Ni Nani Ambao Kwa Kweli Wana Mwito wa Mbinguni?
YEHOVA apenda jamii ya binadamu. Kwani, upendo huo ni mkubwa sana hivi kwamba alimtoa Mwana wake, Yesu Kristo, kuwa ukombozi ili kukomboa kile kilichopotezwa na babu yetu Adamu! Na hicho kilikuwa nini? Uhai mkamilifu wa milele pamoja na haki na matazamio yake yote. (Yohana 3:16) Ukombozi ulikuwa pia onyesho la upendo wa Yesu kwa ainabinadamu.—Mathayo 20:28.
Upendo wa kimungu umeonyeshwa katika kufungua matumaini mawili yenye kutolewa na Mungu yaliyo na msingi wa ustahili wa dhabihu ya ukombozi ya Yesu. (1 Yohana 2:1, 2) Kabla ya Yesu kufa akiwa mwanadamu, tumaini la pekee lililofunguliwa kwa wale waliokuwa na kibali cha kimungu lilikuwa lile la uhai katika paradiso ya kidunia. (Luka 23:43) Hata hivyo, baada ya Pentekoste 33 W.K., Yehova aliwapa “kundi dogo” tumaini la kimbingu. (Luka 12:32) Lakini ni nini imetokea nyakati za karibuni? Tangu 1931 ujumbe wa Ufalme umekazia fikira zaidi juu ya “kondoo wengine,” na kutoka 1935 na kuendelea Mungu amekuwa akikusanya kwake kupitia Kristo “mkutano mkubwa” wa hawa walio kama kondoo. (Yohana 10:16; Ufunuo 7:9) Mungu ameweka mioyoni mwao tumaini lile la uhai wa milele katika paradiso ya kidunia. Wanataka kula chakula kikamilifu, kuwa na utawala wa upendo juu ya wanyama, na kuona shangwe milele ya ushirika pamoja na wanadamu wenzao walio waadilifu.
Makuhani na Wafalme Wenye Huruma
Kwa kuwa upendo ndio uliomsukuma Yesu autoe uhai wake uwe ukombozi, haikosi kwamba yeye atakuwa Mfalme wa kimbingu mwenye huruma. Hata hivyo, Yesu hatakuwa peke yake katika kuwainua ainabinadamu kwenye ukamilifu pindi ya Utawala wake wa Miaka Elfu. Ndiyo, “watakuwa makuhani wa Mungu na wa Kristo, nao watatawala pamoja naye hiyo miaka elfu.”—Ufunuo 20:1-6.
Kristo atakuwa na watawala wenzi wangapi, na wanachaguliwaje kwa ajili ya pendeleo hilo kubwa ajabu? Mtume Yohana aliona 144,000 juu ya Mlima Sayuni wa kimbingu pamoja na Mwana-Kondoo, Yesu Kristo. Kwa kuwa “wamenunuliwa katika wanadamu,” watajua inavyomaanisha kuona majaribu, kuvumilia taabu za kutokukamilika, kuteseka, na kufa wakiwa wanadamu. (Ufunuo 14:1-5; Ayubu 14:1) Kwa hiyo, watakuwa wafalme-makuhani wenye huruma kama nini!
Ushuhuda wa Roho
Wale 144,000 ‘wamepakwa mafuta na Yeye aliye Mtakatifu,’ Yehova. (1 Yohana 2:20) Huko ni kupakwa mafuta kwa tumaini la kimbingu. Mungu ‘amewatia muhuri wa kuwa mali yake yeye na kuwajalia roho mioyoni mwao kama dhamana ya mambo yote ambayo amewawekea.’—2 Wakorintho 1:21, 22, HNWW.
Naam, wale walio na mwito wa mbinguni wana ushuhuda wa roho ya Mungu kwa maana hiyo. Kuhusu hilo, Paulo aliandika hivi katika Warumi 8:15-17: “Hamkupokea tena roho ya utumwa iletayo hofu; bali mlipokea roho ya kufanywa wana, ambayo kwa hiyo twalia, Aba, yaani, Baba. Roho mwenyewe hushuhudia pamoja na roho zetu, ya kuwa sisi tu watoto wa Mungu; na kama tu watoto, basi, tu warithi; warithi wa Mungu, warithio pamoja na Kristo; naam, tukiteswa pamoja naye ili tupate na kutukuzwa pamoja naye.” Wapakwa-mafuta hulia, “Aba, yaani Baba,” kwa njia ya roho ya Mungu, au nguvu ya utendaji.
