Furahia Manufaa za Ufundishaji wa Kimungu

“Mimi ni BWANA [Yehova, NW], Mungu wako, nikufundishaye ili upate faida, nikuongozaye kwa njia ikupasayo kuifuata.”—ISAYA 48:17.

1. Tutanufaikaje tukitumia ufundishaji wa kimungu maishani mwetu?

YEHOVA MUNGU ajua zaidi. Hakuna ampitaye katika fikira, neno, wala tendo. Akiwa Muumba wetu, yeye anatambua mahitaji yetu naye huyaandaa kwa wingi. Kwa hakika yeye ajua jinsi ya kutuagiza. Na tukitumia ufundishaji wa kimungu, tunajinufaisha na kuwa na furaha ya kweli.

2, 3. (a) Watu wa kale wa Mungu wangalijinufaishaje ikiwa wangalitii amri zake? (b) Ni nini kitakachotukia tukitumia ufundishaji wa kimungu maishani mwetu leo?

² Ufundishaji wa kimungu hufunua tamaa ya Mungu yenye bidii kwamba watumishi wake waepuke msiba na wafurahie maisha kwa kutii sheria na kanuni zake. Ikiwa watu wa Yehova wa kale wangalimsikiliza yeye, wao wangalifurahia baraka nyingi, kwani aliwaambia hivi: “Mimi ni BWANA [Yehova, NW], Mungu wako, nikufundishaye ili upate faida, nikuongozaye kwa njia ikupasayo kuifuata. Laiti ungalisikiliza amri zangu! ndipo amani yako ingalikuwa kama mto wa maji, na haki yako kama mawimbi ya bahari.”—Isaya 48:17, 18.

³ Watu wa Mungu wa kale wangalijinufaisha ikiwa wangalielekeza fikira kwenye amri na maagizo yake. Badala ya kupatwa na msiba mikononi mwa Wababuloni, wao wangalikuwa na amani na ufanisi ulio kamili, wenye kina na wa daima kama vile mto. Zaidi ya hayo, matendo yao yenye uadilifu yangalikuwa mengi mno kama vile mawimbi ya bahari. Vivyo hivyo, tukitumia ufundishaji wa kimungu maishani mwetu, twaweza kuwa na manufaa nyingi. Baadhi yazo ni nini?

Huo Hubadili Maisha

4. Ufundishaji wa kimungu umekuwa ukiathirije maisha za watu wengi?

⁴ Ufundishaji wa kimungu umekuwa ukinufaisha watu wengi kwa kubadili maisha zao ziwe bora zaidi. Wale ambao hutumia maagizo ya Yehova huacha “kazi za mwili,” kama vile mwenendo mlegevu, ibada ya sanamu, zoea la uasiliani-roho, ugomvi, na wivu. Badala ya hivyo, wao huonyesha tunda la roho la upendo, shangwe, amani, ustahimilivu, fadhili, wema, imani, upole, na kujidhibiti. (Wagalatia 5:19-23) Wao pia hutii shauri la Waefeso 4:17-24, NW, ambapo Paulo awasihi waamini wenzake wasitembee kama mataifa watembeavyo, katika kutofaidika kwa akili zao, wakiwa katika giza kiakili, na kutengwa mbali kutoka kwenye uhai ulio wa Mungu. Wakiwa hawaongozwi na mioyo ambayo imekuwa sugu, watu walio mifano ya Kristo ‘huondolea mbali utu wa kale unaofanana na njia ya mwenendo wao wa zamani na wamefanywa upya katika kani itendeshayo akili zao.’ Wao ‘huvaa utu mpya ulioumbwa kulingana na mapenzi ya Mungu katika uadilifu na uaminifu-mshikamanifu wa kweli.’

