Kuishi kwa Kupatana na Wakfu Wetu “Kila Siku”

“Mtu ye yote akitaka kunifuata, na ajikane mwenyewe, ajitwike msalaba wake [“mti wake wa mateso,” “NW”] kila siku, anifuate.”—LUKA 9:23.

1. Ni ipi njia moja ambayo twaweza kupima ufanisi wetu tukiwa Wakristo?

“JE, KWELI tulikuwa watu wa wakfu?” Jibu la swali hilo, kulingana na John F. Kennedy, Rais wa 35 wa Marekani, linahusika katika kupima ufanisi wa wale wenye mamlaka. Swali hilo lingekuwa na umaana mwingi zaidi katika kujaribu ufanisi wetu tukiwa wahudumu Wakristo.

2. Kamusi moja hufasilije neno “wakfu”?

² Lakini, wakfu ni nini? Webster’s Ninth New Collegiate Dictionary yaufasili kuwa “tendo au sherehe ya kuweka [kitu] wakfu kwa mtu wa kimungu au kwa matumizi matakatifu,” “kutoa au kuweka [kitu] kando kwa ajili ya matumizi maalumu,” “ujitoaji wa kujidhabihu.” Yaonekana John F. Kennedy alikuwa akitumia neno hilo kumaanisha “ujitoaji wa kujidhabihu.” Kwa Mkristo, ujitoaji wamaanisha mambo mengi zaidi.

3. Wakfu wa Kikristo ni nini?

³ Yesu Kristo aliwaambia wanafunzi wake: “Mtu ye yote akitaka kunifuata, na ajikane mwenyewe, ajitwike msalaba wake [“mti wake wa mateso,” NW], anifuate.” (Mathayo 16:24) Kuwekwa kando kwa ajili ya matumizi ya kimungu hakuhusishi tu kufanya tendo la ibada Jumapili au wakati mtu anapozuru mahali fulani pa ibada. Kwahusisha mtindo-maisha wote wa mtu. Kuwa Mkristo kwamaanisha kujikana mwenyewe au kujikataa mwenyewe huku mtu akimtumikia Mungu ambaye Yesu Kristo alimtumikia, Yehova. Kwa kuongezea, Mkristo huchukua “mti wake wa mateso” kwa kuvumilia akiwa chini ya mateso yoyote ambayo huenda yakampata kwa sababu ya kuwa mfuasi wa Kristo.

Kielelezo Kikamilifu

4. Ubatizo wa Yesu ulifananisha nini?

⁴ Alipokuwa duniani, Yesu alionyesha kile ambacho kujiweka wakfu kwa Yehova kwahusisha. Maoni yake yalikuwa hivi: “Dhabihu na toleo hukutaka, lakini mwili uliniwekea tayari.” Kisha akaongeza hivi: “Tazama, nimekuja (katika gombo la chuo nimeandikiwa) niyafanye mapenzi yako, Mungu.” (Waebrania 10:5-7) Akiwa mshiriki wa taifa lililojiweka wakfu, yeye alikuwa amejiweka wakfu kwa Yehova tangu azaliwe. Bado, mwanzoni mwa huduma yake ya kidunia, alijitoa kwenye ubatizo ukiwa ufananisho wa kujitoa kwake kufanya mapenzi ya Yehova, ambayo kwake yangetia ndani kutoa uhai wake ukiwa dhabihu ya fidia. Hivyo aliwekea Wakristo kielelezo cha kufanya chochote ambacho Yehova apenda.

