Mashahidi Wakristo Walio na Uraia wa Kimbingu
“Kwa habari yetu, uraia wetu uko katika mbingu.”—WAFILIPI 3:20, NW.
1. Ni kusudi gani ajabu Yehova analo kuhusu wanadamu fulani?
WATU waliozaliwa na wanadamu watatawala wakiwa wafalme na makuhani mbinguni, hata watawale malaika. (1 Wakorintho 6:2, 3; Ufunuo 20:6) Hiyo ni kweli yenye kustaajabisha kama nini! Na Yehova aliikusudia, naye anaitimiza kupitia Mwana wake mzaliwa-pekee, Yesu Kristo. Kwa nini Muumba wetu afanye jambo hilo? Na ujuzi kulihusu wapasa kuwa na mvutano gani kwa Mkristo leo? Ebu tuone jinsi Biblia inavyojibu maswali haya.
2. Yohana Mbatizaji alitangaza jambo jipi jipya ambalo Yesu angefanya, na jambo hili jipya lilihusu nini?
2 Yohana Mbatizaji alipokuwa akimtayarishia Yesu njia, alitangaza kwamba Yesu angefanya jambo fulani jipya. Rekodi yasema: ‘Yohana akahubiri akisema, Yuaja nyuma yangu aliye na nguvu kuliko mimi, ambaye mimi sistahili kuinama na kuilegeza gidamu ya viatu vyake. Mimi niliwabatiza kwa maji; bali yeye atawabatiza kwa roho takatifu.’ (Marko 1:7, 8) Kabla ya wakati huo, hakuna mtu aliyekuwa amebatizwa kwa roho takatifu. Huu ulikuwa mpango mpya unaohusu roho takatifu, nao ulihusisha kusudi la Yehova lililokuwa karibu kufunuliwa la kutayarisha wanadamu kwa ajili ya utawala wa kimbingu.
‘Kuzaliwa Mara ya Pili’
3. Ni mambo yapi mapya kuhusu Ufalme wa mbinguni ambayo Yesu alifafanulia Nikodemo?
3 Katika mkutano wa siri pamoja na Farisayo mmoja mashuhuri, Yesu alifunua mengi kuhusu kusudi lake la kimungu. Farisayo huyo, Nikodemo, alimjia Yesu usiku, Yesu akamwambia: “Mtu asipozaliwa mara ya pili, hawezi kuuona ufalme wa Mungu.” (Yohana 3:3) Ni lazima iwe kwamba Nikodemo, aliyekuwa Farisayo, alijifunza Maandiko ya Kiebrania na hivyo alijua kitu fulani kuhusu kweli tukufu ya Ufalme wa Mungu. Kitabu cha Danieli kilitoa unabii kwamba huo Ufalme wangepewa “mmoja aliye mfano wa mwanadamu” na “watu wa watakatifu wake Aliye juu.” (Danieli 7:13, 14, 27) Huo Ufalme ulipaswa ‘uvunje vipande vipande na kuziharibu’ falme nyinginezo zote nao usimame milele. (Danieli 2:44) Yaelekea Nikodemo alifikiri kwamba unabii huo mbalimbali ungetimizwa kwa taifa la Kiyahudi; lakini Yesu alisema kwamba ili kuuona huo Ufalme, ni lazima mtu azaliwe mara ya pili. Nikodemo hakuelewa, kwa hiyo Yesu akaendelea kusema: “Isipokuwa yeyote azaliwe kutokana na maji na roho, hawezi kuingia katika ufalme wa Mungu.”—Yohana 3:5, NW.
4. Kwa wale waliozaliwa kutokana na roho takatifu, uhusiano wao na Yehova ungebadilikaje?
4 Yohana Mbatizaji alikuwa amezungumza juu ya ubatizo kwa njia ya roho takatifu. Sasa, Yesu aongezea kwamba ni lazima mtu azaliwe kutokana na roho takatifu ikiwa ataingia katika Ufalme wa Mungu. Kwa uzaliwa huu wa kipekee, wanaume na wanawake wasiokamilika huingia katika uhusiano wa kipekee sana na Yehova Mungu. Wao huja kufanywa kuwa watoto wake. Twasoma hivi: “Wote waliompokea [Yesu] aliwapa uwezo wa kufanyika watoto wa Mungu, ndio wale waliaminio jina lake; waliozaliwa, si kwa damu, wala si kwa mapenzi ya mwili, wala si kwa mapenzi ya mtu, bali kwa Mungu.”—Yohana 1:12, 13; Warumi 8:15.
