Asiyefunga Ndoa Lakini Kamili kwa Utumishi wa Mungu
Yeye ambaye pia anautoa ubikira wake katika ndoa afanya vema, lakini yeye asiyeutoa katika ndoa atafanya vema zaidi.—1 WAKORINTHO 7:38, NW.
1. Ndoa imethibitikaje kuwa baraka?
YEHOVA hakutazamia kamwe mwanamume wa kwanza aendelee kuwa mseja. Bali, Mungu alimuumbia Adamu mwenzi wa ndoa, Baba ya jamaa ya kibinadamu. (Mwanzo 2:20-24; Matendo 17:26) Nayo ndoa ilithibitika kuwa baraka iliyoje! Ilitoa uandamani, ikafanyiza msaada wa wote wawili uwezekane, ilikuwa mpango unaoheshimika wa kuzaa watoto, nayo ilichangia sana furaha ya binadamu. Kwani, hata maskini na wenye kuonewa wanaweza kufurahia kile ambacho hakuna kiasi cho chote cha pesa kinaweza kununua—upendo wa ndoa!—Wimbo Ulio Bora 8:6, 7.
2, 3. (a) Ni maoni gani ambayo kichapo kimoja cha kidini kilikuwa nayo kuhusu useja na ndoa? (b) Ndoa yapasa ionweje Kimaandiko?
2 Hata hivyo, wengine, wanaiona ndoa katika njia tofauti. Chasema hivi kichapo kimoja cha kidini: “Kutofunga ndoa ni sheria ya kidini katika Kanisa la Magharibi wanayopasishwa makasisi ikiwakataza wale ambao wamefunga ndoa wasiwekwe kuwa wahudumu na wale walio katika agizo takatifu wasifunge ndoa. Inatia ndani takwa la wajibu wa kushikalia ubikira kamili chini ya nadhiri. Sababu ya mambo haya ni: kwamba wale wanaowekwa kuwa wahudumu wamtumikie Mungu wakiwa na kusudi moja kubwa (1 Kor. 7:32), na kwamba kwa kuishi maisha ya utawa wanashikilia hadhi ya ubikira, ambayo ni takatifu zaidi na ya juu zaidi ya ile ya ndoa. Katika AJ [Agano Jipya] hadhi ya kutofunga ndoa au ubikira inainuliwa juu zaidi ya ile ya kufunga ndoa.”—The Catholic Encyclopedia, iliyotungwa na Robert C. Broderick.
3 Je! kweli inawezekana kwamba useja wa kulazimishwa ni ‘mtakatifu zaidi na wa juu zaidi ya ndoa’? Sivyo kulingana na “Agano Jipya,” ambayo inasema hivi katika Jerusalem Bible ya Kikatoliki: “Roho imesema waziwazi kwamba katika nyakati za kumalizia kutakuwa na wengine ambao wataiacha ile imani na kuchagua kusikiliza roho zenye uwongo na mafundisho yanayotoka kwa maibilisi; na kisababishi cha hili ni ule uwongo unaosemwa na wanafiki ambao dhamiri zao zimetiwa alama kana kwamba kwa chuma chenye moto sana: wao watasema ndoa imekatazwa, na wataweka amri juu ya kushika mwiko wa vyakula ambavyo Mungu ameumba ili vikubaliwe kwa shukrani na wote wanaoitikadi na wanaojua ukweli.” (1 Timotheo 4:1-3) Kwa kweli, ndoa ni zawadi kutoka kwa Mungu, nayo ni nzuri.—Ruthu 1:9.
4. Kwa sababu ya 1 Wakorintho 7:38, ni maulizo gani yanayozuka?
4 Ijapokuwa ndoa ni zawadi kutoka kwa Mungu, mtume Paulo aliandika hivi: “Yeye ambaye pia anautoa ubikira wake katika ndoa afanya vema, lakini yeye asiyeutoa katika ndoa atafanya vema zaidi.” (1 Wakorintho 7:38, NW) Kwa sababu gani Paulo alisema kwamba ingekuwa vema zaidi kubaki bila kufunga ndoa? Je! mseja apaswa kuhisi kwamba yeye si kamili? Na je! useja unaweza kuthawabisha?