5. Yesu alionyeshaje maoni yenye kielelezo kizuri juu ya vitu vya kimwili?

⁵ Baada ya ubatizo wake Yesu alifuata mwendo wa maisha ambao hatimaye uliongoza kwenye kifo cha kujidhabihu. Yeye hakupendezwa na kutafuta utajiri au kuishi maisha ya ustarehe. Badala ya hivyo, maisha yake yalikazia huduma yake. Aliwaonya wanafunzi wake kwa upole ‘wautafute kwanza ufalme wake, na haki yake,’ naye mwenyewe aliishi kwa kupatana na maneno hayo. (Mathayo 6:33) Hata wakati mmoja alisema hivi: “Mbweha wana pango, na ndege wa angani wana vioto; lakini Mwana wa Adamu hana pa kulaza kichwa chake.” (Mathayo 8:20) Yeye angaliweza kuunda mafundisho yake ili aweze kutoza wafuasi wake fedha kwa udhalimu. Akiwa seremala yeye angaliweza kuchukua wakati fulani kutengeneza chombo kizuri cha mbao cha kuuza ili awe na vipande vichache zaidi vya fedha. Lakini hakutumia stadi zake ili kutafuta ufanisi wa kimwili. Tukiwa watumishi wa Mungu waliojiweka wakfu, je tunamwiga Yesu kwa kuwa na maoni yaliyo sawa juu ya vitu vya kimwili?—Mathayo 6:24-34.

6. Twaweza kumwigaje Yesu katika kuwa watumishi wa Mungu waliojiweka wakfu na wenye kujidhabihu?

⁶ Katika kutanguliza utumishi wake kwa Mungu, Yesu hakutafuta masilahi yake mwenyewe. Maisha yake muda wa ile miaka mitatu na nusu ya huduma yake ya hadharani yalikuwa ya kujidhabihu. Pindi moja baada ya siku yenye shughuli nyingi, hata bila kuchukua wakati wa kula mlo, Yesu alikuwa tayari kufundisha watu waliokuwa “wamechoka na kutawanyika kama kondoo wasio na mchungaji.” (Mathayo 9:36; Marko 6:31-34) Ingawa alikuwa “amechoka kwa safari,” alichukua hatua ya kwanza kuongea na mwanamke Msamaria aliyekuja kwenye kisima cha Yakobo katika Sikari. (Yohana 4:6, 7, 13-15) Sikuzote alitanguliza hali njema ya wengine mbele ya yake mwenyewe. (Yohana 11:5-15) Twaweza kumwiga Yesu kwa kudhabihu kwa ukarimu masilahi yetu wenyewe ili kutumikia Mungu na wengine. (Yohana 6:38) Kwa kufikiria njia ambazo twaweza kumpendeza Mungu kikweli badala ya kufanya kiasi kidogo zaidi kinachotakikana, tutakuwa tukiishi kwa kupatana na wakfu wetu.

7. Twaweza kumwigaje Yesu katika kumpa Yehova heshima sikuzote?

⁷ Yesu hakuwa akijaribu hata kidogo kujivutia uangalifu kwa kusaidia watu. Alikuwa amejiweka wakfu kwa Mungu kufanya mapenzi Yake. Kwa hiyo sikuzote alihakikisha kwamba Yehova, Baba yake, alipokea utukufu wote kwa jambo lolote lililotimizwa. Mtawala fulani alipomwita “Mwalimu mwema,” akitumia neno “mwema” kama jina la cheo, Yesu alimsahihisha kwa kusema: “Hakuna aliye mwema ila mmoja, naye ndiye Mungu.” (Luka 18:18, 19; Yohana 5:19, 30) Je, sisi kama vile Yesu, tuko wepesi wa kuelekeza heshima kutoka kwetu wenyewe kumwendea Yehova?

8. (a) Akiwa mtu aliyejiweka wakfu, Yesu alijiwekaje kando na ulimwengu? (b) Twapaswa kumwigaje?

