Kitabu Cha Biblia Namba 47—2 Wakorintho
Mwandikaji: Paulo
Mahali Kilipoandikiwa: Makedonia
Uandikaji Ulikamilishwa: c. (karibu) 55 W.K.
1, 2. (a) Ni nini kilichoongoza Paulo aandike barua yake ya pili kwa Wakorintho? (b) Paulo aliandika akiwa wapi, naye alihangaikia nini?
LABDA sasa ilikuwa mwishoni mwa kiangazi au mapema katika vuli ya 55 W.K. Ndani ya kundi la Kikristo Korintho kulikuwa kungali kuna mambo fulani yenye kusababisha hangaiko kwa mtume Paulo. Si miezi mingi iliyokuwa imepita tangu kuandikwa kwa barua yake ya kwanza kwa Wakorintho. Tangu wakati huo Tito alikuwa ametumwa aende Korintho kusaidia katika mchango wenye kuendeshwa huko kwa ajili ya watakatifu katika Yudea na labda pia ili akaone itikio la Wakorintho kwa barua ya kwanza. (2 Kor. 8:1-6; 2:13) Wao walikuwa wameichukuaje? Paulo alifarijika kama nini kujua kwamba ilikuwa imewasukuma wawe na sikitiko na toba! Tito alikuwa amerudia Paulo katika Makedonia akiwa na ripoti hiyo njema, na sasa moyo wa mtume ulijawa hata ukafurikwa na upendo kwa ajili ya waamini wenzake wapendwa wa Korintho.—7:5-7; 6:11.
2 Kwa hiyo Paulo aliwaandikia tena Wakorintho. Barua hii ya pili yenye kuchangamsha moyo na yenye nguvu nyingi iliandikwa akiwa Makedonia na yaonekana kwamba Tito ndiye aliyeipeleka. (9:2, 4; 8:16-18, 22-24) Moja la mambo yaliyohangaisha Paulo yakamsukuma kuandika ni kuwamo kwa “mitume walio wakuu” miongoni mwa Wakorintho, ambao yeye aliwaeleza pia kuwa “mitume wa uongo, watendao kazi kwa hila.” (11:5, 13, 14) Hali njema ya kiroho ya kundi hilo lililokuwa changa kwa kulinganisha ilikuwa hatarini, na mamlaka ya Paulo akiwa mtume ilikuwa ikishambuliwa. Hivyo barua yake ya pili kwa Korintho ilijazia uhitaji mkubwa.
3, 4. (a) Ni ziara gani mbalimbali za kwenda Korintho ambazo Paulo mwenyewe alifanya? (b) Wakorintho wa Pili yatupaje mafaa sasa?
3 Yaweza kuangaliwa kwamba Paulo alisema: “Hii ni mara ya tatu ya mimi kuwa tayari kuja kwenu.” (2 Kor. 12:14; 13:1) Alipoandika barua yake ya kwanza alikuwa amepanga kuwazuru mara ya pili, lakini ingawa alijitayarisha, hii “pindi ya pili ya kuwa na shangwe” haikuwezekana. (1 Kor. 16:5; 2 Kor. 1:15, NW) Basi, kwa kweli Paulo alikuwa amekuwa huko mara moja tu, kwa miezi 18 katika 50-52 W.K., wakati ambapo kundi la Kikristo lilianzishwa katika Korintho. (Mdo. 18:1-18) Hata hivyo, baadaye tamaa ya Paulo kutembelea Korintho kwa mara nyingine ilitimizwa. Alipokuwa katika Ugiriki kwa miezi mitatu, labda katika 56 W.K., yeye alitumia angalau sehemu ya wakati huo akiwa Korintho, na huko ndiko alikoandikia barua yake kwa Warumi.—Rum. 16:1, 23; 1 Kor. 1:14.
4 Sikuzote Wakorintho wa Pili imehesabiwa pamoja na Wakorintho wa Kwanza na nyaraka zile nyingine za Paulo kuwa ni sehemu asilia yenye kukubalika ya Biblia. Hapa tena twawezeshwa kutazama ndani ya kundi la Korintho na kupata mafaa kutokana na maneno ya Paulo yenye pumzi ya Mungu ambayo yalitolewa yawaonye kwa upole na sisi pia.
