Sura 22
Mungu wa “Mwana-Mfalme wa Amani” Awa “Vitu Vyote kwa Kila Mmoja”
1. Ni katika jambo gani Yesu Kristo anaweka mfano kwa viumbe wote wengine mbinguni na duniani?
MUDA mfupi baada ya kufufuliwa kwake, “Mwana-Mfalme wa Amani” alisema hivi kwa mmoja wa wanafunzi wake: “Ninapaa kwenda kwa Baba yangu naye ni Baba yenu, kwa Mungu wangu naye ni Mungu wenu.” (Yohana 20:17) Kwa maneno hayo yeye alikubali kwamba Baba yake wa kimbingu vilevile alikuwa Mungu wake, Yeye ambaye peke yake aliabudu. Katika ibada hiyo yeye aliweka mfano kwa viumbe wengine wote katika mbingu zote na dunia yote.
2, 3. (a) Andiko la Wakorintho 15:24-26, 28 linaelezaje tendo la pekee la Yesu la kujitiisha kwa Baba yake? (b) Tokeo zuri ajabu litakuwa nini?
2 Ni mfano mzuri kama nini “Mwana-Mfalme wa Amani” atakuwa kwa wanadamu wote waliokamilishwa wakati yeye kwa ushikamanifu ajitiishapo mwenyewe kwa njia ya pekee kwa yule ambaye ni Mwenye Enzi Kuu ya ulimwengu mzima aliye bora kabisa! Hilo litafunuliwa kwa njia isiyo na kifani mwishoni mwa Utawala wa Miaka Elfu wake juu ya wanadamu, wakati yeye atakapokuwa amekwisha rudisha amani, usalama, na upatani kwa dunia yote. Katika unabii usiokosea, tunahakikishiwa hilo hivi:
3 “Ndipo, mwisho, wakati anampa ufalme Mungu na Baba yake, akiisha fanya kuwa si kitu serikali zote na mamlaka zote na uwezo. Kwa kuwa ni lazima yeye atawale akiwa mfalme mpaka Mungu ameweka adui wote chini ya miguu yake. Akiwa ndiye adui wa mwisho, kifo kitafanywa kuwa si kitu. Lakini wakati vitu vyote vitakapokuwa vimekwisha tiishwa kwake, ndipo Mwana mwenyewe pia atajitiisha mwenyewe kwake Yeye aliyetiisha vitu vyote kwake, ili Mungu awe vitu vyote kwa kila mmoja.” (1 Wakorintho 15:24-26, 28, NW) Au, kama The Amplified Bible inavyotafsiri sehemu ya pili ya mstari wa 28: “Ili kwamba Mungu awe vyote katika wote—yaani, awe kila kitu kwa kila mmoja, mkuu zaidi, ile sehemu ya kukaa ndani na kuongoza maisha.”
4. (a) Wakaaji wa dunia wataitikiaje mfano wa Baba yao mlezi? (b) Ni hali gani mpya ya kujitiisha itakayokuwako wakati huo?
4 Wakati “Mwana-Mfalme wa Amani” anampa Ufalme Mungu wake mwishoni mwa Utawala wa Miaka Elfu, wakaaji wa dunia watajulishwa tendo hilo la Baba yao mlezi. Yeye akiwa ndiye Mfano wa Kifalme wao, wao vivyo hivyo watajitiisha wenyewe kwa namna mpya kwa Mungu Aliye Juu Zaidi Sana. Sasa kwa mara ya kwanza wao watamtolea Yehova utii kwa upendo moja kwa moja, ndiyo, ibada, katika unyofu na ukweli wote, bila kuhitaji tena utumishi wa kikuhani wa Yesu, hata wanaposali.
5. Ni nini utakaokuwa mwelekeo wa wale wafalme washirika 144,000 wa Yesu Kristo?
5 Katika njia hiyo, Mungu Aliye Juu Zaidi Sana anakuwa tena Mfalme wa ulimwengu wote mzima bila kuwa na wakili wa kifalme akimwakilisha yeye ama katika mbingu ama duniani. Vivyo hivyo wafalme washirika 144,000 ambao Yesu Kristo amekomboa kutoka kwenye dunia vilevile watapiga goti mbele ya Mtawala wa Kifalme aliye mkuu zaidi na katika maana hii iliyoongezwa watamtambua yeye kuwa ndiye Mwenye Enzi Kuu ya Ulimwengu Mzima.