Ushuhuda wenye maana zaidi kwamba mtu amepakwa mafuta kwa ajili ya mwito wa mbinguni ni roho, au maono yenye nguvu ya uana. (Wagalatia 4:6, 7) Mtu kama huyo ana uhakika kabisa kwamba amezaliwa na Mungu kwenye uana wa kiroho akiwa mmoja wa wale warithi wenzi 144,000 wa Ufalme wa kimbingu. Anaweza kushuhudia kwamba tumaini lake la kimbingu si tamaa aliyokuza mwenyewe au wazo lake; bali linatoka kwa Yehova likiwa tokeo la utendaji wa roho ya Mungu kumwelekea.—1 Petro 1:3, 4.
Chini ya uvutano wa roho takatifu ya Mungu, roho, au mwelekeo wenye nguvu, wa wapakwa-mafuta inatenda kama nguvu yenye kusukuma. Inawasukuma wawe na itikio chanya (zuri) kwa yale ambayo Neno la Mungu linasema juu ya tumaini la kimbingu. Wao pia wanaitikia kwa njia chanya kwa matendo ya Yehova pamoja nao kwa njia ya roho takatifu. Hivyo, wana uhakika kwamba wao ni watoto wa kiroho wa Mungu na warithi.
Wakati wapakwa-mafuta wanaposoma yale Neno la Mungu linasema juu ya watoto wake wa kiroho na juu ya tumaini la kimbingu, mwelekeo wao wa hiari ni kusema ndani yao, ‘Hili linamaanisha mimi!’ Ndiyo, wanaitikia kwa shangwe wakati Neno la Baba yao linapoahidi zawadi ya kimbingu. Wanasema, ‘Hilo linamaanisha mimi!’ wanaposoma hivi: “Wapenzi, sasa tu wana wa Mungu.” (1 Yohana 3:2) Na wapakwa-mafuta wanaposoma kwamba Mungu amenunua watu ‘kuwa kama limbuko la viumbe vyake,’ mwelekeo wao wa akilini ni kuitikia, ‘Ndiyo, alininunua mimi kwa kusudi hilo.’ (Yakobo 1:18) Wanajua kwamba ‘wamebatizwa katika Kristo Yesu’ na katika kifo chake. (Warumi 6:3) Kwa hiyo wana thibitisho imara la kuwa sehemu ya mwili wa kiroho wa Yesu na wana tumaini la kupatwa na kifo kama chake na kufufuliwa kwenye uhai wa kimbingu.
Ili kuurithi Ufalme wa kimbingu, ni lazima wapakwa-mafuta ‘wajitahidi zaidi kufanya imara kuitwa kwao na uteule wao.’ (2 Petro 1:5-11) Wanatembea kwa imani na kufuliza kukua kiroho, jinsi vile wale walio na matumaini ya kidunia hufanya. Kwa hiyo, ni jambo gani lingine linalohusu ushuhuda wa roho?
Sababu Wanashiriki
Wakristo wapakwa-mafuta hawataki kuenda mbinguni kwa sababu ya kutoridhika na uhai wa kidunia wa siku hizi. (Linganisha Yuda 3, 4, 16.) Badala ya hiyo, roho takatifu hushuhudia pamoja na roho yao kwamba wao ni watoto wa Mungu. Wao wana uhakika pia kwamba wamechukuliwa katika agano jipya. Wenye kushiriki katika agano hilo ni Yehova Mungu na Israeli wa kiroho. (Yeremia 31:31-34; Wagalatia 6:15, 16; Waebrania 12:22-24) Agano hilo, lililotendeshwa kazi kwa damu ya Yesu iliyomwagwa, linatwaa watu kwa ajili ya jina la Yehova na kuwafanya Wakristo hawa wapakwa-mafuta kuwa sehemu ya “mbegu” ya Abrahamu. (Wagalatia 3:26-29, NW; Matendo 15:14) Agano jipya linabaki likitenda kazi hadi Waisraeli wote wa kiroho wanafufuliwa kwenye uhai usiokufa mbinguni.
