Kutembea Pamoja na Mungu—Tukifikiria Umilele

“Tutatembea . . . katika jina la Yehova Mungu wetu kwa wakati usio dhahiri, hata milele.”—MIKA 4:5, NW.

1. Kwa nini Yehova anaweza kuitwa “Mfalme wa umilele”?

YEHOVA MUNGU hakuwa na mwanzo. Kwa kufaa yeye huitwa “Mzee wa Siku,” kwa kuwa kuwako kwake hakuna mwanzo. (Danieli 7:9, 13) Yehova pia atakuwa na wakati ujao usio na mwisho. Yeye peke yake ndiye “Mfalme wa umilele.” (Ufunuo 10:6; 15:3) Machoni pake, miaka elfu moja ni “kama siku ya jana ikiisha kupita, na kama kesha la usiku.”—Zaburi 90:4.

2. (a) Kusudi la Mungu kwa wanadamu watiifu ni nini? (b) Tunapaswa kukaza matumaini yetu na mipango yetu juu ya nini?

² Kwa kuwa Mpaji wa uhai ni wa milele, yeye angeweza kuwapa wenzi wa kwanza wa kibinadamu, Adamu na Hawa, matazamio ya uhai wa milele katika Paradiso. Hata hivyo, kwa sababu ya kutotii Adamu alipoteza haki ya kuwa na uhai udumuo milele, akipitisha dhambi na kifo kwa wazao wake. (Waroma 5:12) Hata hivyo, uasi wa Adamu haukuzuia kusudi la Mungu la awali. Ni mapenzi ya Yehova kwamba wanadamu watiifu waishi milele, naye atatimiza kusudi lake bila shaka. (Isaya 55:11) Basi, ni jambo lenye kufaa kama nini kukaza matumaini na mipango yetu juu ya kumtumikia Yehova tukifikiria umilele. Ingawa twataka kuweka karibu akilini “siku ya Yehova,” ni muhimu kukumbuka kwamba mradi wetu ni kutembea pamoja na Mungu milele.—2 Petro 3:12.

Yehova Huchukua Hatua Katika Wakati Wake Uliowekwa Rasmi

3. Tunajuaje kwamba Yehova ana “wakati uliowekwa rasmi” wa kutimiza makusudi yake?

³ Tukiwa watu wanaotembea pamoja na Mungu, tunapendezwa sana kutimiza mapenzi yake. Twajua kwamba Yehova ndiye Mtunza-Wakati aliye Mkuu Zaidi, na tuna uhakika kwamba yeye hakosi kamwe kutimiza makusudi yake katika wakati wake uliowekwa rasmi. Kwa kielelezo, “kikomo kamili cha wakati kilipowasili, Mungu alimtuma Mwana wake.” (Wagalatia 4:4) Mtume Yohana aliambiwa kwamba kulikuwa na “wakati uliowekwa rasmi” kwa utimizo wa mambo ya kiunabii aliyoona kwa njia ya ishara. (Ufunuo 1:1-3) Kuna “wakati uliowekwa rasmi kwa ajili ya wafu kuhukumiwa.” (Ufunuo 11:18) Zaidi ya miaka 1,900 iliyopita, mtume Paulo alipuliziwa kusema kwamba Mungu “ameweka siku ambayo katika hiyo akusudia kuihukumu kwa uadilifu dunia inayokaliwa.”—Matendo 17:31.

4. Tunajuaje kwamba Yehova hutaka kukomesha mfumo huu mwovu wa mambo?

⁴ Yehova atakomesha mfumo huu mwovu wa mambo, kwa maana jina lake linasutwa katika ulimwengu wa leo. Waovu wamesitawi. (Zaburi 92:7) Kwa maneno yao na vitendo vyao, wao humtukana Mungu, naye huumia aonapo watumishi wake wakitukanwa na kunyanyaswa. (Zekaria 2:8) Si ajabu kwamba Yehova ameagiza kwamba tengenezo lote la Shetani litakomeshwa karibuni! Mungu ameamua wakati hususa ambapo hilo litatukia, nao utimizo wa unabii mbalimbali wa Biblia hudhihirisha kwamba sasa tunaishi katika “wakati wa mwisho.” (Danieli 12:4) Atachukua hatua karibuni ili kuwabariki wote wampendao.