YALIYOMO KATIKA WAKORINTHO WA PILI
5. (a) Paulo aandika nini kuhusu faraja? (b) Ni nini ambacho kimetokea kupitia Kristo kinachotoa uhakikishio mwingi zaidi?
5 Msaada kutoka kwa “Mungu wa faraja yote” (1:1–2:11). Paulo amtia Timotheo katika salamu ya ufunguzi. “Na ahimidiwe,” asema Paulo, “Baba wa rehema, Mungu wa faraja yote; atufarijiye katika dhiki zetu zote,” ili sisi nasi tuweze kufariji wengine. Ingawa Paulo na waandamani wake wamekuwa chini ya msongo mkali kupita kiasi na uhai wao ulikuwa hatarini, Mungu alikuwa amewaponyoa. Wakorintho waweza kusaidia, pia, kwa kutoa sala kwa ajili yao. Awaandikia kwa moyo mweupe wenye uhakika Mungu ni mwenye fadhili zisizostahiliwa. Ahadi za Mungu zimekuwa “Ndiyo” kupitia Yesu, na Yeye amepaka mafuta wale walio wa Kristo na kuwapa katika mioyo yao “dalili ya kile ambacho kitakuja, yaani, roho.”—1:3, 4, 20, 22, NW.
6. Ni jambo gani ambalo Paulo ashauri lapasa kufanywa kwa mkosaji aliyetengwa na ushirika ambaye sasa ana toba?
6 Yaonekana kwamba mwanamume aliyekuwa lengo la maelezo ya Paulo katika sura ya tano ya barua yake ya kwanza aliondoshwa kundini. Yeye ametubu na aonyesha sikitiko. Kwa hiyo Paulo aambia Wakorintho wamsamehe na kumhakikishia upendo wao mtu huyo mwenye kutubu.
7. Paulo aonyesha nini juu yake mwenyewe na Wakorintho, naye atangaza nini kwa uthabiti?
7 Wastahili kuwa wahudumu wa agano jipya (2:12–6:10). Paulo aonyesha ni kama yeye na Wakristo Wakorintho walikuwa katika andamano lenye shangwe ya ushindi pamoja na Kristo. (Wakorintho walifahamiana vizuri na harufu nzuri ya uvumba uliofukizwa kwenye njia ya maandamano ya majeshi yenye ushindi katika siku hizo.) Kuna tofauti kubwa kati ya “harufu” ya Mkristo kwa wale watakaopata uhai na “harufu” ile kwa wale wanaopotelea mbali. “Sisi si wachuuzi wa neno la Mungu,” Paulo atangaza kwa uthabiti.—2:16, 17, NW.
8. (a) Ni barua gani za ustahili ambazo Paulo na wafanya kazi wenzake walikuwa nazo wakiwa wahudumu? (b) Ni jinsi gani huduma ya agano jipya ilivyo kuu zaidi?
8 Paulo na wafanya kazi wenzake hawahitaji hati zozote, barua za pendekezo la maandishi, ziende au zitoke kwa Wakorintho. Waamini wenyewe wa Korintho ni barua za pendekezo, zilizoandikwa “na sisi wahudumu” na kuandikwa, si juu ya mabamba ya mawe, bali “juu ya mabamba ya mnofu, juu ya mioyo,” ajulisha rasmi Paulo. Mungu amewastahilisha vya kutosha wahudumu wa agano jipya. Orodha ya sheria zilizoandikwa ilikuwa usimamizi wa kifo, ikiwa na utukufu wenye kufifia, na ilikuwa ya muda tu. Hata hivyo, usimamizi wa roho waongoza kwenye uhai, ni wa kudumu, na una utukufu wenye kuongezeka sana. Wakati “Musa anaposomwa,” utaji wakaa juu ya mioyo ya wana wa Israeli, lakini wakati kunapokuwako kugeukia Yehova, utaji huo waondolewa, na ‘wageuzwa wawe katika mfano ule ule wa kutoka utukufu hadi utukufu.’—3:3, 15, 18, NW.