⁸ Muda wote wa mwendo wake wa maisha wa kujiweka wakfu akiwa duniani, Yesu alionyesha kwamba alikuwa amejiweka kando kwa ajili ya utumishi wa kimungu. Alijiweka akiwa safi ili aweze kujitoa akiwa “mwana-kondoo asiye na ila, asiye na waa” kuwa dhabihu ya fidia. (1 Petro 1:19; Waebrania 7:26) Yeye alishika amri zote za Sheria ya Kimusa, hivyo akitimiza Sheria hiyo. (Mathayo 5:17; 2 Wakorintho 1:20) Aliishi kwa kupatana na fundisho lake mwenyewe juu ya adili. (Mathayo 5:27, 28) Hakuna yeyote ambaye angeweza kwa haki kumshtaki juu ya kuwa na madhumuni mabaya. Kwa kweli, yeye ‘alichukia maasi.’ (Waebrania 1:9) Tukiwa watumwa wa Mungu, na tumwige Yesu katika kuweka maisha zetu na hata madhumuni yetu yakiwa safi machoni pa Yehova.

Vielelezo vya Kuonya

9. Paulo alirejezea kielelezo kipi cha kuonya, na kwa nini tufikirie kielelezo hicho?

⁹ Tofauti na kielelezo cha Yesu, tuna kielelezo cha kuonya cha Waisraeli. Hata baada ya wao kutangaza kwamba wangefanya yote ambayo Yehova aliwaambia wafanye, wao walishindwa kufanya mapenzi yake. (Danieli 9:11) Mtume Paulo aliwatia moyo Wakristo wajifunze kutokana na yale yaliyowapata Waisraeli. Acheni tuchunguze baadhi ya mambo ambayo Paulo alirejezea katika barua yake ya kwanza kwa Wakorintho na tuone ni mitego ipi inayohitaji kuepukwa na watumishi wa Mungu waliojiweka wakfu katika wakati wetu.—1 Wakorintho 10:1-6, 11.

10. (a) Waisraeli ‘walitamanije mabaya’? (b) Kwa nini Waisraeli walitakwa watoe hesabu mara ya pili waliponung’unika juu ya chakula, nasi twaweza kujifunza nini kutokana na kielelezo hiki cha kuonya?

¹⁰ Kwanza, Paulo alituonya tusiwe wenye “kutamani mabaya.” (1 Wakorintho 10:6) Hilo huenda likakukumbusha ile pindi ambayo Waisraeli walilalamika juu ya kuwa na mana pekee ya kula. Yehova alituma kware kwao. Jambo lilo hilo lilikuwa limetukia karibu mwaka mmoja mapema kidogo katika jangwa la Sini, kabla tu ya Waisraeli kutangaza wakfu wao kwa Yehova. (Kutoka 16:1-3, 12, 13) Lakini hali haikuwa vivyo hivyo kamili. Yehova alipoandaa kware wakati wa kwanza, yeye hakuwataka Waisraeli watoe hesabu kwa ajili ya kunung’unika kwao. Hata hivyo, wakati huu mambo yalikuwa tofauti. “Hiyo nyama ilipokuwa ikali kati ya meno yao, hawajaitafuna bado, hasira za BWANA ziliwaka juu ya watu, BWANA akawapiga watu kwa pigo kuu mno.” (Hesabu 11:4-6, 31-34) Ni nini lililobadilika? Wakiwa taifa lililojiweka wakfu, sasa walitakwa watoe hesabu. Ukosefu wao wa uthamini kwa ajili ya maandalizi ya Yehova uliwaongoza walalamike dhidi ya Yehova, kujapokuwa kuahidi kwao kufanya yale yote ambayo Yehova alikuwa amesema! Leo kulalamika juu ya meza ya Yehova kwafanana na hilo. Wengine hukosa kuthamini maandalizi ya kiroho ya Yehova kupitia “mtumwa mwaminifu mwenye akili.” (Mathayo 24:45-47) Lakini, kumbuka kwamba wakfu wetu hututaka tukumbuke kwa shukrani yale ambayo Yehova ametufanyia na kukubali chakula cha kiroho ambacho Yehova hutoa.

11. (a) Waisraeli walichafuaje ibada yao kwa Yehova kwa ibada ya sanamu? (b) Tungeweza kuathiriwaje na aina fulani ya ibada ya sanamu?

