Yehova Huwapenda Watoaji Wachangamfu

“Kila mtu na atende kama alivyokusudia moyoni mwake, si kwa huzuni, wala si kwa lazima; maana Mungu humpenda yeye atoaye kwa moyo wa ukunjufu [mtoaji mchangamfu, NW].”—2 WAKORINTHO 9:7.

1. Mungu na Kristo wamekuwaje watoaji wachangamfu?

YEHOVA ndiye alikuwa mtoaji mchangamfu wa kwanza. Kwa shangwe alimtolea Mwana mzaliwa-pekee wake uhai na kumtumia kuumba malaika na ainabinadamu. (Mithali 8:30, 31; Wakolosai 1:13-17) Mungu alitutolea sisi uhai na pumzi na vitu vyote, kutia ndani mvua kutoka mbinguni na majira ya mavuno, akiijaza mioyo yetu furaha. (Matendo 14:17; 17:25) Kwa kweli, Mungu na pia Mwana wake, Yesu Kristo, ni watoaji wachangamfu. Wao hutoa kwa furaha wakiwa na roho isiyo ya ubinafsi. Yehova aliupenda ulimwengu wa ainabinadamu sana hata “akamtoa Mwanawe pekee, ili kila mtu amwaminiye asipotee, bali awe na uzima wa milele.” Na Yesu ‘aliitoa nafsi yake iwe fidia ya wengi,’ bila unyimivu.—Yohana 3:16; Mathayo 20:28.

2. Kulingana na Paulo, ni mtoaji wa aina gani ambaye Mungu hupenda?

² Kwa hiyo, watumishi wa Mungu na Kristo wapaswa kuwa watoaji wachangamfu. Utoaji wa jinsi hiyo ulihimizwa katika barua ya pili ya mtume Paulo kwa Wakristo katika Korintho, iliyoandikwa yapata 55 W.K. Kwa wazi akirejezea upaji wa kifedha wa hiari na wa faragha uliotolewa hasa kuwasaidia Wakristo wenye uhitaji katika Yerusalemu na Yudea, Paulo alisema hivi: “Kila mtu na atende kama alivyokusudia moyoni mwake, si kwa huzuni, wala si kwa lazima; maana Mungu humpenda yeye atoaye kwa moyo wa ukunjufu [mtoaji mchangamfu, NW].” (2 Wakorintho 9:7; Warumi 15:26; 1 Wakorintho 16:1, 2; Wagalatia 2:10) Watu wa Mungu wameitikiaje nafasi za kutoa? Na twaweza kujifunza nini kutokana na shauri la Paulo juu ya kutoa?

Kusukumwa na Mioyo Yenye Nia

3. Ni kwa kadiri gani Waisraeli walitegemeza ujenzi wa tabenakulo kwa ajili ya ibada ya Yehova?

³ Mioyo yenye nia husukuma watu wa Mungu kujitoa wenyewe na mali zao katika kulitegemeza kusudi la kimungu. Kwa mfano, Waisraeli wa siku ya Musa waliutegemeza kwa shangwe ujenzi wa tabenakulo (hema) kwa ajili ya ibada ya Yehova. Mioyo ya wanawake fulani iliwasukuma wasokote manyoya ya mbuzi, huku wanaume wengine wakitumika wakiwa mafundi. Watu walitoa kwa uchangamfu dhahabu, fedha, mbao, nguo ya kitani, na vitu vingine vikiwa ‘matoleo ya hiari kwa Yehova.’ (Kutoka 35:4-35) Walikuwa wakarimu sana hivi kwamba vitu vilivyotolewa vilikuwa “vingi sana zaidi ya hivyo vitoshavyo kwa ajili ya utumishi wa hiyo kazi.”—Kutoka 36:4-7.

4. Daudi na wengine walichangia hekalu wakiwa na mwelekeo gani?

⁴ Karne kadhaa baadaye, Mfalme Daudi alichangia sana hekalu la Yehova ambalo lingejengwa na mwana wake Sulemani. Kwa kuwa Daudi ‘alipendezwa na nyumba ya Mungu,’ alitoa “mali yake ya pekee” ya dhahabu na fedha. Wana-wafalme, wakuu, na wengine ‘waliijaza mikono yao na zawadi kwa Yehova.’ Tokeo likawa nini? Kwani, “watu wakaanza kushangilia kwa sababu walitoa matoleo ya hiari, kwa maana ilikuwa kwa moyo kamili kwamba walitoa matoleo ya hiari kwa Yehova”! (1 Mambo ya Nyakati 29:3-9, NW) Walikuwa watoaji wachangamfu.

