Waliotengwa Wawe Wasifaji Wenye Shangwe Ulimwenguni Pote

“Haleluya. Enyi watumishi wa BWANA, sifuni, lisifuni jina la BWANA.”—ZABURI 113:1.

1, 2. (a) Kupatana na Zaburi 113:1-3, ni nani anayestahili sifa zetu zenye idili? (b) Inafaa kuuliza swali gani?

YEHOVA MUNGU ndiye Muumba Mtukufu wa mbingu na dunia, Mwenye Enzi Kuu ya Ulimwengu Wote Mzima wetu kwa umilele wote. Ni mwenye kustahili kikamili sifa yetu yenye idili. Hiyo ndiyo sababu Zaburi 113:1-3 hutuamuru hivi: “Haleluya. Enyi watumishi wa BWANA, sifuni, lisifuni jina la BWANA. Jina la BWANA lihimidiwe tangu leo na hata milele. Toka maawio ya jua hata machweo yake jina la BWANA husifiwa.”

² Tukiwa Mashahidi wa Mungu, twashangilia kumsifu. Yasisimua kama nini kwamba Yehova Mungu karibuni atafanya wimbo huo wenye shangwe wa sifa tunaoimba leo uijaze dunia nzima! (Zaburi 22:27) Je, sauti yako yasikika katika kwaya hiyo ya ulimwenguni pote? Ikiwa yasikika, lazima iwe yakufurahisha kama nini kuwa umetengwa na ulimwengu huu usio na muungano, wala shangwe!

3. (a) Ni nini huwafanya watu wa Yehova kuwa tofauti, wa pekee? (b) Tumetengwa katika njia zipi?

³ Kwa hakika kumsifu kwetu Yehova kwa muungano hutufanya tuwe tofauti, wa pekee. Twasema na kufundisha kwa mwafaka na kutumia njia zilezile ili kutangaza ‘wema mwingi wa Yehova.’ (Zaburi 145:7, Biblia Habari Njema) Ndiyo, tukiwa watu wa Yehova waliojiweka wakfu, tumetengwa ili kumtumikia Mungu wetu, Yehova. Mungu aliwaambia watu wake wa kale waliojiweka wakfu, Israeli, wajitenge na mataifa yaliyowazunguka na wasichafuliwe na mazoea ya mataifa hayo. (Kutoka 34:12-16) Aliwapa watu wake sheria za kuwasaidia wafanye hivyo. Hali kadhalika leo, Yehova ametupatia Neno lake Takatifu, Biblia. Maagizo yayo hutuonyesha jinsi ya kujitenga na ulimwengu huu. (2 Wakorintho 6:17; 2 Timotheo 3:16, 17) Hatutengwi kwa kukaa peke yetu katika nyumba na makao ya watawa, kama watawa wa kiume na wa kike wa Babiloni Mkubwa wafanyavyo. Kwa kufuata kielelezo cha Yesu Kristo, sisi ni wasifaji wa hadharani wa Yehova.

Igeni Msifaji Mkuu wa Yehova

4. Yesu aliwekaje kielelezo katika kumsifu Yehova?

⁴ Yesu hakukengeuka kamwe kutoka kwenye kusudi lake la kumsifu Yehova. Na hilo lilimtenga na ulimwengu. Katika masinagogi na hekaluni huko Yerusalemu, alisifu jina takatifu la Mungu. Yesu alihubiri kweli za Yehova hadharani, popote ambapo umati ungekusanyika, iwe mlimani au ufukoni. Alitangaza hivi: “Nakusifu wewe hadharani, Baba, Bwana wa mbingu na dunia.” (Mathayo 11:25) Hata alipokuwa hukumuni mbele ya Pontio Pilato, Yesu alitoa ushahidi hivi: “Kwa ajili ya hili mimi nimezaliwa, na kwa ajili ya hili nimekuja kuingia ulimwenguni, ili nitoe ushahidi juu ya ile kweli.” (Yohana 18:37) Yesu aling’amua umaana wa kazi yake. Popote alipokuwa, Yesu alitoa ushahidi juu ya Yehova na kumsifu hadharani.

