Vijana Huuliza . . .

Je, Mungu Ataendelea Kuwa Rafiki Yangu?

MFALME DAUDI alikuwa mtu aliyefurahia urafiki wa Mungu. Lakini wakati fulani alisema: “Taabu za moyo wangu zimeongezeka.” Daudi aliteseka si kwa sababu ya kunyanyaswa na watu wengine bali pia kwa sababu ya makosa yake mwenyewe. Alianza kuhisi kwamba hata Mungu alikuwa amemkataa na alisali: “Uniangalie na kunifadhili, maana mimi ni mkiwa na mteswa.”—Zaburi 25:11, 16-19, linganisha Zaire Swahili Bible.

Labda wewe pia wahisi msononeko. Labda nyumbani au shuleni upo katika hali zisizopendeza ambazo zinakulemea. Kisha pia, waweza kuwa na matatizo mazito ya afya au waweza kujikuta umevunjika moyo kwa sababu ya udhaifu fulani ambao umekukabili. Vyo vyote iwavyo, hupaswi kuteseka peke yako; Mungu hutoa kwa ukarimu urafiki na tegemezo lake.a Ikiwa umeanza kukuza uhusiano pamoja naye, utafarijika kujua kwamba yeye hawaachi rafiki zake wanapokuwa na matatizo. Hata hivyo, upatapo matatizo, waweza kuhisi kwamba Mungu yuko mbali. Yaweza hata kuonekana kwako kwamba hakusaidii hata kidogo. Lakini je, ndivyo ilivyo?

“Mwiba Katika Mwili”

Kabla ya yote, tafadhali soma 2 Wakorintho 12:7-10. Hapo mtume Paulo aeleza jinsi alivyoteseka kutokana na kile alichokiita “mwiba katika mwili.” Yamkini, “mwiba” huo ulikuwa ugonjwa fulani wa kimwili, labda ukihusisha macho yake. Uwe ulikuwa nini, uliendelea ‘kumpiga kofi’ kihisia moyo. Licha ya dua tatu za bidii kwa Mungu ili auondoe, “mwiba” huo ulibaki.

Je, Mungu alikuwa anapuuza sala za Paulo? Hata kidogo! Mungu alisema: “Fadhili yangu isiyostahiliwa yakutosha wewe; kwa maana nguvu yangu inafanywa kamilifu katika udhaifu.” Ingawa Yehova aliamua kutokuuondoa “mwiba” huo, hakumwacha Paulo. Kupitia fadhili isiyostahiliwa ya Mungu, Paulo alifurahia urafiki wa karibu sana pamoja naye. Hiyo “ilitosha” kumsaidia Paulo kukabiliana na ugonjwa wake. Kadiri Paulo alivyojitahidi kufanya hivyo, angeweza kupata kuona nguvu ya Mungu yenye kutegemeza katika njia mpya na ya kibinafsi.

Msaada Katika Kukabiliana na Matatizo

Kama vile Paulo, wewe pia waweza kuwa na “mwiba,” au tatizo, ambalo lakuchoma, au kukusababishia maoni yasiyofaa na kivunjamoyo. Kama katika kisa cha Paulo, Mungu aweza kuruhusu matatizo yadumu. Hii haina maana kwamba yeye si Rafiki yako tena. Mungu alimwambia mtume Paulo: “Nguvu yangu inafanywa kamilifu katika udhaifu.” Ikiwa wategemea nguvu za Mungu na si zako mwenyewe, waweza kuvumilia. Waweza hata kupata kwamba kwa msaada wa roho ya Mungu, unaweza kutimiza mambo ambayo kamwe hukufikiria kuwa yanawezekana. Paulo alisema: “Napendezwa na udhaifu . . . Kwa maana niwapo dhaifu, ndipo niwapo mwenye nguvu.”

