Je! Ndoa Ndiyo Ufunguo wa Pekee wa Kupata Furaha?

“Yu huru kuolewa na mtu ye yote amtakaye; katika Bwana tu. Lakini heri yeye zaidi akikaa kama alivyo.”—1 WAKORINTHO 7:39, 40.

1. Maandiko huelezaje juu ya Yehova, naye amefanyia viumbe wake nini?

YEHOVA ni “Mungu mwenye furaha.” (1 Timotheo 1:11, NW) Akiwa Mwandalizi Mkarimu wa “kila kipaji chema na kila zawadi kamilifu,” yeye huwapa viumbe wake wote wenye akili—wa kibinadamu na wa roho—wanachohitaji hasa ili wawe wenye furaha katika utumishi wake. (Yakobo 1:17, Habari Njema kwa Watu Wote) Kulingana na hilo, ndege akiwa anaimba kwa uchangamfu, kijibwa kikicheza kwa furaha, au dolfini mwenye kucheza-cheza, wote hushuhudia kwamba Yehova aliwaumba wanyama wafurahie maisha katika mazingira yao yanayowahusu. Mwandikaji wa zaburi hata hufikia kusema kishairi kwamba “miti ya BWANA [Yehova, NW] nayo imeshiba, mierezi ya Lebanoni aliyoipanda.”—Zaburi 104:16.

2. (a) Ni nini kionyeshacho kwamba Yesu hupata furaha katika kufanya mapenzi ya Baba yake? (b) Wanafunzi wa Yesu walikuwa na sababu zipi za furaha?

² Yesu Kristo ndiye ‘chapa hasa ya nafsi ya Yehova.’ (Waebrania 1:3) Basi, haishangazi kwamba Yesu huitwa “Mwenye furaha na mwenye nguvu pekee.” (1 Timotheo 6:15, NW) Yeye hutuandalia kielelezo chema sana cha jinsi kufanya mapenzi ya Yehova kuwezavyo kuwa kwenye kutosheleza zaidi ya chakula, kukitokeza furaha tupu. Yesu hutuonyesha pia kwamba shangwe yaweza kuwako tutendapo katika kumhofu Yehova, yaani, tukiwa na kicho na hofu inayofaa ya kutokumpendeza Yeye. (Zaburi 40:8; Isaya 11:3; Yohana 4:34) Wakati wanafunzi 70 waliporudi “kwa shangwe” baada ya safari ya kuhubiri Ufalme, Yesu mwenyewe ‘alishangilia kwa roho takatifu.’ Baada ya kumweleza Baba yake shangwe yake katika sala, aliwageukia wanafunzi na kusema: “Heri [yenye furaha ni, NW] macho yaonayo mnayoyaona ninyi. Kwa kuwa nawaambia ya kwamba manabii wengi na wafalme walitamani kuyaona mnayoyaona ninyi wasiyaone; na kuyasikia mnayoyasikia ninyi wasiyasikie.”—Luka 10:17-24.

Sababu za Kuwa na Furaha

3. Ni nini baadhi ya sababu za furaha?

³ Je! macho yetu hayapaswi kufurahi kuona mambo tunayoyaona sasa katika utimizo wa Neno na makusudi ya Yehova katika wakati huu wa mwisho? Je! sisi hatupaswi kushangilia kwa kuelewa unabii mwingi ambao manabii na wafalme waaminifu wa kale, kama vile Isaya, Danieli, na Daudi hawangeweza kuelewa? Je! sisi hatufurahi kumtumikia Yehova, Mungu mwenye furaha, chini ya uongozi wa yule Mwenye nguvu aliye na furaha, Mfalme wetu Yesu Kristo? Bila shaka tunafurahi!

4, 5. (a) Ili kuendelea kuwa wenye furaha katika utumishi wa Yehova, ni lazima tuepuke nini? (b) Ni mambo gani yanayochangia furaha, na hayo yatokeza swali gani?