5. Andiko la Zaburi 22:22 latumika kwa nani, na mtazamo wetu wapaswa kuwa nini?

⁵ Kwenye Zaburi 22:22, twapata taarifa hii ya kiunabii kuhusu Msifaji Mkuu wa Yehova: “Nitalihubiri jina lako kwa ndugu zangu, katikati ya kusanyiko nitakusifu.” Na kwenye Waebrania 2:11, 12, mtume Paulo atumia mistari hiyo imhusu Bwana Yesu, na wale ambao Yehova Mungu amewatakasa kwa ajili ya utukufu wa kimbingu. Kama yeye, hawaonei haya kulisifu jina la Yehova katikati ya kusanyiko. Je, tuna mtazamo huohuo wa akili tunapohudhuria mikutano yetu ya kutaniko? Kushiriki kwetu kwa idili mikutanoni, kwa kusikiliza na kwa kutoa maelezo na kuimba, humsifu Yehova. Lakini je, sifa yetu yenye shangwe yaishia hapo?

6. Yesu aliwapa wanafunzi wake utume gani, na wapendao nuru humtukuzaje Mungu?

⁶ Kulingana na Mathayo 5:14-16, Bwana Yesu pia aliwapa wafuasi wake utume wa kuacha nuru yao ing’ae hivi kwamba wengine wangeweza kumsifu Yehova. Alisema hivi: “Nyinyi ndio nuru ya ulimwengu. . . . Acheni nuru yenu ing’ae mbele ya watu, ili wapate kuona kazi zenu bora na kumpa utukufu Baba yenu aliye katika mbingu.” Wapendao nuru humletea Mungu utukufu. Je, wanafanya hivyo kwa kusema na kufanya mambo mazuri tu, mambo ya hisani tu? La, badala ya hivyo, wanafanya hivyo kwa kumtukuza Yehova kwa muungano. Ndiyo, wapendao nuru hujiweka wakfu kwa Mungu na kuwa wasifaji wake wenye shangwe. Je, wewe umechukua hatua hiyo yenye furaha?

Shangwe Kutokana na Kumsifu Yehova

7. Kwa nini wasifaji wa Yehova ni wenye shangwe sana, nao walikuwa na shangwe gani katika siku ya Pentekoste 33 W.K.?

⁷ Kwa nini wasifaji wa Yehova ni wenye shangwe sana? Kwa sababu shangwe ni tunda la roho takatifu ya Mungu. Kwenye Wagalatia 5:22, shangwe imeorodheshwa baada tu ya upendo. Wanafunzi wa Yesu katika karne ya kwanza walidhihirisha tunda hilo la roho ya Yehova. Kwani, siku ya Pentekoste 33 W.K., Mungu alipowamwagia roho yake wanafunzi wa Yesu wapatao 120, wote walianza kumsifu Yehova katika lugha mbalimbali. Wayahudi wenye kumhofu Mungu waliokuwa wamekuja Yerusalemu kutoka katika mataifa mengi ‘walishikwa na bumbuazi na kushangaa.’ Walisema hivi kwa mshangao: “Twawasikia wakisema katika lugha zetu juu ya mambo yenye fahari ya Mungu”! (Matendo 2:1-11) Tokeo la kumsifu Yehova huko kwa lugha nyingi ajabu lilikuwa nini? Wayahudi na wageuzwa-imani wa Kiyahudi wapatao 3,000 walikubali habari njema ya Ufalme kuhusu Mesiya. Walibatizwa, wakapokea roho takatifu, nao wakaongeza sauti zao wakiwa wasifaji wenye shangwe wa Yehova. (Matendo 2:37-42) Hiyo ilikuwa baraka kama nini!

8. Baada ya Pentekoste, Wakristo walifanya nini ili kuiendeleza shangwe yao?

⁸ Hiyo ripoti yaendelea kusema hivi: “Siku baada ya siku walikuwa wakihudhuria daima kwenye hekalu kwa umoja, nao walikula milo yao katika nyumba za faragha na kushiriki chakula kwa shangilio kuu na weupe wa moyo, wakimsifu Mungu na kupata upendeleo kwa watu wote. Wakati uleule Yehova akaendelea kuongeza kwao kila siku wale wenye kuokolewa.” (Matendo 2:46, 47) Je, kushirikiana pamoja na kula chakula tu ndiko kulikowaletea shangwe kubwa? La, shangwe yao kuu ilitokana na kumsifu Yehova Mungu siku baada ya siku. Nayo shangwe yao iliongezeka walipoona maelfu ya watu wakiitikia ujumbe wao wa wokovu. Ndivyo ilivyo kwa habari yetu leo.

Wasifaji Wenye Shangwe Katika Mataifa Yote

9. (a) Mungu alianza kuwapa watu wa mataifa yote fursa ya kusikia habari njema wakati gani na jinsi gani? (b) Kwa nini roho takatifu ilimwagwa juu ya Kornelio na washirika wake kabla ya ubatizo?