5. Loti na Habakuki walizionaje hali zilizowazunguka?

⁵ Watumishi wa Yehova wa zamani walitamani kuona mwisho wa uovu. Loti mwadilifu ‘alitaabishwa sana na kujitia mno kwa watu wanaokaidi sheria katika mwenendo mlegevu.’ (2 Petro 2:7) Akiwa amehuzunishwa na hali zilizomzunguka, nabii Habakuki alisihi hivi: “Ee BWANA, nilie hata lini, wewe usitake kusikia? Nakulilia kwa sababu ya udhalimu, ila hutaki kuokoa. Mbona wanionyesha uovu, na kunitazamisha ukaidi? Maana uharibifu na udhalimu u mbele yangu; kuna ugomvi, na mashindano yatokea.”—Habakuki 1:2, 3.

6. Yehova alisema nini kwa kujibu sala ya Habakuki, nasi twaweza kujifunza nini kutokana na hilo?

⁶ Kwa sehemu, Yehova alimjibu Habakuki kwa maneno haya: “Njozi hii bado ni kwa wakati ulioamriwa (“wakati uliowekwa rasmi,” NW), inafanya haraka ili kuufikilia mwisho wake, wala haitasema uongo; ijapokawia, ingojee; kwa kuwa haina budi kuja, haitakawia.” (Habakuki 2:3) Hivyo Mungu alijulisha kwamba angechukua hatua katika “wakati uliowekwa rasmi.” Ingawa huenda ikaonekana kama anakawia, Yehova atatimiza kusudi lake—bila shaka!—2 Petro 3:9.

Kutumikia kwa Bidii Isiyolegea

7. Ingawa Yesu hakujua wakati hususa ambapo siku ya Yehova ingekuja, alitekelezaje shughuli zake?

⁷ Je, ni sharti tujue wakati hususa ambao Yehova amepangia matukio ili tuweze kutembea pamoja na Mungu kwa bidii? La, hasha. Fikiria vielelezo kadhaa. Yesu alipendezwa sana na wakati ambapo mapenzi ya Mungu yangefanywa duniani kama ilivyo mbinguni. Kwa kweli, Kristo aliwafundisha wafuasi wake kusali hivi: “Baba yetu uliye katika mbingu, jina lako na litakaswe. Acha ufalme wako uje. Mapenzi yako na yatendeke, kama ilivyo katika mbingu, pia juu ya dunia.” (Mathayo 6:9, 10) Ingawa Yesu alijua kwamba ombi hilo lingejibiwa, hakujua wakati hususa uliopangiwa matukio hayo. Katika unabii wake mkuu kuhusu mwisho wa mfumo huu, yeye alisema: “Kuhusu siku hiyo na saa hiyo hakuna mtu ajuaye, wala hao malaika wa mbingu wala Mwana, ila Baba tu.” (Mathayo 24:36) Kwa kuwa Yesu Kristo ndiye mwenye fungu kubwa zaidi katika kutimizwa kwa makusudi ya Mungu, yeye atahusika moja kwa moja katika kufishwa kwa adui za Baba yake. Hata hivyo, alipokuwa duniani, Yesu hata hakujua wakati ambapo Mungu angechukua hatua. Je, jambo hilo lilimfanya apunguze bidii katika kumtumikia Yehova? Bila shaka sivyo! Walipomwona Yesu akisafisha hekalu kwa bidii, “wanafunzi wake wa[li]kumbuka kwamba imeandikwa: ‘Bidii kwa ajili ya nyumba yako itanila mimi kabisa.’” (Yohana 2:17; Zaburi 69:9) Yesu alijishughulisha kikamili na kazi aliyotumwa kufanya, naye aliifanya kwa bidii isiyolegea. Yeye pia alimtumikia Mungu akifikiria umilele.

8, 9. Wanafunzi waliambiwa nini walipouliza juu ya kurudishwa kwa Ufalme, nao waliitikiaje?

⁸ Wanafunzi wa Kristo pia walifanya vivyo hivyo. Yesu alikutana nao punde tu kabla ya kupaa mbinguni. Simulizi hilo lasema: “Basi, wakati walipokuwa wamekusanyika, wakaanza kumuuliza: ‘Bwana, je, wakati huu unarudishia Israeli ufalme?’” Kama Bwana-Mkubwa wao, walitamani sana Ufalme uje. Hata hivyo, Yesu aliwajibu: “Si juu yenu kupata ujuzi wa nyakati au majira ambayo Baba ameweka katika mamlaka yake mwenyewe; lakini mtapokea nguvu wakati roho takatifu iwasilipo juu yenu, nanyi mtakuwa mashahidi wangu katika Yerusalemu na pia katika Yudea yote na Samaria na hadi sehemu ya mbali zaidi sana ya dunia.”—Matendo 1:6-8.