Mwanamke mmoja kijana Robinb alipata hili kuwa kweli. Akiwa na umri wa miaka 14 alipoteza uwezo wake wa kuona kwa sababu ya ugonjwa wa glakoma. Mwaka huohuo, mama yake alikufa ghafula. “Sasa nilikuwa na Yehova tu,” asema Robin aanzapo kushughulika na “miiba” hii yenye maumivu. “Nilijua kwamba ili kushughulika na hali yangu kwa mafanikio, nilipaswa kuwa karibu sana naye.” Robin alifanya hivyo hasa, hatimaye akitumikia akiwa mweneza-evanjeli wa wakati wote. Asema: “Nilimwomba Yehova anisaidie katika kila kitu. Kwa kweli alifanya hivyo.”

Vijana wengi wamepata kwamba kupata majaribu kwa kweli huwasaidia kuwavuta karibu zaidi na Mungu. Mfikirie kijana Jeff. Baba yake aliiacha familia yake, akimwacha mama ya Jeff atunze watoto saba. “Nilihisi sana ukosefu wa baba,” akubali Jeff, ambaye wakati huo alikuwa na umri wa miaka 12 tu. “Nilitamani sana mtu fulani azibe pengo ambalo nilihisi kila siku.” Jeff alifanya nini? “Nilisali kwa Yehova ili anisaidie kuziba pengo hilo.” Jeff alitenda kulingana na sala yake na alijishughulisha sana na mambo ya kiroho. Baadaye, aliweza kutambua kwamba Yehova alikuwa anamtegemeza—kupitia roho takatifu yake yenye kuimarisha na kupitia kutaniko la Kikristo. (Linganisha Zaburi 27:10.) Sasa akiwa na umri wa miaka 27 Jeff akumbuka: “Sikuwa na mtu ambaye ningeweza kumfikia kwa ajili ya usalama, hivyo nikawa karibu sana na Yehova.” Auita uhusiano huo wa karibu “baraka za thamani sana ambazo zimetokana na jaribu hili.”

Jinsi ya Kupata Msaada wa Mungu

Hali kadhalika Rafiki yako wa kimbingu atakusaidia katika matatizo yako. Lakini unapaswa kufanya nini? Bila shaka, ili urafiki wowote usitawi, kunapaswa kuwa na mawasiliano. Sala ni njia yetu ya kuwasiliana na Mungu. Kupitia hiyo, twamfahamisha kwamba twahitaji msaada wake. Hata hivyo, sala haina thamani ikiwa haina hisia au haifikiriwi. Kama kijana aliyetajwa juu, wapaswa ‘kufunua moyo wako’ kwa Mungu! (Zaburi 62:8) Hata waweza kuhitaji kutoa dua. (Wafilipi 4:6) Dua ni sala ambazo hasa ni nzito na za bidii.

Tuseme kwamba una tatizo la kudhibiti mawazo yako au una tatizo la kushinda zoea baya. Omba dua kwa Yehova! Sihi msaada wake wakati wa jaribu. Hili haliwezi kuwa rahisi sikuzote. “Nihisipo msukumo wenye nguvu wa kufanya jambo baya, ninajilazimisha kutoa sala,” akubali Gary. “Mara nyingine mimi hufikiri, ‘Naweza kumfikiaje Yehova?’ Hata hivyo, bado mimi huomba msaada wake. Yeye hunipa nguvu ninazohitaji ili kuvumilia.” Hata kama ni jambo gumu mwanzoni, endelea kufunua moyo wako kwa Mungu.

Lakini iweje ikiwa yaonekana kana kwamba sala zako hazijibiwi? Kwa mfano, Lora, alikuwa anajitahidi kushinda zoea baya la kupiga punyeto. “Ningeongea na Yehova kwa unyofu kuhusu tatizo hilo,” aeleza, “lakini sikuonekana kuacha.” Mara nyingine Mungu aweza kutuacha tuonyeshe jinsi tunavyochukulia kwa uzito maombi yetu. (Linganisha Zaburi 88:13, 14.) Kwa hiyo, twapaswa kudumu katika sala! (Mathayo 7:7; Warumi 12:12) Lora alifanya hivyo hasa. Wakati huohuo, alianza kutumia madokezo ambayo yalitokea juu ya jambo hilo katika vichapo vya Watch Tower Society.c Baadaye, alianza kuona matokeo. Akumbuka: “Wakati wote niliposhinda tatizo kwa mafanikio, ningemshukuru Yehova kwani nilijua alikuwa ananitegemeza.” Ni kweli, unaweza kujikuta ukilirudia tatizo hilo japo unajitahidi kulishinda. Lakini maadamu unajitahidi na si kwamba unajiruhusu kimakusudi kushindwa na udhaifu wako, Mungu atapendezwa na ‘jitihada yako yenye bidii’ na atadumu kuwa Rafiki yako.—2 Petro 1:5.