¹¹ Halafu, Paulo alionya hivi: “Wala msiwe waabudu sanamu, kama wengine wao walivyokuwa.” (1 Wakorintho 10:7) Hapa yaonekana mtume alikuwa akirejezea ibada ya ndama iliyotukia baada tu ya Waisraeli kufanya agano na Yehova kwenye Mlima Sinai. Huenda ukasema, ‘Nikiwa mtumishi wa Yehova aliyejiweka wakfu, sitahusika kamwe na ibada ya sanamu.’ Hata hivyo, angalia kwamba kwa maoni ya Waisraeli, wao hawakuacha kumwabudu Yehova; hata hivyo, walianzisha zoea la ibada ya ndama—jambo lililomchukiza Mungu. Namna hiyo ya ibada ilihusisha nini? Watu walitoa dhabihu mbele ya ndama huyo, kisha “wakaketi kula na kunywa, wakaondoka wacheze.” (Kutoka 32:4-6) Leo, huenda wengine wakadai kwamba wao humwabudu Yehova. Lakini huenda maisha zao zakazia, si ibada ya Yehova, bali kufurahia mambo ya ulimwengu huu, nao hujaribu kuingiza utumishi wao kwa Yehova kando-kando ya mambo hayo. Ni kweli, hayo hayapiti kiasi kama vile kuinamia ndama wa dhahabu, lakini si tofauti sana kwa kanuni. Kwa mtu kufanya tamaa zake mwenyewe ziwe mungu ni mbali sana na kuishi kwa kupatana na wakfu wake kwa Yehova.—Wafilipi 3:19.

12. Kutokana na ono la Waisraeli na Baal-peori, twajifunza nini juu ya kujikana wenyewe?

¹² Aina fulani ya kitumbuizo ilihusika pia katika kielelezo kifuatacho cha kuonya ambacho Paulo alitaja. “Wala tusifanye uasherati, kama wengine wao walivyofanya, wakaanguka siku moja watu ishirini na tatu elfu.” (1 Wakorintho 10:8) Waisraeli, wakiwa wameshawishwa na raha isiyo ya adili iliyotolewa na mabinti wa Moabu, waliongozwa katika ibada ya Baal-peori katika Shitimu. (Hesabu 25:1-3, 9) Kujikana wenyewe ili kufanya mapenzi ya Yehova kwatia ndani kukubali viwango vyake kwa yale yaliyo safi kiadili. (Mathayo 5:27-30) Katika enzi hii ya viwango vinavyozorota, tunakumbushwa uhitaji wa kujiweka tukiwa safi kutoka katika aina zote za mwenendo usio wa adili, tukijinyenyekeza kwa mamlaka ya Yehova kuamua yaliyo mema na yaliyo mabaya.—1 Wakorintho 6:9-11.

13. Kielelezo cha Finehasi kinatusaidiaje kuelewa kinachotiwa ndani ya wakfu kwa Yehova?

¹³ Ingawa wengi walitumbukia mtego wa uasherati katika Shitimu, wengine waliishi kwa kupatana na wakfu wa kitaifa kwa Yehova. Kati yao, Finehasi alikuwa mwenye bidii ya kutokeza. Alipotoka tu kumwona mkuu mmoja Mwisraeli akimleta mwanamke Mmidiani ndani ya hema lake, mara hiyo Finehasi alichukua fumo mkononi mwake akawachoma. Yehova alimwambia Musa hivi: “Finehasi . . . amezigeuza hasira zangu zisiwe juu ya wana wa Israeli, kwa kuwa alikuwa na wivu [“hakuvumilia hata kidogo ushindani kunielekea mimi,” NW] kati yao kwa wivu wangu mimi, hata nisiwaangamize wana wa Israeli katika wivu wangu.” (Hesabu 25:11) Kutovumilia hata kidogo ushindani kuelekea Yehova—hiyo ndiyo maana ya wakfu. Hatuwezi kuruhusu jambo lolote lichukue mahali ambapo wakfu kwa Yehova wapaswa kuchukua mioyoni mwetu. Bidii yetu kwa Yehova hutusukuma pia tuweke kutaniko likiwa safi kwa kuripoti kwa wazee ukosefu wa adili ulio mzito, kutouvumilia.