⁹ Hakuna chochote kionyeshacho kwamba wanafunzi walivunjwa moyo na jibu hilo. Badala yake, walijishughulisha kwa bidii na kazi ya kuhubiri. Baada ya majuma kadhaa, walikuwa wamejaza Yerusalemu fundisho lao. (Matendo 5:28) Na miaka 30 baadaye, walikuwa wamepanua utendaji wao wa kuhubiri kwa kadiri kubwa hivi kwamba Paulo angeweza kusema kwamba habari njema ilihubiriwa “katika viumbe vyote chini ya mbingu.” (Wakolosai 1:23) Ingawa Ufalme ‘haukurudishiwa Israeli’ kama vile wanafunzi walivyotarajia kimakosa, wala haukusimamishwa mbinguni wakati wa maisha yao, wao waliendelea kumtumikia Yehova kwa bidii wakifikiria umilele.

Kuchunguza Nia Zetu

10. Kutojua wakati ambapo Mungu ataharibu mfumo wa Shetani hutuwezesha kuthibitisha nini?

¹⁰ Watumishi wa Yehova wa siku hizi pia hutamani sana kuona mwisho wa mfumo huu mwovu wa mambo. Hata hivyo, hangaiko letu kuu si kukombolewa kuingia katika ulimwengu mpya ulioahidiwa na Mungu. Twataka kuona jina la Yehova likitakaswa na enzi kuu yake ikitetewa. Kwa sababu hiyo, tunaweza kushangilia kwamba Mungu hakutuambia ‘siku wala saa’ iliyowekwa ya kuharibu mfumo wa Shetani. Hilo hutuwezesha kuthibitisha kwamba tumeazimia kutembea pamoja na Mungu kwa umilele kwa sababu tunampenda wala si kwa sababu tuna miradi ya muda mfupi, yenye ubinafsi.

11, 12. Uaminifu-maadili wa Yobu ulipingwaje, nao upinzani huo watuhusuje?

¹¹ Kudumisha uaminifu-maadili wetu kwa Mungu pia hutusaidia kuthibitisha kwamba Ibilisi alikosea alipodai kwamba Yobu mnyoofu—na hivyo wanadamu walio kama yeye—humtumikia Mungu ili kujinufaisha kibinafsi. Baada ya Yehova kumfafanua Yobu mtumishi wake kuwa mtu asiye na lawama, mnyoofu na mwenye kumhofu Mungu, Shetani alidai hivi kwa uovu: “Je! huyo Ayubu yuamcha BWANA bure? Wewe hukumzingira kwa ukigo pande zote, pamoja na nyumba yake, na vitu vyote alivyo navyo? kazi za mikono yake umezibarikia, nayo mali yake imeongezeka katika nchi. Lakini nyosha mkono wako sasa, uyaguse hayo yote aliyo nayo, naye atakukufuru mbele za uso wako.” (Ayubu 1:8-11) Kwa kudumisha uaminifu-maadili wake chini ya jaribu, Yobu alithibitisha dai hilo ovu kuwa lisilo la kweli.

¹² Vivyo hivyo, kwa kudumisha mwendo wa uaminifu-maadili, tunaweza kukanusha dai la kishetani kwamba, sisi humtumikia Mungu kwa sababu tu tunajua kwamba thawabu iko karibu. Kutojua wakati hususa ambapo kisasi cha Mungu kitatekelezwa juu ya waovu hututolea fursa ya kuthibitisha kwamba, twampenda Yehova kikweli na twataka kutembea katika njia zake milele. Hilo huonyesha kwamba sisi tu waaminifu-washikamanifu kwa Mungu na twatumaini njia yake ya kushughulikia mambo. Isitoshe, kutojua siku na saa hutusaidia kuwa waangalifu na kuwa macho kiroho kwa sababu twang’amua kwamba mwisho waweza kuja wakati wowote, kama vile mwizi usiku. (Mathayo 24:42-44) Kwa kutembea pamoja na Yehova kila siku, sisi hufanya moyo wake ushangilie na kutoa jibu kwa Ibilisi, ambaye humdhihaki.—Mithali 27:11.

Pangia Umilele!