5. Waisraeli walitegemezaje ibada ya kweli katika muda wote wa karne zilizopita?

⁵ Muda wa karne zilizopita, Waisraeli walipewa pendeleo la kutegemeza tabenakulo, mahekalu yaliyofuata, na utumishi mbalimbali wa kikuhani na wa Kilawi ndani yayo. Kwa mfano, katika siku ya Nehemia Wayahudi waliazimia kutoa michango ili kudumisha ibada safi, wakitambua kwamba hawapaswi kuiacha nyumba ya Mungu. (Nehemia 10:32-39) Vivyo hivyo leo, Mashahidi wa Yehova hutoa upaji wa hiari kwa uchangamfu kujenga na kudumisha mahali fulani-fulani pa kukutania na kutegemeza ibada ya kweli.

6. Toa mifano ya utoaji mchangamfu uliofanywa na Wakristo.

⁶ Wakristo wa mapema walikuwa watoaji wachangamfu. Kwa mfano, Gayo alikuwa akifanya ‘kazi ya uaminifu’ katika kuwa mkaribishaji-wageni kwa wale waliokuwa wakisafiri kwa ajili ya masilahi ya Ufalme, sawa na vile Mashahidi wa Yehova huonyesha ukaribishaji-wageni kwa waangalizi wasafirio ambao sasa hutumwa na Watch Tower Bible and Tract Society. (3 Yohana 5-8) Inagharimisha kutuma ndugu hao makundini na kuwaonyesha ukaribishaji-wageni, lakini hilo ni lenye manufaa kama nini kiroho!—Warumi 1:11, 12.

7. Wafilipi walitumiaje mali zao za kimwili?

⁷ Makundi kwa ujumla yametumia mali yazo ya kimwili kueneza masilahi ya Ufalme. Kwa mfano, Paulo aliwaambia waamini katika Filipi hivi: “Nilipokuwa nahitaji msaada kule Thesalonike mliniletea, tena zaidi ya mara moja. Msifikiri kwamba napenda tu kupokea zawadi; ninachotaka ni faida iongezwe katika hazina [hesabu, NW] yenu.” (Wafilipi 4:15-17, HNWW) Wafilipi walitoa kwa uchangamfu, lakini ni mambo gani yanayouchochea utoaji mchangamfu wa jinsi hiyo?

Ni Nini Kinachochochea Utoaji Mchangamfu?

8. Ungethibitishaje kwamba roho ya Mungu huwasukuma watu wa Mungu kuwa watoaji wachangamfu?

⁸ Roho takatifu au kani ya utendaji ya Yehova, huwasukuma watu wake kuwa watoaji wachangamfu. Wakati Wakristo wa Yudea walipokuwa na uhitaji, roho ya Mungu iliwasukuma waamini wengine wawasaidie kimwili. Ili kutia moyo Wakristo katika Korintho wajitahidi sana katika kutoa upaji wa jinsi hiyo, Paulo alitaja mfano wa makundi katika Makedonia. Ingawa waamini wa Makedonia walikuwa wakipatwa na mnyanyaso na umaskini, walionyesha upendo wa kidugu kwa kutoa zaidi ya uwezo wao hasa. Hata waliomba wapate pendeleo la kutoa! (2 Wakorintho 8:1-5) Nia ya Mungu haitegemei tu utoaji wa matajiri. (Yakobo 2:5) Watumishi wake waliojiweka wakfu ambao ni maskini kimwili ndio wamekuwa tegemeo kuu katika kulipia gharama za kazi ya kuhubiri Ufalme. (Mathayo 24:14) Hata hivyo, hawateseki kwa sababu ya ukarimu wao, kwani Mungu huandalia daima mahitaji ya watu wake katika kazi hiyo, na kani iliyo nyuma ya uendelevu na ongezeko layo ni roho yake.