9. Paulo aelezaje hazina ya huduma?
9 Halafu Paulo aendelea hivi: ‘Tuna huduma hii kwa sababu ya rehema tuliyoonyeshwa. Sisi tumetangaza wazi kabisa kwamba hatuyataki mambo ya kichinichini na tumekuwa hatulichanganyi na kitu neno la Mungu, lakini tumejipendekeza wenyewe kwa kudhihirisha ukweli. Ikiwa ujumbe wa habari njema umetiwa utaji, ni kwa sababu mungu wa ulimwengu huu amepofusha akili za wasioamini. Hata hivyo, mioyo yetu imemulikwa na maarifa matukufu ya Mungu kwa uso wa Yesu Kristo. Ni kubwa kama nini hazina hii tuliyo nayo! Imo katika vyombo vilivyofanyizwa kwa udongo ili kwamba nguvu inayozidi iliyo ya kawaida iwe ya Mungu. Tukiwa chini ya mnyanyaso na mkazo, ndiyo, katika kupambana na kifo chenyewe, sisi twajizoeza imani na hatukubali kushindwa, kwa maana dhiki iliyo ya muda mfupi hutufanyizia utukufu ulio na uzito mwingi kuliko dhiki yenyewe, ambao unakuwa mwingi zaidi na zaidi na ni wa milele. Kwa hiyo sisi tunaweka macho yetu juu ya mambo yasiyoonwa.’—4:1-18.
10. (a) Paulo asema nini juu ya wale walio katika muungano pamoja na Kristo? (b) Paulo anajipendekezaje mwenyewe kuwa mhudumu wa Mungu?
10 ‘Sisi tunajua,’ aandika Paulo, ‘ya kuwa nyumba yetu iliyo ya dunia itaondokea nyumba iliyo ya milele mbinguni. Kwa sasa sisi twaenenda kwa imani na tuna moyo mkuu. Ingawa hatupo na Kristo, tunatafuta kukubaliwa naye.’ (5:1, 7-9) Wale walio katika muungano pamoja na Kristo ni “kiumbe kipya” na wana huduma ya upatanisho. Wao ni “wajumbe [mabalozi, NW] kwa ajili ya Kristo.” (5:17, 20) Kwa kila njia Paulo ajipendekeza mwenyewe kuwa mhudumu wa Mungu. Jinsi gani? ‘Katika saburi nyingi katika dhiki, mapigo, taabu, kukesha, kuwa safi, katika elimu, katika uvumilivu, katika utu wema, katika roho takatifu, katika upendo usio na unafiki; katika neno la kweli, katika nguvu ya Mungu; kama maskini, bali tukitajirisha wengi; kama wasio na kitu, bali tu wenye vitu vyote.’—6:4-10.
11. Ni shauri na onyo gani ambalo Paulo atoa?
11 ‘Kutimiza utakatifu katika kumcha Mungu’ (6:11–7:16). Paulo awaambia Wakorintho hivi: ‘Moyo wetu umekunjuliwa kuwapokea nyinyi.’ Wao pia wapaswa kukunjua shauku zao nyororo. Lakini sasa onyo laja! “Msifungiwe nira pamoja na wasioamini.” (6:11, 14) Nuru ina ushirika gani pamoja na giza, au Kristo pamoja na Beliari? Kwa kuwa wao ni hekalu la Mungu aliye hai, lazima wajitenge na kuacha kugusa kitu kisicho safi. Asema Paulo: “Na tujitakase nafsi zetu na uchafu wote wa mwili na roho, huku tukitimiza utakatifu katika kumcha Mungu.”—7:1.
12. Kwa nini Paulo alishangilia ripoti iliyotoka Korintho?
12 Paulo aeleza zaidi hivi: “Nimejaa faraja, katika dhiki yetu yote nimejaa furaha ya kupita kiasi.” (7:4) Kwa nini? Si kwa sababu tu ya kuwapo kwa Tito bali pia kwa sababu ya ripoti njema kutoka Korintho, ile ya tamaa yao, maombolezo yao, na bidii kwa ajili ya Paulo. Yeye atambua kwamba barua yake ya kwanza ilisababisha huzuni ya muda mfupi, lakini ashangilia kwamba Wakorintho walihuzunishwa wawe na toba kwa ajili ya wokovu. Yeye awapongeza kwa kufanya ushirikiano pamoja na Tito.
