Furaha ya Kweli Katika Kumtumikia Yehova

“Heri [mwenye furaha, “NW”] ambaye Mungu wa Yakobo ni msaada wake, na tumaini lake ni kwa BWANA [Yehova, “NW”].”—ZABURI 146:5.

1, 2. Ni nini ambalo limesemwa juu ya ufafanuzi wa furaha, na furaha humaanisha nini kwa watu wengi leo?

FURAHA ni nini? Watungaji kamusi, wanafalsafa, na wanatheolojia wamekuwa wakijaribu kulifafanua kwa muda wa karne kadhaa. Lakini hawajaandaa ufafanuzi unaokubaliwa na wote. Encyclopædia Britannica hukiri hivi: “Furaha ni mojawapo maneno yaliyo magumu sana kufafanua.” Furaha laonekana kumaanisha mambo tofauti kwa watu tofauti, ikitegemea maoni yao ya maisha.

² Kwa watu wengi furaha hutegemea afya nzuri, mali za kimwili, na ushirika wenye kupendeza. Hata hivyo, kuna watu walio na hayo yote lakini ambao hukosa furaha. Kwa wanaume na wanawake waliojiweka wakfu kwa Yehova Mungu, Biblia huandaa wazo la furaha lililo tofauti kabisa na maoni ya watu kwa ujumla.

Maoni Tofauti ya Furaha

3, 4. (a) Yesu alitamka nani kuwa wenye furaha? (b) Ni nini laweza kuonwa kuhusu visababishi vya furaha ambavyo Yesu alitaja?

³ Katika Mahubiri ya Mlimani yake, Yesu Kristo hakusema kwamba furaha hutegemea afya njema, mali za kimwili, na mambo kama hayo. Alitamka wale “wanaotambua uhitaji wao wa kiroho” na “wale wenye njaa na kiu kwa ajili ya uadilifu,” kuwa wenye furaha kweli kweli. Yenye kuhusika na mambo hayo mawili yanayohitajiwa ili kupata furaha ya kweli ni taarifa ya Yesu ionekanayo kuwa yenye kupinga: “Wenye furaha ni wale wanaoomboleza, kwa kuwa watafarijiwa.” (Mathayo 5:3-6, NW) Kwa wazi, Yesu hakuwa akisema kwamba watu wangekuwa wenye furaha kwa urahisi wanapopoteza mpendwa. Bali, alikuwa akisema juu ya wale wanaoomboleza juu ya hali yao yenye dhambi na matokeo yayo.

⁴ Mtume Paulo alisema juu ya uumbaji wa kibinadamu kuwa unaugua chini ya dhambi kwa msingi wa tumaini kwamba ‘utawekwa huru na kutolewa katika utumwa wa uharibifu.’ (Warumi 8:21, 22) Wanadamu wanaokubali uandalizi wa Yehova wa kufunika dhambi kupitia dhabihu ya Kristo ya fidia na wanaofanya mapenzi ya Mungu hufarijiwa kweli kweli na kufurahishwa. (Warumi 4:6-8) Katika Mahubiri ya Mlimani, Yesu alitamka “wale wenye hali pole,” “wenye rehema,” “wenye moyo safi,” na “wenye amani,” kuwa wenye furaha. Alitoa uhakikisho kwamba hata ingawa wangenyanyaswa, wasikivu hao wasingepoteza furaha yao. (Mathayo 5:5-11, NW) Inapendeza kuona kwamba visababishi hivyo vya furaha vilivyokwezwa huweka matajiri na maskini katika hali moja.

Msingi wa Furaha wa Kweli

5. Ni nini msingi wa furaha ya watumishi wa Mungu waliojiweka wakfu?

⁵ Chanzo cha furaha ya kweli hakipatikani katika utajiri wa vitu vya kimwili. Mfalme Sulemani mwenye hekima alisema hivi: “Baraka ya BWANA [Yehova, NW] hutajirisha, wala hachanganyi huzuni nayo.” (Mithali 10:22) Kwa viumbe wanaokiri enzi kuu ya Yehova ya ulimwengu wote mzima, furaha huhusiana na baraka ya Mungu bila kutenganika. Mtu aliyejiweka wakfu ambaye anayo na huhisi baraka ya Yehova juu yake ni mwenye furaha kweli kweli. Kwa maoni ya Kibiblia, furaha huhusisha hisia ya uradhi, utoshelevu, na utimilizo katika utumishi wa Yehova.

