UVUMILIVU
Kitenzi cha Kigiriki hy·po·meʹno kinachomaanisha kihalisi “kubaki au kuendelea kuwa chini,” kwenye andiko la Luka 2:43 na Matendo 17:14, kimetafsiriwa ‘kubaki.’ Kinamaanisha pia “kuendelea kusimama; kustahimili; kubaki imara,” kwa hiyo kinatafsiriwa kuwa ‘vumilia.’ (Mt 24:13) Nomino hy·po·mo·neʹ kwa kawaida humaanisha ujasiri, kusimama imara, au “uvumilivu” wenye subira ambao haupotezi tumaini licha ya vikwazo, minyanyaso, majaribu, au vishawishi.
Kwa Nini Unahitajiwa. Huenda Wakristo wakakutana na watu wasiopendezwa, wakashutumiwa, wakaharibiwa sifa, wakachukiwa sana hata na washiriki wa karibu wa familia zao, wakateswa, wakafungwa gerezani, na hata kuuawa. (Mt 5:10-12; 10:16-22; 24:9, 10, 39; Mk 13:9, 12, 13; Ufu 13:10) Wanahitaji uvumilivu. Bila sifa hiyo muhimu, mtu hawezi kupata uzima wa milele. (Ro 2:7; Ebr 10:36; Ufu 14:12) Uzima wa milele unategemea jinsi utakavyomaliza mbio za uhai, na si jinsi ulivyoanza mbio hizo vizuri. Kama Yesu alivyosema: “Yule atakayevumilia mpaka mwisho ndiye atakayeokolewa.” (Mt 24:13) “Mkivumilia, mtauokoa uhai wenu.”—Lu 21:19.
Watu wanaolikubali “Neno la Mungu” haraka, kijuujuu tu, wanakosa uvumilivu. Wakipatwa na dhiki au minyanyaso wanavunjika moyo na kupoteza kibali na baraka za Mungu. Lakini wale wanaolithamini sana “Neno la Mungu” wanavumilia hali zote. ‘Wanazaa matunda kwa uvumilivu,’ wakiendelea kutangaza ujumbe wa Mungu kwa uaminifu hata wanapokabili matatizo, mateso, na mambo yanayovunja moyo.—Lu 8:11, 13, 15.
Jinsi ya Kuudumisha. Kutafakari mifano mizuri ya watumishi wa Mungu, kama vile Ayubu, mtume Paulo na Yohana, manabii wa kabla ya Ukristo, na wengine wengi, na kuona matokeo ya uaminifu wao kunaweza kumchochea mtu aendelee kuvumilia anapokabili mateso. (2Ko 6:3-10; 12:12; 2Th 1:4; 2Ti 3:10-12; Yak 5:10, 11; Ufu 1:9) Tunapaswa hasa kutafakari mfano bora wa uvumilivu wa Yesu Kristo.—Ebr 12:2, 3; 1Pe 2:19-24.
Ni muhimu sana kukumbuka tumaini letu la Kikristo, kuishi milele tukiwa wakamilifu. Hata maadui zetu wakitutesa na kutuua hatuwezi kupoteza tumaini hilo. (Ro 5:4, 5; 1Th 1:3; Ufu 2:10) Mateso tunayokabili sasa yatasahaulika tumaini hilo litakapotimizwa. (Ro 8:18-25) Tunapowazia kuishi milele, mateso yoyote, hata yawe makali namna gani sasa, “ni ya muda mfupi na ni [mepesi].” (2Ko 4:16-18) Tukikumbuka kwamba mateso ni ya muda tu na tuendelee kushikilia tumaini letu la Kikristo hatutakata tamaa na kuacha kuwa waaminifu kwa Yehova Mungu.
Mkristo hawezi kuvumilia kwa kutegemea nguvu zake mwenyewe. Yule Aliye Juu Zaidi ndiye anayewategemeza na kuwaimarisha watumishi wake kupitia roho yake na faraja kutoka kwa Maandiko. Anawapa “uvumilivu” wale wanaomtegemea kikamili, basi kupitia sala Wakristo wanaomba msaada wake na hekima wanayohitaji ili kushughulikia jaribu fulani. (Ro 15:4, 5; Yak 1:5) Yehova hataruhusu kamwe mtu yeyote ajaribiwe kupita anavyoweza kuvumilia. Mtu akitafuta msaada wa Mungu, bila kukosa imani bali amtegemee kabisa Yehova, Mweza Yote atafanya njia ya kutokea ili aweze kuvumilia.—1Ko 10:13; 2Ko 4:9.
Mkristo anapoteseka, anaweza kupata nguvu zote anazohitaji. Mtume Paulo alisali kwa niaba ya Wakolosai kwamba ‘waimarishwe kwa nguvu zote kwa uwezo wake wenye utukufu ili wavumilie kikamili kwa subira na shangwe.’ ( Kol 1:11) Mfano mmoja wa ‘uwezo wenye utukufu’ ni ufufuo wa Yesu Kristo kutoka kwa wafu na kisha kupewa utukufu kwa kuketi kwenye mkono wa kuume wa Baba yake.—Efe 1:19-21.
Yehova Mungu na Mwana wake wanataka kila mtu afanikiwe. Hilo linaonekana wazi katika maneno ya Yesu Kristo ya kuwatia moyo Wakristo katika makutaniko ya Efeso, Smirna, Pergamamu, Thiatira, Sardisi, Filadelfia, na Laodikia wavumilie.—Ufu 2:1-3, 8-10, 12, 13, 18, 19; 3:4, 5, 7, 10, 11, 14, 19-21.
Maoni Yanayofaa Kuhusu Majaribu. Wakristo wanapopatwa na majaribu na dhiki, hawapaswi kuogopa, kukasirika au kulalamika, kujihurumia, au kuwa na uchungu, kwa sababu wanajua kwamba wakati wao ujao unategemea uvumilivu na wanaweza kuwa na hakika Yehova atawasaidia. Mtume Paulo alituhimiza hivi: “Tushangilie tukiwa katika dhiki, kwa kuwa tunajua kwamba dhiki hutokeza uvumilivu.” (Ro 5:3) Mkristo anapokabili majaribu kwa subira na kubaki imara kwa msaada wa Mungu anaonyesha kwamba ana sifa ya uvumilivu—sifa ambayo hangeielewa au kuionyesha ikiwa hangepatwa na jaribu hilo.
Uvumilivu unapaswa kuruhusiwa “ukamilishe kazi yake” kwa kuacha jaribu lifikie mwisho badala ya kujaribu kulikomesha kwa kutumia njia zisizo za kimaandiko. Ndipo imani itakapojaribiwa na kuboreshwa, na nguvu zake za kutuimarisha zitaonekana. Udhaifu wa Mkristo utafunuliwa, na kumwezesha kuona kasoro na kufanya marekebisho yanayohitajiwa. Kuvumilia kwa uaminifu kunaweza kumsaidia mtu ashughulike na wengine vizuri zaidi kwa subira, huruma, fadhili, na kwa upendo. Basi, kwa kuruhusu uvumilivu “ukamilishe kazi yake,” mtu ‘hatakosa kitu chochote’ ambacho Yehova Mungu anatafuta katika watumishi wake aliowakubali.—Yak 1:2-4.