9. Imani, maarifa, na upendo huhusianaje na utoaji mchangamfu?

⁹ Utoaji mchangamfu huchochewa na imani, maarifa, na upendo. Paulo alisema hivi: “Kama [ninyi Wakorintho] mlivyo na wingi wa mambo yote; imani, na usemi, na elimu [maarifa, NW], na bidii yote, na upendo wenu kwetu sisi; basi vivyo hivyo mpate wingi wa neema hii pia. Sineni ili kuwaamuru, bali kwa bidii ya watu wengine nijaribu unyofu wa upendo wenu.” (2 Wakorintho 8:7, 8) Kuichangia kusudi la Yehova, hasa wakati mtoaji hana mali nyingi, huhitaji imani katika maandalizi ya Mungu ya wakati ujao. Wakristo wenye maarifa mengi hutaka kutumikia kusudi la Yehova, na wale wenye upendo mwingi kwake na kwa watu wake hutumia mali zao kwa uchangamfu ili kuendeleza kusudi lake.

10. Kwa nini yaweza kusemwa kwamba mfano wa Yesu huwasukuma Wakristo watoe kwa uchangamfu?

¹⁰ Mfano wa Yesu husukuma Wakristo watoe kwa uchangamfu. Baada ya kuwasihi Wakorintho watoe kwa sababu ya upendo, Paulo alisema hivi: “Mmejua neema ya Bwana wetu Yesu Kristo, jinsi alivyokuwa maskini kwa ajili yenu, ingawa alikuwa tajiri, ili kwamba ninyi mpate kuwa matajiri kwa umaskini wake.” (2 Wakorintho 8:9) Akiwa tajiri mkubwa zaidi ya mwana mwingine yeyote wa Mungu mbinguni, Yesu alijiondolea mwenyewe yote hayo na kuchukua uhai wa kibinadamu. (Wafilipi 2:5-8) Hata hivyo, kwa kuwa maskini katika njia hiyo isiyo ya ubinafsi, Yesu alichangia utukuzo wa jina la Yehova na akatoa uhai wake kuwa dhabihu ya fidia kwa faida ya wanadamu ambao wangeikubali. Kwa kupatana na mfano wa Yesu, je, hatupaswi kutoa kwa uchangamfu ili kuwasaidia wengine na kuchangia utukuzo wa jina la Yehova?

11, 12. Kupanga kuzuri kwaweza kutufanyaje tuwe watoaji wachangamfu?

¹¹ Kupanga mambo vizuri hufanya utoaji wa uchangamfu uwezekane. Paulo aliwaambia Wakorintho hivi: “Siku ya kwanza ya juma kila mtu kwenu na aweke akiba kwake, kwa kadiri ya kufanikiwa kwake; ili kwamba michango isifanyike hapo nitakapokuja.” (1 Wakorintho 16:1, 2) Katika njia kama hiyo ya faragha na ya hiari, wale wanaotaka kutoa misaada ili kuendeleza kazi ya Ufalme leo wangefanya vema kuweka kando kiasi fulani cha mapato yao kwa kusudi hilo. Likiwa tokeo la kupanga kuzuri huko, Mashahidi mmoja mmoja, familia, na makundi yaweza kutoa misaada ili kuendeleza ibada ya kweli.

¹² Kutekeleza mipango ya kuchanga kutatuchangamsha. Kama Yesu alivyosema, “kuna furaha nyingi katika kutoa kuliko zilivyo katika kupokea.” (Matendo 20:35, NW) Kwa hiyo Wakorintho wangeweza kuongeza shangwe yao kwa kufuata shauri la Paulo la kutekeleza mpango wao wa muda wa mwaka mmoja wa kupeleka pesa Yerusalemu. “Hukubaliwa kwa kadiri ya alivyo navyo mtu, si kwa kadiri ya asivyo navyo,” akasema. Mtu anapotoa michango kwa kadiri alivyo navyo, yapasa ithaminiwe sana. Tukimtumaini Mungu, yeye aweza kusawazisha mambo hivi kwamba wale walio na vingi wanakuwa wakarimu, wala si wenye kuvitumia vibaya, na wale walio na vichache hawana kasoro inayopunguza nguvu na uwezo wao wa kumtumikia.—2 Wakorintho 8:10-15.