5. Ufundishaji wa kimungu huathirije njia ambayo watu hutembea?

⁵ Manufaa nzuri ya kutumia ufundishaji wa kimungu ni kwamba huo huonyesha watu jinsi ya kutembea na Mungu. Tukitembea na Yehova, kama vile Noa alivyofanya, tunafuata mwendo wa maisha ulioonyeshwa na Mfunzi wetu Mtukufu. (Mwanzo 6:9; Isaya 30:20, 21) Watu wa mataifa ‘hutembea katika kutofaidika kwa akili zao,’ kama vile mtume Paulo alivyosema. Na baadhi ya maandishi ya akili hizo yaweza kuwa yasiyo na faida kama nini! Mchunguzi mmoja aliyeona maandishi ya wengine juu ya ukuta katika Pompeii, aliandika hivi yeye mwenyewe: “Oh ukuta, inashangaza kwamba wewe bado hujaporomoka kwa sababu ya uzito wa upuuzi mwingi ulioandikwa.” Lakini hakuna upuuzi katika yale ‘mafundisho ya Yehova’ na katika kazi ya kuhubiri Ufalme ambayo huo huwezesha. (Matendo 13:12) Kupitia kazi hiyo, watu wapendao kweli wanasaidiwa watende ifaavyo. Wao wanafundishwa jinsi ya kuacha kutembea katika njia yao yenye dhambi, ya kupuuza makusudi ya Mungu. Wao hawawi tena katika giza kiakili, wala hawasukumwi na mioyo ambayo imekuwa sugu wakitafuta miradi isiyo na faida.

6. Kuna uhusiano gani kati ya utii wetu kwa mafundisho ya Yehova na furaha yetu?

⁶ Ufundishaji wa kimungu hutunufaisha pia katika maana ya kwamba huo hutujulisha juu ya Yehova na shughuli zake. Ujuzi huo hutuleta karibu zaidi na Mungu, huongeza upendo wetu kwake, na kuzidisha tamaa yetu ya kumtii yeye. Kitabu cha 1 Yohana 5:3 husema hivi: “Huku ndiko kumpenda Mungu, kwamba tuzishike amri zake; wala amri zake si nzito.” Pia tunatii amri za Yesu kwa sababu tunajua kwamba mafundisho yake yametoka kwa Mungu. (Yohana 7:16-18) Utii huo hutulinda dhidi ya madhara ya kiroho nao huendeleza furaha yetu.

Kusudi Halisi Maishani

7, 8. (a) Twapaswa kuelewaje Zaburi 90:12? (b) Twaweza kujipatiaje moyo wa hekima?

⁷ Mafundisho ya Yehova yananufaisha katika kutuonyesha jinsi ya kutumia maisha zetu katika njia yenye kusudi. Kwa kweli, ufundishaji wa kimungu hutuonyesha jinsi ya kuhesabu siku zetu kwa njia ya pekee. Tazamio la kuishi la miaka 70 latoa ahadi ya siku 25,550 hivi. Mtu mwenye umri wa miaka 50 tayari ametumia siku 18,250 kati yazo, na siku zake 7,300 zinazobaki anazotumaini huonekana kuwa chache kwelikweli. Wakati huo hasa ndipo awezapo kuthamini kwa ukamili zaidi kwa nini nabii Musa alisali kwa Mungu kwenye Zaburi 90:12 hivi: “Utujulishe kuzihesabu siku zetu, tujipatie moyo wa hekima.”

⁸ Musa hakumaanisha kwamba Mungu angefunua hesabu hususa ya siku ambazo zingekuwako katika muda wa maisha ya kila Mwisraeli. Kulingana na Zaburi 90, mistari ya 9 na 10, nabii huyo Mwebrania alitambua kwamba urefu wa maisha ya mtu waweza kuwa miaka 70 au 80 hivi—mfupi kwelikweli. Kwa hiyo maneno ya Zaburi 90:12 yaonekana yalionyesha tamaa ya Musa kwa sala kwamba Yehova amwonyeshe, au amfundishe yeye na watu Wake wajizoeze hekima katika kuthamini ‘siku za miaka yao’ na kuzitumia katika njia inayokubaliwa na Mungu. Basi, namna gani sisi? Je! sisi huthamini kila siku yenye thamani? Je! tunajipatia moyo wa hekima kwa kujaribu kutumia kila siku kwa njia ifaayo kwa utukufu wa Mfunzi wetu Mtukufu, Yehova Mungu? Ufundishaji wa kimungu hutusaidia tufanye hivyo hasa.

