambayo mtu mwingine aligawiwa katika Shule ya Huduma ya Kitheokrasi? Utaona kwamba ukijitolea kufanya mambo kwa niaba ya wengine utapata shangwe.—Mdo. 20:35.
3. Hali nzuri ya kiroho ni muhimu kadiri gani, na tunawezaje kuisitawisha?
3 Hali ya Kiroho: Ni jambo muhimu sana kwamba mtumishi katika kutaniko awe na hali nzuri ya kiroho kuliko kuwa na vipawa au uwezo wa pekee. Mtu wa kiroho hujitahidi kuona mambo jinsi Yehova na Yesu wanavyoyaona. (1 Kor. 2:15, 16) Huonyesha “matunda ya roho.” (Gal. 5:22, 23) Ni mhubiri mwenye bidii ambaye hutanguliza masilahi ya Ufalme kwanza. (Mt. 6:33) Unaweza kusitawisha sifa za kiroho kwa kuwa na mazoea mazuri ya kujifunza kibinafsi. Hilo linatia ndani kusoma Biblia kila siku, kusoma kila nakala ya gazeti la Mnara wa Mlinzi na Amkeni!, na kutayarisha na kuhudhuria mikutano ya kutaniko. (Zab. 1:1, 2; Ebr. 10:24, 25) Paulo aliandika hivi alipokuwa akimtia moyo kijana Timotheo afanye maendeleo ya kiroho: ‘Angalia daima . . . ufundishaji wako.’ (1 Tim. 4:15, 16) Hivyo, timiza kwa bidii migawo yako ya kutoa hotuba katika Shule ya Huduma ya Kitheokrasi. Jitayarishe na ushiriki kwa ukawaida katika huduma. Jiwekee na ujitahidi kufikia miradi ya kiroho kama vile, upainia, utumishi wa Betheli, au kuhudhuria Shule ya Biblia ya Ndugu Waseja. Hali nzuri ya kiroho itakusaidia ‘ukimbie tamaa zinazotukia ujanani.’—2 Tim. 2:22.
4. Ni nini thamani ya uaminifu na kutegemeka?
4 Kutegemeka na Uaminifu: Kwa kuwa akina ndugu waliopewa mgawo wa kugawa chakula kwa Wakristo wa karne ya kwanza wenye uhitaji “walithibitishwa,” yaani walijulikana kuwa wenye kutegemeka na waaminifu, mitume hawakuwa na wasiwasi ikiwa kazi hiyo ingefanywa au la. Hilo liliwasaidia wakazie fikira mambo mengine muhimu. (Mdo. 6:1-4) Hivyo basi, unapopewa mgawo kutanikoni, utimize kwa uwezo wako wote. Mwige Noa aliyefuata kwa makini maagizo aliyopewa ya kujenga safina. (Mwa. 6:22) Yehova anathamini sana tunapokuwa waaminifu na hilo huonyesha kwamba tumekomaa kiroho.—1 Kor. 4:2; ona sanduku “Faida za Kuwazoeza.”
5. Kwa nini ndugu vijana wanapaswa kujitahidi kufikia mapendeleo?
5 Kama ilivyotabiriwa, Yehova anaharakisha kazi ya kuwakusanya watu. (Isa. 60:22) Kwa wastani, watu 250,000 wanabatizwa kila mwaka. Kwa kuwa kuna watu wengi wapya wanaojiunga na tengenezo la Yehova, wanaume wa kiroho wanaostahili wanahitajiwa ili washughulikie majukumu kutanikoni. Sasa, kuliko wakati mwingine wowote, kuna kazi nyingi ya kufanya katika utumishi wa Yehova. (1 Kor. 15:58) Enyi ndugu vijana, je, mnajitahidi kufikia mapendeleo? Ikiwa ndivyo, kwa kweli mnatamani kazi njema sana!
[Blabu katika ukurasa wa 2]
Kwa kuwa kuna watu wengi wapya wanaojiunga na tengenezo la Yehova, wanaume wa kiroho wanaostahili wanahitajiwa ili washughulikie majukumu kutanikoni
[Sanduku katika ukurasa wa 3]
Faida za Kuwazoeza
Ndugu vijana wanaostahili hufaidika wazee wanapowapa migawo na kuwazoeza. Baada ya mkutano, mwangalizi mmoja wa mzunguko aliketi jukwaani huku akimtia moyo mhubiri fulani. Alimwona mvulana fulani akiwa amesimama karibu na jukwaa, kwa hiyo akamuuliza ikiwa alitaka kuzungumza naye. Ndugu huyo kijana alijibu kwamba alikuwa amepewa mgawo wa kusafisha jukwaa baada ya kila mkutano. Wazazi wake walikuwa tayari kuondoka, lakini hakutaka kwenda kabla ya kutimiza mgawo wake. Akiwa amefurahishwa na jambo hilo, mwangalizi huyo wa mzunguko aliondoka jukwaani. Alisema hivi: “Wazee katika kutaniko hilo walikuwa chonjo kuwazoeza vijana waliostahili kwa kuwapa migawo kutanikoni. Matokeo ni kwamba, halikuwa jambo la ajabu kuona ndugu kijana akipendekezwa kuwa mtumishi wa huduma nilipotembelea kutaniko hilo.”