⁴ Hata hivyo, ikiwa twataka kuendelea kuwa wenye furaha katika utumishi wa Yehova, ni lazima sisi tusitegemeze matakwa yetu ya kupata furaha juu ya mawazo ya kilimwengu. Hayo yaweza kutia giza kufikiri kwetu kwa sababu yanatia ndani utajiri wa vitu vya kimwili, mtindo wa maisha wa kujionyesha, na mambo kama hayo. “Furaha” yoyote inayotegemezwa juu ya mambo kama hayo itakuwa ya muda mfupi tu, kwani ulimwengu huu unapitilia mbali.—1 Yohana 2:15-17.

⁵ Wengi wa watumishi walio wakfu wa Yehova hutambua kwamba kutimiza miradi ya kilimwengu hakutaleta furaha ya kweli. Ni Baba wetu wa kimbingu tu anayeandaa vitu vya kimwili na vya kiroho vinavyochangia furaha ya kweli ya watumishi wake. Twashukuru kama nini kwa ajili ya chakula cha kiroho ambacho anatupa kupitia “mtumwa mwaminifu mwenye akili”! (Mathayo 24:45-47) Tunashukuru pia kwa ajili ya chakula cha kimwili na vitu vingine vya kimwili tunavyopokea kutoka kwa mkono wa Mungu wenye upendo. Halafu, pia, kuna ile zawadi nzuri ajabu ya ndoa na shangwe za maisha ya familia zinazohusiana nayo. Si ajabu kwamba tamaa ya Naomi yenye kuhisiwa moyoni kwa mabinti wakwe wake ilionyeshwa katika maneno haya: “BWANA [Yehova, NW] na awajalie [awape zawadi, NW] kuona raha kila mmoja nyumbani kwa mumewe.” (Ruthu 1:9) Kwa hiyo ndoa ni ufunguo uwezao kufungua mlango wa kupata furaha nyingi. Lakini, je, ndoa ndiyo ufunguo wa pekee wa kufungua njia ya kupata furaha maishani? Vijana hasa ndio wanaohitaji kuchunguza kwa uzito kama hivyo ndivyo ilivyo.

6. Kulingana na Mwanzo, kusudi la msingi la mpango wa ndoa lilikuwa nini?

⁶ Ikisimulia mwanzo wa ndoa, Biblia hutaarifu hivi: “Mungu akamwumba, mwanamume na mwanamke aliwaumba. Mungu akawabarikia, Mungu akawaambia, Zaeni, mkaongezeke, mkaijaze nchi, na kuitiisha.” (Mwanzo 1:27, 28) Kwa kuanzisha ndoa, Yehova alitumia Adamu ili kuwezesha viumbe wa kibinadamu wengine wawepo, hivyo kupanua jamii ya kibinadamu. Lakini mengi zaidi yanahusika katika ndoa.

“Katika Bwana Tu”

7. Mzee mmoja wa ukoo mwaminifu alijitahidi sana kutimiza takwa gani la ndoa?

⁷ Kwa kuwa Yehova ndiye Mwanzilishi wa ndoa, tungetazamia aweke viwango kwa ajili ya ndoa ambavyo vingetokeza furaha kwa watumishi wake. Katika nyakati za wazee wa ukoo, kufunga ndoa na wale ambao hawakuwa waabudu wa Yehova kulikatazwa kabisa. Abrahamu alimlazimisha mtumishi wake Eliezeri aape kwa Yehova kwamba asingechukulia mwana wa mzee huyo wa ukoo mke kutoka kwa Wakanaani. Eliezeri alifunga safari ndefu na kufuata maagizo ya Abrahamu kwa uangalifu sana ili apate ‘mke ambaye Yehova alimwekea mwana wa bwana wake.’ (Mwanzo 24:3, 44) Kwa hiyo Isaka alimwoa Rebeka. Mwana wao Esau alipochagua wake kutoka miongoni mwa Wahiti waliokuwa wapagani, wanawake hao “walikuwa chanzo cha uchungu wa roho kwa Isaka na Rebeka.”—Mwanzo 26:34, 35, NW; 27:46; 28:1, 8.