Usimamizi Wenye Uangalifu wa Kutoa

13. Kwa nini Wakorintho wangeweza kuwa na uhakika katika usimamizi wa Paulo wa utoaji?

¹³ Ingawa Paulo alisimamia mpango wa utoaji ili kwamba waamini wenye uhitaji waweze kuonea shangwe msaada wa kimwili na kushiriki kwa nishati nyingi zaidi katika kazi ya kuhubiri, wala yeye wala wengine hawakuchukua sehemu yoyote ya pesa hizo kwa ajili ya utumishi wao. (2 Wakorintho 8:16-24; 12:17, 18) Paulo alifanya kazi kupata mahitaji yake mwenyewe ya kimwili badala ya kuwekelea kundi lolote mizigo ya kifedha. (1 Wakorintho 4:12; 2 Wathesalonike 3:8) Kwa hiyo, kwa kumpa utoaji huo, Wakorintho walikuwa wakiukabidhi mtumishi wa Mungu mwenye kuaminika, aliye na bidii.

14. Kwa habari ya utumizi wa utoaji, Watch Tower Society ina sifa gani?

¹⁴ Tangu kuandikishwa kisheria kwa Watch Tower Bible and Tract Society katika 1884, wachangaji wamekuwa na ushuhuda wa kwamba huo ni msimamizi mwenye kuaminika wa utoaji wote unaokabidhiwa kwa ajili ya kazi ya Ufalme ya Yehova. Kulingana na hati yayo ya katiba, Sosaiti hujitahidi kutimiza uhitaji mkubwa zaidi wa watu wote, uhitaji wa mambo ya kiroho. Hilo hufanywa kwa njia ya vichapo vya Biblia na maagizo juu ya jinsi ya kupata wokovu. Leo, Yehova anauharakisha mkusanyo wa wale wenye mfano wa kondoo katika tengenezo lake linalopanuka, na baraka yake kwenye utumizi wenye hekima wa utoaji katika kazi ya kuhubiri Ufalme ni ushuhuda wa wazi wa kibali cha kimungu. (Isaya 60:8, 22) Tuna uhakika kwamba ataendelea kuisukuma mioyo ya watoaji wachangamfu.

15. Ni kwa nini gazeti hili hutaja utoaji mara kwa mara?

¹⁵ Sosaiti mara kwa mara hutumia safu za jarida hili kuwafanya wasomaji walo wawe macho kwa pendeleo lao la kutoa upaji wa hiari kwa kazi ya ulimwenguni pote ya kuhubiri Ufalme. Huko si kuombaomba, bali ni ukumbusho kwa wote wanaotamani kuitegemeza “kazi takatifu ya habari njema” kadiri Mungu anavyowapa ufanisi. (Warumi 15:16, NW; 3 Yohana 2) Sosaiti hutumia kwa njia ya uangalifu sana pesa zote zinazotolewa ili kujulisha jina na Ufalme wa Yehova. Michango yote hupokewa kwa shukrani, julisho hutolewa kuwa imepokewa, na hutumiwa kueneza habari njema za Ufalme wa Mungu. Kwa mfano, kupitia hiyo utendaji mbalimbali wa mishonari hutegemezwa katika nchi nyingi, na vifaa vya kuchapia vilivyo muhimu ili kueneza maarifa ya Biblia hudumishwa na kupanuliwa. Zaidi ya hayo, michango kwa kazi ya ulimwenguni pote hutumiwa kulipia gharama zinazoendelea kupanda za uchapishaji wa Biblia na vichapo vyenye msingi wa Biblia na pia za kaseti za sauti na za video. Masilahi ya Ufalme huendelezwa na watoaji wachangamfu katika njia kama hizo.