6. Ni nini linalotakwa kwa watu wa Yehova ili waweze kuwa na furaha kweli kweli?

⁶ Furaha ya kweli hutegemea uhusiano unaofaa pamoja na Yehova. Inategemea kumpenda Mungu na uaminifu kwake. Watumishi wa Yehova waliojiweka wakfu hukubali kwa moyo wote maneno ya Paulo: “Hakuna mtu miongoni mwetu aishiye kwa nafsi yake . . . Twaishi kwa Bwana [Yehova, NW] . . . tu mali ya Bwana [Yehova, NW].” (Warumi 14:7, 8) Kwa hiyo, furaha ya kweli haiwezi kupatikana bila kumtii Yehova na kunyenyekea kwa shangwe mapenzi yake. Yesu alisema: “Heri [wenye furaha ni, NW] walisikiao neno la Mungu na kulishika”!—Luka 11:28.

Visababishi vya Furaha Vinavyobadilika-badilika

7, 8. (a) Visababishi vya furaha vyaweza kupangwaje katika aina? (b) Ni nini laweza kusemwa juu ya ndoa na kuzaa watoto?

⁷ Visababishi vya furaha vilivyotangulia kutajwa vyaweza kuitwa “misingi,” au “mambo yasiyobadilika,” kwa sababu ni vyenye maana nyakati zote kwa watumishi wa Yehova waliojiweka wakfu. Kwa kuongezea, kuna yale yawezayo kuitwa mambo yenye kubadilika-badilika, mambo yawezayo kuleta furaha kwa wakati mmoja lakini kuleta furaha kidogo au kukosa kuleta furaha yoyote wakati mwingine. Katika vipindi vya wazee wa ukoo na kabla ya Ukristo, ndoa na kuzaa watoto yalionwa kuwa mambo ya lazima ili kupata furaha. Hilo laonwa katika sihi ya Raheli yenye uchungu: “Nipe wana; kama sivyo, nitakufa mimi.” (Mwanzo 30:1) Mtazamo huo kuelekea kuzaa watoto ulifaa kusudi la Yehova kwa kipindi hicho.—Mwanzo 13:14-16; 22:17.

⁸ Ndoa na kuzaa watoto ilionwa kuwa baraka za kupewa na Mungu miongoni mwa watu wa Yehova wa nyakati za mapema. Hata hivyo, taabu ilishirikishwa na hali hizo na nyinginezo wakati wa vipindi vya maafa katika historia yao. (Linganisha Zaburi 127, 128 na Yeremia 6:12; 11:22; Maombolezo 2:19; 4:4, 5.) Kwa hiyo, ni wazi kwamba ndoa na kuzaa watoto si visababishi vya daima vya furaha.

Furaha Bila Ndoa Katika Wakati Uliopita

9. Ni kwa nini binti ya Yeftha alipokea pongezi kila mwaka?

⁹ Watumishi wengi wa Mungu wamepata furaha ya kweli bila ndoa. Kwa sababu ya kustahi kiapo cha baba yake, binti wa Yeftha alikaa akiwa mseja. Kwa muda fulani yeye na wasichana waandamani wake waliuombolezea ubikira wake. Lakini alikuwa na shangwe iliyoje akitumikia wakati wote kwenye nyumba ya Yehova, labda miongoni mwa “wanawake wenye kutumika, waliokuwa wakitumika mlangoni mwa hema ya kukutania”! (Kutoka 38:8) Kwa sababu hiyo, alipokea pongezi kila mwaka.—Waamuzi 11:37-40.