9. Twaweza kutazamia nini tukijifunza kuzihesabu siku zetu kwa utukufu wa Yehova?

⁹ Tukijifunza kuhesabu siku zetu kwa utukufu wa Yehova, huenda tukaweza kuendelea kuhesabu, kwani ufundishaji wa kimungu hutoa ujuzi kwa ajili ya uhai wa milele. “Na uzima wa milele ndio huu,” Yesu akasema, “wakujue wewe, Mungu wa pekee wa kweli, na Yesu Kristo uliyemtuma.” (Yohana 17:3) Bila shaka, ikiwa tungejipatia ujuzi wote wa kilimwengu unaopatikana, huo usingetuletea uhai wa milele. Lakini tunaweza kupata uhai wa milele ikiwa tunajipatia na kutumia ujuzi sahihi juu ya watu wawili walio wa maana zaidi katika ulimwengu wote mzima na kujizoeza imani kwelikweli.

10. Ensaiklopedia moja inasema nini juu ya elimu, hilo lalinganaje na manufaa za ufundishaji wa kimungu?

¹⁰ Haidhuru ni muda mrefu kadiri gani ambao tumeishi, acheni tukumbuke manufaa hii yenye kutokeza ya ufundishaji wa kimungu: Huo huwapa wale wanaoutumia kusudi halisi maishani. The World Book Encyclopedia lasema hivi: “Elimu yapaswa isaidie watu wawe washiriki wa jamii walio wa maana. Inapaswa pia iwasaidie wasitawishe uthamini wa utamaduni wao waliorithi na kuishi maisha zenye kuridhisha zaidi.” Ufundishaji wa kimungu hunufaisha katika kutusaidia tuishi maisha zenye uradhi. Huo husitawisha ndani yetu uthamini mwingi kuelekea urithi wetu wa kiroho tukiwa watu wa Mungu. Na kwa kweli huo hutufanya tuwe washiriki wa jamii walio wa maana, kwani huo hutuwezesha tuwe na fungu muhimu katika kutimiza mahitaji ya watu duniani pote. Kwa nini yaweza kusemwa hivyo?

Programu ya Kufundisha ya Ulimwenguni Pote

11. Thomas Jefferson alikaziaje uhitaji wa elimu ifaayo?

¹¹ Tofauti na programu nyingine yoyote ya kuagiza, ufundishaji wa kimungu hutimiza mahitaji ya watu ya elimu. Uhitaji wa kufundisha watu ulionwa na Thomas Jefferson, aliyekuja kuwa rais wa tatu wa United States. Katika barua ya Agosti 13, 1786, kwa George Wythe, aliyekuwa rafiki na mtia sahihi mwenzake katika Julisho Rasmi la Uhuru, Jefferson aliandika hivi: “Nafikiri sheria ya maana zaidi kupita zote katika katiba yetu yote ni ile ya kueneza ujuzi miongoni mwa watu. Hakuna msingi mwingine hakika unaoweza kuwekwa, kwa ajili ya kuhifadhiwa kwa uhuru na furaha. . . . Bwanangu mpendwa, unga mkono krusedi dhidi ya ujinga; anzisha na kusitawisha sheria ya kuelimisha watu wa kawaida. Acha wananchi wetu wajue . . . kwamba kodi itakayotozwa kwa kusudi [la elimu] haipiti sehemu moja kwa elfu ambayo itapewa wafalme, makasisi, na watu mashuhuri watakaotokea kati yetu ikiwa tutawaacha watu katika ujinga.”

12. Kwa nini yaweza kusemwa kwamba ufundishaji wa kimungu ni programu yenye mafanikio na yenye manufaa zaidi ya tufeni pote?