Ule Msingi wa Maisha ya Kikristo
5. Msingi wa maisha yetu ya Kikristo unapasa uwe nini?
5 Kutumikia Yehova kwafaa kuwe msingi wenyewe wa maisha yetu ya Kikristo, tuwe tu waseja au tumefunga ndoa. Utumishi mtakatifu unaotolewa kwa Mungu kwa furaha unatoa ithibati ya ufugamano wetu kwake akiwa Mwenye Enzi Kuu wa Ulimwengu Wote Mzima. Utii wa moyo wote na ushiriki wa bidii katika huduma ya Kikristo ni njia za kuonyesha ufungamano huo. (1 Yohana 5:2, 3; 1 Wakorintho 9:16) Yote mawili yaani huduma na vitendo vingine vya utii vinavyopatana na mapenzi ya kimungu vinaweza kutimizwa na mtu ikiwa hajafunga ndoa.
6. Tuwe tumefunga ndoa au tu waseja, huduma inayofanywa kwa bidii inatuwezesha sisi tufanye nini?
6 Sasa waeneza-evanjeli wanatimiza kazi ya kuhubiri Ufalme kwa sifa ya Yehova. Na tuwe tumefunga ndoa au tu waseja, huduma inayofanywa kwa juhudi inatupa sisi nafasi ya kukazia angalau nyingine za mali zetu za kibinafsi na vipawa kwa utumishi wa Mungu. Lakini ni lazima sisi tukuze na kuongoza hali zetu ili kwamba huduma isiwekwe kamwe mahali pasipofaa maishani mwetu. Lazima sisi ‘tutafute kwanza Ufalme.’ (Mathayo 6:33) Kuna furaha katika kuelekeza fikira kwenye masilahi ya kimungu badala ya masilahi za kibinafsi tu.
Kamili kwa Ajili ya Huduma
7. Kuna kielelezo gani kinachoonyesha kwamba Mkristo asiyefunga ndoa anaweza kuwa kamili kwa ajili ya huduma?
7 Wakristo wanaweza kuwa kamili kwa ajili ya huduma wawe ni waseja au wamefunga ndoa. Kwa hiyo hali ya kutofunga ndoa ni msingi ambao hauhitaji badiliko kwa lazima. (Linganisha 1 Wakorintho 7:24, 27.) Neno la Mungu halifuati maoni ya makabila mengine ya kwamba mwanamume hawi kamili isipokuwa ameoa ndoa. Yesu Kristo alikufa akiwa hajaoa, na bibi-arusi wa kiroho mbinguni ni mke pekee ambaye Yehova amemruhusu Yesu awe naye. (Ufunuo 21:2, 9) Hata hivyo, ingawaje Mwana wa Mungu alikuwa hajaoa akiwa binadamu, alikuwa kielelezo kikuu cha mtu aliye kamili kwa ajili ya huduma.
8. Kama anavyoonyesha Paulo, kutofunga ndoa kunaruhusu nini?
8 Kwa kweli, kutofunga ndoa kunatoa uhuru mkubwa zaidi wa kibinafsi na wakati kwa ajili ya huduma. Akipendekeza useja, Paulo alisema: “Nataka msiwe na masumbufu. Yeye [mwanamume] asiyeoa hujishughulisha na mambo ya Bwana, ampendezeje Bwana; . . . Yeye [mwanamke] asiyeolewa hujishughulisha na mambo ya Bwana.” (1 Wakorintho 7:32-34) Hii inahusu Wakristo waseja na wale ambao walikuwa wamefunga ndoa wakati fulani lakini hali zao zimebadilika, zikiwarudisha katika hali ya kutofunga ndoa.—Mathayo 19:9; Warumi 7:2, 3.