Jaribu la Mwisho Juu ya Wanadamu Wote
6. (a) Ni nini litakalopata wanadamu wasiotii wakati wa Utawala wa mileani wa Yesu? (b) Hali itakuwaje ya wale ambao Yesu anampa Baba yake wa kimbingu?
6 Akitambua Yehova kuwa ndiye Hakimu Aliye Mkuu Zaidi, Yesu Kristo anatamani kwamba kibali cha kimungu kinachohitajiwa sana kionyeshwe juu ya kazi ambayo Yesu ametimiza wakati wa Utawala wa Mileani wake. Wakati wa utawala huo, wale wanadamu waliokataa kujipatanisha na matakwa ya uadilifu na walioonyesha kutokumtii Mfalme watakuwa wamekwisha kuangamizwa. Hivyo wale ambao Yesu Kristo anampa Yehova Mungu, aliye Hakimu wa mwisho, watakuwa wale watiifu ambao wamefikia ukamilifu wa kibinadamu.
7. (a) Ni nini kitakachotiwa kwenye jaribu lenye kuchunguza moyo baada ya Yesu kurudisha Ufalme? (b) Wanadamu waliokamilishwa watatiwaje kwenye jaribu hilo?
7 Kufika hapo ni wakati wa kutia kwenye jaribu hali yenye kudumu ya kujitoa kwa kibinadamu kwa Mwenye Enzi Kuu ya ulimwengu mzima, Yehova Mungu. Kama kwa habari ya Ayubu, ulizo ni: Je! wao wanampenda na kumwabudu Mungu kwa sababu tu ya vitu vyote vizuri ambavyo amewafanyia, au wao wanampenda kwa sababu ya vile alivyo yeye binafsi—ndiye mwenye Haki ya kuwa Mwenye Enzi Kuu ya ulimwengu mzima? (Ayubu 1:8-11) Lakini wanadamu waliokamilishwa watawekwaje chini ya jaribu la utii wa kutoka moyoni? Biblia inajibu hivi: Shetani Ibilisi na Mashetani wake watafunguliwa kwa “muda mchache” kutoka shimo refu ambamo walikuwa wamefungiwa kwa ile miaka elfu. (Ufunuo 20:3) Kwa kumruhusu Ibilisi awatie kwenye jaribu wanadamu waliorudishwa, ukamilifu kwa Mungu wa mtu mmoja mmoja wa washiriki wa wanadamu waliokamilishwa unaweza kuthibitishwa katika maana kamili.—Linganisha Ayubu 1:12.
8. (a) Wakifunguliwa kutoka shimo refu, Shetani na mashetani wake watajitahidi kufanya nini? (b) Wale wanaojiruhusu wenyewe wapotezwe na Ibilisi na mashetani wake watakuwa wakichukua mwendo gani wa tendo?
8 Miaka elfu saba iliyotangulia, Shetani Ibilisi aliweza kuwashawishi Adamu na Hawa wakamilifu wafanye dhambi kwa kuchukua mwendo wa tendo wa kujitafutia makuu. Maandiko hayasemi ni njia zipi za kushawishi ambazo Yehova ataruhusu Shetani na mashetani wake watumie baada ya kufunguliwa kwao kutoka shimo refu. Lakini bila shaka kutakuwako kutumia ubinafsi na kutaka kujitegemea bila Mungu. Akiwa bado yeye mwenyewe ni mwasi dhidi ya enzi kuu ya Yehova, Ibilisi atataka sana kuwafanya wanadamu pia wawe waasi. Maandiko hayaelezi pia ni kwa kadiri gani hasa majeshi hayo ya kishetani yatafanikiwa. Lakini kutakuwako wanadamu waasi wa kutosha kuonekana wakiwa umati mkubwa. Wakati huo dhambi upande wa kiumbe ye yote wa kibinadamu, ambaye sasa amekamilishwa, itakuwa ikifanywa kwa kutumia akili, hivyo, iwe ya kukusudia, ya kupenda. Itaonyesha kuondoka kutoka ibada ya yule Mungu mmoja tu wa kweli aishiye na kuchukua msimamo upande wa Shetani Ibilisi. (Ufunuo 20:7, 8) Hivyo, kwa habari ya waasi hao, Yehova hawi “vitu vyote kwa kila mmoja.”