8. Ni kizuizi gani kilichowekewa ndoa na agano la Sheria, na kwa nini?

⁸ Chini ya agano la Sheria, kufunga ndoa na wanaume au wanawake wa mataifa fulani yaliyotajwa hususa ya Wakanaani kulikatazwa. Yehova aliwaagiza watu wake: “Binti yako usimpe mwanawe mume, wala usimtwalie mwanao mume binti yake. Kwa kuwa atamkengeusha mwanao mume asinifuate, ili wapate kuabudu miungu mingine; ndipo itakapowaka hasira ya BWANA [Yehova, NW] juu yenu, naye atakuangamiza upesi.”—Kumbukumbu la Torati 7:3, 4.

9. Biblia yawapa Wakristo shauri gani juu ya ndoa?

⁹ Haishangazi kwamba vizuizi kama hivyo juu ya kufunga ndoa na wasio waabudu wa Yehova vinatumika ndani ya kundi la Kikristo. Mtume Paulo alionya waamini wenzake kwa upole: “Msifungwe nira pamoja na wasioamini, kwa jinsi isivyo sawasawa; kwa maana pana urafiki gani kati ya haki na uasi? Tena pana shirika gani kati ya nuru na giza? Tena pana ulinganifu gani kati ya Kristo na Beliari? Au yeye aaminiye ana sehemu gani pamoja na yeye asiyeamini?” (2 Wakorintho 6:14, 15) Shauri hilo latumika katika njia mbalimbali, na kwa hakika latumika kwa ndoa. Agizo la wazi la Paulo kwa watumishi wote wa Yehova ni kwamba wapaswa kufikiria kufunga ndoa na mtu “ikiwa tu yeye yumo katika muungano pamoja na Bwana.”—1 Wakorintho 7:39, NW, kielezi cha chini.

Kutoweza Kufunga Ndoa “Katika Bwana”

10. Wakristo wengi wasiofunga ndoa wanafanya nini, na ni swali gani linalotokea?

¹⁰ Wakristo wengi waseja wamechagua kufuata mfano wa Yesu Kristo kwa kusitawisha zawadi ya useja. Lakini pia, kwa sababu ya kutoweza wakati huu kupata mwenzi mwenye kumcha Mungu na hivyo kufunga ndoa “katika Bwana,” Wakristo wengi waaminifu-washikamanifu wameweka tumaini lao katika Yehova na wamekaa waseja badala ya kufunga ndoa pamoja na asiyeamini. Roho ya Mungu hutokeza ndani yao matunda kama vile shangwe, amani, imani, na kujidhibiti, ikiwawezesha wadumishe useja ulio safi. (Wagalatia 5:22, 23) Miongoni mwa wale wanaokabili jaribu hilo la ujitoaji kwa Mungu kwa mafanikio ni idadi kubwa ya dada zetu Wakristo, tunaowastahi sana. Katika nchi mbalimbali, wao huwa wengi kuliko ndugu na kwa hiyo hushiriki sehemu kubwa katika kazi ya kuhubiri. Kwa kweli, “Yehova mwenyewe hutoa usemi; wanawake wasimuliao habari njema ni jeshi kubwa.” (Zaburi 68:11, NW) Kwa kweli, walio wengi wa watumishi wa Mungu wasiofunga ndoa wa jinsia zote mbili wanadumisha uaminifu wao wa kimaadili kwa sababu ‘wanamtumaini Yehova kwa moyo wao wote, naye ananyosha mapito yao.’ (Mithali 3:5, 6) Lakini je, ni lazima wale ambao hawawezi kufunga ndoa “katika Bwana” sasa wakose furaha?