Watoto wa Mungu
5. Ni wakati gani wafuasi waaminifu walipobatizwa kwa roho takatifu, na ni utendaji gani mbalimbali unaohusika wa roho takatifu uliotokea wakati uo huo?
5 Yesu aliposema na Nikodemo, roho takatifu ilikuwa tayari imekuja juu ya Yesu, ikimtia mafuta kwa ajili ya utawala wake katika Ufalme wa Mungu, na Mungu alikuwa amekiri peupe kwamba Yesu alikuwa Mwana Wake. (Mathayo 3:16, 17) Yehova alizaa watoto wengine zaidi wa kiroho katika Pentekoste 33 W.K. Wanafunzi waaminifu waliokusanyika katika chumba cha juu Yerusalemu walibatizwa kwa roho takatifu. Wakati uo huo, walizaliwa mara ya pili kutokana na roho takatifu kuwa wana wa kiroho wa Mungu. (Matendo 2:2-4, 38; Warumi 8:15) Na zaidi, walitiwa mafuta kwa roho takatifu kwa kusudi la urithi wa kimbingu wa wakati ujao, nao mwanzoni walitiwa muhuri kwa roho takatifu ukiwa wonyesho wa uhakika wa tumaini la kimbingu.—2 Wakorintho 1:21, 22.
6. Kusudi la Yehova kuhusu Ufalme wa kimbingu ni nini, na kwa nini inafaa kwamba wanadamu wawe washiriki katika hilo?
6 Hawa walikuwa wanadamu wa kwanza wasiokamilika waliochaguliwa na Mungu kuingia katika Ufalme. Yaani, baada ya kifo na ufufuo wao, wangekuwa sehemu ya tengenezo la Ufalme wa kimbingu ambao utatawala wanadamu na malaika. Yehova akusudia kwamba kupitia Ufalme huo, jina lake kuu litatakaswa na enzi yake kuu kutetewa mbele ya uumbaji wote. (Mathayo 6:9, 10; Yohana 12:28) Inafaa kama nini kwamba wanadamu wana sehemu katika Ufalme huo! Shetani alitumia wanadamu alipozusha ushindani wake wa kwanza dhidi ya enzi kuu ya Yehova huko nyuma katika bustani ya Edeni, na sasa Yehova akusudia kwamba wanadamu watahusishwa katika kujibu ushindani huo. (Mwanzo 3:1-6; Yohana 8:44) Mtume Petro aliwaandikia watu waliochaguliwa kutawala katika Ufalme huo: “Ahimidiwe Mungu, Baba wa Bwana wetu Yesu Kristo, ambaye kwa rehema zake nyingi alituzaa mara ya pili ili tupate tumaini lenye uzima kwa kufufuka kwake Yesu Kristo katika wafu; tupate na urithi usioharibika, usio na uchafu, usionyauka, uliotunzwa mbinguni kwa ajili yenu.”—1 Petro 1:3, 4.