9. Kielelezo cha Yesu kinaonyeshaje kwamba kutofunga ndoa hakumfanyi mtu asiwe kamili kwa ajili ya huduma ya Kikristo?
9 Kupata ukomavu wa kimwili, kiakili, na kiroho kunatokeza ukamili kwa ajili ya utumishi wa Mungu. Yesu Kristo hakuhitaji mwenzi wa ndoa ili awe kamili kwa ajili ya daraka la Mhudumu Mkuu wa Mungu na yeye ambaye kupitia kwake ukombozi ungeandaliwa. (Mathayo 20:28) Akiwa asiyeoa, Yesu alikuwa huru kuelekeza uweza wake wote kwa huduma yake. Hali yake ya kutooa ilitofautiana sana na ile kawaida ya Kiyahudi, ambayo chini yayo ndoa na watoto vilikaziwa. Walakini, Yesu alikuwa na uwezo kamili wa kumaliza kazi yake aliyopewa na Mungu. (Luka 3:23; Yohana 17:3, 4) Kwa sababu hiyo, kutofunga ndoa hakumfanyi mtu asiwe kamili kwa ajili ya huduma ya Kikristo.
Watu Waliofunga Ndoa “W amegawanyika”
10. Kwa sababu ya kifungo cha “mwili mmoja,” Paulo alisema nini kuhusu wale ambao wamefunga ndoa wakilinganishwa na wale ambao hawajafunga ndoa?
10 Tofauti na waseja, Wakristo waliofunga ndoa wapaswa kufuatia huduma yao wakitambua kifungo chao cha “mwili mmoja.” (Mathayo 19:5, 6) Kwa sababu ya kifungo hicho na madaraka yacho mbalimbali, Paulo alisema kwamba watu mmoja mmoja waliofunga ndoa “wamegawanyika.” Yeye aliandika hivi: “Lakini nataka msiwe na masumbufu. Yeye asiyeoa hujishughulisha na mambo ya Bwana, ampendezeje Bwana; bali yeye aliyeoa hujishughulisha na mambo ya dunia hii, jinsi atakavyompendeza mkewe. Tena iko tofauti hii kati ya mke na mwanamwali. Yeye asiyeolewa hujishughulisha na mambo ya Bwana, apate kuwa mtakatifu mwili na roho. Lakini yeye aliyeolewa hujishughulisha na mambo ya dunia hii, jinsi atakavyompendeza mumewe. Nasema hayo niwafaidie; si kwamba niwategee tanzi, bali kwa ajili ya vile vipendezavyo, tena mpate kumhudumia Bwana pasipo kuvutwa na mambo mengine.”—1 Wakorintho 7:32-35.
11. Paulo alikuwa akionyesha nini katika 1 Wakorintho 7:32-35?
11 Kwa wazi, kwa maisha yasiyovutwa zaidi na mambo mengine, Paulo alipendekeza useja. Huenda yeye mwenyewe alikuwa mjane aliyechagua kutooa tena. (1 Wakorintho 9:5) Vyo vyote iwavyo, yeye alijua kwamba kuna masumbufu yanayohusiana na maisha ya ndoa katika ulimwengu huu. Yeye alikuwa akionyesha uhuru ambao kwa kulinganisha Wakristo wasiofunga ndoa wanaweza kufurahia na jinsi masilahi ya walio na itikadi waliofunga ndoa yamegawanyika kwa lazima kati ya mambo ya kimwili na mambo ya kiroho. Mtu aliyefunga ndoa hana mamlaka kamili juu ya mwili wake, kwa kuwa mwenzi wake ni mwili mmoja pamoja naye na basi yeye ana dai juu ya mwili wake. (1 Wakorintho 7:3-5) Kwa sababu ya hii, kwa usahihi Paulo alisema kwamba Mkristo asiyefunga ndoa anaweza kuwa mtakatifu, yaani, amewekwa kando kikamili na kuwekwa kwa matumizi ya moja kwa moja ya Yehova Mungu, katika mwili na katika roho.
