Faraja kwa Washika Ukamilifu

“Kwa sababu ya ukamilifu wangu wewe umenitegemeza.”​—ZABURI 41:12, Biblia ya New World Translation.

 1. Kwa sababu gani watu wa Yehova wanahitaji taraja?

MASHAHIDI washika ukamilifu wa Yehova wanahitaji faraja kwa sababu wao ni vyombo vya kuteswa. Bila shaka, wanapaswa kutazamia majaribu hayo, kwa maana Yesu Kristo aliwaambia wafuasi wake hivi “Mtumwa si mkubwa kuliko bwana mkubwa wake. Ikiwa wamenitesa mimi, watawatesa ninyi pia.” (Yohana 15:20, NW) Sasa hasa ndipo watu wa Yehova wanapohitaji faraja. Kwa sababu gani? Kwa sababu yule mvunja ukamilifu wa kwanza, Shetani Ibilisi, ametupwa chini kwenye ujirani wa dunia, na wakati wake ni mfupi. Kwa hiyo, yeye anachukua msimamo wake wa mwisho akiwa mpiganaji dhidi ya Mungu na watumishi Wake.​—Ufunuo 12:7-9, 17.

 2. Wakristo wanajisikiaje juu ya taabu zinazopata waamini wenzao?

² Sisi watumishi wa Mungu tunasali kwa bidii nyingi kwa ajili ya ndugu na dada zetu wanaolazimika kufanya kazi chini ya marufuku au wanaotishwa na kutendwa vibaya na watesi. (Matendo 12:1; 2 Wathesalonike 1:4) Tunawasifu Wakristo wanaovumilia kwa uaminifu masuto wanayotendwa na waasi-imani na wengine. (Mathayo 5:11) Tunawahangaikia kwa upendo waamini wenzetu wanaopingwa na watu wa ukoo wao au wanaoishi katika jamaa zilizogawanyika kidini. (Mathayo 10:34-36) Tunawasikitikia kwa moyo washika ukamilifu wanaotaabishwa na kasoro za mwili na magonjwa ya muda mrefu. Lakini mbona kuwe na taabu zote hizo? Na kuna faraja gani kwa wanaume na wanawake wanaoshika ukamilifu?

Kumbuka Sababu na Kimbilio

 3. Shetani anatumia mateso katika jitihada ya kufanya nini?

³ Iwe ni kwa kutumia njia za kibinadamu au za kishetani, Ibilisi anatafuta ‘kuwameza’ Wakristo. (1 Petro 5:8) Ndiyo Shetani anatumia mateso na magumu mengine akijaribu kuharibu uhusiano wetu na Yehova Mungu. kutufanya tuwe washika ukamilifu wasio washikamanifu. Lakini je, katika yote hayo hatuna ulinzi? Hapana!

 4. Wanapokabili mateso na misiba mingine, washika ukamilifu wanaweza kuwa na uhakika wa jambo gani?

⁴ Yehova atakuwa Kimbilio letu tukiutafuta msaada wake katika sala. Tunaposongwa na mateso na misiba mingine, tunaweza kumsihi kama alivyofanya Daudi mtunga zaburi: “Unirehemu, Ee Mungu, unirehemu mimi, maana nafsi yangu imekukimbilia Wewe. Nitaukimbilia uvuli wa mbawa zako, hata misiba hii itakapopita.” (Zaburi 57:1) Kama washika ukamilifu. tunaweza kuwa na uhakika kwamba, baada ya muda fulani, faraja itatoka kwa Yehova, Kimbilio letu. Nasi tunaweza kuwa na tumaini hakika kama Daudi wakati alipomwambia Mungu hivi katika sala: “Kwa sababu ya ukamilifu wangu wewe umenitegemeza, nawe utaniweka mbele za uso wako kwa wakati usiojulikana.”​—Zaburi 41:12, NW.