7. Ni uhusiano gani wa kipekee na Yesu unaofurahiwa na wale waliobatizwa kwa roho takatifu?
7 Wakiwa wamefanywa kuwa wana wa Mungu, Wakristo hawa wachaguliwa wakawa ndugu za Yesu Kristo. (Warumi 8:16, 17; 9:4, 26; Waebrania 2:11) Kwa kuwa Yesu alithibitika kuwa ile Mbegu iliyoahidiwa Abrahamu, Wakristo hawa watiwa-mafuta kwa roho ni washirika, au sehemu yenye kusaidia ya Mbegu hiyo, ambayo ingeletea wanadamu wenye kuamini baraka. (Mwanzo 22:17, 18; Wagalatia 3:16, 26, 29) Baraka ipi? Fursa ya kukombolewa kutoka dhambi na kupatanishwa na Mungu na ya kumtumikia sasa na kwa umilele. (Mathayo 4:23; 20:28; Yohana 3:16, 36; 1 Yohana 2:1, 2) Wakristo watiwa-mafuta walio duniani huelekeza wenye mioyo mizuri kwenye baraka hiyo kwa kutoa ushahidi juu ya ndugu yao wa kiroho Yesu Kristo na kwa yule aliyekuja kuwa Baba yao, Yehova Mungu.—Matendo 1:8; Waebrania 13:15.
8. Ni nini kule “kufunuliwa” kwa wana wa Mungu waliozaliwa kwa roho?
8 Biblia yasema juu ya “kufunuliwa” kwa wana hawa wa Mungu waliozaliwa kwa roho. (Warumi 8:19) Wakiingia katika Ufalme wakiwa watawala washirika wa Yesu, wao washiriki katika kuharibu mfumo wa ulimwengu wa mambo wa Shetani. Baadaye, kwa miaka elfu moja, wao watasaidia kuelekeza manufaa za dhabihu ya fidia kwa wanadamu na hivyo kuinua jamii ya wanadamu kwa ukamilifu ambao Adamu alipoteza. (2 Wathesalonike 1:8-10; Ufunuo 2:26, 27; 20:6; 22:1, 2) Kufunuliwa kwao kwatia ndani mambo hayo yote yaliyotajwa. Hilo ni jambo ambalo wanadamu wote wanaoamini wanangojea kwa hamu.
9. Biblia inarejezeaje kikundi cha ulimwenguni pote cha Wakristo watiwa-mafuta?
9 Kikundi cha ulimwenguni pote cha Wakristo watiwa-mafuta ni “kutaniko la wazaliwa wa kwanza ambao wameandikwa mbinguni.” (Waebrania 12:23, NW) Wao ndio wa kwanza kunufaika na dhabihu ya fidia ya Yesu. Wao pia ni “mwili wa Kristo,” jambo linaloonyesha uhusiano wao wa kindani pamoja na Yesu. (1 Wakorintho 12:27) Paulo aliandika: ‘Maana kama vile mwili ni mmoja, nao una viungo vingi, na viungo vyote vya mwili ule, navyo ni vingi, ni mwili mmoja; vivyo hivyo na Kristo. Kwa maana katika roho moja sisi sote tulibatizwa kuwa mwili mmoja, kwamba tu Wayahudi, au kwamba tu Wayunani; ikiwa tu watumwa au ikiwa tu huru; nasi sote tulinyweshwa roho moja.’—1 Wakorintho 12:12, 13; Warumi 12:5; Waefeso 1:22, 23; 3:6.
“Israeli wa Mungu”
10, 11. Katika karne ya kwanza, kwa nini Israeli jipya lilihitajiwa, na taifa hilo jipya lilijumuisha nani?
10 Kwa miaka zaidi ya 1,500 kabla ya Yesu kuja akiwa Mesiya aliyeahidiwa, taifa la asili la Israeli lilikuwa watu wa kipekee wa Yehova. Licha ya kukumbushwa daima, kwa ujumla taifa lote lilikosa uaminifu. Yesu alipotokea, taifa hilo lilimkataa. (Yohana 1:11) Hivyo, Yesu aliwaambia viongozi wa kidini wa Kiyahudi: “Ufalme wa Mungu utaondolewa kwenu, nao watapewa tai[f]a lingine lenye kuzaa matunda yake.” (Mathayo 21:43) Kutambua ‘taifa hilo lenye kuzaa matunda ya Ufalme’ ni muhimu kwa wokovu.