9. (a) Wale wasioshika ukamilifu wao kwa Yehova Mungu watapatwa na nini? (b) Makao yasiyoonekana yataondolewaje waasi wayo? (c) Ni hali gani nzuri ajabu itakayoenea wakati huo katika mbingu zote na dunia yote?
9 Hata hivyo, wale washikamanifu wanakataa kushindwa na hoja na mikazo ya wale watukuzaji wa taifa waliopotezwa. Bila kusita, wale washikamanifu wanachagua kumwacha Yehova awe kwao “vitu vyote kwa kila mmoja.” Kwa ajili ya haki yenyewe, enzi kuu ya Yehova ni lazima ifikilizwe vikali. Kwa hiyo, waasi wote wenye kufuata maongozi ya kishetani duniani watafutiliwa mbali wasiwepo milele. Na wafutiliwe mbali kabisa! Yale Makao yasiyoonekana ya uumbaji ni lazima pia yaondolewe waasi wayo. Hivyo, ili kuusafisha kabisa ulimwengu mzima, Shetani Ibilisi na vikosi vyake vya mashetani wataangamizwa kabisa, wafutiliwe mbali wasiwepo kabisa. Hivyo mbingu na dunia zitasafishwa na kuondolewa kila waa la dhambi. (Ufunuo 20:9, 10) Utakatifu wa Yehova utaenea kila mahali. (Linganisha Zekaria 14:20.) Jina takatifu la Mungu Aliye Juu Zaidi Sana litatakaswa katika mbingu na duniani. Wote wanaoishi katika mbingu na dunia watafanya kwa furaha penzi lake kuu zaidi.
10. Ni katika njia zipi dunia itakuwa na hali ya pekee kwa umilele wote ambao hakuna sayari nyingine itafurahia?
10 Kwa umilele wote dunia yetu itakuwa na hali ya pekee ambayo hakuna sayari nyingineyo katika anga lisilo na mwisho itafurahia, ijapokuwa huenda dunia isiwe sayari pekee itakayopata kukaliwa. Bila kifani, itakuwa mahali ambapo Yehova bila shaka lo lote ameondolea malawama enzi yake kuu ya ulimwengu mzima, akiweka kiolezo cha kisheria cha milele kwa ulimwengu mzima. Itakuwa ndiyo sayari pekee ambayo juu yayo Yehova wa majeshi atakuwa ameipiga “vita ya siku ile kuu ya Mungu Mwenyezi.” Itakuwa ndiyo sayari pekee ambako Mungu alimtuma Mwanaye mpendwa zaidi awe mwanadamu na kufa ili kuwaondoa wakaaji wa sayari hiyo katika dhambi na kifo. Itakuwa ndiyo sayari pekee ambayo kutoka hiyo Yehova atakuwa amechukua wakaaji wayo 144,000 wawe “warithi kweli kweli wa Mungu, lakini warithi washirika pamoja na Kristo.”—Warumi 8:17, NW.
Maserafi, Makerubi, Malaika
11, 12. (a) Ni viumbe wa kiroho wa aina gani ambao Isaya aliona katika njozi? (b) Hao wanapendezwaje na sisi wanadamu?
11 Mungu, aliye Chanzo kitukufu cha uumbaji wote, wa kimbingu na wa kidunia, atakuwa “vitu vyote” si kwa wale 144,000 warithi washirika pamoja na Kristo tu bali pia kwa wengine katika makao ya kimbingu. Katika sura ya 6 ya kitabu cha Isaya, tunapewa kiono kidogo cha makao ya kimbingu. Humo tunasoma hivi: “Nalimwona [Yehova] ameketi katika kiti cha enzi, kilicho juu sana na kuinuliwa sana, na pindo za vazi lake zikalijaza hekalu. Juu yake walisimama maserafi; kila mmoja alikuwa na mabawa sita; kwa mawili alifunika uso wake, na kwa mawili alifunika miguu yake, na kwa mawili aliruka. Wakaitana, kila mmoja na mwenzake, wakisema, Mtakatifu, Mtakatifu, Mtakatifu, ni [Yehova] wa majeshi; dunia yote imejaa utukufu wake.”—Isaya 6:1-3.