10. Yehova alitaka nini kwa Yeremia, na je, yaonekana kwamba kama tokeo yeye alikuwa na maisha yasiyo na furaha?

¹⁰ Kwa sababu ya nyakati zenye matukio makubwa ambazo katika hizo nabii Yeremia aliishi, Mungu alimtaka ajiepushe kufunga ndoa na kulea watoto. (Yeremia 16:1-4) Lakini Yeremia aliona ukweli wa maneno ya Mungu: “Amebarikiwa mtu yule anayemtegemea BWANA [Yehova, NW], ambaye BWANA [Yehova, NW] ni tumaini lake.” (Yeremia 17:7) Muda wote wa miaka zaidi ya 40 ya utumishi wa kiunabii, Yeremia alimtumikia Mungu kwa uaminifu akiwa mwanamume mseja. Kwa kadiri tujuavyo, yeye hakupata kamwe kufunga ndoa wala kupata watoto. Hata hivyo, ni nani awezaye kutia shaka hata kidogo kwamba Yeremia alikuwa mwenye furaha, sawa na lile baki jaminifu la kiyahudi ‘lililokuwa na furaha juu ya wema wa Yehova’?—Yeremia 31:12, NW.

11. Ni baadhi ya mifano gani ya Kimaandiko ya watumishi waaminifu wa Yehova waliokuwa wenye furaha ingawa hawakuwa na mwenzi wa ndoa?

¹¹ Watu wengine wengi wamemtumikia Yehova kwa shangwe bila mwenzi wa ndoa. Wao ama walikuwa waseja, wajane wa kiume, au wajane wa kike. Miongoni mwao walikuwa nabii wa kike Ana; labda Dorkasi, au Tabitha; mtume Paulo; na mfano mkuu zaidi ya wote—Yesu Kristo.

Waseja Lakini Wenye Furaha Leo

12. Baadhi ya watumishi wa Yehova wenye furaha, waliojiweka wakfu wametolea nafasi nini leo, na kwa nini?

¹² Leo, maelfu ya Mashahidi wa Yehova humtumikia Mungu kwa uaminifu bila mwenzi wa ndoa. Baadhi yao wameweza kuukubali mwaliko wa Yesu: “Awezaye kulipokea neno hilo [zawadi ya useja] na alipokee.” Wamefanya hivyo “kwa ajili ya ufalme wa mbinguni.” (Mathayo 19:11, 12) Yaani, wametumia vizuri uhuru wao wa kupewa na Mungu kwa kutumia wakati na nishati nyingi zaidi ili kueneza masilahi ya Ufalme. Wengi wao wanatumikia wakiwa mapainia, wamishonari, au washiriki wa familia ya Betheli kwenye makao makuu ya ulimwengu ya Watch Tower Society au kwenye mojawapo matawi yayo.

13. Ni mifano gani inayoonyesha kwamba Mkristo aweza kuwa mseja na mwenye furaha?

¹³ Dada mmoja mpendwa mwenye umri mkubwa aliyapa masimulizi ya maisha yake kichwa chenye kujieleza “Mseja na Mwenye Furaha Nikiwa Painia.” (Mnara wa Mlinzi (Kiingereza), Mei 1, 1985, kurasa 23-6) Dada mwingine mseja aliyetumia miaka zaidi ya 50 akitumika katika Betheli alitaarifu hivi: “Mimi natosheka kabisa na maisha. Sina masikitiko. Ningefanya uamuzi uo huo tena.”—Mnara wa Mlinzi, Novemba 15, 1982, ukurasa 15.

14, 15. (a) Kulingana na mtume Paulo, ni nini linalohitajiwa ili kuendelea kuwa mseja? (b) Ni kwa nini Paulo asema kwamba mtu aliye mseja anafanya “vema zaidi” na “ni mwenye furaha zaidi”?