⁹ Yehova hakutaka utendaji wa watumishi wake wa kutoa nuru uwe wa taifa moja tu. Kwa hiyo, kuanzia mwaka wa 36 W.K., aliwapa watu wa mataifa yote fursa ya kusikia habari njema yake. Kwa mwelekezo wa Mungu, Petro alienda kwenye nyumba ya ofisa-jeshi asiye Myahudi huko Kaisaria. Huko alimkuta Kornelio akiwa amekusanyika pamoja na familia yake na rafiki zake wa karibu zaidi. Walipokuwa wakisikiliza maneno ya Petro kwa makini, walidhihirisha imani katika Yesu mioyoni mwao. Twajuaje? Kwa sababu roho takatifu ya Mungu iliwajia waamini hao wasio Wayahudi. Kwa kawaida, zawadi ya roho ya Mungu ilitolewa baada ya ubatizo tu, lakini kwenye pindi hiyo Yehova alionyesha kukubali kwake wasio Wayahudi kabla ya kuzamishwa kwao. Ikiwa Yehova hangekuwa amefanya hivyo, Petro asingalikuwa na uhakika wa kwamba sasa Mungu alikuwa akiwakubali Wasio Wayahudi wawe watumishi Wake na kwamba walikuwa na sifa za kustahili kubatizwa kwa maji.—Matendo 10:34, 35, 47, 48.

10. Ilitabiriwaje kutoka nyakati za kale kwamba watu wa mataifa yote wangemsifu Yehova?

¹⁰ Tangu nyakati za kale, Yehova aliahidi kwamba watu wa mataifa yote wangemsifu. Angekuwa na wasifaji wenye shangwe katika kila nchi. Ili kuthibitisha hilo, mtume Paulo alinukuu unabii mbalimbali kutoka katika Maandiko ya Kiebrania. Aliliambia kutaniko la kimataifa la Wakristo katika Roma hivi: “Karibishaneni, kama vile Kristo pia alivyotukaribisha sisi, kwa tazamio la utukufu kwa Mungu. Kwa maana nasema kwamba kwa kweli Kristo alipata kuwa mhudumu wa wale waliotahiriwa kwa ajili ya ukweli wa Mungu, ili kuthibitisha ahadi ambazo Yeye aliwafanyia baba zao wa zamani, na kwamba mataifa yapate kumtukuza Mungu kwa ajili ya rehema yake. Kama vile imeandikwa [kwenye Zaburi 18:49]: ‘Hiyo ndiyo sababu hakika nitakukiri wewe waziwazi miongoni mwa mataifa na kwa jina lako hakika nitafanya melodia.’ Na tena asema [kwenye Kumbukumbu la Torati 32:43]: ‘Iweni na mteremo, nyinyi mataifa, pamoja na watu wake.’ Na tena [kwenye Zaburi 117:1]: ‘Sifuni Yehova, nyinyi mataifa yote, na acheni vikundi vyote vya watu vimsifu yeye.’”—Waroma 15:7-11.

11. Mungu amewasaidiaje watu wa mataifa yote wajifunze kweli zake, na tokeo limekuwa nini?

¹¹ Watu hawawezi kumsifu Yehova kwa muungano isipokuwa wameweka tumaini lao juu ya Yesu Kristo, yule ambaye Mungu amemweka rasmi atawale watu wote wa mataifa. Ili kuwasaidia wang’amue kweli Zake ziongozazo kwenye uhai wa milele, Mungu ameanzisha programu ya ufundishaji ya kimataifa. Anatoa mwelekezo kupitia jamii yake ya mtumwa mwaminifu. (Mathayo 24:45-47) Tokeo ni nini? Sauti zenye shangwe za watu zaidi ya milioni tano zinaimba sifa za Yehova katika nchi zaidi ya 230. Na mamilioni zaidi ya watu wanaonyesha upendezi katika kufanya vivyo hivyo. Ona ni wangapi waliohudhuria Ukumbusho wa mwaka wa 1996: watu 12,921,933. Ajabu!