14. (a) Waisraeli walimjaribuje Yehova? (b) Wakfu kamili kwa Yehova hutusaidiaje “tusichoke”?

¹⁴ Paulo alirejezea kielelezo kingine cha kuonya: “Wala tusimjaribu Bwana, kama wengine wao walivyomjaribu, wakaharibiwa na nyoka.” (1 Wakorintho 10:9) Hapa Paulo alikuwa akiongea juu ya wakati Waisraeli walipolalamika kwa Musa dhidi ya Mungu wakati ‘walipokufa moyo kwa sababu ya ile njia.’ (Hesabu 21:4) Je, wewe hufanya kosa hilo? Ulipojiweka wakfu kwa Yehova, je, ulifikiri Har–Magedoni ilikuwa karibu sana? Je, subira ya Yehova imechukua muda mrefu zaidi kuliko vile ulivyotazamia? Kumbuka, sisi hatukujiweka wakfu kwa Yehova kwa kipindi fulani tu cha wakati au mpaka Har–Magedoni tu. Wakfu wetu huendelea milele. Kwa hiyo basi, “tusichoke katika kutenda mema; maana tutavuna kwa wakati wake, tusipozimia roho.”—Wagalatia 6:9.

15. (a) Waisraeli walinung’unika dhidi ya nani? (b) Wakfu wetu kwa Yehova hutusukumaje tustahi mamlaka ya kitheokrasi?

¹⁵ Mwishowe, Paulo alionya juu ya kuwa ‘wanung’unikaji’ dhidi ya watumishi wa Yehova waliowekwa rasmi. (1 Wakorintho 10:10) Waisraeli walinung’unika sana dhidi ya Musa na Haruni wakati wapelelezi 10 kati ya 12 waliotumwa kuchunguza nchi ya Kanaani waliporudisha ripoti mbaya. Hata waliongea juu ya kuweka mtu mwingine mahali pa Musa kuwa kichwa chao na kurudi Misri. (Hesabu 14:1-4) Je, leo sisi hukubali uongozi tunaopewa kupitia utendaji wa roho takatifu ya Yehova? Kwa kuona ile meza ya kiroho yenye ukarimu inayoandaliwa na jamii ya mtumwa mwaminifu mwenye akili, si vigumu kujua wale wanaotumiwa na Yesu kugawanya “chakula kwa wakati wake.” (Mathayo 24:45) Wakfu wa nafsi yote kwa Yehova wataka sisi tuonyeshe staha kwa watumishi wake waliowekwa rasmi. Tusiwe kamwe kama wanung’unikaji wa siku ya kisasa ambao, kwa kusema kimfano, wamegeukia kichwa kingine, kiwaongoze warudi ulimwenguni.

Ni Yote Niwezayo?

16. Watumishi wa Mungu waliojiweka wakfu huenda wakataka kujiuliza maswali gani?

¹⁶ Waisraeli wasingalitumbukia makosa hayo mazito ikiwa wangalikumbuka kwamba wakfu wao kwa Yehova ulikuwa bila masharti. Tofauti na wale Waisraeli wasio na imani, Yesu Kristo aliishi kwa kupatana na wakfu wake hadi mwisho. Tukiwa wafuasi wa Kristo, sisi twaiga kielelezo chake cha ujitoaji wa nafsi yote, tukiishi maisha zetu ‘si katika tamaa za wanadamu, bali katika mapenzi ya Mungu.’ (1 Petro 4:2; linganisha 2 Wakorintho 5:15.) Mapenzi ya Yehova leo ni kwamba “watu wote waokolewe, na kupata kujua yaliyo kweli.” (1 Timotheo 2:4) Kwa kusudi hilo, sisi twapaswa kuhubiri “habari njema ya ufalme” kabla ya mwisho kuja. (Mathayo 24:14) Sisi hujitahidi kadiri gani katika utumishi huu? Huenda tukataka kujiuliza wenyewe, ‘Je, ni yote niwezayo?’ (2 Timotheo 2:15) Hali huwa tofauti. Yehova anapenda kutumikiwa “kadiri ya alivyo navyo mtu, si kwa kadiri ya asivyo navyo.” (2 Wakorintho 8:12; Luka 21:1-4) Hakuna apaswaye kuhukumu kina na unyoofu wa wakfu wa mwingine. Kila mmoja apaswa kukadiri binafsi kadiri ya ujitoaji wake mwenyewe kwa Yehova. (Wagalatia 6:4) Kumpenda kwetu Yehova kwapaswa kutusukuma tuulize, ‘Naweza kumfurahisha Yehova jinsi gani?’