 5. Wakristo wenye kuteswa wanahitaji sifa gani, nasi tuna tumaini gani?

⁵ Lakini, kwa kuwa huenda majaribu yakabaki kwa muda fulani tunahitaji kusitawisha uvumilivu. Mtume Paulo aliwahimiza Wakristo Waebrania waendelee ‘kuzikumbuka siku za kwanza ambazo walistahimili mashindano makubwa ya maumivu.’ Kisha akaandika hivi: “Mnahitaji saburi, ili kwamba mkiisha kuyafanya mapenzi ya Mungu mpate ile ahadi.” (Waebrania 10:32-36) Kwa habari ya Wakristo wapakwa mafuta, utimizo wa ahadi ya Mungu utawaletea thawabu ya uzima usiokoma katika mbingu. Lakini kwa habari ya “mkutano mkubwa,” kuna taraja la uzima wa milele katika paradiso ya kidunia. (Ufunuo 7:9; Luka 23:43) Kwa kweli, uzima wa milele unaweza kupatikana na wote wanaovumilia mpaka mwisho wakiwa washika ukamilifu.​—Marko 13:13.

 6. Kwa sababu gani wengine kati ya Mashahidi wa Yehova wanahitaji uvumilivu kwa njia ya pekee, nao wana msaada gani?

⁶ Kwa makumi ya miaka, Mashahidi wa Yehova katika nchi fulani fulani ‘wamehitaji saburi’ kwa njia ya pekee. Kwa sababu gani? Kwa sababu wamelazimika kuendesha utumishi mtakatifu wao katika maeneo magumu au kwa kukabiliwa na matatizo mbalimbali, kutia na marufuku za kiserikali. Labda wewe mwenyewe umelazimika kuvumilia afya mbaya au upinzani wa kijamaa kwa shughuli zako za Kikristo. Majaribu kama hayo yangewakomesha wale wanaotegemea nguvu za kibinadamu tu, lakini hayawasimamishi Mashahidi wa Yehova kwa sababu ‘msaada wao ni kutoka kwa Yehova, Mfanyi wa mbingu na dunia.’​—Zaburi 121:1-3, NW.

 7. (a) Majaribu yenye kuendelea yanatutolea nafasi gani? (b) Kwa sababu gani tunaweza kuamini yale yaliyosemwa na Paulo kwenye Wafilipi 4:13?

⁷ Huenda ikawa lazima hali fulani zivumiliwe mpaka mwisho wa mfumo huu wa mambo. Lakini majaribu yanayoendelea kuwapo yanatutolea nafasi ya kuthibitisha ukamilifu wetu kwa Mungu na kufurahisha moyo wake. (Mithali 27:11) Wakati ule ule, Yehova anaandaa nguvu zinazohitajiwa ili kuvumilia kwa uaminifu. Mtume Paulo aliandika hivi: “Nayaweza mambo yote katika yeye anitiaye nguvu.” (Wafilipi 4:13) Unaweza kuyaamini maneno hayo yenye faraja, kwa maana yanathibitika daima kuwa kweli katika habari ya “ushirika mzima wa ndugu zenu ulimwenguni.”​—1 Petro 5:9, 10, NW.