Zaidi ya hayo, wale ambao kwa kweli wana ule mwito wa mbinguni hawana shaka kwamba wamo pia katika lile agano kwa ajili ya Ufalme wa kimbingu. Yesu alirejezea agano hilo kati yake na wafuasi wake wakati aliposema hivi: “Nanyi ndinyi mliodumu pamoja nami katika majaribu yangu. Nami nawawekea ninyi ufalme [nafanya agano pamoja nanyi, NW], kama vile Baba yangu alivyoniwekea [amefanya agano pamoja na, NW] mimi; mpate kula na kunywa mezani pangu katika ufalme wangu; na kuketi katika viti vya enzi, huku mkiwahukumu kabila kumi na mbili za Israeli.” (Luka 22:28-30) Agano hilo lilianzishwa kuelekea wanafunzi wa Yesu kwa wao kupakwa mafuta kwa roho takatifu siku ya Pentekoste 33 W.K. Hilo linabaki likitenda kazi kati ya Kristo na wafalme washirika wake milele.—Ufunuo 22:5.
Wale ambao wana ule mwito wa mbinguni wana uhakika kwamba wamo ndani ya agano jipya na ndani ya agano kwa ajili ya Ufalme. Kwa hiyo, kwa kufaa wanashiriki mkate na divai za mifano kwenye makumbusho ya kila mwaka ya chakula cha jioni cha Bwana, au Ukumbusho wa kifo cha Yesu Kristo. Mkate usiotiwa chachu unafananisha mwili wa Yesu wa kibinadamu usio na dhambi, na divai damu yake kamilifu iliyomwagwa katika kifo na kulihalalisha agano jipya.—1 Wakorintho 11:23-26.
Ikiwa Yehova amekuza ndani yako tumaini lisiloweza kukanushwa la uhai wa kimbingu, wewe unategemea hilo. Wewe hutoa sala katika wonyesho wa tumaini hilo. Linavuta fikira zako zote, na huwezi kulitoa mwilini mwako. Una tamaa za kiroho zinazokushughulisha kabisa. Lakini ikiwa wewe umegawanyika na huna uhakika, basi kwa hakika wewe hupaswi kushiriki mifano ya Chakula cha Jioni cha Bwana.
Kwa Nini Mawazo ya Kimakosa?
Wengine huenda wakashiriki mifano ya Ukumbusho kwa sababu wao kwa kweli hawakiri kwamba kupakwa mafuta “si katika uwezo wa yule atakaye, wala wa yule apigaye mbio; bali wa yule arehemuye, yaani, Mungu.” (Warumi 9:16) Si juu ya mtu kuamua kwamba yeye angependa kuingizwa katika agano jipya na kuwa mrithi mwenzi pamoja na Kristo katika Ufalme wa kimbingu. Chaguo la Yehova ndilo la maana. Katika Israeli la kale, Mungu alichagua wale ambao wangetumikia wakiwa makuhani wake, na alimwua Kora kwa ajili ya kutafuta kwake kwa majivuno ukuhani uliowekwa kimungu katika familia ya Haruni. (Kutoka 28:1; Hesabu 16:4-11, 31-35; 2 Nyakati 26:18; Waebrania 5:4, 5) Vivyo hivyo, isingempendeza Yehova ikiwa mtu angejitokeza kuwa mmoja aliyeitwa awe miongoni mwa wafalme na makuhani wa kimbingu na huku Mungu hakuwa amempa mwito huo.—Linganisha 1 Timotheo 5:24, 25.
Mtu huenda akawaza kimakosa kwamba yeye anao mwito wa mbinguni kwa sababu ya maoni ya moyoni yenye nguvu ambayo yametokana na matatizo makali. Kifo cha mwenzi wa ndoa au jambo lingine lenye kuhuzunisha laweza kumfanya mtu apoteze kupendezwa na uhai duniani. Au huenda mshirika wa karibu akadai kuwa mmoja wa wapakwa-mafuta, na huenda mtu yule akatamani mwisho uo huo. Mambo kama hayo yangeweza kumfanya aone kwamba uhai wa mbinguni ni wake. Lakini hiyo siyo njia ya Mungu ya kumpa yeyote roho ya uana. Ikiwa mtu angetamani kwenda mbinguni kwa sababu ya hali zisizotakiwa au msononeko wa moyoni unaohusiana na uhai wa kidunia, hiyo ingeonyesha ukosefu wa shukrani kwa ajili ya kusudi la Mungu kuhusu dunia.