¹⁴ Angalia neno hilo “uamuzi.” Paulo aliandika hivi: “Lakini ikiwa yeyote anasimama imara akiwa ametulia katika moyo wake, asiwe na uhitaji wa lazima, bali ana mamlaka juu ya hiari yake na yeye amefanya uamuzi katika moyo wake mwenyewe, kuendeleza ubikira wake mwenyewe, yeye atafanya vema. Kwa hiyo yeye ambaye pia autoa ubikira wake katika ndoa afanya vema, lakini yeye ambaye hautoi katika ndoa atafanya vema zaidi.” (1 Wakorintho 7:37, 38, NW) Kwa nini “vema zaidi”? Paulo alieleza hivi: “Nataka msiwe na masumbufu. Yeye asiyeoa hujishughulisha na mambo ya Bwana, ampendezeje Bwana. Nasema hayo niwafaidie, . . . kwa ajili ya vile vipendezavyo, tena mpate kumhudumia Bwana pasipo kuvutwa na mambo mengine.”—1 Wakorintho 7:32-35.

¹⁵ Je! “kumhudumia Bwana pasipo kuvutwa na mambo mengine” kwa ajili ya ‘kumpendeza Bwana’ kunahusiana na furaha? Yaonekana Paulo alifikiri hivyo. Akinena juu ya mjane Mkristo alisema hivi: “Yu huru kuolewa na mtu ye yote amtakaye; katika Bwana tu. Lakini heri yeye zaidi [ni mwenye furaha zaidi, “NW”] akikaa kama alivyo; ndivyo nionavyo mimi; nami nadhani ya kuwa mimi nina Roho wa Mungu.”—1 Wakorintho 7:39, 40.

Faida za Hali ya Kutofunga Ndoa

16. Ni baadhi ya faida zipi zinazoonewa shangwe na Mashahidi wa Yehova wasiofunga ndoa?

¹⁶ Iwe mtu hakufunga ndoa kwa uamuzi wa kibinafsi au iwe ni kwa kulazimishwa na hali, ile hali ya kutofunga ndoa hufuatana na faida nyingi za kibinafsi. Waseja kwa ujumla huwa na wakati zaidi wa kujifunza Neno la Mungu na kulitafakari. Wakitumia hali hiyo kwa faida, hali yao ya kiroho huimarishwa. Kwa kuwa hawana wenzi wa ndoa wa kushiriki nao matatizo yao, wengi wao hujifunza kuegemea kwa uzito zaidi juu ya Yehova na kutafuta mwelekezo wake katika mambo yote. (Zaburi 37:5) Hiyo husaidia kutokeza uhusiano wa karibu zaidi pamoja na Yehova.

17, 18. (a) Ni fursa gani nyingi za utumishi zinazopatikana kwa watumishi wa Yehova wasiofunga ndoa? (b) Baadhi ya watumishi wa Yehova wameelezaje furaha yao?

¹⁷ Wasiofunga ndoa wana fursa nyingi zaidi za utumishi kwa sifa ya Yehova. Yale mazoezi ya pekee yanayotolewa sasa kwenye Shule ya Mazoezi ya Kihuduma ni ya ndugu waseja au wajane wa kiume peke yao. Akina dada waseja vilevile wana uhuru mwingi zaidi wa kufikilia mapendeleo katika utumishi wa Mungu. Yule dada mwenye umri mkubwa aliyetajwa mapema alijitolea kutumika katika nchi moja ya Kiafrika wakati ambao, kwa kumnukuu, alikuwa “kidogo mwanamke dhaifu wa umri wa zaidi ya miaka 50.” Naye alikaa huko, hata wakati wa marufuku wamishonari wote walipofukuzwa nchini. Angali anatumika huko akiwa painia, ijapokuwa sasa ana umri wa miaka zaidi ya 80. Je! yeye ni mwenye furaha? Katika masimulizi ya maisha yake yeye aliandika hivi: “Niliweza kutumia ule uhuru na urahisi wa kusafiri unaotolewa na useja ili kuendelea kuwa na shughuli nyingi katika huduma, na hilo limenipa furaha nyingi sana. . . . Kwa muda wa miaka iliyopita uhusiano wangu pamoja na Yehova umeimarika. Nikiwa mwanamke mseja katika nchi ya Kiafrika, mimi nimemwona kuwa Mlinzi.”