12 Isaya alipendelewa sana sana kama nini kumwona Yeye aliye Mtakatifu zaidi katika ulimwengu mzima wote akiwa ameketi juu ya kiti chake cha kifalme cha kimbingu akitumikiwa na maserafi watukufu! Hilo lilikuwa ono lenye kuogopesha kama nini, likionyesha cheo chenye kupendelewa sana walichokuwa nacho hao maserafi, kwa kuwa yeye ndiye Yule Mtakatifu Kabisa Kabisa ambaye utakatifu wake walitangaza walipokuwa wakishuhudia utakatifu wake kwa kuutilia mkazo mara tatu! Maserafi hao wanapendezwa kuwasaidia waabudu wa Yehova wawe watakatifu kama Mungu alivyo mtakatifu.—Isaya 6:5-7.
13. (a) Ni aina gani nyingine ya viumbe wa kiroho ambayo Biblia inatufunulia sisi? (b) Yehova anaelezwaje kuhusiana nao?
13 Kama vile kulivyo na viumbe vyenye uhai wa aina mbalimbali hapa duniani, vikionyesha uweza wa Yehova Mungu, vivyo hivyo pia, kuna viumbe vya aina nyingine katika makao ya kiroho. Biblia inafunua kwamba hao ndio wale makerubi wenye utukufu, ambao ni lazima wawe na mwendo wa kasi sana katika kuruka. (Zaburi 18:10; Linganisha Waebrania 9:4, 5.) Mwanzo 3:24 huonyesha kwamba baada ya Adamu na Hawa kuwa wamefanya dhambi juu ya Mungu mtakatifu wa mbingu kwa kula lile tunda lililokatazwa, Muumba aliweka katika upande wa mashariki wa njia ya kurudi kwenye Paradiso ya raha wale makerubi wakiwa na “upanga wa moto [uliokuwa ukijigeuza wenyewe daima] huko na huko.” Yehova anasemekana kuwa “ameketi juu ya makerubi.” (Zaburi 99:1; Isaya 37:16) Hivyo yeye anaonyeshwa kuwa amekalia kiti cha kifalme juu ya hao makerubi.
14. (a) Ni aina gani nyingine ya viumbe wa kiroho ambao si wa kukosa kuangaliwa? (b) Ni wengi kadiri gani?
14 Wasio wa kukosa kuangaliwa kati ya halaiki ya viumbe wa kiroho ni malaika. Kuna mamilioni mengi yao. (Danieli 7:9, 10) Kati yao kuna malaika ambao wamepewa mgawo wa kuhudumia waabudu wa Yehova waliopo duniani. Yesu alionya kwamba hapana ye yote anayepaswa kukwaza ye yote wa waabudu wa Yehova kwa sababu ya kwamba “malaika zao mbinguni sikuzote hutazama uso wa Baba yangu aliye mbinguni.” (Mathayo 18:10; Waebrania 1:14) Mwishoni mwa siku 40 za Yesu kufunga kula jangwani na baada ya yeye kufaulu kushinda vile vishawishi vitatu vyenye maana kubwa alivyoletewa na Ibilisi, lilikuwa pendeleo kama nini kwa wale malaika kuja kuhudumia mahitaji ya kimwili ya Yesu aliyekuwa amekonda na kuona njaa!—Mathayo 4:11
15, 16. (a) Eleza umoja kama wa jamaa utakaokuwako katika mbingu na dunia. (b) Ni thawabu gani kutoka Yehova watakayopewa wale wanadamu waliokamilishwa wanaopita kwa kufaulu lile jaribu? (c) Yehova atakuonaje kutimizwa kwa lile kusudi lake la awali?