13. Biblia huonyesha nini kuhusu kupangia wakati ujao?

¹³ Wale wanaotembea pamoja na Mungu wanajua kwamba ni jambo la hekima kupangia ifaavyo wakati ujao. Kwa kufahamu matatizo na udhaifu mbalimbali wa uzee, watu wengi hujaribu kutumia ujana na nguvu zao vizuri ili maisha yao ya baadaye yawe salama kifedha. Basi, namna gani wakati wetu ujao wa kiroho ulio wa maana zaidi? Andiko la Mithali 21:5 lasema hivi: “Mipango ya mtu wa bidii huleta mali kwa wingi, lakini kila aliye na pupa huishia patupu.” (Biblia Habari Njema) Kupanga kimbele tukifikiria umilele hunufaisha kikweli. Kwa kuwa hatujui wakati hususa ambapo mwisho wa mfumo huu utakuja, twahitaji kufikiria mahitaji yetu ya wakati ujao. Lakini acheni tuwe na usawaziko na kuweka masilahi ya Mungu kwanza maishani mwetu. Huenda watu ambao hawana imani wakakata kauli kwamba, mtu anayezingatia tu kufanya mapenzi ya Mungu amekosa busara. Lakini je, ndivyo ilivyo?

14, 15. (a) Yesu alitoa kielezi kipi kuhusiana na kupangia wakati ujao? (b) Kwa nini tajiri katika kielezi cha Yesu alikosa kufikiria mambo ya wakati ujao?

¹⁴ Yesu alitoa kielezi kinachotuelimisha kuhusiana na jambo hilo. Yeye alisema: “Shamba la mtu fulani tajiri lilizaa vema. Kwa sababu hiyo yeye akaanza kuwazawaza ndani yake mwenyewe, akisema, ‘Nitafanya nini, sasa kwa kuwa sina mahali popote pa kukusanya mazao yangu?’ Kwa hiyo akasema, ‘Hakika nitafanya hili: Hakika nitabomoa ghala zangu na kujenga zilizo kubwa zaidi, na humo hakika nitakusanya nafaka yangu yote na vitu vyangu vyema vyote; nami hakika nitaiambia nafsi yangu: “Nafsi, wewe una vitu vyema vingi vilivyolimbikwa kwa miaka mingi; starehe, kula, kunywa, jifurahishe mwenyewe.”’ Lakini Mungu akamwambia, ‘Wewe mwenye kukosa akili, usiku huu wanadai nafsi yako kutoka kwako. Ni nani, basi, atakayepaswa kuwa na vitu ulivyoviweka akiba?’ Hivyo ndivyo huwa kwa mtu ajilimbikiaye hazina mwenyewe lakini si tajiri kuelekea Mungu.”—Luka 12:16-21.

¹⁵ Je, hoja ya Yesu ilikuwa kwamba tajiri hakupaswa kujitahidi kupata vitu vya kimwili ili awe salama wakati ujao? La, kwa kuwa Maandiko hutia moyo kufanya kazi kwa bidii. (2 Wathesalonike 3:10) Kosa la tajiri huyo lilikuwa kwamba hakufanya yaliyokuwa ya lazima ili kuwa “tajiri kuelekea Mungu.” Hata ikiwa angeliweza kufurahia utajiri kwa miaka mingi, angelikufa hatimaye. Alikosa busara kwa kutofikiria umilele.

16. Kwa nini tunaweza kumtegemea Yehova ili kuwa na wakati ujao salama?

¹⁶ Kutembea pamoja na Yehova tukifikiria umilele ni jambo lifaalo na la busara. Hiyo ndiyo njia bora zaidi ya kupangia wakati ujao. Ingawa ni jambo la hekima kupangia ifaavyo elimu, kazi, na madaraka ya kifamilia, twapaswa sikuzote kukumbuka kwamba Yehova haachi kamwe watumishi wake waaminifu-washikamanifu. Mfalme Daudi aliimba hivi: “Nalikuwa kijana nami sasa ni mzee, lakini sijamwona mwenye haki ameachwa wala mzao wake akiomba chakula.” (Zaburi 37:25) Vivyo hivyo, Yesu alitoa uhakikisho wa kwamba Mungu atawaruzuku wote ambao hutafuta Ufalme kwanza na kutembea katika njia za Yehova za uadilifu.—Mathayo 6:33.

