MAMLAKA ZILIZO KUBWA
Maneno yanayopatikana kwenye Waroma 13:1 yanayorejelea mamlaka za serikali za wanadamu. Andiko hilo limetafsiriwa kwa njia mbalimbali, kama vile: “Kila mtu na ajitiishe kwa mamlaka zilizo kubwa, kwa maana hakuna mamlaka isipokuwa kupitia Mungu; mamlaka zilizopo zimewekwa na Mungu katika vyeo vyao vya kadiri.” (NW) “Kila mtu anapaswa kuwatii wenye mamlaka katika serikali; maana mamlaka yote hutoka kwa Mungu; nao wenye mamlaka wamewekwa na Mungu.” (BHN) “Kila mtu na aitii mamlaka iliyo kuu; kwa maana hakuna mamlaka isiyotoka kwa Mungu; na ile iliyopo imeamriwa na Mungu.”—UV.
Yehova Mungu, ingawa yeye si mwanzilishi wa serikali hizo (linganisha Mt 4:8, 9; 1Yo 5:19; Ufu 13:1, 2), ameruhusu mamlaka za serikali za wanadamu ziwepo, na zinaendelea kuwapo kwa ruhusa yake. Hata hivyo, anapochagua kufanya hivyo, Yehova anaweza kuondoa, kuongoza, au kudhibiti mamlaka hizo ili atimize mapenzi yake. Nabii Danieli alisema hivi kumhusu Yehova: “Yeye hubadili nyakati na majira, huwaondoa wafalme na kuwaweka wafalme.” (Da 2:21) Na Methali 21:1 inasema: “Moyo wa mfalme ni kama vijito vya maji mkononi mwa Yehova. Yeye huuelekeza mahali popote anapopenda.”—Linganisha Ne 2:3-6; Est 6:1-11.
Sababu za Wakristo Kujitiisha. Kwa kuwa hakuna sababu ya kuwafanya Wakristo wapinge mpango ambao umeruhusiwa na Mungu, basi Wakristo wana sababu nzuri ya kujitiisha chini ya mamlaka zilizo kubwa. Ingawa huenda wenye mamlaka katika serikali wakawa wafisadi, kwa kawaida hawaadhibu mtu kwa kufanya jambo zuri, yaani, kutii sheria ya nchi. Lakini mtu anayehusika katika wizi, uuaji, au matendo mengine ya uvunjaji wa sheria anaweza kutarajia kwamba atapata hukumu kali kutoka kwa wenye mamlaka. Kwa mfano, mtu aliye na hatia ya kuua kimakusudi anaweza kuuawa kwa kosa lake. Kwa kuwa baada ya Gharika Yehova Mungu alitoa hukumu ya kifo kwa wauaji (Mwa 9:6), mamlaka za wanadamu zingekuwa zikitenda kama “mhudumu wa Mungu, [anayelipiza] kisasi ili kuonyesha ghadhabu dhidi ya yule anayefanya mabaya” kwa kumuua mvunjaji sheria huyo.—Ro 13:2-4; Tit 3:1; 1Pe 2:11-17.
Wakristo hawajitiishi chini ya mamlaka zilizo kubwa kwa sababu tu zina uwezo wa kuwaadhibu watenda mabaya. Kwa Mkristo, ujitiisho ni suala la dhamiri. Anajitiisha chini ya mamlaka za wanadamu kwa sababu anatambua kwamba kufanya hivyo kunapatana na mapenzi ya Mungu. (Ro 13:5; 1Pe 2:13-15) Hivyo, hawezi kujitiisha kikamili kwa mamlaka zilizo kubwa, yaani, mamlaka za kisiasa za ulimwengu. Haiwezekani kwa Mkristo kudumisha dhamiri njema na afanye mapenzi ya Mungu ikiwa angevunja sheria ya Mungu kwa sababu mamlaka za kisiasa zimemlazimisha kufanya hivyo. Kwa sababu hiyo, ujitiisho chini ya mamlaka zilizo kubwa lazima upatane na maneno waliosema mitume mbele ya Sanhedrini ya Kiyahudi: “Lazima tumtii Mungu kuwa mtawala badala ya wanadamu.”—Mdo 5:29.
Kwa kuwa mamlaka za serikali hutoa huduma nzuri ili kuhakikisha kwamba raia wake wana usalama, utulivu, na hali njema, basi zinastahili kupokea kodi na ushuru kwa sababu ya huduma hizo. Mamlaka za serikali zinaweza kuitwa “watumishi wa Mungu kwa watu wote” katika maana ya kwamba zinatoa huduma zenye faida. (Ro 13:6, 7) Nyakati nyingine huduma kama hizo ziliwanufaisha moja kwa moja watumishi wa Mungu, kama wakati ambapo Mfalme Koreshi alifanya iwezekane kwa Wayahudi kurudi Yuda na Yerusalemu na kulijenga upya hekalu. (2Nya 36:22, 23; Ezr 1:1-4) Kwa kawaida mamlaka zinapofanya kazi vizuri watu wote hufaidika. Baadhi ya manufaa hizo zinatia ndani kudumisha mfumo mzuri wa sheria ambapo watu wanaweza kuomba kutendewa haki, walindwe kutokana na wahalifu na magenge yanayovunja sheria, na kadhalika.—Flp 1:7; Mdo 21:30-32; 23:12-32.
Bila shaka, mtawala anayetumia vibaya mamlaka yake anawajibika mbele za Mungu. Mtume Paulo aliandika hivi: “Wapendwa, msijilipizie kisasi bali iachieni nafasi ghadhabu; kwa maana imeandikwa: ‘Kisasi ni changu; mimi nitalipa, asema Yehova.’”—Ro 12:19; Mhu 5:8.