11. Wakristo wanaokaa wakiwa waseja kwa sababu ya kustahi kanuni za Biblia wanaweza kuhakikishiwa nini?

¹¹ Acheni tukumbuke kwamba sisi ni watumishi wa yule Mungu mwenye furaha, Yehova, tunaotumika tukiwa chini ya yule Mwenye nguvu aliye na furaha, Yesu Kristo. Kwa hiyo ikiwa kustahi kwetu vizuizi vilivyoandikwa waziwazi katika Biblia kwatusukuma kukaa tukiwa waseja kwa sababu ya kutoweza kupata mwenzi wa ndoa “katika Bwana,” je, ni jambo la akili kufikiri kwamba Yehova na Kristo wangetuacha tukiwa bila furaha? Hakika sivyo. Kwa hiyo, ni lazima tufikie mkataa kwamba inawezekana kuwa wenye furaha tukiwa Wakristo katika hali ya kutofunga ndoa. Yehova aweza kutufanya tuwe wenye furaha kweli kweli iwe tumefunga ndoa au iwe sisi ni waseja.

Ufunguo wa Kupata Furaha ya Kweli

12. Kisa cha malaika wasiotii kinaonyesha nini juu ya ndoa?

¹² Ndoa siyo ufunguo wa pekee wa kupata furaha kwa watumishi wote wa Mungu. Kwa mfano, chukua malaika. Kabla ya Furiko, baadhi ya malaika walisitawisha tamaa zisizokuwa za asili kwa viumbe wa roho, wakakosa kuridhika kwa sababu hawakuweza kufunga ndoa, wakavaa miili ya kimnofu ili wachukue wanawake wawe wake zao. Kwa sababu malaika hao ‘waliyaacha makao yao yaliyowahusu,’ Mungu “amewaweka katika vifungo vya milele chini ya giza kwa hukumu ya siku ile kuu.” (Yuda 6; Mwanzo 6:1, 2) Kwa wazi, Mungu hakupanga kamwe kwamba malaika wafunge ndoa. Kwa hiyo ndoa isingeweza hata kidogo kuwa ufunguo wao wa kupata furaha.

13. Ni kwa nini malaika watakatifu ni wenye furaha, na hilo laonyesha nini kwa watumishi wote wa Mungu?

¹³ Hata hivyo, malaika waaminifu ni wenye furaha. Yehova aliweka misingi ya dunia “kwa shangwe ya pamoja ya nyota za asubuhi na shangilio la umoja la wana wa Mungu.” (Ayubu 38:7, The New Jerusalem Bible) Ni kwa nini malaika watakatifu ni wenye furaha? Kwa sababu wao humhudumia Yehova daima, ‘wakisikiliza sauti ya neno lake’ ili kulitekeleza. Wanafurahia ‘kufanya limpendezalo.’ (Zaburi 103:20, 21, NW, kielezi cha chini) Naam, shangwe ya malaika watakatifu hutokana na kumtumikia Yehova kwa uaminifu. Huo ndio ufunguo wa furaha ya kweli kwa wanadamu pia. Kulingana na hilo, Wakristo wapakwa mafuta waliofunga ndoa wanaomtumikia Mungu sasa hawatafunga ndoa wanapofufuliwa kwenye uhai wa kimbingu, lakini watakuwa na furaha wakiwa viumbe wa roho wanaofanya mapenzi ya kimungu. Basi, iwe wamefunga ndoa au ni waseja, watumishi waaminifu-washikamanifu wa Yehova wote waweza kufurahi kwa sababu msingi wa kweli wa furaha ni utumishi mwaminifu kwa Muumba.

“Lililo Jema Kuliko Kuwa na Wana na Binti”

14. Ni ahadi gani ya kiunabii waliyopewa matowashi wenye kumcha Mungu katika Israeli wa kale, na ni kwa nini hilo huenda likaonekana kuwa jambo la ajabu?