12. Kwa kutokuwa na mume au mke, mtu asiyefunga ndoa anaweza kufanya nini?
12 Roho, au mwelekeo wa akilini wa Mkristo mseja, unamsukuma kwenye utendaji wa utumishi wa Ufalme wa Mungu usiovutwa na mambo mengine. Akiwa hana mume au mke anayedai kuongoza kidogo mwili wake, yeye anaweza kufuata roho, au mwelekeo wa akili na moyo wake. Yeye anaweza kukaza mwili na akili zake kwenye utumishi wa Yehova pekee. Kwa hiyo mwanamume au mwanamke asiyefunga ndoa anaweza kutazamia kumpendeza Bwana peke yake kwa uhuru mkubwa wa kibinafsi. Hatuwezi kukataa kwa kufaa yale aliyoyasema Paulo, kwa kuwa Yehova aliona kwamba inafaa yaandikwe kwa ajili ya kutufundisha sisi.
Je! Mtu Aliyefunga Ndoa Si Kamili?
13, 14. Ni mwendo gani wenye kosa unaodharau kifungo cha “mwili mmoja” na ambao ungeweza kumfanya mtu aliyefunga ndoa asiwe kamili kwa ajili ya huduma?
13 Wakiwa na oni lenye makosa la kwamba wao wanaweza kufanya mengi zaidi katika utumishi wa Mungu, Wakristo fulani waliofunga ndoa huenda wakaweka ndoa yao mahali pasipofaa maishani. Kwa mfano, huenda mke akaanza kutenda kwa kutotegemea mume wake katika njia kubwa. Huenda mume akajishughulisha na utendaji wa kundi. Chini ya hali kama hizo, huenda wao wakakata maneno kwamba wanafanya vizuri katika utumishi wa Yehova. Hata hivyo, kwa kweli, huenda wakawa wanachukua mwendo unaodharau kile kifungo cha “mwili mmoja.” Ikiwa hivyo, jambo hilo halingempendeza Yehova.
14 Kwa kweli, kudharau kifungo cha “mwili mmoja” kungemfanya mtu aliyefunga ndoa asiwe kamili kwa ajili ya huduma ya Kikristo. Ndoa haiongezei ukamili wa huduma bali inapunguza kuelekezea fikira huduma kibinafsi. (Linganisha Luka 14:16, 17, 20.) Hata hivyo, ili watu waliofunga ndoa wampendeze Mungu na wawe wahudumu wake walio kamili, ni lazima wao waishi kupatana na wajibu wao wa ndoa.
Kutofunga Ndoa kwa Ajili ya Ufalme
15. (a) Wakristo wasiofunga ndoa wapaswa wakuze sifa gani? (b) Ni jambo gani la msingi kuhusu ndoa na useja ambalo Paulo anasema katika 1 Wakorintho 7:36, 37?
15 Ingawa watumishi wa Yehova waliofunga ndoa wanapasa waishi kulingana na wajibu wao wa ndoa, Wakristo waseja wapasa wakuze uradhi katika ukamili wa hali yao ya kutofunga ndoa. Kama alivyosema Paulo: “Lakini nawaambia wale wasiooa bado, na wajane, Ni heri [afadhali, NW] wakae kama mimi nilivyo [kutofunga ndoa]. Je! umefungwa kwa mke? Usitake kufunguliwa. Umefunguliwa? Usitafute mke.” (1 Wakorintho 7:8, 27) Kwa msaada wa Yehova, ukiwa mseja, kuza hali ya utulivu ambayo Mungu anakufanyia iwezekane. Badiliko lo lote la hali lisiwe mkataa uliokwisha katwa, kwa sababu tu ya desturi au tendo linalofanywa kwa sababu ya mkazo kutoka kwa marika. Bali, lapasa litokane na uhitaji wa lazima wa Kimaandiko, kwa kuwa Paulo alisema: “Ikiwa ye yote anafikiri anajiendesha isivyofaa kuelekea ubikira wake, ikiwa huyo amepita ule ukamilifu wa ujana, na hivi ndivyo inavyopasa kuwa, acha yeye afanye atakavyo; yeye hafanyi dhambi. Acheni wao wafunge ndoa. Lakini ikiwa ye yote anasimama akiwa ametulia katika moyo wake, asiwe na uhitaji wa lazima, bali ana mamlaka juu ya hiari yake na yeye amefanya uamuzi katika moyo wake mwenyewe, kuendeleza ubikira wake mwenyewe, yeye atafanya vema.”—1 Wakorintho 7:36, 37, NW.