Washika Ukamilifu Wanatutia Moyo

 8. Toa mfano wa jinsi washika ukamilifu katika jamaa zinazogawanyika wanavyoweza kubarikiwa.

⁸ Inatia moyo sana kuona ukamilifu ukidumishwa na ‘ushirika mzima wa ndugu zetu ulimwenguni.’ Wengine wao wamethawabishwa sana kwa kushika ukamilifu wao kuelekea Yehova katika jamaa zilizogawanyika. Kwa mfano, wakati funzo la Biblia lilipoanzwa kwa mwanamke Mkatoliki katika Ailandi, mume wake alionyesha upinzani mkali sana na kutisha kumtaliki. Hata hivyo, mke aliendelea kujifunza, na siku moja akampa mumeye nakala ya kitabu Unaweza Kuishi Milele Katika Paradiso Duniani. Alivutiwa na jinsi kitabu hicho kinavyoeleweka kwa urahisi, kutoboa mambo waziwazi, na jinsi kilivyo na picha nzuri. Karibuni mume akawa akijifunza Biblia kwa msaada wa kitabu hicho. Aliacha kuvuta sigareti, na muda mfupi baada ya hapo mume huyo na mkeye wakajiuzulu katika Kanisa Katoliki na kuharibu zile wanazoita picha takatifu. Muda mwingi haukupita kabla mwanamke huyo hajabatizwa na kuanza kushiriki katika kazi ya painia msaidizi, hali mumeye alifanya maendeleo mazuri katika huduma. Mambo hayo yaliyoonwa yanaweza kuwatia sana moyo wale walio katika jamaa zilizogawanyika wanaostahimili wakiwa washika ukamilifu.​—1 Wakorintho 7:12-16.

 9. Washika ukamilifu wenye kasoro za mwili wanaweza kusaidiaje wengine?

⁹ Washika ukamilifu wengine wamejithibitisha kuwa waaminifu wajapokuwa na udhaifu wa mwili. Katika Uingereza, Mkristo mmoja asiyejiweza kimwili anayelazimika kutembea kwa kutumia kiti chenye magurudumu anajisikia akitimiza mambo ya maana katika huduma yake. Aliandika hivi: “Ingawa nimekuwa siwezi kuajiriwa kazi ya kimwili tangu mwaka 1949, Yehova amefurahia kunitumia mimi wakati wote huo. Kwa hiyo miaka imepita haraka. Nimejifunza kwamba hata mtu asiyejiweza sana kimwili anaweza kutumikia sana wengine. Mke wangu na mimi tumekuwa kama nanga ya namna fulani kwa watu mbalimbali kundini. Kwa sababu ya hali zetu tunakuwapo sikuzote, tunapatikana sikuzote tuweze kufikiwa na watu.” Ndiyo, Mkristo ye yote mwenye udhaifu wa kimwili asivunjike moyo, kwa maana anaweza kuwa chanzo cha kuwatia moyo wengine.

10. Kwa kutojiacha washindwe na mateso, washika ukamilifu wanaweza kusaidiaje waamini wenzao?

¹⁰ Washika ukamilifu hawajiachi washindwe na mateso. Alipofungwa gerezani kwa sababu ya kudumisha kutokuwamo kwa Kikristo, ndugu mmoja alisema: “Mapigo . . . yakawa sehemu ya kawaida ya maisha yangu, yakaongezeka katika hesabu na ukali. Nilikuwa nikizidi kudhoofika kila siku, kwa kuwa mara nyingi walininyima chakula. Nilimpelekea Yehova sala daima, nami naweza kusema kwamba yeye hakuniacha. Kadiri walivyozidi kunipiga, ndivyo nilivyozidi kutoyahisi mapigo hayo.” Ingawa alihukumiwa kifungo cha miaka zaidi ya miwili, shahidi huyo wa Yehova alidumisha hali yake ya kutokuwamo. (Isaya 2:2-4; Yohana 15:19) Washika ukamilifu wengine wengi wamechukua msimamo unaofanana na huo. Kwa uhakika, ushikaji ukamilifu wa namna hiyo ni mfano wenye kutia moyo unaoweza kusukuma waamini wenzetu wawe waaminifu.

Faraja Isiyoisha

11. Wakristo wana uhakikisho gani wa Kimaandiko juu ya kupata faraja?

¹¹ Yaliyotangulia ni machache tu kati ya mambo mengi sana yaliyoonwa kuthibitisha kwamba Yehova yu pamoja na watu wake waaminifu. Yeye ndiye “baba wa rehema zilizo pole na Mungu wa faraja yote, anayetufariji sisi katika dhiki yetu yote.” (2 Wakorintho 1:3, 4, NW) Ndiyo, “Mungu kwetu sisi ni kimbilio na nguvu, msaada utakaoonekana tele wakati wa mateso.” (Zaburi 46:1-3) Inafariji kama nini kujua kwamba yeye atatutegemeza sisi na waamini wenzetu katika dhiki zetu zote!