¹⁸ Yenye kutokeza pia, ni yale maneno ya ndugu mmoja aliyetumikia kwenye makao makuu ya Watch Tower Society kwa muda wa miongo mingi. Alikuwa mwenye furaha, ingawa hakupata kamwe kufunga ndoa na ingawa alikuwa na tumaini la kimbingu bila taraja lolote la ndoa. Alipokuwa na umri wa miaka 79, aliandika hivi: “Kila siku mimi husali kwa Baba yetu mpendwa wa kimbingu na humwomba anipe msaada na hekima ili niendelee kuwa na afya njema ya kiroho na ya kimwili pia ili niweze kuendelea kufanya mapenzi yake matakatifu. Muda wote wa miaka hiyo 49 nikiwa katika utumishi wa Yehova kwa kweli nimeonea shangwe njia ya maisha ya furaha, yenye kuthawabisha na yenye kubarikiwa. Na kwa fadhili zisizostahiliwa za Yehova ninatazamia mbele utumishi wenye kuendelea kwa heshima na utukufu wake na kwa baraka ya watu wake. . . . Shangwe ya Yehova hunisaidia niendeleze lile pigano jema la imani, nikitazama mbele kwenye wakati ambao adui za Yehova hawatakuwako tena na dunia yote itajaa utukufu wake.”—Hesabu 14:21; Nehemia 8:10; Mnara wa Mlinzi, (Kiingereza) Novemba 15, 1968, kurasa 699-702.

Furaha ya Kweli Hutegemea Nini?

19. Furaha yetu itategemea nini sikuzote?

¹⁹ Uhusiano wetu wa karibu pamoja na Yehova, kibali chake, na baraka yake—mambo hayo ndiyo yatakayotuletea furaha ya kweli muda wote wa milele. Wakiwa na mtazamo huo unaofaa juu ya mambo yanayotokeza furaha ya kweli, hata watumishi wa Yehova waliofunga ndoa hutambua kwamba ndoa yao si jambo la maana zaidi maishani mwao. Wao hutii shauri la mtume Paulo: “Lakini, ndugu, nasema hivi, muda ubakio si mwingi; basi tokea sasa wale walio na wake na wawe kama hawana.” (1 Wakorintho 7:29) Hilo halimaanishi waache kutunza wake zao. Waume Wakristo wakomavu huweka utumishi wa Yehova kwanza, ndivyo pia na wake zao wapendwa wenye kumcha Mungu, wanaowaunga mkono, baadhi yao hata wakitumikia wakati wote wakiwa waandamani wa waume zao.—Mithali 31:10-12, 28; Mathayo 6:33.

20. Wakristo wengi wana mtazamo gani unaofaa kuelekea mapendeleo yao ya ndoa?

²⁰ Ndugu waliofunga ndoa ambao ni waangalizi wasafirio, wenye kujitolea kufanya kazi Betheli, wazee wa kundi—kwa kweli, Wakristo wote waliofunga ndoa ambao hutanguliza masilahi ya Ufalme—‘hawautumii ulimwengu sana’; wanajitahidi ili mapendeleo yao ya ndoa yapatane na maisha yao yaliyo wakfu ya utumishi kwa Yehova. (1 Wakorintho 7:31) Hata hivyo, wao ni wenye furaha. Kwa nini? Kwa kuwa, sababu kuu ya furaha yao si ndoa yao bali utumishi wao kwa Yehova. Na waume na wake wengi waaminifu—naam, na watoto wao pia—hufurahi kwamba mambo yako hivyo.

21, 22. (a) Kwa msingi wa Yeremia 9:23, 24, ni nini linalopasa kutujaza na furaha? (b) Ni visababishi vipi vya furaha vinavyotajwa kwenye Mithali 3:13-18?