Maoni ya kwanza ya kidini yangeweza pia kumfanya mtu akate maneno kimakosa kwamba anao mwito wa mbinguni. Labda wakati mmoja alikuwa anashiriki na dini bandia ambayo ilitolea uhai wa kimbingu kuwa tumaini la pekee kwa ajili ya waaminifu. Kwa hiyo, Mkristo apaswa kujilinda dhidi ya kushawishwa na maoni ya moyoni na maoni bandia ya zamani.
Uchunguzi wa Uangalifu Ni Muhimu
Jambo la maana sana lilitokezwa na mtume Paulo wakati alipoandika hivi: “Basi kila aulaye mkate huo, au kukinywea kikombe hicho cha Bwana isivyostahili, atakuwa amejipatia hatia ya mwili na damu ya Bwana. Lakini mtu ajihoji mwenyewe, na hivyo aule mkate, na kukinywea kikombe. Maana alaye na kunywa, hula na kunywa hukumu ya nafsi yake, kwa kutokuupambanua ule mwili.” (1 Wakorintho 11:27-29) Kwa hiyo, Mkristo aliyebatizwa ambaye katika miaka ya hivi karibuni alianza kufikiri kwamba yeye alipokea mwito wa mbinguni apaswa afikirie jambo hilo kwa uangalifu sana na kwa sala.
Mtu kama huyo pia angejiuliza hivi: ‘Je! wengine wameniongoza ili niwe na wazo la uhai wa kimbingu? Hilo halingefaa kwa kuwa Mungu hajaamrisha yeyote aandike wengine kwa ajili ya pendeleo hili. Mwelekeo wa kuwazia-wazia tu usingekuwa onyesho wa kupakwa mafuta na Mungu, naye hapaki mafuta warithi wa Ufalme kwa kuwafanya wasikie sauti zenye ujumbe kwa maana hiyo.
Wengine wangejiuliza hivi: Je! kabla ya kuwa Mkristo, nilihusika na kutumia vibaya dawa za kulevya? Ninatumia dawa ambazo zinaathiri maoni ya moyoni? Nimepokea utabibu kwa ajili ya matatizo ya akili au maoni ya moyoni?’ Wengine wamesema kwamba kwanza walipigana dhidi ya lile walilofikiri lilikuwa tumaini la kimbingu. Wengine wamesema kwamba kwa wakati fulani Mungu alikuwa ameondoa tumaini lao la kidunia na mwishowe akawapa la kimbingu. Lakini jinsi hiyo ya kutenda ni kinyume cha matendo ya kimungu. Tena, imani siyo yenye shaka; ni ya uhakika.—Waebrania 11:6.
Mtu pia angejiuliza mwenyewe hivi: ‘Je! mimi natamani umashuhuri? Mimi ni mwenye kutaka makuu ya kuwa na cheo cha mamlaka sasa au kuwa mmoja wa wafalme na makuhani wanaoshiriki pamoja na Kristo?’ Katika karne ya kwanza W.K., wakati mwaliko kwa watu wote ili watafute mwingilio katika Ufalme wa kimbingu ulipokuwa ukitolewa, sio Wakristo wapakwa-mafuta wote ambao walikuwa na vyeo vya daraka wakiwa washiriki wa baraza linaloongoza au wakiwa wazee au watumishi wa huduma. Wengi walikuwa wanawake, na hawakuwa na mamlaka yoyote ya kipekee; wala kupakwa mafuta kwa roho hakuleti ufahamu wa Neno la Mungu usio wa kawaida, kwa maana Paulo aliona uhitaji wa kufunza na kushauri wengine wapakwa-mafuta. (1 Wakorintho 3:1-3; Waebrania 5:11-14) Wale walio na mwito wa mbinguni hawajioni kuwa watu mashuhuri, na hawavuti uangalifu kwao kwamba wao ndio wapakwa-mafuta. Badala ya hiyo, wanaonyesha unyenyekevu ambao unatazamiwa kutoka kwa wale walio na “akili ya Kristo.” (1 Wakorintho 2:16, NW) Wao pia hung’amua kwamba ni lazima matakwa yenye uadilifu ya Mungu yafuatwe na Wakristo wote, kama tumaini lao ni la kimbingu au la kidunia.