17. Tunajuaje kwamba mwisho uko karibu?

¹⁷ Ingawa sisi humtumikia Mungu tukifikiria umilele, bado sisi huweka siku ya Yehova karibu akilini. Kutimizwa kwa unabii wa Biblia huthibitisha waziwazi kukaribia kwa siku hiyo. Karne hii imejulikana kwa vita, magonjwa ya kuambukiza, matetemeko ya dunia, na upungufu wa chakula, pamoja na kunyanyaswa kwa Wakristo wa kweli na kuhubiriwa kwa habari njema ya Ufalme wa Mungu. Hayo yote ni sehemu muhimu za wakati wa mwisho wa huu mfumo mwovu wa mambo. (Mathayo 24:7-14; Luka 21:11) Ulimwengu umejaa wale ambao ni “wenye kujipenda wenyewe, wapenda-fedha, wenye kujitanguliza, wenye kiburi, wakufuru, wasiotii wazazi, wasio na shukrani, wasio waaminifu-washikamanifu, wasio na shauku ya kiasili, wasiotaka upatano wowote, wachongezi, wasio na hali ya kujidhibiti, wakali, wasio na upendo wa wema, wasaliti, wenye vichwa vigumu, wenye kututumuka kwa kiburi, wenye kuzipenda raha badala ya kuwa wapenda-Mungu.” (2 Timotheo 3:1-5) Katika siku hizi za mwisho zenye hatari, maisha ni magumu kwetu tukiwa watumishi wa Yehova. Jinsi tunavyoitamani siku ambayo Ufalme wa Yehova utaondolea mbali uovu wote! Kwa sasa, acheni tuazimie kutembea pamoja na Mungu tukifikiria umilele.

Kutumikia Tukifikiria Uhai wa Milele

18, 19. Ni nini ambacho huonyesha kwamba waaminifu wa zamani walimtumikia Mungu wakifikiria umilele?

¹⁸ Tutembeapo pamoja na Yehova, acheni tukumbuke imani ya Abeli, Enoki, Noa, Abrahamu, na Sara. Baada ya kuwataja, Paulo aliandika hivi: “Katika imani wote hao walikufa, ijapokuwa hawakupata utimizo wa ahadi, bali waliziona kwa mbali na kuzikaribisha na kutangaza hadharani kwamba wao walikuwa watu wasiojulikana na wakaaji wa muda katika nchi.” (Waebrania 11:13) Watu hao waaminifu “wa[li]jitahidi kufikilia mahali palipo bora, yaani, pamoja ambapo ni pa mbinguni.” (Waebrania 11:16) Kwa imani, walitarajia mahali palipo bora chini ya utawala wa Ufalme wa Mungu wa Kimesiya. Twaweza kuwa na uhakika kwamba Mungu atawathawabisha kwa uhai wa milele katika mahali hapo palipo bora—Paradiso ya kidunia chini ya utawala wa Ufalme.—Waebrania 11:39, 40.

¹⁹ Nabii Mika alionyesha azimio la watu wa Yehova la kumwabudu Mungu milele. Aliandika hivi: “Mataifa yote watakwenda, kila moja kwa jina la mungu wake, na sisi tutakwenda kwa jina la BWANA, Mungu wetu, milele na milele.” (Mika 4:5) Mika alimtumikia Yehova kwa uaminifu-mshikamanifu hadi kifo chake. Atakapofufuliwa katika ulimwengu mpya, bila shaka nabii huyo ataendelea kutembea pamoja na Mungu kwa umilele wote. Ni kielelezo bora kama nini kwetu sisi ambao tunaishi katika kipindi cha mwisho kabisa cha wakati wa mwisho!

20. Azimio letu lapaswa kuwa nini?

²⁰ Yehova huthamini upendo ambao sisi huonyesha kwa jina lake. (Waebrania 6:10) Yeye anajua kwamba si rahisi kwetu kudumisha uaminifu-maadili kwake katika ulimwengu huu unaotawalwa na Ibilisi. Hata hivyo, ingawa “ulimwengu unapitilia mbali,” “yeye ambaye hufanya mapenzi ya Mungu hudumu milele.” (1 Yohana 2:17; 5:19) Basi, kwa msaada wa Yehova, acheni tuazimie kuvumilia majaribu tukabiliyo siku kwa siku. Na tukaze fikira zetu na njia yetu ya maisha juu ya baraka za ajabu zilizoahidiwa na Baba yetu wa kimbingu mwenye upendo. Tunaweza kupata baraka hizo tukiendelea kutembea pamoja na Mungu tukifikiria umilele.—Yuda 20, 21.

[Ungejibuje?]

◻ Kusudi la Mungu kwa wanadamu watiifu ni nini?

◻ Kwa nini Yehova hajachukua hatua bado kukomesha ulimwengu huu usiomwogopa Mungu?

◻ Kwa nini kutojua wakati hususa ambapo Mungu atachukua hatua hakupaswi kupunguza bidii yetu?

◻ Kutembea pamoja na Mungu tukifikiria umilele kuna manufaa gani?

[Picha katika ukurasa wa 17]

Kutembea pamoja na Mungu hutaka tumtumikie kwa bidii kama vile wanafunzi wa Kristo wa mapema walivyofanya