16. (a) Inamaanisha nini “kupita ule ukamilifu wa ujana”? (b) Mkristo anayebaki bila kufunga ndoa apasa asadikishwe juu ya nini?
16 Hivyo Paulo alionyesha kwamba halingekuwa kosa kufunga ndoa ikiwa mmoja alikuwa akitenda katika njia isiyofaa kuelekea ubikira wake, ijapokuwa bila shaka mtume hakuwa akitaja dhambi nzito. Kama alivyosema mwanzoni, “Ni afadhali kuoa kuliko kuwaka tamaa.” (1 Wakorintho 7:9) Bila shaka, yeye alikuwa akielekeza kwenye ndoa chini ya hali hizo ikiwa mtu amepita “ukamilifu wa ujana,” amepita wakati ambao kupendezwa na ngono kwa mara ya kwanza kulikuwa kwenye nguvu. Ikiwa mtu mmoja mmoja aliyekomaa angeweza kuwa “na mamlaka juu ya hiari yake” na alikuwa ameamua kwa uthabiti katika moyo wake kuwa mseja, yeye angefanya vema. Useja wenye mafanikio haumaanishi kuzuia tamaa ya kufunga ndoa na maisha ya jamaa inayosumbua-sumbua na inayokaribia kumshinda nguvu mtu. Bali, Mkristo anayechagua kutofunga ndoa apasa asadikishwe kikamili moyoni kwamba kudumisha useja ni sawa katika hali yake na apasa awe na nia ya kujitahidi kwa njia yo yote inayohitajiwa ili kudumisha hali hiyo ya usafi. Mkristo anayefanya hivyo atakuwa na mambo machache yanayovuta fikira zake na atakuwa na uhuru mkubwa zaidi wa kumtumikia Bwana.
17. Kulingana na Yesu, kwa nini wengine wanabaki bila kufunga ndoa?
17 Wakristo wasiofunga ndoa watasaidiwa wadumishe hali yao ya useja ikiwa watakuza akili ya Yesu Kristo. Ingawa yeye hakuoa katika utamaduni uliokazia ndoa yeye alielekeza wakati na vipawa vyake kwenye huduma yake ambayo haingerudiwa tena. Kama Yesu, Mkristo asiyefunga ndoa anaweza kufurahia kipawa cha useja ambacho Mungu anawatolea wale wanaupa nafasi. Kuhusu jambo hili, Yesu alisema: “Si wote wawezao kulipokea neno hili, ila wale waliojaliwa. Maana wako matowashi waliozaliwa hali hiyo toka matumboni mwa mama zao; tena wako matowashi waliofanywa na watu kuwa matowashi; tena wako matowashi waliojifanya kuwa matowashi kwa ajili ya ufalme wa mbinguni. Awezaye kulipokea neno hili, na alipokee.”—Mathayo 19:11, 12.