11 Taifa hilo jipya ni kutaniko la Wakristo watiwa-mafuta, lililozaliwa katika Pentekoste 33 W.K. Washiriki walo wa kwanza walikuwa wanafunzi wa Kiyahudi wa Yesu waliomkubali yeye kuwa Mfalme wao wa kimbingu. (Matendo 2:5, 32-36) Hata hivyo, wao walikuwa washiriki wa taifa jipya la Mungu, si kwa msingi wa uzaliwa wao wa Kiyahudi, bali kwa msingi wa imani katika Yesu. Hivyo, hili Israeli jipya la Mungu lilikuwa kitu cha kipekee sana—taifa la kiroho. Wengi wa Wayahudi walipokataa kumkubali Yesu, mwaliko wa kuwa sehemu ya taifa jipya ulipelekwa kwa Wasamaria na kisha kwa wasio Wayahudi. Taifa jipya liliitwa “Israeli wa Mungu.”—Wagalatia 6:16.
12, 13. Ilikujaje kuwa wazi kwamba taifa jipya la Israeli halikuwa dhehebu fulani tu la Dini ya Kiyahudi?
12 Katika Israeli la kale, wasio Wayahudi walipogeuzwa imani, ilikuwa lazima watii Sheria ya Kimusa, na ilikuwa lazima wanaume waonyeshe hilo kwa kutahiriwa. (Kutoka 12:48, 49) Wakristo fulani Wayahudi walihisi kwamba wasio Wayahudi katika Israeli wa Mungu walipaswa kufanya vivyo hivyo. Lakini, Yehova alikuwa na jambo fulani akilini. Roho takatifu ilimwelekeza mtume Petro nyumbani kwa mtu asiye Myahudi, Kornelio. Kornelio na familia yake walipoitikia mahubiri ya Petro, walipokea roho takatifu—hata kabla ya kubatizwa katika maji. Jambo hili lilionyesha wazi kwamba Yehova alikuwa amewakubali watu hawa wasio Wayahudi kuwa washiriki wa Israeli wa Mungu bila kusisitiza kwamba watii Sheria ya Kimusa.—Matendo 10:21-48.
13 Baadhi ya waamini walipata ugumu wa kukubali jambo hilo, na upesi hilo jambo lilihitaji kuzungumzwa na mitume na wazee katika Yerusalemu. Baraza hilo lenye mamlaka lilisikiliza ushuhuda ulioeleza kindani jinsi roho takatifu ilivyokuwa ikitenda kazi kwa wasio Wayahudi wenye kuamini. Utafiti wa Biblia ulionyesha kwamba hili lilikuwa utimizo wa unabii uliopuliziwa. (Isaya 55:5; Amosi 9:11, 12) Uamuzi sahihi ulifanywa: Haikuwa lazima kwa Wakristo wasio Wayahudi kutii Sheria ya Kimusa. (Matendo 15:1, 6-29) Hivyo, Israeli la kiroho lilikuwa kweli taifa jipya na si dhehebu fulani tu la Dini ya Kiyahudi.
14. Ni nini linalodokezwa na Yakobo kuita kutaniko la Kikristo “kabila kumi na mbili waliotawanyika”?
14 Kwa kupatana na hilo, mwanafunzi Yakobo alipowaandikia Wakristo watiwa-mafuta wa karne ya kwanza, alielekeza barua yake kwa “kabila kumi na mbili waliotawanyika.” (Yakobo 1:1; Ufunuo 7:3-8) Bila shaka, raia wa Israeli jipya hawakupewa mgawo wa kuwa wa makabila hususa. Hakukuwa na mgawanyo wa makabila 12 tofauti-tofauti katika Israeli la kiroho kama ilivyokuwa imekuwa katika Israeli la asili. Hata hivyo, maneno yaliyopuliziwa ya Yakobo yaonyesha kwamba machoni pa Yehova Israeli wa Mungu walikuwa wamechukua kabisa mahali pa makabila 12 ya Israeli la asili. Ikiwa Mwisraeli wa asili alikuja kuwa sehemu ya taifa jipya—hata kama alikuwa wa kabila la Yuda au Lawi—uzaliwa wake wa kiasili haukuwa na maana yoyote.—Wagalatia 3:28; Wafilipi 3:5, 6.
Agano Jipya
15, 16. (a) Yehova awaonaje washiriki wasio wa Kiyahudi wa Israeli wa Mungu? (b) Israeli jipya lilisimamishwa kwenye msingi gani wa kisheria?