15 Huko juu katika makao ya kimbingu, wakaaji wenye utukufu wa kiroho watakuwa ndugu kwa mmoja na mwenzake, hali chini hapa duniani ile jamaa ya kibinadamu iliyokamilishwa itafanywa kuwa ndugu na dada kwa mmoja na mwenzake. Wao watakuwa katika mfano na sura ya Mungu kwa kadiri ile nzuri sana ambayo Adamu na Hawa, wakiwa wabichi kutoka kwenye mikono ya kuumba ya Yehova Mungu, walikuwa katika ‘mfano na sura’ ya Muumba wao. (Mwanzo 1:26, 27) Baada ya kulipita jaribu la mwisho, wanadamu hao waliokamilishwa watapewa haki ya kuishi milele na kwa upendo watakubaliwa kuwa “watoto wa Mungu” wa kulelewa, wakifurahia uhuru wenye utukufu, na kuwa sehemu ya jamaa ya Yehova yenye umoja katika mbingu na dunia.—Warumi 8:21.
16 Ni kwa furaha na kushangilia kulikoje kwa nafsi yake yote Yehova Mungu atatazama kutimizwa kwa kusudi lake la awali—tendo la uhodari lisilo na kifani la kupata kuwa na vitu vyote kulingana na azimio lake la kwanza kabisa—viumbe vyote vikiwa na umoja wenye upendo usiovunjika pamoja na yeye!
17. Kwa sababu ya hayo yote, ni nani ataweza kujizuia asifanye nini, kupatana na maneno ya mtunga zaburi?
17 Kwa sababu ya hayo yote, ni nani ambaye ataweza kujizuia asimbariki huyu Mkusudiaji wa kimungu mwenye kustaajabisha? Akiinua juu kwa kufaa maneno yake ya kuwaambia viumbe wenye uwezo upitao wa kibinadamu, mtunga zaburi anasema hivi: “Barikini Yehova, O ninyi malaika zake, wenye nguvu nyingi katika uweza, mtimizao neno lake, kwa kusikiliza sauti ya neno lake. Barikini Yehova, enyi majeshi yake yote, ninyi wahudumu wake, mnaofanya penzi lake.”—Zaburi 103:20, 21, NW.
18. Mtunga zaburi anamaliziaje kitabu chake cha Zaburi?
18 Mtunga zaburi huyo aliyeongozwa na Mungu, mwenye kufurahika sana anamalizia kitabu cha Zaburi kwa maneno haya yenye kusihi: “Sifuni Yah, enyi watu! Sifuni Mungu katika mahali patakatifu pake. Sifuni yeye katika anga ya nguvu zake. Sifuni yeye kwa ajili ya kazi zake za uweza. Sifuni yeye kulingana na wingi wa ukuu wake. Sifuni yeye kwa mpulizo wa pembe. Sifuni yeye kwa chombo chenye nyuzi na kinubi. Sifuni yeye kwa matari na dansi ya mzunguko. Sifuni yeye kwa nyuzi na paipu. Sifuni yeye kwa patu zenye mvumo mtamu. Sifuni yeye kwa patu zenye mshindo. Kila kitu chenye kupumua—acheni kisifu Yah. Sifuni Yah, enyi watu!”—Zaburi 150:1-6, NW.
19. (a) Wakati huo, ulimwengu mzima utaunganishwa katika kifungo gani? (b) Viumbe wote wenye akili watasema nini hasa?
19 Mwishowe ulimwengu mzima wote utakuwa na umoja katika kifungo kikamilifu kitakachoshika kwa umilele, kifungo cha ibada moja ya Baba wa kimbingu kwa sababu watoto wake wanampenda na kumwabudu yeye zaidi ya kinginecho chote. Ndiyo, wakati huo ndipo itakuwa kwamba viumbe wote wenye akili watasema, kama walivyosema wale maserafi: “Mtakatifu, Mtakatifu, Mtakatifu, ni [Yehova] wa majeshi; dunia yote imejaa utukufu wake.” Hapo ndipo, Mungu wa “Mwana-Mfalme wa Amani” atakapokuwa amekuwa kweli kweli “vitu vyote kwa kila mmoja”—milele na milele.
[Picha katika ukurasa wa 188, 189]
Ulimwengu mzima utakuwa na umoja katika ibada yenye amani ya Mwenye Enzi Kuu ya Ulimwengu Mzima