Umati Mkubwa wa Wasifaji Wenye Shangwe Watabiriwa

12. Ni ono gani lenye kuamsha aliloona Yohana, na ni yapi mambo halisi ya ono hilo?

¹² Katika ono, mtume Yohana aliona “umati mkubwa” kutoka katika mataifa yote. (Ufunuo 7:9) Kichwa cha sifa ambazo umati huo mkubwa pamoja na mabaki ya watiwa-mafuta wa Mungu wanaimba ni nini? Yohana atuambia: “Sisi tunawiwa wokovu na Mungu wetu, aketiye juu ya hicho kiti cha ufalme, na kwa Mwana-Kondoo.” (Ufunuo 7:10) Hilo linatangazwa kwa ujasiri katika kila sehemu ya ulimwengu. Kwa kupunga matawi ya mitende, kusema kitamathali, twamsifu Mungu kwa muungano akiwa Mwenye Enzi Kuu ya Ulimwengu Wote Mzima na kukiri kwa shangwe mbele ya dunia na mbingu kwamba “tunawiwa” wokovu wetu naye na Mwana wake, yule Mwana-Kondoo, Yesu Kristo. Loo, mtume Yohana alisisimuka kama nini kwa kuona ono hilo lenye kusisimua la umati mkubwa! Nasi twasisimuka kama nini leo kuona, na hata kuwa sehemu ya, mambo halisi aliyoona Yohana!

13. Ni nini huwatenga watu wa Yehova na ulimwengu?

¹³ Tukiwa watumishi wa Yehova, twajivunia kuitwa kwa jina lake. (Isaya 43:10, 12) Kuwa kwetu Mashahidi wa Yehova hutufanya tuwe tofauti na ulimwengu huu. Ni shangwe iliyoje kuitwa kwa jina la pekee la Mungu na kufanya kazi yake ya kimungu kuwe kusudi kuu maishani mwetu! Kusudi tukufu la Yehova la kutakasa jina lake takatifu na kutetea enzi yake kuu ya ulimwengu wote mzima kupitia kwa Ufalme kumeyafanya maisha yetu yawe na maana. Naye ametusaidia tuwe na sehemu katika kusudi lake la kimungu kwa habari ya jina lake na Ufalme wake. Amefanya hilo kwa njia tatu.

Kukabidhiwa Ile Kweli

14, 15. (a) Ni ipi njia moja ambayo Mungu ametusaidia kuwa na sehemu katika kusudi lake la kimungu kwa habari ya jina lake na Ufalme wake? (b) Ufalme ulioanzishwa katika 1914 W.K. watofautianaje na ule uliopinduliwa katika 607 K.W.K.?

¹⁴ Kwanza, Yehova amewakabidhi watu wake ile kweli. Ufunuo wenye kusisimua zaidi sana ni ule wa kwamba Ufalme wake ulianza kutawala katika 1914. (Ufunuo 12:10) Serikali hiyo ya kimbingu yatofautiana na ufalme wa ufananisho katika Yerusalemu, ambamo wafalme wa uzawa wa Daudi walikuwa wakitawazwa. Ufalme huo ulipinduliwa, na kuanzia mwaka wa 607 K.W.K., Yerusalemu lilikuwa limetiishwa kabisa chini ya utawala wa serikali za ulimwengu za Wasio Wayahudi. Ufalme mpya ambao Yehova alianzisha katika 1914 ni serikali ya kimbingu ambayo haitatiishwa kamwe chini ya yeyote ila Yehova, wala haitaangamizwa. (Danieli 2:44) Pia, utawala wayo ni tofauti. Jinsi gani? Andiko la Ufunuo 11:15 lajibu hivi: “Sauti kubwa zikatokea mbinguni, zikisema: ‘Ufalme wa ulimwengu ulipata kuwa ufalme wa Bwana wetu na wa Kristo wake, naye atatawala akiwa mfalme milele na milele.’”

¹⁵ “Ufalme wa Bwana wetu na wa Kristo wake” watekeleza mamlaka juu ya ulimwengu wote wa wanadamu. Wonyesho huo mpya wa enzi kuu ya Yehova, unaotia ndani Mwana wake wa Kimesiya na ndugu za Yesu 144,000, ambao wengi wao sasa wanafufuliwa kuingia katika utukufu wa kimbingu, si jambo la upendezi wa kielimu tu—nadharia tu ambayo wanafunzi wangependa kuzungumzia. La, Ufalme huo wa kimbingu ni serikali halisi. Nalo taraja letu lenye furaha la kuishi milele katika ukamilifu likiwa tokeo la utawala wayo hutupatia sababu ya kutosha ya kuendelea kushangilia. Kukabidhiwa kweli hizo za Neno la Yehova hutusukuma kusema mambo mazuri kuuhusu sikuzote. (Zaburi 56:10) Je, wewe unafanya hilo kwa ukawaida kwa kuambia kila mtu kwamba Ufalme wa Mungu wa Kimesiya unatawala sasa mbinguni?

Kusaidiwa na Roho Takatifu na Udugu wa Ulimwenguni Pote

16, 17. Njia ya pili na ya tatu ambazo Mungu ametusaidia kuwa na sehemu katika kusudi lake la kimungu ni zipi?