¹² Badala ya kuacha watu wenye mwelekeo wa uadilifu katika ujinga, mafundisho ya Yehova huandaa programu bora zaidi ya elimu ya tufeni pote kwa manufaa yao. Vita ya Ulimwengu 2 ilipokuwa ikiendelea miaka 50 iliyopita, Halmashauri ya Kurekebisha Elimu Katika United States iliona uhitaji wa haraka kwa ajili ya “elimu ya tufeni pote.” Uhitaji huo ungali upo, lakini ufundishaji wa kimungu ndio programu pekee yenye mafanikio kwa ajili ya elimu ya tufeni pote. Hiyo pia ni yenye kunufaisha zaidi kwa sababu hutoa watu katika hali ya kukata tamaa, huwainua kiadili na kiroho, huwaokoa na kiburi na chuki ya ulimwengu, nayo hutoa ujuzi kwa ajili ya uhai wa milele. Zaidi ya yote, programu hiyo inanufaisha watu kila mahali kwa kuwafundisha kumtumikia Yehova Mungu.

13. Isaya 2:2-4 linatimizwaje leo?

¹³ Manufaa za ufundishaji wa kimungu zinafurahiwa na wengi sasa wanaokuwa watumishi wa Mungu. Wao wanaona uhitaji wao wa kiroho, na wanajua kikamili kwamba siku ya Yehova iko karibu. (Mathayo 5:3; 1 Wathesalonike 5:1-6) Hivi sasa, “katika siku za mwisho,” watu hao wa mataifa yote wanamiminika kwenye mlima wa Yehova, ibada yake safi. Imewekwa imara na imekwezwa juu ya ibada yote iliyo kinyume cha mapenzi ya Mungu. (Isaya 2:2-4) Ikiwa wewe ni Shahidi wa Yehova aliyejiweka wakfu, je! wewe hufurahi kuwa miongoni mwa umati unaozidi kuongezeka unaomwabudu na kunufaika na ufundishaji wa kimungu? Ni jambo zuri kama nini kuwa miongoni mwa wale wanaopaaza sauti hivi: “Sifuni Yah, enyi watu!”—Zaburi 150:6, NW.

Matokeo Yenye Kunufaisha Juu ya Roho Yetu

14. Ni nini manufaa ya kufuata shauri la Paulo kwenye 1 Wakorintho 14:20?

¹⁴ Miongoni mwa zile manufaa nyingi za ufundishaji wa kimungu ni yale matokeo mazuri huo waweza kuwa nayo juu ya fikira na roho yetu. Huo hutuchochea tufikiri juu ya mambo maadilifu, yaliyo safi, yenye wema-adili, na yanayostahili sifa. (Wafilipi 4:8) Mafundisho ya Yehova hutufundisha tufuate shauri hili la Paulo: “Katika uovu mgeuzwe watoto wachanga, bali katika akili zenu mkawe watu wazima.” (1 Wakorintho 14:20) Tukitumia onyo hilo lenye upole hatutajaribu kupata ujuzi katika uovu. Paulo aliandika hivi pia: “Uchungu wote na ghadhabu na hasira na kelele na matukano yaondoke kwenu, pamoja na kila namna ya ubaya.” (Waefeso 4:31) Kutii shauri hilo kutatusaidia tuepuke ukosefu wa adili na dhambi nyinginezo nzito. Ingawa hilo laweza kunufaisha kimwili na kiakili, litatuletea hasa shangwe ya kujua kwamba twampendeza Mungu.