18. Ni kitu gani kinachowafanya “matowashi” kwa ajili ya Ufalme wasifunge ndoa?
18 Yesu hakusema kwamba mseja amemshinda mtu aliyefunga ndoa. Yeye hakusisitiza useja ili kuwa na maisha ya bila masumbufu, na kwa kweli yeye hakuupendekeza ili mtu asiyefunga ndoa aweze kueneza fikira zake kwa hesabu fulani ya watu wa ile jinsia tofauti. La, lakini wale wanaojifanya wenyewe kuwa “matowashi” kwa ajili ya Ufalme ni watu wanyofu kiadili wanaoweka nafasi kwa jambo hilo katika mioyo yao. Ni kitu gani kinachowafanya wasifunge ndoa? Si kasoro fulani ya kimwili bali tamaa yenye nguvu ya kujitumikisha wenyewe kikamili kadiri wawezavyo katika utumishi wa Mungu. Utumishi huu ni wa maana sana sasa tangu Ufalme usimamishwe mbinguni katika 1914 na “habari njema hizi za ufalme” lazima zihubiriwe duniani pote kwa ajili ya ushuhuda kabla ya mwisho unaokaribia kwa haraka wa mfumo huu wa mambo uliohukumiwa maangamizi.—Mathayo 24:14, NW.
Wasifu Wakristo Wasiofunga Ndoa
19. Kuhusu wale wanaobaki waseja kwa ajili ya Ufalme, Wakristo wote wapaswa wafanye nini?
19 Wakristo wote wanapasa kusifu na kuwatia moyo wale wanaobaki bila kufunga ndoa kwa ajili ya Ufalme. Kwani, kuwa mseja kunamaanisha “kumhudumia Bwana pasipo kuvutwa na mambo mengine.” (1 Wakorintho 7:35) Wazazi watafanya vema kuwafunza watoto wao yale ambayo Biblia inasema kuhusu hali ya kutofunga ndoa na faida zayo kwa utumishi wa Yehova. Sisi sote tunaweza kuwatia moyo walio na itikadi wenzetu ambao hawakufunga ndoa waseja na hatupasi kudhoofisha kamwe azimio lao la kuendelea bila kufunga ndoa kwa ajili ya Ufalme.
20. Ikiwa wewe ni Mkristo asiyefunga ndoa, inakupasa ufanye nini?
20 Wakristo wasiofunga ndoa wanaweza kufurahi wakiwa wahudumu wa Mungu walio kamili. Katika nyakati hizi za kumalizia, wao wanafurahia kushiriki katika kazi ya haraka ya kuhubiri Ufalme. Basi, ikiwa wewe ni mseja, furahia kutumiwa na Yehova ukiwa mhudumu Mkristo asiyefunga ndoa aliye kamili. ‘Utimize wokovu wako mwenyewe kwa kuogopa na kutetemeka, ukionekana kuwa kama mwanga katika ulimwengu, ukilishika neno la uzima.’ (Wafilipi 2:12-16) Elekeza fikira kwenye masilahi ya Ufalme unapobaki katika umoja na udugu wa kimataifa wa Mashahidi wa Yehova na kutimiza ile huduma ya Kikristo. Kufanya hivyo ukiwa mseja ni njia ya maisha yenye kuthawabisha, kama tutakavyoona.
Majibu Yako Ni Nini?
◻ Msingi wa maisha wapasa uwe nini?
◻ Kwa sababu gani watumishi wa Yehova wasiofunga ndoa wanaweza kuwa kamili kwa ajili ya huduma ya Kikristo?
◻ Ni katika njia gani mtu aliyefunga ndoa angeweza kuwa si kamili?
◻ Inamaanisha nini kuwa“towashi” kwa ajili ya Ufalme?
◻ Kwa sababu gani inatupasa tuwatie moyo Wakristo wasiofunga ndoa?
[Picha katika ukurasa wa 10]
Ingawa hakuwa amefunga ndoa, mtume Paulo alikuwa kamili
[Picha katika ukurasa wa 12]
Yesu alikuwa kielelezo kikuu cha mtu aliye kamili kwa ajili ya huduma
[Picha katika ukurasa wa 15]
Je! wewe unawasifu wale wanaobaki bila kufunga ndoa kwa ajili ya Ufalme?