13. (a) Paulo ataja vielelezo gani vya ukarimu? (b) Paulo azungumzia kanuni gani kuhusiana na upaji?
13 Ukarimu utathawabishwa (8:1–9:15). Kuhusiana na michango kwa “watakatifu” wenye uhitaji, Paulo ataja kielelezo cha Wamakedonia, ambao kwa kweli, ukarimu wao uliofanywa ijapokuwa umaskini wa kina kirefu ulizidi uwezo wao; na sasa yeye atumaini kuona upaji wa aina iyo hiyo kwa upande wa Wakorintho ili waonyeshe uhalisi wa upendo wao kwa Bwana Yesu Kristo, ambaye alikuwa maskini ili wao waweze kuwa matajiri. Upaji huo unaolingana na kile walicho nacho utafanyiza usawazishi, ili yule aliye na vingi asiwe na vingi mno, na yule aliye na kidogo, asiwe na kidogo mno. Watapelekewa Tito na wengine kuhusiana na zawadi hiyo ya fadhili. Paulo amekuwa akijisifu juu ya ukarimu na utayari wa Wakorintho, na hataki wao waaibike kwa kushindwa kwa njia yoyote kukamilisha zawadi hiyo ya ukarimu. Ndiyo, “apandaye kwa ukarimu atavuna kwa ukarimu [utele, NW].” Hilo na litoke moyoni, kwa maana “Mungu humpenda yeye atoaye kwa moyo wa ukunjufu.” Yeye aweza pia kufanya fadhili zisizostahiliwa zake ziwe za ukarimu kuwaelekea na kuwatajirisha kwa ajili ya kila namna ya ukarimu. “Mungu ashukuriwe kwa sababu ya kipawa chake, tusichoweza kukisifu kama ipasavyo.”—9:1, 6, 7, 15.
14. Ni mawazo gani ambayo Paulo atokeza kwa kuunga mkono utume wake?
14 Paulo atoa hoja kutetea utume wake (10:1–13:14). Paulo akiri kwamba kwa sura aonekana mtu dhaifu. Lakini Wakristo hawafanyi vita kulingana na mwili; silaha zao ni za kiroho, “zina uwezo katika Mungu” kwa kupindua mawazo yaliyo kinyume cha maarifa ya Mungu. (10:4) Watu fulani, kwa kuona mambo kijuu-juu tu, wasema kwamba barua za mtume ni nzito lakini uneni wake ni wa kudharaulika. Acheni hao wajue kwamba vitendo vya Paulo vitakuwa hali moja na neno lake la barua. Wakorintho wapaswa kutambua kwamba Paulo hajisifii kutimiza mambo katika eneo la mtu mwingine. Yeye binafsi ndiye amewapelekea wao habari njema. Zaidi ya hilo, kama yafaa kujisifia jambo lolote, na iwe ni katika Yehova.
15. (a) Paulo asema wazi juu ya mitume bandia kwa kutumia vielezi gani? (b) Ni nini yaliyompata Paulo mwenyewe?
15 Paulo aona daraka lake la kumtokezea Kristo kundi la Korintho likiwa bikira safi. Sawa na vile Hawa alivyotongozwa na ujanja wa Nyoka, ndivyo kulivyo na hatari ya kwamba akili zao huenda zikapotoshwa. Kwa hiyo, Paulo anena kwa nguvu nyingi kupinga “mitume walio wakuu” wa kundi la Korintho. (11:5,) Wao ni mitume wa bandia. Shetani mwenyewe aendelea kujigeuza awe malaika wa nuru, kwa hiyo si ajabu kwamba wahudumu wake wafanya hivyo hivyo. Lakini kwa habari ya kuwa wahudumu wa Kristo, wao waonekana kuwa namna gani wakilinganishwa na yaliyompata Paulo? Yeye amevumilia mengi: kifungo gerezani, mapigo, kuvunjikiwa merikebu mara tatu, hatari nyingi, kwenda mara nyingi bila usingizi au chakula. Hata hivyo kupitia yote hayo hakuacha kamwe kuona mahitaji ya makundi na sikuzote alikasirika sana wakati mtu fulani alipokwazwa.