¹⁶ Njia ya pili ambayo Mungu ametusaidia kuwa na sehemu katika kusudi lake la kimungu ni kwa kutupatia roho yake takatifu, inayotuwezesha kuzaa matunda yayo mazuri maishani mwetu na kupata kibali chake. (Wagalatia 5:22, 23) Zaidi ya hayo, Paulo aliwaandikia Wakristo watiwa-mafuta hivi: “Tulipokea . . . roho itokayo kwa Mungu, ili tupate kuyajua mambo ambayo tumepewa kwa fadhili na Mungu.” (1 Wakorintho 2:12) Kwa kuitikia kwetu roho ya Yehova, sasa sisi sote twaweza kujua na kuelewa mambo mazuri yaliyopo ambayo ametupatia kwa fadhili—ahadi zake, sheria zake, na kadhalika.—Linganisha Mathayo 13:11.

¹⁷ Kuhusu njia ya tatu ambayo Mungu anatusaidia, tuna udugu wa ulimwenguni pote na mpango wenye kupendeza wa kitengenezo wa Yehova kwa ajili ya ibada. Mtume Petro alisema juu yao alipotuhimiza sana “[tuwe] na upendo kwa ushirika mzima wa ndugu.” (1 Petro 2:17) Familia yetu ya kimataifa ya ndugu na dada wenye upendo hutusaidia kumtumikia Yehova kwa shangwe kubwa ya moyoni, kama vile liamuruvyo andiko la Zaburi 100:2: “Mtumikieni BWANA kwa furaha; njoni mbele zake kwa kuimba.” Mstari wa 4 waendelea kusema hivi: “Ingieni malangoni mwake kwa kushukuru; nyuani mwake kwa kusifu; mshukuruni, lihimidini jina lake.” Kwa hiyo iwe tunahubiri hadharani au tunahudhuria mikutano yetu, twaweza kuwa na shangwe. Ni amani na usalama ulioje ambao tumepata katika nyua nzuri za hekalu la kiroho la Yehova!

Msifuni Yehova kwa Shangwe!

18. Kwa nini twaweza kushangilia katika kumsifu Yehova ujapokuwa mnyanyaso au matatizo mengineyo yanayotusumbua?

¹⁸ Haidhuru ni hali zipi ngumu, mnyanyaso, au matatizo mengineyo ambayo huenda yakatusumbua, acheni tushangilie kwamba tuko katika nyumba ya Yehova ya ibada. (Isaya 2:2, 3) Kumbukeni kwamba shangwe ni sifa ya moyoni. Ndugu na dada zetu Wakristo wa mapema walikuwa wasifaji wenye shangwe wa Yehova yajapokuwa magumu mengi na hasara nyingi walizopata. (Waebrania 10:34) Waamini wenzetu leo ni kama wao tu.—Mathayo 5:10-12.

19. (a) Ni amri gani zenye kurudiwa zinazotuchochea tumsifu Yehova? (b) Uhai wetu wa milele wategemea nini, na azimio letu ni nini?

¹⁹ Sisi sote tunaomtumikia Yehova hupendezwa kutii amri za Biblia za kumsifu. Kitabu cha Ufunuo chatumia usemi “Sifuni Yah!” tena na tena katika sifa za Mungu. (Ufunuo 19:1-6) Katika ile mistari sita ya Zaburi 150, twaambiwa mara 13 tumsifu Yehova. Huo ni mwito wa ulimwenguni pote kwa uumbaji wote wajiunge katika kuimba sifa za Yehova kwa shangwe. Uhai wetu wa milele wategemea kujiunga kwetu katika korasi hii kubwa ya Haleluya! Ndiyo, watu pekee watakaoishi milele ni wale tu wanaomtolea Yehova sifa bila kukoma. Kwa hiyo, tumeazimia kukaa karibu na kutaniko lake lenye uaminifu-mshikamanifu la ulimwenguni pote mwisho ukaribiapo. Kisha, twaweza kutarajia kuona maneno ya mwisho ya Zaburi 150 yakiwa yametimizwa kikamili: “Kila mwenye pumzi na amsifu BWANA. Haleluya”!

Ungejibuje?

◻ Ni nini huwafanya watu wa Yehova kuwa tofauti, wa pekee?

◻ Kwa nini watumishi wa Yehova ni wenye shangwe sana?

◻ Ni nini hututenga na ulimwengu?

◻ Mungu ametusaidia kuwa na sehemu katika kusudi lake la kimungu katika njia gani tatu?

[Picha katika ukurasa wa 17]

Popote alipokuwa, Yesu alitoa ushahidi juu ya Yehova na kumsifu hadharani