²¹ Nabii Yeremia aliandika hivi: “BWANA [Yehova, NW] asema hivi, Mwenye hekima asijisifu kwa sababu ya hekima yake, wala mwenye nguvu asijisifu kwa sababu ya nguvu zake, wala tajiri asijisifu kwa sababu ya utajiri wake; bali ajisifuye na ajisifu kwa sababu hii, ya kwamba ananifahamu mimi, na kunijua, ya kuwa mimi ni BWANA [Yehova, NW], nitendaye wema, na hukumu, na haki, katika nchi; maana mimi napendezwa na mambo hayo, asema BWANA [Yehova, NW].”—Yeremia 9:23, 24.

²² Iwe sisi ni waseja au waliofunga ndoa, chanzo chetu kikubwa zaidi cha furaha chapasa kuwa maarifa yetu ya Yehova na usadikisho kwamba tuna baraka yake kwa sababu tunafanya mapenzi yake. Tunafurahi pia kuwa na mwono-ndani katika mambo yenye thamani kweli kweli, mambo ambayo Yehova hupendezwa nayo. Mfalme Sulemani aliyefunga ndoa na wanawake wengi hakuona ndoa kuwa ndiyo ufunguo wa pekee wa kupata furaha. Alisema hivi: “Heri mtu yule aonaye hekima, na mtu yule apataye ufahamu. Maana biashara yake ni bora kuliko biashara ya fedha. Na faida yake ni nyingi kuliko dhahabu safi. Yeye ana thamani kuliko marijani, wala vyote uvitamanivyo havilingani naye. Ana wingi wa siku katika mkono wake wa kuume, utajiri na heshima katika mkono wake wa kushoto. Njia zake ni njia za kupendeza sana, na mapito yake yote ni amani. Yeye ni mti wa uzima kwao wamshikao sana; ana heri kila mtu ashikimanaye naye.”—Mithali 3:13-18.

23, 24. Kwa nini twaweza kuwa na uhakika kwamba watumishi wote wa Yehova waaminifu watakuwa wenye furaha katika mfumo mpya wa mambo?

²³ Wale kati yetu ambao wamefunga ndoa na wapate shangwe ya milele katika kufanya mapenzi ya kimungu. Na ndugu na dada zetu wapendwa walio waseja kwa kujichagulia au kwa kulazimishwa na hali na wavumilie majaribu yao yote na kupata furaha na uradhi katika kumtumikia Yehova sasa na milele. (Luka 18:29, 30; 2 Petro 3:11-13) Katika mfumo wa mambo wa Mungu unaokuja, “hati-kunjo” zitafunguliwa. (Ufunuo 20:12, NW) Hizo zitakuwa na amri na sheria mpya zenye kusisimua zitakazochangia furaha ya aina ya kibinadamu tiifu.

²⁴ Kwa hakika, twaweza kuwa na uhakika kwamba “Mungu [wetu] mwenye furaha” ametuwekea mambo mazuri ajabu yatakayotufurahisha kikamili. (1 Timotheo 1:11) Mungu ataendelea ‘kuufumbua mkono wake, na kushibisha kila kilicho hai matakwa yake.’ (Zaburi 145:16) Si ajabu kwamba kunayo na kutakuwako sikuzote furaha ya kweli katika kumtumikia Yehova.

Ungejibuje?

◻ Ni nini msingi wa furaha ya watumishi wa Yehova waliojiweka wakfu?

◻ Katika nyakati za Biblia, ni nani waliokuwa baadhi ya watumishi wa Yehova wenye furaha wasiofunga ndoa?

◻ Ni kwa nini Paulo alipendekeza useja, na baadhi ya Wakristo wamepataje hayo kuwa maisha yenye furaha?

◻ Furaha yetu itategemea nini sikuzote?

◻ Kwa nini tuwe na uhakika kwamba waaminifu wote katika mfumo mpya wa mambo watakuwa wenye furaha?

[Picha katika ukurasa wa 16]

Dada wengi waseja humtumikia Yehova kwa furaha wakiwa wahudumu wa wakati wote

[Picha katika ukurasa wa 18]

Kutumikia masilahi ya Yehova ndiko chanzo cha msingi cha furaha