12. Mwendo wa Paulo wa kushika ukamilifu ulikuwa na matokeo gani juu ya Wakristo wenzake?

¹² Tunaweza kujipatia ushujaa kwa kuona waabudu wenzetu wa Yehova wakivumilia wakiwa Wakristo washikamanifu wajapopatwa na magumu mbalimbali. Ndivyo ilivyotukia wakati wengine walipouona uaminifu wa mtume Paulo. Yeye aliandika hivi: “Mambo yote yaliyonipata yametokea zaidi kwa kuieneza Injili; hata vifungo vyangu vimekuwa dhahiri . . . na wengi wa hao ndugu walio katika Bwana, hali wakipata kuthibitika kwa ajili ya kufungwa kwangu, wamezidi sana kuthubutu kulinena neno la Mungu pasipo hofu.”​—Wafilipi 1:12-14.

13. Sisi wenyewe tukishika ukamilifu matokeo yanaweza kuwa nini?

¹³ Ndiyo, tunapojua kwamba mashahidi wengine wa Yehova wanadumisha ukamilifu kwake wajapokabiliwa na mateso, tunatiwa nguvu tubaki tukiwa waaminifu. Kwa upande mwingine, wakati sisi wenyewe tunapodumisha ukamilifu chini ya jaribu, tunawatia wengine moyo walinene Neno la Mungu pasipo woga. Na hakika tunaweza kupata uradhi kwa kujua kwamba uaminifu wetu ni kitia-moyo na baraka kwao.

14. Ni njia gani mbili kati ya zile ambazo Yehova anatumia kutupa faraja?

¹⁴ Yehova anatutegemeza sisi kupitia roho takatifu yake. Kwa kweli, kama vile Petro alivyoandika, ‘tukilaumiwa kwa ajili ya jina la Kristo ni heri yetu; kwa kuwa roho ya utukufu na ya Mungu inatukalia.’ (1 Petro 4:12-16) Mungu anatufariji sisi pia na waamini wenzetu wanaotaabika kwa kujibu sala zetu. “Msijisumbue kwa neno lo lote,” akaandika Paulo, “bali katika kila neno kwa kusali na kuomba, pamoja na kushukuru, haja zenu na zijulikane na Mungu. Na amani ya Mungu, ipitayo akili zote, itawahifadhi mioyo yenu na nia zenu katika Kristo Yesu.” (Wafilipi 4:6, 7) Je, wewe unamtumaini kwa uhakika kama huo yule “Msikiaji wa sala”?​—Zaburi 65:2, NW.

Kupata Faraja Kutokana na Neno la Mungu

15. Ungetoa mfano gani kuonyesha kwamba andiko la Warumi 15:4 linasema kweli?

¹⁵ Neno takatifu la Mungu ni chanzo pia cha faraja kubwa. Ni kama vile mtume Paulo alivyoandika: “Yote yaliyotangulia kuandikwa yaliandikwa ili kutufundisha sisi; ili kwa saburi na faraja ya maandiko tupate kuwa na tumaini.” (Warumi 15:4) Kwa mfano, tunaposoma habari za kukombolewa kimuujiza kwa Waisraeli katika Misri au kuhifadhiwa hai kwa Wayahudi katika siku za Malkia Esta, je, jambo hilo halilitii nguvu tumaini letu hakika kwamba Yehova ni Mkombozi asiye na kifani? Namna gani lile kumbukumbu linalohusu kushika ukamilifu kwa Ayubu ajapokabiliwa na msiba mkubwa? Kwa uhakika, jambo hilo linaonyesha jinsi watumishi wa Yehova wa kisasa wanavyoweza kuvumilia taabu kwa nguvu zinazotolewa na Mungu. “Faraja ya maandiko” inaweza kweli kuwajaza tumaini na ushujaa washika ukamilifu.