16. (a) Paulo angeweza kujisifia nini, lakini kwa nini ingekuwa afadhali anene juu ya udhaifu wake mbalimbali? (b) Paulo ametokezaje uthibitisho wa utume wake?
16 Kwa hiyo ikiwa mtu yeyote ana sababu ya kujisifu, mtu huyo ni Paulo. Je! hao wengine wa huko Korintho wenye kuitwa mitume eti wangeweza kusimulia kwamba walinaswa wakapelekwa mbali ndani ya paradiso, wakasikie mambo yasiyoweza kutamkwa? Hata hivyo Paulo anena juu ya udhaifu wake mbalimbali. Ili asije kuhisi amekwezwa kupita kiasi, alipewa “mwiba katika mwili.” Paulo alisihi kwamba uondolewe lakini akaambiwa hivi: “Neema yangu yakutosha.” Paulo aona ni afadhali kujisifia udhaifu wake, ili “uweza wa Kristo” ubaki juu yake kama hema. (12:7, 9) Hapana, Paulo hakuthibitika kuwa duni kwa wale “mitume walio wakuu,” na Wakorintho wameona vithibitisho vya utume ambavyo ametokeza miongoni mwao “katika saburi yote, kwa ishara na maajabu na miujiza.” Yeye hatafuti mali zao, sawa na vile Tito na wafanya kazi wenzake wale wengine aliowatuma hawakujifaidi kutokana nao.—12:11, 12.
17. Onyo la upole la mwisho ambalo Paulo awapa Wakorintho ni lipi?
17 Mambo yote ni kwa ajili ya kuwajenga. Hata hivyo, Paulo aeleza hofu ya kwamba, atakapowasili Korintho, atakuta watu fulani ambao wamekuwa hawakutubia kazi za mwili. Yeye awaonya mapema watenda dhambi kwamba atachukua hatua inayofaa na hataachilia hata mmoja, na ashauri wote katika kundi waendelee kujichunguza kama wamo katika imani kwa muungano pamoja na Yesu Kristo. Paulo na Timotheo watapelekea Mungu sala kwa ajili yao. Yeye awaagiza washangilie na warudie muungamano, ili Mungu wa upendo na amani awe pamoja nao, na amalizia kwa kuwapelekea salamu kutoka kwa watakatifu na kwa kuwatakia mema yeye mwenyewe ili wapate baraka ya kiroho.
KWA NINI NI CHENYE MAFAA
18. Wakristo wapaswa kuwa na maoni gani mazuri kuelekea huduma?
18 Jinsi uthamini wa Paulo kwa ajili ya huduma ya Kikristo kama ulivyoelezwa katika Wakorintho wa Pili ulivyo wenye kusisimua na kutia moyo! Na tuione kama yeye. Mhudumu Mkristo ambaye amestahilishwa vya kutosha na Mungu si mchuuzi wa lile Neno bali hutumikia kwa weupe wa moyo. Kinachompendekeza, si hati fulani iliyoandikwa, bali matunda anayozaa katika huduma. Hata hivyo, ingawa huduma ni tukufu kweli kweli, hiyo si sababu ya yeye kujivimbisha kwa kiburi. Watumishi wa Mungu wakiwa wanadamu wasiokamilika wana hazina hii ya utumishi katika vyombo dhaifu vya ardhi, ili kwamba uwezo uonekane waziwazi kuwa wa Mungu. Kwa hiyo hilo lataka unyenyekevu kukubali pendeleo tukufu la kuwa wahudumu wa Mungu, na jinsi zilivyo fadhili zisizostahiliwa kutoka kwa Mungu kutumikia kuwa “wajumbe kwa ajili ya Kristo”! Basi, jinsi lilivyofaa himizo la Paulo ‘kutopokea neema ya Mungu bure’!—2:14-17; 3:1-5; 4:7; 5:18-20; 6:1.