15. Ni nini kiwezacho kutusaidia tubaki tukiwa wenye wema-adili katika fikira?

¹⁵ Ikiwa tutabaki tukiwa wenye wema-adili katika fikira, msaada mmoja ni kuepuka ‘mashirika mabaya yanayoharibu mazoea mazuri.’ (1 Wakorintho 15:33, NW) Tukiwa Wakristo, tusingeshirikiana na waasherati, wazinzi, na watenda mabaya wengine. Basi, kwa kufuatana kiakili, hatupaswi kushirikiana na watu wa jinsi hiyo kwa kusoma juu yao ili kupata raha ya kuamsha nyege au kuwatazama kwenye televisheni au katika sinema. Moyo ni mdanganyifu, waweza kupata kwa urahisi tamaa ya mabaya, na waweza kushawishwa kuyafanya. (Yeremia 17:9) Kwa hiyo acheni tuepuke vishawishi kwa kushikamana na ufundishaji wa kimungu. Huo waweza kuathiri fikira za ‘wampendao Yehova’ kwa kadiri yenye kunufaisha sana hivi kwamba wao ‘wauchukia uovu.’—Zaburi 97:10.

16. Mafundisho ya Mungu yanaweza kuathirije roho tunayoonyesha?

¹⁶ Paulo alimwambia mfanyakazi mwenzake Timotheo hivi: “Bwana na awe pamoja na roho yako [uonyeshayo, NW]. Neema na iwe pamoja nanyi.” (2 Timotheo 4:22) Mtume alitamani kwamba Mungu, kupitia Bwana Yesu Kristo, angekubali ile kani itendeshayo iliyomchochea Timotheo na Wakristo wengine. Mafundisho ya Mungu hutusaidia tuonyeshe roho yenye upendo, fadhili, upole. (Wakolosai 3:9-14) Na jinsi ilivyo tofauti na ile ya wengi katika siku hizi za mwisho! Wao ni wenye kujigamba, wasio na shukrani, wasio na shauku ya asili, wasiotaka kufanya mwafaka wowote, wenye vichwa vigumu, wenye kupenda anasa, na bila ujitoaji kimungu wa kweli. (2 Timotheo 3:1-5) Hata hivyo, tuendeleapo kutumia manufaa za ufundishaji wa kimungu maishani mwetu, sisi twaonyesha roho inayotupendekeza kwa Mungu na wanadamu wenzetu.

Yenye Kunufaisha Katika Mahusiano ya Kibinadamu

17. Kwa nini ushirikianao wenye unyenyekevu ni wa maana sana?

¹⁷ Mafundisho ya Yehova hutusaidia tuone manufaa za ushirikiano wenye unyenyekevu pamoja na waabudu wenzetu. (Zaburi 138:6) Tofauti na watu wengi leo, sisi hatukiuki kanuni zenye uadilifu lakini tuko tayari kukubaliana na watu. Kwa kielelezo, kuna matokeo mazuri mengi kwa sababu waangalizi waliowekwa rasmi wako tayari kukubaliana wakiwa katika mikutano ya wazee. Wanaume hao waweza kusema kwa upole kwa ajili ya masilahi ya kweli, huku wakikataa kuruhusu hisiamoyo ifunike kufikiri kuzuri au isababishe kutopatana. Washiriki wote wa kutaniko watanufaika na roho ya muungano tuliyo nayo ikiwa sisi sote twaendelea kutumia ufundishaji wa kimungu.—Zaburi 133:1-3.

18. Ufundishaji wa kimungu hutusaidia kuwa na maoni gani juu ya waamini wenzetu?

¹⁸ Ufundishaji wa kimungu ni wenye kunufaisha pia katika kutusaidia kuwa na maoni yafaayo juu ya waamini wenzetu. Yesu alisema hivi: “Hakuna mtu awezaye kuja kwangu, asipovutwa na Baba aliyenipeleka.” (Yohana 6:44) Tangu 1919 hasa, Yehova amewaamuru watumishi wake wapige mbiu ya hukumu zake, na mfumo wa ulimwengu wa Shetani umetikiswa na kutetemeshwa na onyo hilo la tufeni pote. Wakati uo huo, wanadamu wenye kumhofu Mungu—“vitu vinavyotamaniwa”—wamevutwa na Mungu wajitenge na mataifa na kushirikiana na Wakristo wapakwa katika kuijaza utukufu nyumba ya Yehova ya ibada. (Hagai 2:7) Kwa hakika, ni lazima tuone watu hao wenye kutamanika ambao wamevutwa na Mungu kuwa washiriki wapendwa.