Si kwa Lazima

16. Ingawa ni Mashahidi wa Yehova wachache walio matajiri kimwili, ni kwa nini michango yao inathaminiwa?

¹⁶ Ni Mashahidi wa Yehova wachache walio matajiri kimwili. Ingawa huenda wakatoa kiasi kidogo cha pesa ili kuendeleza masilahi ya Ufalme, hata hivyo utoaji wao ni wenye maana. Yesu alipomwona mjane mwenye uhitaji akitia sarafu ndogo mbili zenye thamani ndogo katika sanduku la hazina la hekalu, alisema hivi: “Huyu mjane maskini ametia zaidi kuliko wote; maana, [wachangaji wengine] hao wote walitia sadakani katika mali iliyowazidi, bali huyu katika umaskini wake ametia vyote alivyokuwa navyo.” (Luka 21:1-4) Ingawa zawadi yake ilikuwa ndogo, yeye alikuwa mtoaji mchangamfu—na mchango wake ulithaminiwa.

17, 18. Ni nini maana ya maneno ya Paulo kwenye 2 Wakorintho 9:7, na ni nini kinachoonyeshwa na neno la Kigiriki lililofasiriwa “-changamfu”?

¹⁷ Kuhusu kazi ya kutoa msaada kwa ajili ya Wakristo wa Yudea, Paulo alisema hivi: “Kila mtu na atende kama alivyokusudia moyoni mwake, si kwa huzuni, wala si kwa lazima; maana Mungu humpenda yeye atoaye kwa moyo wa ukunjufu [mtoaji mchangamfu, NW].” (2 Wakorintho 9:7) Huenda ikawa kwamba Mtume alikuwa akitaja sehemu ya Mithali 22:8 katika tafsiri ya Septuajenti, inayosema hivi: “Mungu humbariki mtoaji mchangamfu; naye ataandalia upungufu wa kazi zake.” (The Septuagint Bible, iliyotafsiriwa na Charles Thomson) Paulo aliweka neno “humpenda” mahali pa neno “humbariki,” lakini kuna ulinganifu, kwani mavuno ya mibaraka hutokana na upendo wa Mungu.

¹⁸ Mtoaji mchangamfu kwa kweli hufurahi kutoa. Kwani, kutoka kwa neno la Kigiriki lililofasiriwa “-changamfu” kwenye 2 Wakorintho 9:7, NW huwa neno “-a furaha”! Baada ya kuonyesha hilo, mwanachuo R. C. H. Lenski alisema hivi: “Mungu humpenda mtoaji mwenye moyo mwepesi, mwenye shangwe, aliye na furaha . . . [ambaye] imani yake huzungushiwa tabasamu wakati nafasi nyingine ya kutoa inapomjia.” Mtu mwenye roho yenye shangwe kama hiyo hatoi kwa huzuni au kwa kulazimishwa bali anapotoa, hutoa kwa moyo. Je! wewe huchangamka jinsi hiyo kuhusu kutoa ili kutegemeza masilahi ya Ufalme?

19. Wakristo wa mapema walitoaje michango?

¹⁹ Wakristo wa mapema hawakupitisha sahani za michango au kuzoea kutoa zaka kwa kutoa sehemu kumi ya mapato yao kwa ajili ya makusudi ya kidini. Bali, michango yao ilikuwa ya hiari kabisa. Tertuliani, aliyeongoka kwenye Ukristo yapata 190 W.K., aliandika hivi: “Ingawa tuna sanduku letu la hazina, haliwi na pesa za kununua wokovu, kama la dini iliyo na bei yayo. Katika siku moja kila mwezi [yaonekana mara moja kwa mwezi], akipenda, kila mtu huweka utoaji mdogo; lakini kama tu akipenda, na kama tu aweza; kwani si kwa lazima; yote ni kwa hiari.” Apology, Sura 39.

20, 21. (a) Toleo la mapema la gazeti hili lilisema nini kuhusu pendeleo la kutegemeza kusudi la Mungu kifedha, na hilo linatumikaje hata sasa? (b) Ni nini kinachotokea tunapomheshimu Yehova kwa vitu vyetu vinavyothamanika?

²⁰ Utoaji wa hiari umekuwa wa kidesturi sikuzote miongoni mwa watumishi wa Yehova wa ki-siku-hizi. Hata hivyo, nyakati nyingine, wengine hawajatumia kwa faida kamili pendeleo lao la kutegemeza kusudi la Mungu kwa kutoa misaada. Kwa mfano, katika Februari 1883 gazeti hili lilisema hivi: “Wengine wanajilemeza sana na mzigo wa kifedha kwa ajili ya wengineo, hivi kwamba uwezo wao wa kutoa msaada wa kifedha unapunguka kwa sababu ya kutoa kwingi sana na kuishiwa, na hivyo kutumika kwao kunafifia; si hivyo tu, bali wale ambao . . . hawajatambua jinsi hali ilivyo, wamepoteza nafasi ya kupokea mibaraka kwa sababu ya kukosa kwao ukarimu katika kuchanga kifedha.”