¹⁴ Hata ikiwa Mkristo mwaminifu-mshikamanifu hapati kufunga ndoa kamwe, Mungu aweza kuhakikisha kwamba mtu huyo apata furaha. Kitia-moyo chaweza kupatikana kutoka kwa maneno haya yaliyoelekezwa kiunabii kwa matowashi katika Israeli wa kale: “BWANA [Yehova, NW] awaambia hivi matowashi, wanaozishika sabato zangu, na kuyachagua mambo yanipendezayo, na kulishika sana agano langu; nitawapa hawa nyumbani mwangu, na ndani ya kuta zangu, kumbukumbu na jina, lililo jema kuliko kuwa na wana na binti; nitawapa jina lidumulo milele, lisilokatiliwa mbali.” (Isaya 56:4, 5) Huenda mtu akatazamia kwamba watu hao mmoja mmoja wangeahidiwa mke na watoto wa kuendeleza jina lao. Lakini waliahidiwa “lililo jema kuliko kuwa na wana na binti”—jina lenye kudumu ndani ya nyumba ya Yehova.

15. Ni jambo gani huenda likasemwa juu ya utimizo wa Isaya 56:4, 5?

¹⁵ Ikiwa matowashi hao walionwa kuwa ufananisho wa kiunabii unaohusu “Israeli wa Mungu,” wao huwakilisha wapakwa-mafuta wanaopokea mahali pa kudumu ndani ya nyumba ya kiroho, au hekalu la Yehova. (Wagalatia 6:16) Pasipo shaka, unabii huo utatumika kihalisi kwa matowashi wenye kumcha Mungu wa Israeli wa kale wafufuliwao. Wakikubali dhabihu ya Kristo ya fidia na kuendelea kuchagua lile limpendezalo Yehova, watapokea “jina lidumulo milele” katika ulimwengu mpya wa Mungu. Hilo laweza pia kutumika kwa wale wa “kondoo wengine” katika wakati huu wa mwisho wanaoepuka ndoa na uzazi ili wajitoe wenyewe kikamili zaidi kwa utumishi wa Yehova. (Yohana 10:16) Baadhi yao huenda wakafa bila kufunga ndoa na bila watoto. Lakini ikiwa wao ni waaminifu, katika ufufuo watapokea “lililo jema kuliko kuwa na wana na binti”—jina “lisilokatiliwa mbali” katika mfumo mpya wa mambo.

Ndoa Siyo Ufunguo wa Pekee wa Kupata Furaha

16. Kwa nini yaweza kusemwa kwamba ndoa haileti furaha sikuzote?

¹⁶ Wengine huhisi kwamba furaha inahusiana na ndoa bila kutenganika. Hata hivyo, lazima ikubaliwe kwamba hata miongoni mwa watumishi wa Yehova leo, ndoa haileti furaha sikuzote. Ndoa hutatua matatizo fulani, lakini mara nyingi hutokeza matatizo mengine ambayo yaweza kuwa magumu zaidi kushughulika nayo kuliko yale yanayowapata waseja. Paulo alisema kwamba ndoa huleta “dhiki katika mwili.” (1 Wakorintho 7:28, NW) Kuna nyakati ambazo mtu aliyefunga ndoa huwa na “masumbufu,” na ‘kugawanyika, NW.’ Yeye mara nyingi hupata kwamba ni vigumu “kumhudumia Bwana pasipo kuvutwa na mambo mengine.”—1 Wakorintho 7:33-35.

17, 18. (a) Waangalizi wasafirio fulani wameripoti nini? (b) Paulo alitoa shauri gani, na kwa nini inanufaisha kulitumia?

¹⁷ Yote mawili, ndoa na useja ni zawadi kutoka kwa Mungu. (Ruthu 1:9; Mathayo 19:10-12) Hata hivyo, ili kufanikiwa katika hali yoyote ile, ufikirio wenye sala ni wa muhimu. Waangalizi wasafirio huripoti kwamba Mashahidi wengi wanafunga ndoa wakiwa wachanga mno, mara nyingi wanakuwa wazazi kabla hawajawa tayari kubeba madaraka yanayofuata. Nyingine za ndoa hizo huvunjika. Wenzi wengine hukabiliana na matatizo yao, lakini ndoa yao haiwaletei furaha. Kama alivyoandika William Congreve, mtungaji wa drama Mwingereza, wale ambao hufunga ndoa haraka-haraka “huenda wakawa na wakati mwingi wa kujuta.”