19. Mafundisho ya Mungu hufunua nini kuhusu kusuluhisha matatizo ya kibinafsi pamoja na Wakristo wenzetu?

¹⁹ Bila shaka, kwa sababu sisi sote ni wasiokamilika, mambo hayatakuwa shwari sikuzote. Paulo alipokuwa karibu kuondoka kwenye safari yake ya pili ya mishonari, Barnaba aliazimia kumchukua Marko pamoja nao. Paulo hakukubali kwa sababu Marko ‘alikuwa amewaacha huko Pamfilia, asiende nao kazini.’ Ndipo, “palitokea mashindano baina yao.” Barnaba akamchukua Marko pamoja naye kwenda Kipro, hali Paulo akamchagua Sila aandamane naye kupitia Siria na Kilikia. (Matendo 15:36-41) Baadaye, yaonekana mtengano huo ulisuluhishwa, kwani Marko alikuwa pamoja na Paulo katika Roma, na mtume huyo alisema vema juu yake. (Wakolosai 4:10) Manufaa moja ya ufundishaji wa kimungu ni kwamba huo hutuonyesha jinsi ya kusuluhisha matatizo ya kibinafsi kati ya Wakristo kwa kufuata shauri kama lile la Yesu kwenye Mathayo 5:23, 24 na Mathayo 18:15-17.

Wenye Kunufaisha na Wenye Ushindi Daima

20, 21. Mazungumzo yetu juu ya ufundishaji wa kimungu yapasa yatusukume tufanye nini?

²⁰ Hata kutokana na mazungumzo yetu mafupi juu ya baadhi ya manufaa na ushindi wa ufundishaji wa kimungu, bila shaka sisi sote twaweza kuona uhitaji wa kudumu katika kuutumia maishani mwetu. Basi, tukiwa na roho ya sala, acheni tuendelee kujifunza kutoka kwa Mfunzi wetu Mtukufu. Hivi karibuni, ufundishaji wa kimungu utashinda kuliko wakati mwingine wowote. Utashinda wakati wale wenye elimu wa ulimwengu huu watakapokuwa wameharibiwa milele. (Linganisha 1 Wakorintho 1:19.) Zaidi ya hayo, kadiri ambavyo mamilioni zaidi wanapojifunza na kufanya mapenzi ya Mungu, ujuzi wa Yehova utajaa duniani kama vile maji yazifunikavyo bahari. (Isaya 11:9) Hilo litanufaisha ainabinadamu tiifu kwa utukufu kama nini na kumtetea Yehova kuwa Mwenye Enzi Kuu ya Ulimwengu Wote Mzima!

²¹ Mafundisho ya Yehova yatakuwa yenye kunufaisha na yenye ushindi sikuzote. Je! wewe utaendelea kunufaika nao ukiwa mwanafunzi mwenye bidii wa Kitabu kikuu cha Mafundisho cha Mungu? Je! wewe unaishi kulingana na Biblia na kushiriki kweli zayo na wengine? Ikiwa ndivyo, waweza kutazamia kuona ushindi kamili wa ufundishaji wa kimungu, kwa utukufu wa Mfunzi wetu Mtukufu, Bwana Mwenye Enzi Kuu Yehova.

Umejifunza Nini?

◻ Ufundishaji wa kimungu waweza kuathirije maisha zetu?

◻ Mafundisho ya Yehova yanatimizaje mahitaji ya elimu?

◻ Ufundishaji wa kimungu waweza kuwa na tokeo jipi lenye kunufaisha juu ya fikira na mtazamo wetu?

◻ Mafundisho ya Mungu yanathibitikaje kuwa yenye kunufaisha kwa habari ya mahusiano ya kibinadamu?

[Picha katika ukurasa wa 15]

Ufundishaji wa kimungu hutuonyesha jinsi ya kutembea pamoja na Mungu, kama vile Noa alivyofanya

[Picha katika ukurasa wa 17]

Watu wa mataifa yote wanamiminika kwenye mlima wa Yehova