15 Machoni pa Yehova, washiriki wasio Wayahudi wa taifa hili jipya ni Wayahudi kamili wa kiroho! Mtume Paulo alieleza: “Yeye si Myahudi aliye Myahudi kwa nje tu, wala tohara siyo ile ya nje tu katika mwili; bali yeye ni Myahudi aliye Myahudi kwa ndani; na tohara ni ya moyo, katika roho, si katika andiko; ambayo sifa yake haitoki kwa wanadamu bali kwa Mungu.” (Warumi 2:28, 29) Watu wengi wasio Wayahudi waliitikia mwaliko huo wa kuwa sehemu ya Israeli wa Mungu, na tukio hilo lilitimiza unabii wa Biblia. Kwa kielelezo, nabii Hosea aliandika: “Nitamrehemu yeye asiyepewa rehema; nami nitawaambia wale wasiokuwa watu wangu, Ninyi ndinyi watu wangu; nao watasema, Wewe ndiwe Mungu wangu.”—Hosea 2:23; Warumi 11:25, 26.
16 Ikiwa Waisraeli wa kiroho hawakuwa chini ya agano la Sheria ya Kimusa, ni kwa msingi gani walikuwa sehemu ya taifa jipya? Yehova alifanya agano jipya pamoja na taifa hili la kiroho kupitia Yesu. (Waebrania 9:15) Yesu alipoanzisha Ukumbusho wa kifo chake, Nisani 14, 33 W.K., alipitishia mitume wake waaminifu 11 mkate na divai akasema kwamba divai ilifananisha ‘damu ya agano.’ (Mathayo 26:28; Yeremia 31:31-34) Kama ilivyosimuliwa katika masimulizi ya Luka, Yesu alisema kwamba kikombe cha divai kilifananisha “agano jipya.” (Luka 22:20) Kwa utimizo wa maneno ya Yesu, roho takatifu ilipomwagwa katika Pentekoste na Israeli wa Mungu kuzaliwa, Israeli la asili lilinyang’anywa Ufalme nao ukapewa kwa taifa jipya la kiroho. Badala ya Israeli la asili, taifa hili jipya sasa lilikuwa mtumishi wa Yehova, lenye kujumuisha mashahidi wake.—Isaya 43:10, 11.
“Yerusalemu Jipya”
17, 18. Ni mafafanuzi gani yanayotolewa katika kitabu cha Ufunuo kuhusu utukufu unaowangoja Wakristo watiwa-mafuta?
17 Ni utukufu ulioje unaowangoja wale wenye pendeleo la kushiriki katika wito wa kimbingu! Na ni furaha iliyoje kujifunza maajabu yanayowangoja! Kitabu cha Ufunuo chatupa miono yenye kusisimua ya urithi wao wa kimbingu. Kwa kielelezo, kwenye Ufunuo 4:4 (NW), twasoma: “Kuzunguka hicho kiti cha ufalme [cha Yehova] kuna viti vya ufalme ishirini na vinne, na juu ya hivyo viti vya ufalme niliona wameketi wazee ishirini na wanne wakiwa wamevaa mavazi meupe ya nje, na juu ya vichwa vyao mataji ya dhahabu.” Wazee hawa 24 ni Wakristo watiwa-mafuta, waliofufuliwa na ambao sasa wako katika vyeo vya kimbingu ambavyo Yehova aliwaahidi. Mataji yao na viti vyao vya ufalme vyatukumbusha juu ya hali yao ya kifalme. Fikiria vilevile pendeleo lao kubwa ajabu la kutumikia wakiwa wamezunguka kiti cha ufalme cha Yehova!