²¹ Umati mkubwa unapotiririka ndani ya tengenezo la Yehova leo, na kazi ya Mungu inapopanuka hadi Ulaya ya Mashariki na katika maeneo mengine yaliyozuiliwa wakati uliopita, kuna uhitaji wenye kuongezeka wa kupanua viwanda vya kuchapia na vifaa vinginevyo. Ni lazima Biblia zaidi na vichapo vingine vichapishwe. Miradi mingi ya kitheokrasi inaendelea; hata hivyo, mingine ingeendelea kwa haraka zaidi ikiwa kungekuwa pesa za kutosha. Bila shaka, tuna imani kwamba Mungu ataandaa kile kinachohitajiwa, na twajua kwamba wale ‘wanaomheshimu Yehova kwa vitu vyao vinavyothamanika’ watabarikiwa. (Mithali 3:9, 10) Kwa kweli, “apandaye kwa ukarimu atavuna kwa ukarimu.” Yehova ‘atatutajirisha katika ukarimu wote,’ na utoaji wetu mchangamfu utasababisha wengi wamshukuru na kumsifu.—2 Wakorintho 9:6-14.

Onyesha Shukrani Yako kwa Zawadi Zitokazo kwa Mungu

22, 23. (a) Ni nini zawadi ya Mungu ya bure isiyo na kifani? (b) Kwa kuwa tunathamini zawadi za Yehova, twapaswa kufanya nini?

²² Kwa kusukumwa na shukrani nyingi, Paulo mwenyewe alisema hivi: “Tumshukuru Mungu kwa ajili ya zawadi yake [ya bure, NW] isiyo na kifani.” (2 Wakorintho 9:15, HNWW) Akiwa “dhabihu ya kufunika” kwa ajili ya dhambi za Wakristo wapakwa-mafuta na kwa ajili ya wale wa ulimwengu, Yesu ndiye msingi na njia ya zawadi ya Yehova ya bure isiyo na kifani. (1 Yohana 2:1, 2, NW) Zawadi hiyo ni “neema [fadhili zisizostahiliwa, NW] ya Mungu iliyozidi sana” ambayo ameonyesha watu wake duniani kupitia Yesu Kristo, nayo inazidi kwa wokovu wao na kwa utukufu na kutetewa kwa Yehova.—2 Wakorintho 9:14.

²³ Shukrani zetu nyingi humwendea Yehova kwa ajili ya zawadi yake ya bure isiyo na kifani na zawadi zake nyingine nyingi za kiroho na za kimwili kwa watu wake. Kwani, wema wa Baba yetu wa kimbingu kwetu ni mzuri ajabu hivi kwamba unashinda uwezo wa usemi wa kibinadamu! Na kwa hakika wapasa kutuchochea kuwa watoaji wachangamfu. Tukiwa na uthamini wenye kuhisiwa moyoni, acheni tufanye yote tuwezayo kuendeleza kusudi la Mungu wetu mkarimu, Yehova, mtoaji mchangamfu wa kwanza kabisa!

◻ Mioyo yenye nia imechochea watu wa Yehova wafanye nini?

◻ Ni nini huchochea utoaji mchangamfu?

◻ Watch Tower Society hutumiaje utoaji wote inaopokea?

◻ Mungu humpenda mtoaji wa aina gani, na tunapaswa kuonyeshaje shukrani zetu kwa zawadi Zake nyingi?

[Maswali ya Funzo]

[Picha katika ukurasa wa 15]

Tabenakulo ilipokuwa ikijengwa, Waisraeli walifanya kazi kwa bidii na kutoa michango ya ukarimu kwa Yehova

[Picha katika ukurasa wa 18]

Utoaji kama ule wa mjane wenye uhitaji huthaminiwa na ni wenye maana