17. Kuna uhusiano gani kati ya ujitoaji na uthamini? Toa kielezi.

¹⁷ Ujitoaji wetu kwa Yehova huongezeka tunapokua katika uthamini wetu kwa ajili yake. Kijana wa miaka 14 katika Japani alijiweka wakfu kwa Yehova na kuufananisha wakfu huo kwa ubatizo wa maji. Baadaye alitaka kufuatia elimu ya juu zaidi na kuwa mwanasayansi. Yeye hakufikiria kamwe huduma ya wakati wote, lakini akiwa mtumishi aliyejiweka wakfu, yeye hakutaka kumwacha Yehova na tengenezo lake lionekanalo. Ili kutimiza mradi wa kazi-maisha yake, yeye alihudhuria chuo kikuu fulani. Huko aliona wahitimu wa chuo kikuu wakilazimika kuweka wakfu maisha yao yote kwa makampuni au kwa masomo yao. Alijiuliza, ‘Ninafanya nini hapa? Je, naweza kweli kufuatia njia yao ya maisha na kujiweka wakfu kwa kazi ya kimwili? Je, sijajiweka wakfu tayari kwa Yehova?’ Akiwa na uthamini uliofanywa upya, yeye alikuwa painia wa kawaida. Uelewevu wake wa wakfu wake uliongezeka ukamsukuma aazimie moyoni mwake kwenda popote alipohitajika. Yeye alihudhuria Shule ya Mazoezi ya Kihuduma akapokea mgawo wa kutumikia akiwa mishonari katika nchi ya kigeni.

18. (a) Ni mambo mengi kadiri gani yanayohusika katika wakfu wetu kwa Yehova? (b) Twaweza kuvuna thawabu gani kutokana na wakfu wetu kwa Yehova?

¹⁸ Wakfu huhusisha maisha yetu yote. Ni lazima tujikane wenyewe na kufuata kielelezo kizuri cha Yesu “kila siku.” (Luka 9:23) Tukiisha kujikana wenyewe, sisi hatumwombi Yehova atupe likizo, ruhusa ya kupumzika. Maisha zetu hupatana na kanuni ambazo Yehova huwekea watumishi wake. Hata katika mambo ambayo twaweza kufanya chaguo la kibinafsi, yafaa tuone kama tunafanya tuwezavyo kabisa kuishi maisha yaliyowekwa wakfu kwa Yehova. Tumtumikiapo kila siku, tukifanya yote tuwezayo kumpendeza, tutafanikiwa tukiwa Wakristo nasi tutabarikiwa na tabasamu yenye kibali kutoka kwa Yehova, Yule astahiliye ujitoaji wetu wa nafsi yote.

Je, Waweza Kueleza?

◻ Wakfu ulihusisha nini kwa Yesu Kristo?

◻ Kwa nini tuepuke kunung’unika dhidi ya Yehova?

◻ Twaweza kuepuka kwa njia gani kuruhusu ibada ya sanamu ipenye kwa hila maisha zetu?

◻ Kukumbuka nini kutatusaidia “tusichoke” katika kufanya mapenzi ya Mungu?

[Picha katika ukurasa wa 17]

Wakristo waliojiweka wakfu ‘hawachoki katika kutenda mema’