Kudai kuwa na mwito wa kimbingu hakumletei mtu mafunuo ya kipekee. Mungu anayo njia ya uwasiliano ambayo kupitia hiyo yeye huandalia tengenezo lake la kidunia chakula cha kiroho. (Mathayo 24:45-47) Kwa hiyo hakuna yeyote apaswaye kufikiri kwamba kuwa Mkristo mpakwa-mafuta kunampa hekima iliyo ya ubora wa juu kuliko ile ya “mkutano mkubwa” walio na tumaini la kidunia. (Ufunuo 7:9) Kuwa mwenye ustadi katika kutoa ushahidi, kujibu maswali ya Kimaandiko, au kutoa hotuba za Biblia hakuonyeshi kupakwa mafuta kwa roho, kwa kuwa Wakristo wenye tumaini la kidunia hufanya vizuri sana katika mambo hayo pia. Kama wapakwa-mafuta, wao pia huishi maisha ya Kikristo yenye mifano mizuri. Kwa jambo hilo, Samsoni na wengine katika nyakati kabla ya Ukristo walikuwa na roho ya Mungu na walijawa na juhudi na ufahamu. Hata hivyo, hakuna yeyote wa hilo “wingu kubwa la mashahidi” aliyekuwa na tumaini la kimbingu.—Waebrania 11:32-38; 12:1; Kutoka 35:30, 31; Waamuzi 14:6, 19; 15:14; 1 Samweli 16:13; Ezekieli 2:2.
Mkumbuke Anayefanya Uchaguzi
Ikiwa mwamini mwenzi auliza juu ya mwito wa mbinguni, mzee aliyewekwa au Mkristo mwingine aliyekomaa aweza kuzungumza juu ya jambo hilo pamoja naye. Lakini mtu mmoja hawezi kufanya uamuzi huo kwa ajili ya mwingine, na ni Yehova ambaye hutoa tumaini la kimbingu. Mtu ambaye kwa kweli anao mwito wa mbinguni hahitajiki kamwe kuuliza Wakristo wenzake ikiwa analo tumaini hilo. Wapakwa-mafuta ‘wamezaliwa mara ya pili [upya, HNWW]; si kwa mbegu iharibikayo, bali kwa ile isiyoharibika; kwa neno la Mungu lenye uzima, lidumulo hata milele.’ (1 Petro 1:23) Kupitia roho na Neno lake, Mungu hupanda “mbegu” ambayo inamfanya mtu “kiumbe kipya,” aliye na tumaini la kimbingu. (2 Wakorintho 5:17) Ndiyo, Yehova ndiye hufanya uchaguzi.
Kwa hiyo, wakati wa kujifunza Biblia na wapya, si vizuri kuwadokezea kwamba wajaribu kuamua kama wanao mwito wa mbinguni. Lakini vipi ikiwa Mkristo mpakwa mafuta alithibitika kutokuwa mwaminifu na ikahitajika mwingine kuingia mahali pake? Basi lingekuwa jambo la akili kukata maneno kwamba Mungu angeutoa mwito wa mbinguni kwa mtu ambaye alikuwa mwenye mfano mzuri katika kutoa utumishi mwaminifu kwa miaka mingi sana kwa Baba yetu wa mbinguni
Leo, msukumo mkuu wa ujumbe wa Mungu si ili watu wawe washiriki wa bibi arusi wa kimbingu wa Kristo. Bali, “Roho na Bibi-arusi wasema, Njoo!” Huo ni mwaliko kwa uhai katika paradiso ya kidunia. (Ufunuo 22:1, 2, 17) Wapakwa-mafuta wanapoongoza katika utendaji huo, wao huonyesha “unyenyekevu” na hujitahidi ‘kufanya imara kuitwa kwao na uteule wao.’—Waefeso 4:1-3; 2 Petro 1:5-11.