16. Ni mahakikisho gani yenye kufariji yanayopatikana kwenye 1 Petro 5:6, 7 na 1 Wakorintho 10:13?

¹⁶ Lakini namna gani matatizo yetu yakitufanya tujisikie tumeshuka moyo? Kwa kweli, mahakikisho yenye kufariji ya Kimaandiko yanaweza kutufanya tujione salama katika utunzaji wa Yehova na yanaweza kupunguza hali yetu ya kushuka moyo. Mtume Petro aliandika hivi: “Nyenyekeeni chini ya mkono wa Mungu ulio hodari, ili awakweze kwa wakati wake; huku mkimtwika yeye fadhaa zenu zote, kwa maana yeye hujishughulisha sana kwa mambo yenu.” (1 Petro 5:6, 7) Ndiyo, Yehova ‘anakujali.’ Hilo ni wazo lenye kufariji namna gani! Hakuna jambo linaloweza kutukia asiloliona wala asiloweza kuliendesha atakavyo. Zaidi ya hilo, Paulo alitoa uhakikisho huu: “Mungu ni mwaminifu; ambaye hatawaacha mjaribiwe kupita mwezavyo; lakini pamoja na lile jaribu atafanya na mlango wa kutokea, ili mweze kustahimili.” (1 Wakorintho 10:13) Ukiwa mtu aliyepiga moyo konde awe mshika ukamilifu, unaweza kutegemea iwe hivyo kwako!

17. Kuna maandalizi gani mengine ya kutuletea faraja?

¹⁷ Kujifunza kwa njia ya sala Neno la Mungu na vichapo vya Kikristo vinavyoandaliwa na “mtumwa mwaminifu mwenye akili” kunaweza kuleta faraja nyakati za mikazo. (Mathayo 24:45-47; Zaburi 119:105) Ndivyo na maoni ya Kimaandiko yenye mafaa yanayotolewa na wazee wenye fadhili kundini. Kati ya mambo mengine, wao wanaagizwa ‘waseme kwa kuzifariji nafsi zilizoshuka moyo, wawasaidie waliolegea, wawe wastahimilivu kwa watu wote.’​—1 Wathesalonike 5:14, NW.

18. Ikiwa vitu vyetu vya kimwili ni vichache, sisi tuna faraja gani?

¹⁸ Lakini kuna faraja gani ikiwa vitu vyetu vya kimwili si vingi? Hakika inafariji kujua kwamba katika Utaratibu Mpya wa Mungu kutakuwa na nyumba nzuri nzuri, utele wa chakula, na baraka nyingine za kimwili. (Zaburi 72:16; 2 Petro 3:13; linganisha Isaya 65:17-25.) Lakini hata sasa maisha ya Kikristo yanamaliza utapanyaji wa pesa kwa matumizi yenye madhara ya kuvuta sigareti, kunywa vileo kupindukia, kucheza kamari, na mambo kama hayo. Mtu anaweza kutumia pesa alizookoa kwa njia hiyo aifaidi jamaa yake. Kufuata Neno la Mungu kunaweza pia kutusaidia turidhike kuwa na vitu vichache zaidi vya kimwili. Paulo aliridhika, kwa maana alisema: “Walakini [utawa] pamoja na kuridhika ni faida kubwa. Kwa maana hatukuja na kitu duniani, tena hatuwezi kutoka na kitu; ila tukiwa na chakula na nguo tutaridhika na vitu hivyo.” (1 Timotheo 6:6-8; Wafilipi 4:11, 12) Kukaza fikira juu ya mapendeleo tuliyo nayo katika utumishi wa Yehova kunaleta baraka nyingi zinazotutajirisha kweli kweli.​—Mithali 10:22.