19. Ni katika njia zipi mbalimbali Paulo alitoa kigezo chenye kutokeza kwa ajili ya wahudumu Wakristo leo, hasa kwa ajili ya waangalizi?
19 Bila shaka Paulo alitoa kielelezo chema kwa ajili ya wahudumu Wakristo waige. Jambo moja ni kwamba, yeye alithamini na kujifunza Maandiko ya Kiebrania yaliyopuliziwa na Mungu, akiyanukuu tena na tena, akielekeza kwayo, na kuyatumia. (2 Kor. 6:2, 16-18; 7:1; 8:15; 9:9; 13:1; Isa. 49:8; Law. 26:12; Isa. 52:11; Eze. 20:41; 2 Sam. 7:14; Hos. 1:10) Zaidi ya hayo, akiwa mwangalizi, yeye alieleza hangaiko lenye kina kwa ajili ya kundi, akisema: “Nami kwa furaha nyingi nitatapanya, tena nitatapanywa kwa ajili ya roho [nafsi, NW] zenu.” Yeye alijitoa kabisa kwa ajili ya akina ndugu, kama ambavyo maandishi yaonyesha. (2 Kor. 12:15; 6:3-10) Yeye hakuchoka katika taabu zake alipokuwa akifundisha, kuhimiza, na kunyoosha mambo katika kundi la Korintho. Yeye alionya waziwazi juu ya ushirikiano na giza, akiwaambia Wakorintho hivi: “Msifungwe nira pamoja na wasioamini.” Kwa sababu ya hangaikio lake lenye upendo kwa ajili yao, yeye hakutaka kuona akili zao zikipotoshwa, “kama yule nyoka alivyomdanganya Hawa kwa hila yake,” na kwa hiyo kwa moyo aliwaonya kwa upole hivi: “Jijaribuni wenyewe kwamba mmekuwa katika imani; jithibitisheni wenyewe.” Yeye aliwachochea kwenye ukarimu wa Kikristo, akiwaonyesha kwamba “Mungu humpenda yeye atoaye kwa moyo wa ukunjufu,” naye mwenyewe alionyesha shukrani zenye uthamini mkubwa zaidi kwa Mungu kwa ajili ya zawadi Yake ya bure isiyoelezeka. Kweli kweli ndugu zake kule Korintho walitiwa nakshi ya upendo kwenye bamba la kimnofu la moyo wa Paulo, na utumishi wake usio na unyimivu kwa ajili ya masilahi (faida) yao ulikuwa ndilo jambo kuu linalopasa kutia alama mwangalizi mwenye bidii, aliye macho kabisa. Jinsi alivyo kigezo chenye kutokeza kwetu sisi leo!—6:14; 11:3; 13:5; 9:7, 15; 3:2.
20. (a) Paulo aziwekaje akili zetu upande unaofaa? (b) Wakorintho wa Pili yaelekeza kwenye tumaini gani tukufu?
20 Mtume Paulo aziweka akili zetu upande unaofaa kwa kuelekeza kwa “Baba wa rehema, Mungu wa faraja yote” kuwa chanzo halisi cha nguvu wakati wa jaribu. Yeye ndiye “atufarijiye katika dhiki zetu zote” kusudi tuvumilie kwa ajili ya wokovu katika ulimwengu mpya wake. Paulo aelekeza pia kwenye tumaini tukufu la “jengo litokalo kwa Mungu, nyumba isiyofanywa kwa mikono, iliyo ya milele mbinguni,” na kusema: “Hata imekuwa, mtu akiwa ndani ya Kristo amekuwa kiumbe kipya; ya kale yamepita; tazama! yamekuwa mapya.” Kweli kweli Wakorintho wa Pili ina maneno ya ajabu ya uhakikisho kwa wale ambao, kama Paulo, watarithi Ufalme wa kimbingu.—1:3, 4; 5:1, 17.