¹⁸ Waangalizi wa mzunguko huripoti pia kwamba baadhi ya akina ndugu vijana huepuka kutoa ombi la utumishi wa Betheli au kujitolea kwa ajili ya Shule ya Mazoezi ya Kihuduma kwa sababu ya takwa la kukaa wakiwa waseja kwa muda fulani. Lakini Paulo atoa shauri dhidi ya kufunga ndoa kabla mtu ‘hajapita ukamilifu wa ujana,’ yaani, kungoja mpaka ule msisimuko wa kwanza wa tamaa ya ngono uwe umepungua. (1 Wakorintho 7:36-38, NW) Miaka anayoishi mseja akiwa mtu mzima humwandalia ujuzi na ufahamu wa ndani, ikimweka katika hali njema zaidi ya ama kuchagua mwenzi wa ndoa ama kufanya uamuzi uliofikiriwa kwa uangalifu wa kukaa akiwa mseja.

19. Twaweza kuonaje mambo ikiwa hatuna uhitaji wa kweli wa ndoa?

¹⁹ Baadhi yetu tumepita uzuri wa ujana, ulio na msukumo wao mkubwa wa kufanya ngono. Huenda tukafikiria mara kwa mara baraka za ndoa lakini kwa kweli tuna zawadi ya useja. Yehova huenda akaona kwamba tunamtumikia kwa mafanikio katika hali ya useja na kwamba hatuna uhitaji kweli kweli wa ndoa, ambayo huenda ikataka kwamba tuache mapendeleo fulani katika utumishi wake. Ikiwa ndoa si uhitaji wa kibinafsi na hatubarikiwi kwa kupata mwenzi, huenda ikawa Mungu ametuwekea jambo jingine fulani. Acheni basi tujizoeze imani kwamba atatuandalia kile tunachohitaji. Furaha kubwa zaidi yatokana na kukubali kwa unyenyekevu lile lionekanalo kuwa mapenzi ya Mungu kwetu, sawa na vile ndugu Wayahudi ‘walivyokubali na kumtukuza Mungu’ walipotambua kwamba alikuwa amewajalia Wasio Wayahudi toba ili waweze kuwa na uhai.—Matendo 11:1-18, NW.

20. (a) Ni shauri gani juu ya useja linalotolewa hapa kwa Wakristo wachanga? (b) Ni jambo gani la msingi kuhusu furaha linalobaki kuwa la kweli?

²⁰ Kwa hiyo, basi, ndoa yaweza kuwa ufunguo wa kupata furaha, ingawa yaweza pia kufungua mlango kuelekea matatizo. Jambo moja ni hakika: Ndoa siyo njia pekee ya kupata furaha. Kwa hiyo, mambo yote yakiisha fikiriwa, lingekuwa jambo la hekima kwa vijana Wakristo kujaribu kuupa useja nafasi kwa miaka kadhaa. Miaka hiyo yaweza kutumiwa vizuri kumtumikia Yehova na kufanyia maendeleo hali yao ya kiroho. Ingawa hivyo, bila kujali umri au maendeleo ya kiroho, jambo hili la msingi labaki likiwa kweli kwa wale wote wanaojiweka wakfu kabisa kwa Mungu: Furaha ya kweli hupatikana katika utumishi mwaminifu kwa Yehova.

Ungeitikiaje?

◻ Ni kwa nini watumishi wa Yehova ni wenye furaha?

◻ Kwa nini ndoa siyo ufunguo wa kupata furaha nyingi zaidi?

◻ Katika uchaguzi wa mwenzi wa ndoa, ni nini linalotakwa kwa watu wa Yehova?

◻ Kwa nini ni jambo la akili kuamini kwamba Wakristo wanaokaa wakiwa waseja waweza kuwa wenye furaha?

◻ Ni jambo gani lipasalo kukubaliwa kuhusu ndoa na furaha?