19. Ugonjwa wa muda mrefu unaweza kuvumiliwaje?

¹⁹ Hata hivyo, namna gani ikiwa ni lazima tuvumilie ugonjwa wa muda mrefu? Unaweza kuvumiliwa kwa msaada wa Yehova na faraja inayoandaliwa kupitia Neno lake. Kwa mfano, mtunga zaburi Daudi alisema: “Heri amkumbukaye mnyonge . . . [Yehova] atamtegemeza alipo mgonjwa kitandani.” (Zaburi 41:1-3) Huo sio wakati wa maponyo ya kimuujiza. Lakini Yehova anawapa Wakristo wenye kuugua hekima na imara inayohitajiwa ili kushughulika na magonjwa yao wanapotanguliza faida za Ufalme maishani.​—Mathayo 6:33; 2 Wakorintho 12:7-10.

20. Tunaweza kukabilianaje na kihoro wakati mpendwa anapokufa?

²⁰ Tunaweza kukabilianaje na kihoro kinachopata mtu wakati mpendwa anapokufa? Faraja inaweza kupatikana kutokana na tumaini la ufufuo la Biblia. (Yohana 5:28, 29; Matendo 24:15) Hivyo, ingawa tunahuzunishwa na kifo cha mpendwa, ‘hatuhuzuniki kama na wengine wasio na matumaini.’ (1 Wathesalonike 4:13) Ni faraja iliyoje ambayo tumaini la ufufuo linawaletea washika ukamilifu!

Baki Ukiwa na Tumaini Hakika Katika Mungu wa Faraja

21. Matokeo ya mateso yaliyovumiliwa yanakuwa nini mara nyingi?

²¹ Uwe na uhakika wa kwamba Yehova, “Mungu wa faraja yote,” hatawaacha kamwe watu wake washikamanifu waliojiweka wakfu. (2 Wakorintho 1:3, NW; Zaburi 94:14, UV) Ni jambo lenye msaada pia kukumbuka kwamba mateso ambayo Wakristo wanavumilia yanaweza kumletea Mungu heshima au kumtukuza. Kuteswa kunavuta fikira za wengine kwenye watu wake na kazi yao ya kuuhubiri Ufalme, na mara nyingi jambo hilo linaleta ongezeko kubwa zaidi katika hesabu ya wenye kusifu Yehova.​—Linganisha Matendo 8:4-8; 11:19-21.

22. Kwa habari ya ukamilifu, imetupasa tupige moyo konde kufanya nini?

²² Kwa hiyo, kwa msaada wa Mungu, acheni tupige moyo konde ili tusiache hila za Shetani zivunje ukamilifu wetu. Kwa kutenda tukiwa na imani, na tuendelee kumtumainia Yehova. Tusizisahau kamwe njia nyingi anazozitumia kutubariki, kututegemeza, na kutufariji sisi watumishi wake. Na tuthibitishe kwamba tumejitoa kwake na kwa kanuni zake za uadilifu, tukiiunga mkono enzi kuu yake. Kumbuka, pia, kwamba ni juu ya mtu mwenyewe kuamua kama atafanya hivyo. Endelea kufanya mapenzi ya kimungu wakati wewe unapofanya kazi pamoja na tengenezo la Yehova katika siku hizi za maana sana. Furahia pendeleo lako la kufurahisha moyo wa Yehova kwa kubaki ukiwa mwaminifu kwake, na usisahau kamwe kwamba yeye haachi kuwapa faraja washika ukamilifu wote.

Jibu Lako Ni Nini?

◻ Kwa sababu gani watumishi wa Yehova hasa wanahitaji faraja?

◻ Kwa sababu gani Shetani anatumia mateso dhidi ya Wakristo?

◻ Washika ukamilifu wanaweza kututiaje moyo?

◻ Tunaweza kujipatiaje faraja kutokana na Neno la Mungu?

◻ Tunahakikishiwa nini kwenye 1 Petro 5:6,7 na 1 Wakorintho 10:13?

[Picha katika ukurasa wa 16]

Shetani anatafuta kuwameza watumishi wa Yehova, lakini kwa vyo vyote sisi hatuwi bila ulinzi

[Picha katika ukurasa wa 18]

Yehova anajibu sala za washika ukamilifu. Je, wewe unasali kwa ukawaida?