18 Kwenye Ufunuo 14:1, twawaona tena mara moja: “Nikaona, na tazama, huyo Mwana-Kondoo amesimama juu ya mlima Sayuni, na watu mia na arobaini na nne elfu pamoja naye, wenye jina lake na jina la Baba yake limeandikwa katika vipaji vya nyuso zao.” Hapa twaona ile idadi ndogo ya watiwa-mafuta hawa—144,000. Hali yao ya kifalme yatambuliwa kwa habari ya kwamba wao wasimama pamoja na Mfalme-mwekwa wa Yehova, “Mwana-Kondoo,” Yesu. Nao wako katika Mlima Sayuni wa kimbingu. Mlima Sayuni wa kidunia ulikuwa mahali lilipo Yerusalemu, jiji la kifalme la Israeli. Mlima Sayuni wa kimbingu wawakilisha cheo kilichotukuka cha Yesu pamoja na warithi wenzake, wanaofanyiza Yerusalemu la kimbingu.—2 Mambo ya Nyakati 5:2; Zaburi 2:6.
19, 20. (a) Wakristo watiwa-mafuta watakuwa sehemu ya tengenezo gani la kimbingu? (b) Ni katika kipindi gani cha wakati Yehova aliteua wale ambao uraia wao ungekuwa katika mbingu?
19 Kwa kupatana na hilo, watiwa-mafuta wakiwa katika utukufu wao wa kimbingu pia husemwa kuwa “Yerusalemu jipya.” (Ufunuo 21:2, NW) Yerusalemu la kidunia lilikuwa “mji wa Mfalme mkuu” na pia mahali pa hekalu. (Mathayo 5:35) Yerusalemu Jipya la kimbingu ndilo tengenezo la Ufalme ambalo kupitia hilo Mwenye Enzi Kuu mkuu, Yehova, na Mfalme wake aliyewekwa rasmi, Yesu, wanatawala sasa na ambamo utumishi wa kikuhani unafanywa huku baraka zenye kutajirisha zikitiririka kutoka kwenye kiti cha ufalme cha Yehova ili kuponya wanadamu. (Ufunuo 21:10, 11; 22:1-5) Katika njozi nyingine Yohana asikia Wakristo waaminifu watiwa-mafuta waliofufuliwa wakirejezewa kuwa ‘mke wa Mwana-Kondoo.’ Hicho ni kielezi chenye kuchangamsha moyo kama nini cha ukaribu watakaokuwa nao pamoja na Yesu na ujitiisho wao wa hiari kwake! Ebu wazia shangwe itakayokuwa mbinguni hatimaye mmoja wao wa mwisho apokeapo thawabu yake ya kimbingu. Hatimaye, sasa, “arusi ya Mwana-Kondoo” inaweza kufanywa! Ndipo tengenezo hilo la kimbingu la kifalme litakuwa kamili.—Ufunuo 19:6-8.
20 Ndiyo, baraka za ajabu zangoja wale ambao mtume Paulo alisema hivi kuwahusu: “Kwa habari yetu, uraia wetu uko katika mbingu.” (Wafilipi 3:20, NW) Kwa karibu miaka elfu mbili, Yehova amekuwa akiteua watoto wake wa kiroho na kuwatayarisha kwa ajili ya urithi wa kimbingu. Kulingana na uthibitisho huu wote, kazi hii ya kuteua na kutayarisha inakaribia kukamilika. Lakini kulikuwa na mengi ya kufuata, kama ilivyofunuliwa kwa Yohana katika njozi yake iliyorekodiwa katika Ufunuo sura ya 7. Sasa, kikundi kingine cha Wakristo chataka uangalifu wetu, nasi tutazungumza juu yacho katika makala inayofuata.
Je, Wakumbuka
◻ Ni upi ulio utendaji mbalimbali wa roho juu ya wale wenye urithi wa kimbingu?
◻ Ni uhusiano gani wa kindani ambao watiwa-mafuta hufurahia pamoja na Yehova? na pamoja na Yesu?
◻ Kutaniko la Wakristo watiwa-mafuta lafafanuliwaje katika Biblia?
◻ Israeli wa Mungu ulisimamishwa kwenye msingi gani wa kisheria?
◻ Ni mapendeleo gani ya kimbingu yanayowangoja Wakristo watiwa-mafuta?
[Picha katika ukurasa w10]
Zaidi ya kipindi kinachokaribia miaka elfu mbili, Yehova alichagua wale ambao wangetawala katika Ufalme wa kimbingu