Kufanya Kazi na Mungu

Njia nyingine ya kujipatia msaada wa Mungu ni kukubali mwaliko wake wa kuwa mmoja wa “wafanyakazi wenzi.” (1 Wakorintho 3:9) Hii inatia ndani kuwa na ushiriki katika kusaidia wengine kujifunza kuhusu Mungu. (Mathayo 28:19, 20) Uwapo na msononeko au kuvunjika moyo, wazo la kushiriki katika kazi ya aina yoyote huenda lisipendeze. Lakini, “kuwa na mengi ya kufanya katika kazi ya Bwana” kwaweza kukusaidia kwelikweli. (1 Wakorintho 15:58) Angalau, utaacha kukazia fikira matatizo yako mwenyewe. (Linganisha Mithali 18:1.) Robin, aliyenukuliwa mwanzoni, asema juu ya nyakati zake ngumu: “Kitu kilichonisaidia niendelee, ni kazi yangu kwa Yehova!”

Kufanya kazi na Mungu kwaweza kukusaidia kushinda hisia zozote zinazoendelea kukaa kwamba Mungu amekuacha. Watu wawili wafanyapo kazi pamoja wakiwa na lengo moja, je, kwa kawaida hawakaribiani kuwa marafiki? Ushirikipo katika kazi ya kuhubiri, kwa kuendelea wapambana na magumu. Wajikuta ukimgeukia Mungu kwa ajili ya msaada. Na Mungu abarikivyo kazi zako, urafiki wake unakuwa halisi zaidi. Waanza kutambua itibari ambayo Mungu ameiweka kwako ukiwa mfanyakazi mwenzi. Hili laweza kuwa msaada halisi kwako wa kujipatia uhakika.

Kwa mfano, Carol hakuwa na uhakika. Mama yake alijiua, na baba yake mwenye kutenda vibaya alimdhalilisha wakati wote. Lakini akiwa na umri wa miaka 17 alikuwa mmoja wa Mashahidi wa Yehova na alianza kazi ya kuhubiri. Sasa baada ya kuwa mweneza-evanjeli wa wakati wote kwa miaka kumi, asema: “Kazi hii imenisaidia sana kwa sababu nimeona baraka ya Yehova kwangu. Najiambia hivi, ‘Ikiwa Mungu anipenda, mimi si mtu asiyefaa.’ Kutumiwa na Yehova katika kulitangaza jina lake kumenifanya niwe na uhakika zaidi.”

“Onjeni Mwone ya Kuwa BWANA Yu Mwema”

“[Mungu] akaniponya na hofu zangu zote,” aliandika Mfalme Daudi baada ya kuponyoka hali yenye kutishia uhai. (Zaburi 34:4, 6, maneno ya utangulizi ya NW; 1 Samweli 21:10-12) Hivyo Daudi angeweza kusema hivi kutokana na mambo aliyojionea mwenyewe: “Onjeni mwone ya kuwa BWANA yu mwema; heri mtu yule anayemtumaini.”—Zaburi 34:8.

Ingawa maisha yako huenda yasiwe kamwe katika hatari kama yalivyokuwa ya Daudi, kwa hakika nyakati fulani utapatwa na shida na mikazo. ‘Shida ziongezekapo katika moyo wako,’ omba dua kwa Mungu. (Zaburi 25:17) Usihofu kwamba Mungu ataondoa urafiki wake. Uvumiliapo kwa subira na kujionea tegemezo na utunzi kutoka kwa Yehova mwenyewe, ‘utaonja na kuona’ ‘kwamba Yehova yu mwema.’ Naye atadumu kuwa Rafiki yako milele.—Yakobo 4:8.

[Maelezo ya Chini]

[Picha katika ukurasa wa 19]

Je, Mungu huwaacha rafiki zake wakati wa janga?